Faaopoopoga

Manatu mo Mea Eseese

Manatu mo Mea Eseese

O lenei punaoa e aofia ai ni auala eseese e fesoasoani ai i tagata aoga ia auai ma le mataalia i lesona. E oo lava i auala faatauanau e aoao atu ai pe afai e soona faaaogaina e ono le aoga pe le manaia. E ui e le tatau ona e filifilia ni metotia mo na o le eseese, ae mafaufau pe faapefea ona eseese auala e te aoao atu ai i lesona taitasi. O le faaaogaina o metotia eseese o le aoao atu e mafai ona fesoasoani e oo atu ai i le toatele o tagata aoga. O ni nai fesili nei e tatau ona mafaufau i ai pe a filifilia ni gaoioiga e aofia ai i se taimi o le aoaoina:

• Pe o faafaigofieina e le gaoioiga se aafiaga e totonugalemu ia Keriso, e faavae i tusitusiga paia, ma taulai atu i tagata aoao? Tagai i le Faaaogaina ma le Fetuunaiina o Aoaoga o Mataupu Aoaoina a le Seminare mo nisi faamatalaga e uiga i lenei mea.

• Pe o valaaulia e le gaoioiga le Agaga Paia e aoao atu ma molimau atu? Mafaufau pe faapefea e le gaoioiga ona aafia ai le siosiomaga faaaloalo lea e manaomia mo le Agaga Paia e faatino ai Lana matafaioi.

• E faapefea ona faatusa le metotia i le afioga paia a le Atua? E manaomia ona tuuina atu tusitusiga paia ma upu a perofeta i se auala mamalu ma le paia.

• Pe o le a faia uma tagata aoga ma le migao? Ia saili pea e atiina ae lagona o le lotogatasi ma le alofa. Aloese mai gaoioiga e ono oo ai i se tagata aoga lagona o le le mautonu, lotovaivai, pe faaesea.

• Pe aoga le gaoioiga i le faaalu ai o le taimi o le vasega? O le taimi e te faapotopoto ai ma tagata aoga i le seminare o se taimi taua tele. E mafai ona aoga gaoioiga e aunoa ma le faaaluina o se taimi tele.

• O le a le tele o le taimi ma pe fia punaoa o le a manaomia e saunia ai le gaoioiga? E taua le pulea lelei o lou taimi taua ma punaoa.

O nei manatu e masani ona faaaoga i le tele o nofoaga i le taimi atoa o se lesona. I le tele o tulaga, o le tuuina atu o se faataitaiga mo tagata aoga o mea ua talosagaina i latou e fai o le a fesoasoani ia i latou ia sili atu ona faamanuiaina ai. Ia mautinoa ua e malamalama lelei i le gaoioiga ma e mafai ona tuuina atu faatonuga manino ma se faataitaiga, pe afai e aoga, a o lei amataina e tagata aoga le gaoioiga. O nei gaoioiga ua faatulagaina i vaega nei:

1. Suesue mau ina ia malamalama ai i le tala ma faailoa mai mataupu faavae po o aoaoga faavae o le talalelei

2. Faaloloto le malamalama i upusii ma mau

3. Faasoa atu mea o loo latou aoaoina

4. Fai se faatusa o mea na latou aoaoina

Ina ia tuuina atu ni manatu faaalia pe fautuaina atu ni manatu faaopoopo, faamolemole imeli le [e-mail]. Ia aofia ai i le mataupu “Manatu mo Mea Eseese.”

1. Suesue mau ina ia malamalama ai i le tala ma faailoa mai mataupu faavae po o aoaoga faavae o le talalelei

O lesona e masani ona aofia ai gaoioiga e suesue ai e tagata aoga se faasologa o fuaiupu ina ia malamalama ai i le talaaga autu ma le tala o se poloka ina ia mafai ai ona iloa mataupu faavae po o aoaoga faavae. O gaoioiga nei o ni nai auala e mafai ona fesoasoani i tagata aoga e faia ai lenei mea.

Faaliliuga o ata

Faaaoga ata o le talalelei e talanoaina ai se tala. Faaali atu se ata mai le Potutusi o Ala o Faasalalauga a le Ekalesia ma valaaulia tagata aoga e suesue fuaiupu o loo faaalia i le ata. Fesili atu i tagata aoga :

• O a ni mea e mafai ona e suia?

• O le a le faaliliuga o le ata (e le o maua i le tusiga)?

• O fea fuaiupu o mau o loo faatusa i ai?

Eseesega: Nai lo le faaali atu o se ata atoa i le amataga o le vasega e amata ai se talanoaga, vaevae le ata i ni vaega. Faaali atu se vaega i le taimi ma fai atu i tagata aoga e mate mai le mea o loo tupu i le ata atoa. Fai atu ia i latou e faamatala mai mea ua latou vaaia ma taumatemate i mea latou te le o vaaia.

Eseesega: Filifili ni nai ata o le Faaola ma tuu i luga o le laupapa. Valaaulia tagata aoga e vaai lemu i le lanu, taulaiga, ma le faataatiaga o ata ma faailoa mai mea taitasi o loo aoao mai e uiga po o ai Iesu Keriso. A uma ona faailoa mai se mataupu faavae, e mafai ona e fai atu ni fesili e pei o le:

• O le fea ata o Keriso e te lagona e faatusa i le mataupu faavae na e mauaina ma aisea?

• O fea o nei ata o Iesu e fesoasoani ia te oe e te lagona ai le taua o lenei upumoni?

• O le a se mea e te manao e iloa e se uo e uiga ia Iesu Keriso pe a mafaufau i lenei upumoni?

Faaopoopo se talanoaga i se ata

Kopi ia ata mai Tala o Tusitusiga Paia mo Tamaiti ma faapipii i totonu o se pepa e tufa atu mo tagata aoga. Faaopoopo ni puta o upu lea e mafai ai e tagata aoga ona tusi mea o loo fai mai ai pe mafaufau i ai tagata.

Talafou po o lipoti o le tusi

Tuu atu i tagata aoga taitasi se vaega o mau o le a latou suesueina. Ona tuu atu lea ia i latou o mea e manaomia o le tala fou po o le lipoti o le tusi (i luga o se pepa po o le laupapa). E mafai ona aofia ai ni tagata autu, le tala, se lesona se tasi pe lua na aoaoina (e ta’u mai ai fuaiupu na aumai ai), ma le faaaogaaga mo se talavou. Tuu atu i tagata aoga se taimi e faasoa atu ai i se isi tagata aoga mea na latou saunia.

Eseesega: I se vaega toalaiti, e mafai e tagata aoga taitasi ona faia se vaega se tasi o le tala po o le lipoti o le tusi: tagata autu, tala, lesona, po o le faaaogaaga.

Faailoaina o fesili

A uma ona faitau e tagata aoga se poloka o mau, valaaulia i latou e lisi ni fesili e mafai ona fesoasoani fuaiupu e tali ai. Lui tagata aoga e tusi ni fesili anoa ma talafeagai mo se talavou, nai lo ni fesili faigofie e suesue ai. Mo se faataitaiga, nai lo le fesili “O le a le uiga o le faatuatua e pei ona fai mai ai Alema? O le a lana tala i mea e le o le faatuatua?” e mafai e tagata aoga ona fesili “O le a se mea e tatau ona ou faia e iloa ai mo au lava ia o se mea na aoao mai e le Faaola e moni?” Afai e tele atu poloka o mau nai lo le tasi mo tagata aoga e suesue ai, e mafai ona latou lisiina a latou fesili ma faasoa atu i se tagata aoga na suesueina se isi poloka. E mafai e tagata aoga ona vaavaai ma mafaufau e uiga i tali i fesili a o latou uo.

Faatalanoa le tusitala

Fai atu i tagata aoga e vaai faalemafaufau o i latou o le tusitala o se tala o tusitusiga paia ma o loo faatalanoaina i latou e se tasi e uiga i mea na latou tusia. E mafai e tagata aoga ona faitau le tala o le tusitusiga paia ma feauauai i le faatumuina o matafaioi a le tagata e faia le faatalanoaga ma le tusitala. O nisi o fesili e mafai ona fesiligia e le tagata e faia le faatalanoaga o:

• O a nisi o vaega o nei fuaiupu e te le manao e misi e le au faitau?

• O le a sau tala e uiga i lou manatu autu, po o se tasi o ou manatu autu?

• E faapefea ona e mana’o i le au faitau e faaaogaina i o latou olaga?

Valaaulia tagata aoga e faasoa mai mea na latou aoaoina mai le aafiaga. Faaaoga a latou faamatalaga e tau mai ai le upumoni malosi.

Faafetaui

Tuu atu ni mau faasino i se koluma se tasi ma faafetaui upumoni i se faasologa fefiloi i se isi koluma. E mafai e tagata aoga ona suesue ma faafetaui.

Upumoni aupito sili ona taua

A suesueina e tagata aoga se mataupu o tusitusiga paia e aofia ai ni upumoni se tele latou te ono faailoa mai, e mafai ona e fai atu ia i latou e amata i le suesue na o i latou. E mafai e i latou taitoatasi ona filifili po o a mea latou te talitonu i ai o upumoni po o manatu e fa e sili ona taua i le poloka ma tusi i lalo. Ona mafai lea ona faatulaga tagata aoga i ni vaega e toalua ma faatusatusa upumoni na latou faailoaina. E fuafua e paga taitasi o tagata aoga mea latou te lagona o upumoni e lua e sili ona taua ma faamaumauina i lalo. Manatua: E mafai ona ese manatu mai uluai manatu e fa. Ona tuufaatasia lea e paga taitasi se isi paga e fai ai se vaega e toafa; faatasi, e faasoa ma faatusatusa e tagata aoga e toafa o latou manatu ma galulue o se au e tasi e iloa ai le upumoni e tasi e sili ona taua i le tusiga.

Faasologa o taimi o ata

Faaali atu ni ata e faatusa i se tala o tusitusiga paia o le a suesueina e tagata aoga. Faaali atu fuaiupu o le a faitauina e tagata aoga. Valaaulia tagata aoga e tuu le ata i le faatulagaga sao.

Kalafi faatusa ai se tala faasolo

Fesoasoani i tagata aoga e faailoa mai aoaoga faavae po o mataupu faavae o loo aoaoina i tala faatusipaia i se kalafi faatusa ai se tala faasolo. Fuafua elemene eseese o le taupulepulega e aofia ai mea nei:

1. O le tulaga amata (e aofia ai po o ai, o le a, o fea, o afea).

2. Faateleina o feteenaiga po o faatinoga. Faailoa mai suiga e aafia ai olaga o tagata o loo i le tala.

3. Taimi maualuga. O le aano autu lea o le tala. E masani lava ona i ai se suiga tele, e pei o se tagata o loo manumalo ai i se faafitauli pe ua maua se tali o le faafitauli.

4. Faatinoga o le pau. O taunuuga o le taimi sili ona maualuga pe a faaitiitia faatinoga.

5. Foiaina. O loo faamatala mai ai le malamalama fou ua maua e tagata ona o o latou aafiaga.

Tusi mau faasino mo elemene taitasi o le kalafi faatusa i luga o le laupapa. Valaaulia tagata aoga e faitau fuaiupu mo elemene taitasi o le kalafi faatusa ma a le o le tusia o se ata o mea o loo latou faitauina pe tusi se lisi o mea autu na tutupu. A maea le laasaga mulimuli a tagata aoga, valaaulia i latou e vaai i le tala atoa ma tusi i lalo se faamatalaga o le upumoni ua latou aoaoina.

Paso

Fai se paso faigofie mai se ata e faatusa i le poloka mau. Tusi mau faasino i tua o fasi pepa taitasi. E mafai ona faatulaga tagata aoga i ni vaega ma tuuina atu i tagata taitoatasi se fasi paso. E suesue e tagata aoga ia mau faasino ma sauni e aotele a latou fuaiupu. A o faasoa atu e vaega a latou aotelega i le vasega, e mafai ona latou faapipiiina ia fasi pepa i le laupapa e fai ai le ata atoa.

Faletifaga a le aufaitau

Mo se tala e tele ni talanoaga, faatulaga fuaiupu o tusitusiga paia i se tusiga ina ia mafai ai e tagata taitoatasi ona vave maua la latou vaega. Faaaoga se tagata faamatala e faitau ai fuaiupu e le o ni talanoaga. E mafai ona e kopiina fuaiupu o mau ma faailoga vaega taitasi e faaaoga ai se lanu eseese e faailoga ai. Manatua: Ia manatua o tagata o le AigaAtua e tatau ona faatusaina i taimi uma i le tulaga aupito maualuga o le migao. Afai o loo faatusaina se tasi o le AigaAtua, e aofia ai ma Iesu Keriso, i se tala o tusitusiga paia lea e te manao e fai ai lenei gaoioiga, tuu atu i le tagata faamatala e faitau Ana upu.

Faitauina o tusitusiga paia

E tele nisi auala e faitau ai tusitusiga paia i le vasega. E mafai e i latou taitoatasi ona auauna atu i faamoemoega eseese. Mafaufau i manaoga o lau vasega pe a filifili ni auala e faitau ai.

• Faitau le leoa: E mafai e tagata aoga ona faitau filemu ia i latou lava. O lenei mea e mafai ai ona maua se taimi e mafaufau ai i tusitusiga paia ma faitau i lo latou lava saoasaoa.

• Faitau faipaga pe faivaega: O lenei mea e mafai ai e le toatele o tagata aoga ona auai ma faaitiitia ai le popole i le faitauina leotele.

• Faiaoga po o le leo ua pueina: E mafai e le faiaoga ona faitau le tusitusiga pe taina le leo ma valaaulia tagata aoga e mulimuli i ai.

• Faitau leotele: E mafai ona valaaulia le vasega atoa e faitau faatasi fuaiupu. E mafai e ni volenitia se toatele o tagata aoga ona faitau leotele i le vasega pe mafai foi ona valaaulia muamua ma tuu atu i ai se taimi e saunia ai e faitauga. Faamautinoa atu i tagata aoga e mafai ona latou “pasi” pe afai latou te le lagonaina le fiafia e faitau.

Sailiili loloto mau

Saunia ni fesili e uiga i se faasologa o fuaiupu i mau i ni pepa eseese. Valaau tagata aoga i luma o le vasega ma tuu atu ia i latou se fesili se tasi. Valaaulia i latou e toe foi i o latou kesi e saili le tali. O le taimi lava latou te maua ai le tali, o le a latou toe o mai i luma o le potu ma maua ai le isi fesili e tali. E mafai foi ona faia lenei mea i ni vaega toalaiti.

Faataitaiga

Faatulaga le potuaoga i se auala e faatusa i se faataitaiga o le tala e faitau i mau i lena aso. Mo se faataitaiga, afai e faitauina le Mataupu Faavae ma Feagaiga 121, e mafai ona faatulaga nofoa e fatu ai se vaega e pei o le tele o se sela o le falepuipui o Liperate. O lenei metotia e fesoasoani i tagata aoga e maua ai se manatu vaaia o mea o le a latou aoaoina. Mo le Mataupu Faavae ma Feagaiga 136, e mafai ona faatulaga tagata aoga i ni vaega o paionia ma filifili se kapeteni e avea ma failauga.

Faailoga o le taofi

Saunia le upumoni malosi i tagata aoga. Faitau lemu ni nai fuaiupu ia i latou, ma fai atu ia i latou e sii o latou lima pe fai atu “Taofi” pe a latou iloaina se mea i se fuaiupu e fesoasoani e aoao atu ai lena upumoni. Ona valaaulia lea o tagata aoga e faasoa mai mea ua latou matauina.

Aotelega a le tagata aoga

A o lei amataina le vasega, tuu atu i se tagata aoga se toatasi pe sili atu se talaaga po o se anotusi e uiga i mau e te manao latou te aoteleina mo le vasega. E mafai ona lolomiina ma tufatufa atu i le aso na muamua atu, pe tuuina atu i tagata aoga a o latou ulufale atu i le vasega. Valaaulia i latou e saunia e faasoa atu le aotelega pe a valaauina i le taimi talafeagai o le vasega.

Faaliliu se fuaiupu

A uma ona faitau e tagata aoga se poloka mau, e mafai ona e fai atu ia i latou e filifili se fuaiupu e faaliliu pe tusi laina taitasi i a latou lava upu. Fesoasoani ia i latou e faataitai le sailia o faauigaga po o le faaaogaina o isi mau ma meafaigaluega mo le suesueina o mau e malamalama ai i upu ma fasifuaitau faigata.

Moni pe sese

Tusi ni faamatalaga moni pe sese eseese e uiga i faamatalaga taua i se poloka o mau. Valaaulia tagata aoga e faailoa mai pe na latou ioe muamua pe le ioe foi i faamatalaga. Valaaulia i latou e sue se faamaoniga mo pe tetee i faamatalaga a o latou suesueina le poloka mau. Ona toe tusi sa’o lea e tagata aoga ia faamatalaga e le sa’o a o latou faitauina le fuaitau o mau.

Faaaoga se ata

Valaaulia tagata aoga e filifili se ata e taua ia i latou. E mafai ona faia lenei mea i a latou telefoni, pe mafai foi ona latou aumaia se telefoni mai le aiga. Valaaulia i latou e saunia e faasoa mea nei:

• O le talaaga, o loo faamatala ai le mea na tupu e tau atu i le ata.

• O le manatu autu po o le faamoemoega o le ata.

• O ni faamatalaga se lua e taua ia i latou.

A uma ona faasoa mai e tagata aoga, ona mafai lea ona latou faitauina le poloka o mau mo le lesona ma saunia ia lava mea e tolu e faatatau i le poloka mau.

Vaai faalemafaufau

Valaaulia tagata aoga e vaai faalemafaufau i se tala po o se vaega o le tusitusiga na suesueina. E mafai ona moeiini mata o tagata aoga ma taulai atu i le vaai faalemafaufau i ata na faamatalaina e le faiaoga. Mo se faataitaiga, e mafai ona e valaaulia tagata aoga e vaai faalemafaufau o i latou o leoleo mamoe na mulimuli i le valaaulia a le agelu e sue le tamaitiiti Keriso o loo taoto i totonu o se fale o manu. Ona mafai lea ona e fai atu se tala e pei o le “E te laa atu i totonu o le fale o manu lea o loo uuina ai e Maria le tamaitiiti o Keriso. O ai o e iloa atu i o? O a manu e te mafaufau i ai? I lou mafaufau, e faapefea ona tali atu Maria i lou taunuu mai?” Faaauau pea ona fai atu fesili e fesoasoani i tagata aoga e vaai faalemafaufau ai i le tulaga.

Ao o Upu

Valaaulia tagata aoga e faailoa mai upu ma fasifuaitau latou te lagona e taua i se fuaitau o mau. Fatu se upu ao e i ai upu ma fasifuaitau e sili ona taatele pe taua latou te faailoa mai. O le tele o upu e mafai ona faailoa mai ai lo latou taua.

2. Faaloloto le malamalama i upusii ma mau

O lesona e masani ona aofia ai ni fuaitau o mau mai tusitusiga faavae e fesoasoani ai i tagata aoga e faaloloto lo latou malamalama i le mataupu faavae po o le aoaoga faavae o loo latou suesueina. O le a i ai foi lesona e aofia ai upusii e tele mai taitai o le Ekalesia. O gaoioiga nei o ni nai auala e mafai ona e fesoasoani ai i tagata aoga e suesue i mau po o upusii eseese ma tuu atu ia i latou se avanoa e iloa ai le upumoni mo i latou lava.

Fai ni nofoaga e suesue ai

Faatulaga ni nofoaga e suesue ai i le potuaoga atoa. O nofoaga taitasi e mafai ona aofia ai faatonuga o loo faapipii i luga o puipui po o luga o kesi. O nei faatonuga e mafai ona aofia ai mau po o upusii e faitau, ma fesili po o isi gaoioiga e faamaea. E mafai ona faataamilo tagata aoga i ni vaega toalaiti, ma talanoaina mea ua latou aoaoina i nofoaga taitasi. E mafai foi ona latou faia taitoatasi ma gaoioi i lo latou lava saoasaoa. E mafai ona i ai sau pepa tele i nofoaga taitasi mo vaega taitasi po o tagata aoga e tusifaamaumau ai a latou tali. E mafai ona latou faitau ma mafaufau loloto i mea na tusia e isi.

Fai ni a oe lava vaefaamatalaga

Valaaulia tagata aoga e faaopoopo vaefaamatalaga i mau o loo latou suesueina. E mafai ona faaopoopo nei mea e ala i le fatuina o sootaga i le va o fuaitau o loo suesueina ma isi mau ma faamatalaga mai taitai o le lotu. E mafai e tagata aoga ona tusi ia mau faasino i autafa o a latou laina pe faaaoga le vaega o le sootaga i le Potutusi o le Talalelei. E mafai ona latou faasoa atu le tele o mau faaopoopo e mafai ai e maua ai nisi malamalamaaga i le autu. Eseesega: E mafai e tagata aoga ona faaaoga Faailoga i la latou Potutusi o le Talalelei e faafesootai ai mau eseese ma upusii mai se lesona.

Faamatalatala

E faailoa mai e tagata aoga se upu po o se manatu faavae e faigata ona malamalama i ai. Tuu atu ia i latou e vaavaai mo punaoa e aofia ai mau ma meafaigaluega mo le suesueina o tusitusiga paia (Taiala Autu, Taiala i Tusitusiga Paia, Autu ma Fesili) e fesoasoani ia i latou e aoao atili ai e uiga i le faaupuga. Tuu atu ia i latou e faamatala le faaupuga po o le fasifuaitau i a latou lava upu.

Tusitusi faamatalaga

A o suesue tagata aoga, tuu atu ia i latou se pepa e i ai ni puta o mafaufauga po o ni vaega e mafai ona latou tusia ai mea ua latou mauaina.

Tagata Tomai Faapitoa

Faatulaga tagata aoga i ni vaega toalaiti ma tofi atu i vaega taitasi ni fuaiupu faapitoa e suesue faatasi ai. Tuu atu i vaega se taimi ma punaoa e suesue ai autu ina ia avea tagata taitoatasi o le vaega ma se tagata tomai faapitoa i le autu a le latou vaega. A lava loa se taimi, faatulaga tagata aoga i ni vaega fou ina ia aofia ai i vaega taitasi se “tagata tomai faapitoa” i se autu eseese. O le a faasoa atu loa e tagata aoga mea na latou aoaoina e uiga i a latou autu.

Sootaga Mo Le Malosi o le Autalavou

Filifili se vaega i le tamaitusi Mo Le Malosi o le Autalavou: O Se Taiala mo le Faia o Filifiliga ma valaaulia tagata aoga e sue ni faamatalaga e faamalosia ai le upumoni ua latou maua mai se poloka mau.

Lea fuaitau i luga o lea fuaitau

Tuu atu i tagata aoga e toe tusi se mau i a latou api faamaumau mo suesuega e tasi le laina po o le fuaiupu i le taimi. E tatau ona latou tuua se avanoa i le va o laina po o fuaiupu taitasi. E mafai e tagata aoga ona suesue ma le faaeteete ma mafaufau i upu taitasi i lena laina po o le fuaiupu. E mafai foi ona latou maua ni mau faasino po o isi faamatalaga o le Potutusi o le Talalelei e uiga i lena laina. Ona faia lea o lea lava mea e tasi i le isi laina o le fuaitau. O se faataitaiga o lenei mea e mafai ona maua i le “Aua le Fefe,”Mo Le Malosi o le Autalavou, Fep. 2021, 32.

Ata faatulaga ai faamatalaga

Valaaulia tagata aoga e fatu se ata faatulaga ai faamatalaga i a latou api faamaumau mo suesuega e pei o lea o loo i luga. E mafai ona latou tusia le mataupu faavae po o le aoaoga faavae na latou faailoaina i le pusa ogatotonu. Ona tuu atu lea ia i latou e vaavaai mo nisi mau po o upusii e faaopoopo atu i lo latou malamalama. E mafai ona latou faaopoopoina o latou malamalamaaga e uiga i lena autu i pusa o i fafo. Valaaulia tagata aoga e faalautele o latou ata faatulaga ai faamatalaga e ala i le faaopoopoina pea o pusa ma faafesootai i mea o loo latou aoaoina.

Manatu felavasa’i

Valaaulia tagata aoga e filifili ni autu se lua pe sili atu mai le lesona e tutusa i nisi o auala ae eseese i isi. Fai se ata e talitutusa ma le ata o i luga lea e mafai ai e tagata aoga ona faatulaga mea e tutusa ai nei mea ma mea e eseese ai autu e lua. E mafai ona faia lenei mea i ni tagata se toalua i se tala (mo se faataitaiga, o Lamana ma Nifae) po o ni autu se lua (mo se faataitaiga, paseka ma le faamanatuga).

Faasoa atu ia malamalamaaga

Tuu atu i tagata aoga se itulau kopi o se poloka mau ma tuu atu ia i latou e tusi o latou igoa i luga. Tuu atu ia i latou le tasi i le lua minute e faitau ai le poloka ma tusi se malamalamaaga na latou aoaoina mai a latou suesuega.

O faataitaiga e mafai ona aofia ai: E mafai e tagata aoga ona faailoga vaefaamatalaga, faasoa atu upusii faaperofeta, vase lalo o fuaitau taua, li’o upu faapitoa, tusi mataupu faavae ma faasoa atu a latou molimau ma isi malamalamaaga i autafa.

A uma le taimi, tuu atu ia i latou e pasi atu a latou pepa i se tagata aoga fou e tusi ni malamalamaaga eseese. A uma ni nai pasipasiga, tuu atu ia i latou e toe tuu atu a latou pepa i le tagata aoga muamua. Eseesega: Nai lo se poloka mau, o pepa taitasi ua i ai se fesili ese e faaaoga e faatatau i le poloka. E toatele tagata aoga e mafai ona taliina fesili e faaaoga ai mau ma faasoa atu a latou molimau i le autu.

Filifili soo se upusii

Tuu ni nai upusii o loo aoao mai ai se upumoni mai le lesona i totonu o se pulou po o se ato. Valaaulia ni volenitia e tusi se upusii mai se pulou ma faasoa mai pe faapefea ona fesootai i le upumoni o loo latou aoaoina ma le uiga ia i latou. Ia mautinoa e tuu atu ia i latou se taimi e faitau ai ma saunia e faasoa atu. Eseesega: O le taimi lava e faasoa mai ai tagata aoga, latou te fesuiai upusii ma sue ni paaga fou e faasoa atu i ai a latou upusii fou.

Puipui o mau

Filifili ni mau faasino se 16 ma tusi mau faasino taitasi i laina e 16 i koluma i fafo o le puipui. Valaaulia tagata aoga i ni paga po o ni vaega toalaiti e faitau tusitusiga paia o loo paga faatasi i puipui taitasi ma fuafua po o le fea o mau faasino o le a sili ona anoa i se talavou i le asō. O le fuaitau latou te filifilia e alu i le isi puipui. E faaauau pea ona talanoaina e tagata aoga ia mau taitasi seia oo ina latou faailoa mai le mau e tasi latou te lagona e sili ona anoa ma talanoaina pe aisea. Ona mafai lea ona faasoa e tagata aoga nei mau i le vasega.

Gaoioiga suesue e filifili ai tagata aoga

Fai se lisi o gaoioiga suesue e ono. A uma ona faailoa mai e tagata aoga se upumoni mai se poloka mau, faaaoga se auala e lei fuafuaina mo tagata aoga e filifili ai po o le fea gaoioiga e faamaea (taisi, se’i se kata, piki se pepa, faatele fuainumera e lei fuafuaina).

O faataitaiga e mafai ona aofia ai:

1. Faasoa atu se tala mai le soifuaga o Iesu lea na Ia aoao atu ai pe faaalia ai le upumoni.

2. Saili se fuaitau o le atamai i aoaoga faavae po o se isi fuaitau o mau e uiga i le upumoni.

3. Saili se faataitaiga o se tala o tusitusiga paia o se tasi na ola i le upumoni.

4. Saili se faamatalaga mai se taitai o le Ekalesia o loo aoao mai ai le upumoni.

5. Faasoa atu se aafiaga patino o se tasi ua faamanuiaina i le upumoni.

6. Filifili lau lava faataitaiga o se mea e mafai ona tatou faia e ola ai i le upumoni. Saili se fuaitau o mau o loo aoao mai ai le faataitaiga o loo e faasoa mai.

Gata suesue

I luga o kesi taitasi po o nofoa, tuu ai se kata o loo i ai faatonuga e pei o le “faitau se fuaitau o mau po o se upusii,” po o le “tali se fesili mai le lesona.” E mafai ona faataamilo nofoa o tagata aoga ma mulimuli i faatonuga o loo i lena kata.

Autu i le upegatafailagi

Valaaulia tagata aoga e fatu se ata faapenei e amata i le upumoni malosi po o le autu i le ogatotonu. Ona tusi lea e tagata aoga o laina i lio i fafo ma faaigoa i mau talafeagai, upumoni, po o elemene o le ulutala autu. Mo se faataitaiga, e mafai e tagata aoga ona faamaumau le valaaulia a le Tupu o Peniamina “Talitonu i le Atua” i le lio ogatotonu faatasi ai ma le mau faasino “Mosaea 4:9–10.” Ona mafai lea ona latou lisi i li’o i fafo mea ua valaaulia i tatou e le Tupu o Peniamina ia talitonu i ai e uiga i le Atua.

Taofi le vitio

Faaaoga se vitio e faaalia ai pe aoao mai ai e uiga i se mataupu faavae o le talalelei. Taofi i taimi eseese e fatu ai ni taupulepulega pe fesoasoani foi i tagata aoga e iloilo mea o loo latou matamata ai. E mafai ona e fai atu i tagata aoga fesili e pei o le:

• “Mata o le a se mea ete mafaufau i ai pe lagonaina pe o a ni au fesili atonu o i ai pe afai o e i ai i lena tulaga?”

• “O a tusitusiga paia na e suesueina i le asō e mafai ona fesoasoani?”

• “O le a se mea e te faamoemoe e mafai ona malamalama i ai lenei tagata e uiga i le upumoni ua tatou suesueina i le asō?”

• “O fea e te vaai i ai ia te oe lava i lenei tala i le asō?”

3. Faasoa atu mea o loo latou aoaoina

I lesona uma, e valaaulia tagata aoga e faasoa mai o latou manatu ma malamalamaaga. A o faamatala mai e tagata aoga, faasoa, ma molimau i se paaga, o se vaega toalaiti, po o le vasega, e tele ina taitai e le Agaga Paia i latou i se molimau e loloto atu ma molimau i mea tonu o loo latou ta’ua. E ala i le mana o le Agaga Paia, e mafai foi e upu a tagata aoga ona i ai se aafiaga maoa’e i loto ma mafaufau o i latou o loo faalogologo i ai. E ui lava ina taua lenei mea, e mafai ona faigata i tagata aoga ona faia le faasoaina atu mo ni mafuaaga se tele. Manatua ia saogalemu mo tagata aoga le “faapasi” pe afai latou te le lagonaina le fiafia e faasoa atu. E mafai ona fesoasoani manatu nei i tagata aoga ia faasoa ai mea o loo latou aoaoina.

Iloilo se fuaitau

Tusi se fuaiupu o mau i le ogatotonu o se pepa tele (a leai, e mafai ona e faaali atu i luga o le laupapa). Ia mautinoa ua lava le telē mo tagata aoga uma e vaai i ai. E mafai ona faaalu e tagata aoga ni nai minute e fai atu ai le tele o fesili e uiga i le fuaiupu o mau latou te mafaia. Ona tuu atu lea ia i latou o ni nai minute e suesue ai i le Potutusi o le Talalelei e tali ai fesili. A leai, e mafai ona lolomiina le mau i luga o se pepa ma e mafai e tagata aoga ona faia lea lava gaoioiga e tasi e le tagata lava ia.

Laupapa o manatu

E mafai e tagata aoga ona faaaoga ni pepa pipii o faamatalaga po o ni fasi pepa laiti e tusi ai o latou manatu e uiga i auala e faaaoga ai se upumoni o le talalelei ma tuu i luga o le laupapa. Mo se faataitaiga, e mafai ona talosagaina tagata aoga e tusi o latou manatu e uiga i auala e faaaoga ai se mataupu faavae o le talalelei. O le laupapa o manatu e mafai ona i ai se ata tele o se mea e faatatau i le autu. Mo se faataitaiga, afai e suesue i le laau o le ola, e mafai e tagata aoga ona lisi auala e ai ai le fua ma faaali atu i luga o lalā o se laau i luga o le laupapa. Avatu i tagata aoga se taimi etoe faamanatu ai mea sa tusia e isi.

Iloa lau aofia

Tuu atu i tagata aoga e filifili se aofia e taulai atu i ai ma faasoa mai mea o loo latou aoaoina i se auala e malamalama ai le aofia. E mafai e tagata aoga ona faia lenei gaoioiga faatasi ma se paaga po o se vaega. E mafai ona aoga le tuuina atu i tagata aoga o ni filifiliga se tele ma tuu atu ia i latou e filifili po o le fea o aofia latou te mananao e aoao atu. O nisi nei o mea e mafai ona e filifili mai ai:

• O se uo o se isi faatuatuaga i lau misiona.

• Tamaiti i le vasega peraimeri.

• O se uo mai le aoga.

• O se tagata o lou aiga.

Faaauau pea le talanoaga

A o lei faia se talanoaga o se vasega, e mafai ona fesoasoani e uunaia ai tagata aoga e faalogologo lelei le tasi i le isi. E mafai ona tuuina atu manatu nei i tagata aoga a o lei faia le talanoaga. E mafai ona fesoasoani lenei mea ia i latou e faalogologo lelei ai le tasi i le isi ma fatuina ai se talanoaga a’oa’oina lea e aofia ai le toatele o tagata aoga i le talanoaga. E mafai ona e faaali atu ia i latou pe tuuina atu i tagata aoga se pepa e tufa atu o nei manatu.

Faaopoopo i ai—Faasoa atu mea sa e fiafia i ai e uiga i le faamatalaga a se tagata o le vasega ona faaopoopo lea i ai o ou lava manatu.

• ”E faamanatu mai ai ia te au ia …”

• “Ou te ioeina aua…”

• “Sao. O le isi faataitaiga o le taimi …”

• “O se manatu lelei lena …”

Aotele—Toe faaupu mea na fai mai ai lau uo i le vasega ona fai lea i ai o sou manatu.

• ”Ua ou faalogo o e fai mai e …”

• “O lea, afai ou te malamalama sa’o ia te oe …”

• “Ou te fiafia i le auala na e fai mai ai …”

Fesili—Fai atu i se isi tagata aoga ni fesili e uiga i mea na latou fai mai ai.

• “E mafai ona e faamatala maia nisi mea e uiga i lena mea?”

• “Ou te le o mautinoa pe ua ou malamalama …?”

• “Ua ou iloa lou manatu, ae faapefea …?”

• “Ua e mafaufau i …?”

Pasi le pepa

Fai se pepa e i ai se faasologa o faatonuga e mafai ona aofia ai mau po o upusii e faitau ma fesili e tali. Ia mautinoa ua lava le avanoa mo tagata aoga e tusi ai a latou tali. Tuu atu ia tofu le tagata aoga ma se kopi ma valaaulia i latou e tusi o latou igoa i le pito i luga. E tali e tagata aoga le fesili muamua. Ona latou gaugau lea o le pepa e ufiufi ai a latou tali. Latou te pasi atu le pepa i se isi tagata aoga o lē e taliina le isi fesili po o le uunaiga. E gaugau e tagata aoga taitasi le pepa e ufiufi ai a latou tali ma pasi atu i se isi tagata aoga. I le faaiuga o le faataamiloga, e toe faafoi atu pepa i le uluai tagata aoga o lē e faitauina mea na tusia e a latou uo.

Sauni e faasoa atu

Faasoa atu se fesili taua e te manao e tali e tagata aoga. Ia mautinoa e faasoa atu i ni nai minute a o lei valaauliaina i latou e tali le fesili. Mo se faataitaiga, e mafai ona e faapea atu, “I ni nai minute mai le taimi nei, ou te fiafia e fai atu i nisi o outou e faasoa mai ou manatu e uiga i ______________. Faamolemole ia mafaufau i mea e te manao e faasoa atu a o matou suesueina le fuaitau lenei.” E mafai ona valaaulia tagata aoga e faasoa muamua atu i se paga po o se vaega.

Faapalota le vasega

Faatautaia se sailiiliga i au tagata aoga e ala i le tuuina atu ia i latou o se fasi pepa laitiiti. E mafai e tagata aoga ona tali mai e le faailoaina ona tuu lea o a latou pepa i totonu o se pusa po o se pulou. E mafai ona e aoina mai o latou manatu e uiga i se mataupu faavae, fesili, po o se faaiuga e ono faia e se tasi i se tulaga faataitai. Ae afai e mafai e tagata aoga ona faaaoga se telefoni feavea’i, e mafai ona e faaaogaina se polokalama e fai ai palota e leai se totogi ma e faigofie ona faaaoga. Tuu atu i tagata aoga se galuega faatino mo suesuega ma se sootaga o le palota i se fesili ma fai atu ia i latou e tali atu e faaaoga ai a latou telefoni. O le a mafai ona e vaai i tali ma e mafai ona e faaali atu i le vasega. E tele polokalama e leai ni totogi e mafai ona faafaigofie ai lenei mea.

Fasifuaitau malosi

Faaaoga fasifuaitau malolosi e aoao ai au tagata aoga e faasoa atu ma faalauiloa ai se talanoaga i le vasega.

O se meafaigaluega aoga lenei mo vasega e filemu pe le o mautinoa pe faapefea pe o le a foi le mea e faasoa atu. Faaali atu le lisi o fasifuaitau o loo i lalo e fesoasoani ai i tagata aoga e faavaa mea latou te ono faasoa mai. Tuu atu ia i latou e suesue se poloka mau ma saunia e faasoa atu e faaaoga ai se fuaitau malosi se tasi pe sili atu. Faafaigofie le talanoaga pe fai atu i se tagata aoga e faafaigofie.

• O se fuaiupu ou te fiafia i ai o le…

• O se fasifuaitau sa malamalama lelei i ai…

• O se lesona e ao ona tatou a’oa’oina mai i lenei mea, o le…

• Sa ou mauaina se mataupu faavae…

• O se upu na ou iloa e manaia/nunumi o le…

• O se mea e manaomia ona iloa e se talavou mai lenei mea o le…

• O se mea ua ou iloa e moni mai lenei mea o le…

• O se mea ou te le o mautinoa o le…

• O le mea e tasi ou te lagona e tatau ona ou faia i lenei mea i le asō o le…

• O le mea e tasi ua ou aoaoina e uiga i le Faaola i lenei mea o le…

Kata e auai ai

Tufa atu kata e mafai ona tuu i luga e tagat aoga e fai ma tali vaaia i fesili e te fesiligia. E mafai e tagata aoga ona faaaoga kata e faailoa mai ai a latou tali pe ua latou saunia foi e faasoa atu pe talanoaina o latou manatu. Mo se faataitaiga:

• Lanu meamata mo le moni, lanumumu mo le sese

• “Mafaufau Pea” i le tasi itu ma le “Saunia e Faasoa Atu” i le isi itu

• O se kata e i ai fuainumera po o mataitusi e faatusa i filifiliga eseese o loo lisiina i luga o le laupapa. E faasino uma tagata aoga i se numera po o se tusi mo a latou tali ina ia mafai ona e vaai i a latou tali ma filifili tagata aoga e tali mai.

• O se kata e tele ni tali i itu eseese (tagai i le faataitaiga o i lalo). Pe a valaaulia tagata aoga e tali mai, o le ogatotonu pito i luga o lo latou tulaga lea. Ona mafai lea e oe po o se tagata aoga ona valaau atu i tagata aoga e tusa ai ma le tulaga o loo latou faaalia.

Amataga o le vaaiga faataitai

Tuu atu i tagata aoga se tulaga e le atoatoa ma valaaulia i latou e faaopoopo i faamatalaga auiliili ina ia sili atu ona talafeagai ma fesootai. Mo se faataitaiga, atonu e te fai atu se tala e pei o le “Sei o tatou fatuina se vaaiga faataitai e uiga i se tagata e latalata i lou matua, e igoa ia Iulia, o le o loo feagai ma ni luitau o le olaga. Faamata o a nisi o nei mea?” A o faasoa mai tagata aoga, fesoasoani ia i latou e fautuaina mai ni faamatalaga auiliili ina ia foliga mai ai o Iulia, po o se isi igoa na e filifilia, o se tagata moni. E mafai foi ona e faaopoopoina faamatalaga autu e uunaia ai le talanoaga, e pei o le fesili autu a Iulia.

A leai, e mafai ona e fai atu i tagata aoga e fatu a latou lava vaaiga faataitai ma tusi i luga o se pepa. E mafai ona e faafesuiai nei vaaiga ma fai atu i tagata aoga e tali mai e ala i le faaaogaina o mea na latou aoaoina.

Filo o le tusitusiga o le vaaiga faataitai

Fatu se vaaiga faataitai e amata i se feau tusitusia se tasi, ae aua nei faaali atu i tagata aoga tulaga na oo atu ai i lena feau tusitusia. E mafai ona e tuuina atu i tagata aoga taitasi se mamanu e leai ni tusitusiga e pei o lenei ma valaaulia i latou e fatu se talanoaga mo le filo o tusitusiga.

Faauo faavave

O le fesoasoani i tagata aoga ia lagona le toafimalie e faasoa atu i le tasi ma le isi e amata i le fesoasoani ia i latou ia iloa tagata o le latou vasega. E mafai ona fesoasoani lenei gaoioiga i tagata aoga ia iloa e le tasi le isi faapea foi ma le faasoaina atu o se mea e uiga i mau. Faatulaga tagata aoga i ni faigapaaga e ala i le faatulagaina o laina e lua o nofoa faafesagai. Ona valaaulia lea o tagata aoga e faailoga se fuaitau o mau ua tuuina mai ma tali se fesili na e saunia e uiga i lena fuaitau. Valaaulia paga taitasi e tali se fesili faauo na e saunia e mafai ona fesoasoani ia i laua e iloa lelei ai le tasi ma le isi. Valaaulia tagata aoga e fesuiai paga ma toe fai le faagasologa i le tele o taimi e faaaoga ai fesili eseese ma fuaitau o mau. Ina ia galulue tagata aoga ma paga uma, e le faataamilo le tagata aoga o loo nofo i se tasi o nofoa tulimanu.

Laupapa pipii

Tuu i luga o le laupapa ni nai fesili mo tagata aoga e tali ai po o fuaiupu e mafai ona latou faasoa mai ai ni malamalamaaga e uiga i ai. E tusi e tagata aoga taitasi o latou igoa i luga o (se) pepa pipii o faamatalaga ma tuu i autafa o (le) fesili po o (le) fuaiupu latou te naunau e tali pe faaalia mai.

Eseesega: o lanu e mafai ona faailoa mai ai mea e mananao tagata aoga e faasoa atu, o lona uiga, o se malamalamaaga, fesili, fesootaiga, ma isi mea faapena.

Pu’e se ata

Valaaulia tagata aoga e filifili se mea faitino i totonu o le potuaoga po o se ata i luga o a latou telefoni e mafai ona faaaoga e fesoasoani ai e aoao atu se mataupu faavae po o se aoaoga faavae. Valaaulia i latou e faasoa mai pe faapefea ona latou aoaoina se tasi i mea na latou aoaoina e faaaoga ai le mea faitino po o le ata.

Tusi ae e te lei faasoaina atu

Tuu atu i tagata aoga se taimi e faamaumau ai tali i fesili taua i a latou api faamaumau mo suesuega a o lei valaauliaina i latou e tali leotele.

4. Fatu se faatusa o mea na latou aoaoina

E masani ona valaaulia e lesona ia tagata aoga e fai se mea e faataitai ai mea na latou suesueina. E mafai ona aofia ai le faaaogaina o tomai fatufatuai. O gaoioiga nei o ni nai auala e mafai ona fesoasoani ai i tagata a’oga e faia ai lenei mea.

Solo Faasolo i Mataitusi (Acrostic)

Faaaoga mataitusi o se igoa, nofoaga, po o se aoaoga faavae e fatu ai se solo faasolo i mataitusi e faaaoga ai mea na latou aoaoina i le vasega. Mo se faataitaiga, e mafai e se tagata aoga ona tusi se solo e faaaoga ai le upu faatuatua e pei o nei:

F – O le mulimulitaia o le faataitaiga a Iesu Keriso.

A – Galue i uunaiga mai le Agaga Paia.

I – Ia aofia ai a tatou fesili po o popolega i a tatou tatalo.

T – Talitonuina o perofeta a le Atua.

H – Faamoemoe ia maua Ana faamanuiaga folafolaina.

Fatuina o polokalama

E mamanu e tagata aoga a latou lava polokalama i luga o se fasi pepa. E mafai ona faaalia i le polokalama se upumoni o loo aoaoina i mau na suesueina ma e aofia ai gaoioiga, ata, mau, po o upusii e mafai ona fesoasoani i se tasi e faaaoga i o latou olaga.

Fefulisaiga

O le chiasmus o se gagana faatusa lea e faaata ai le afa lona lua o se fuaiupu, parakalafa, po o le tusiaina o faaata ma toe fai i le isi faasologa o le afa muamua. O le savali autu o loo maua i le ogatotonu (tagai i le Alema 36 o se faataitaiga). Valaaulia tagata aoga e fatu se chiasmus mai mea latou te suesueina. O le a tuu e tamaiti aoga le upumoni malosi i le ogatotonu ma faaopoopo i ai laina o loo i luga ma lalo faatasi ai ma mau lagolago po o faamatalaga faaperofeta. E mafai ona foliga talitutusa ma lenei:

A – o lagona o tagata aoga e uiga i le upumoni po o aafiaga na latou maua ai

E – o mea ua malamalama i ai tagata aoga e uiga i le upumoni

I – upumoni po o mataupu faavae o le talalelei

I – upumoni po o mataupu faavae o le talalelei

E – se malamalamaaga faaopoopo e uiga i le upumoni

A – o aafiaga faaopoopo na maua e tagata aoga i le upumoni ma o latou lagona e uiga i ai

Suesuega o ata komi

Tuu atu i tagata aoga se mamanu o se tusi ata komi avanoa pe fai atu ia i latou e fai se mamanu i luga o se fasi pepa. E faitau e tagata aoga le poloka o mau ma fatu se ata komi e faaalia ai le faasologa o le tala i le poloka. Tuu atu ia i latou e faaaoga le pusa mulimuli e faasoa mai ai mea latou te lagona o le upumoni aupito sili lea ona taua e aoao mai le tala. E mafai ona latou faasoa a latou ata komi i le vasega. Ae, e mafai ona latou faaaogaina lenei gaoioiga e faataitai ai se faaaogaina i ona po nei o le upumoni po o le mataupu faavae.

Fausia se otootoga o se lesona

Fatu se otootoga e mafai ona faaaoga e tagata aoga e saunia ai se lesona puupuu, lauga, savali, po o se auala e faasoa atu ai se fuaitau o mau. E mafai ona e tuuina atu se mamanu avanoa o le otootoga lea e faamaumau ai e tagata aoga mea na latou maua. E mafai ona e faatonuina tagata aoga e faaaofia ai faamatalaga eseese i pusa taitasi. Mo se faataitaiga, e mafai e tagata aoga ona tusi se ulutala i le pusa muamua, otooto fuaiupu autu i le pusa e sosoo ai, faataitaiga po o tala patino i pusa uumi e tolu, ma se molimau i le pusa mulimuli.

Fai se tamaitusi

Tuu atu i tagata aoga taitasi se pepa ma valaaulia i latou e gaugau i ni vaega se tolu. E mafai e tagata aoga ona faia se itulau autu o loo i ai le mataupu faavae po o le aoaoga faavae ua latou faailoaina. E mafai e tagata aoga ona fatuina ni itulau mulimuli ane faatasi ai ma soaautu ma faamatalaga auiliili mai mea o loo latou aoaoina. E mafai ona e valaaulia i latou e sefe se avanoa i tua o le tamaitusi e tusi ai soo se sini po o ni fuafuaga latou te faia i le taimi o le lesona.

Vaega o lanu valivali

Lolomi se itulau kopi o le poloka mau ma tuu atu penitala lanu e faailoga ai mau. Faailoa mai vaega e pei o le “Faamanuiaga Folafolaina,” “Galuega o le Faatuatua,” po o le “Poloaiga.” E mafai ona atofaina i vaega taitasi se lanu. Valaaulia tagata aoga e suesue fuaiupu ma faailoga vaega lanu pe a latou mauaina. Valaaulia tagata aoga e faasoa mai mea na latou faailogaina ma aoaoina mai lenei gaoioiga.

Iloilo se fuafuaga

E mafai ona e faaaogaina se mea faatulaga ata e fesoasoani ai i tagata aoga e iloilo a latou fuafuaga. E tali e tagata aoga fesili i vaega taitasi o le ata.

Siata Faasolo

E mafai e tagata aoga ona fatuina se ata e faaalia ai le sootaga i le va o faaiuga po o manatu faavae eseese i le lesona. Mo se faataitaiga, o se siata e pei o lenei e mafai ona faaaoga e faaali atu ai le mea e mafai ona taitai atu ai le faatuatua po o le faamoemoe ia Iesu Keriso.

Fausia-i lima

Tuu atu i tagata aoga ni mea e mafai ona latou faaaogaina e pei o poloka po o le faataitaiina o le omea e fatu ai se mea e faatusa i mea na latou suesueina. Mo se faataitaiga, e mafai e tagata aoga ona faaaoga poloka e faatusa ai olo na poloaiina e Kapeteni Moronae lona nuu e fausia (tagai i le Alema 48:7–9). E mafai e tagata aoga ona faaigoa poloka taitasi i se auala e mafai ona tatou saunia ai faaleagaga e tetee atu i osofaiga a Satani.

Ata tusi tuufaatasia

E mafai ona maua e tagata aoga ni ata i a latou telefoni po o le Potutusi o le Talalelei e fesootai ma le upumoni. E mafai ona latou fatuina se ata tuufaatasia faaeletonika ma faasoa atu i le vasega.

Iloa –manatunatu – aoao

Vaevae e tagata aoga se pepa i ni koluma se tolu. I le koluma muamua, latou te tusia ai mea ua uma ona latou iloa e uiga i se autu. I le isi, latou te tusia ai mea latou te fia iloa. O le koluma lona tolu e faatumuina i le taimi ma le maea ai o le lesona i mea na aoaoina e tagata aoga. E mafai ona valaaulia i latou e faailoa mai po o le a se mea, pe afai e i ai se mea, na fesoasoani ia i latou e aoao ai pe aafia ai o latou lagona i le taimi o le lesona.

Tusi mo le lumanai

E mafai e tagata aoga ona tusi se tusi ia i latou lava ina ia tatalaina ma faitau i se taimi faapitoa (i se misiona, faaipoipoga, mauaina o le la tama muamua). O le isi filifiliga e mafai ona fai atu i tagata aoga e tusi se tusi i tagata o o latou aiga i le lumanai. Pe mafai foi ona latou tusia se tusi i tagata aoga i le lumanai o le a o mai i le seminare ma faamatala mai mea na latou aoaoina ma o latou lagona.

Fai se meme

E faailoa mai e tagata aoga taitasi se mataupu faavae mai a latou suesuega ma fai se fuaitau e lelei ona maua e faaalia ai le mataupu faavae. Fai atu ia i latou e tusi foi se ata e faaalia ai le mataupu faavae. Ia mautinoa o loo aofia ai mau faasino. Tuu atu ia i latou e faasoa mai ma faamatala mai a latou meme. Atonu e te manao e faaali atu nisi o faataitaiga mai se mekasini lata mai nei o le Mo Le Malosi o le Autalavou .

Fai se fuafuaga e “alu ma fai”

E mafai e tagata aoga ona faia se fuafuaga e faia ai ni faatinoga aoga ma amiotonu mai mea latou te aoaoina ma lagonaina i le taimi o le lesona. Ina ia faia lenei mea, e mafai ona e fai atu ia i latou e faailoa mai mea latou te mananao e fai ma faia ni laasaga patino o le auala o le a latou faataunuuina ai a latou fuafuaga. E ono aofia ai le faailoaina o faafitauli e ono feagai ma i latou ma laasaga patino e taulima ai nei faafitauli. A o fatuina e tagata aoga a latou fuafuaga, faamalosi i latou e vaevae i ni laasaga laiti. O le faia o ni suiga laiti i mea latou te faia i aso uma e mafai ona fesoasoani ia i latou e lagona ai le faamanuiaina soo.

Fai se fuafuaga “laau o faaiuga”

E mafai e tagata aoga ona faaaoga se laau o faaiuga e fesoasoani ai e faaaoga se mataupu faavae o le talalelei e ala i le lisiina o mea lelei ma mea leaga o faaiuga eseese. E mafai ona latou amata i se fesili se tasi e uiga i se mataupu faavae o le talalelei ma a uma ona lisi mai mea lelei ma mea leaga, iloilo a latou filifiliga e fai ai lena faaiuga. Fai ni laau eseese mo fesili taitasi ma faaiuga i le fuafuaga.

Mo se faataitaiga: Fai se fuafuaga e suesue ai tusitusiga paia.

Fesili:

1. O afea o le a ou suesue ai i au tusitusiga paia? (Fai se laau e tasi o faaiuga.)

2. O fea o le a ou suesue ai i a’u tusitusiga paia? (Fai se isi laau o faaiuga.)

3. O le a le umi o le a ou faaaluina e suesue ai au tusitusiga paia? (Fai se laau o faaiuga lona tolu.)

I le faaiuga o le faagasologa, o faaiuga e tolu e faia faatasi ai se fuafuaga, po o se sini, ma ni laasaga patino e ausia ai.

Fuaiupu fou o le viiga

E mafai e tagata aoga ona filifili se viiga e uiga i se upumoni na suesueina i le lesona. Valaaulia i latou e fatu se fuaiupu fou o le viiga mai mea sa latou suesueina. E mafai e le vasega ona filifili ni nai fuaiupu fou e faaali ma usu.

Aoaoga e faavae i galuega faatino

E mafai e tagata aoga ona fatuina se galuega faatino e tele ni lesona lea o le a latou faaopoopo ai anotusi i lesona/vaiaso mulimuli ane. E mafai ona avea lenei mea ma se solo, viiga, vitio, galuega faatino o faatufugaga, po o isi faaupuga fatufatuai latou te fatuina i lesona mulimuli ane.

Toetusi le faaiuga

Valaaulia tagata aoga e toe tusi le faaiuga o se tala o tusitusiga paia po o se tala e te faasoa mai e pei ua faia e le tagata ni faaiuga e sili atu ona lelei/eseese.

Fua o faiga o kuka

E fatu e tagata aoga ni fua o faiga o kuka e faaaoga ai mea o loo latou aoaoina. E mafai ona e amata i le faaali atu ia i latou o se faataitaiga o se fua o le faiga o kuka e aofia ai mea e manaomia, fua, ma faatonuga. Ona fesoasoani lea i tagata aoga e mulimuli i lena fuafuaga e faatulaga ai mea o loo latou aoaoina. E mafai ona latou faaautuina la latou fua “O le auala e avea ai ma se faifeautalai mamana” po o le “Auala e maua ai se suesuega sili atu ona aoga o tusitusiga paia” ona faaaofia ai lea o mea latou te lagona o ni elemene taua e faaaoga ai maua ma upusii. Mo se faataitaiga, i le Mataupu Faavae ma Feagaiga 76, e mafai e tagata aoga ona lisi mea e manaomia, fua, ma faatonuga mo le avea ai ma se tagata selesitila. Ia fautuaina i latou ia fatufatuai i latou fua i le faiga o kuka. E mafai ona latou tusia se ata e faatusa i le fua mulimuli o le faiga o le fua o le kuka.

Faataitaiga faatino

E faatino e tagata aoga se vaaiga faataitai. E anoanoai suiga i lenei mea. E mafai ona e fai atu i volenitia e o mai i luma o le potu e faatino le vaaiga faataitai. E mafai e tagata aoga ona faataitai ona faatino i ni paga po o ni vaega toalaiti. Pe mafai foi ona e faatinoina le vaega o se tagata e i ai fesili ma fai atu i le vasega atoa e talanoaina au fesili po o popolega.

Vitio puupuu

Valaaulia tagata aoga e fuafua se vitio puupuu. E mafai ona latou fatuina se tusiga ma filifili pe faapefea ona faataitai se mea na latou aoaoina mai le lesona. Afai e mafai, e mafai e tagata aoga ona fai le vitio ma faasoa atu i le vasega.

Faasalalauga faaleagafesootai

Valaaulia tagata aoga e fai se faasalalauga faaagafesootai e faasoa mai ai o latou talitonuga po o aafiaga patino e faatatau i mataupu faavae o loo talanoaina i le vasega. E mafai ona avea lenei mea ma se mea latou te faapipiiina i luga o le initoneti, po o se mea latou te fatuina i a latou api faamaumaumo suesuega. Pe mafai foi ona latou vaai faalemafaufau i se tasi o faapipiiina se fesili e faatatau i mea na suesueina i le vasega ma faia se tali e faaaoga ai le malamalama ua latou aoaoina. Pe mafai foi e tagata aoga ona suesue i se faasalalauga faaagafesootai a se taitai o le Ekalesia ma tusi se tali po o se faamatalaga faamalosiau i luga o le tusitusiga. Mo se tusiga e fesoasoani i tagata aoga e faia ni tusitusiga anoa o faasalalauga faaagafesootai tagai i le “O Ala o Faasalalauga Faaleagafesootai: Mana e Suia ai Olaga,” Mo Le Malosi o le Autalavou, Aperila 2022.

Faaaliga vaaia

Tuu tagata aoga i vaega e faaaoga mau, upusii, ma isi punaoa mo suesuega e fatu ai ni pepa lautele o i ai se savali po o ni faaaliga i puipui mo le potuaoga. O a latou pepa lautele o i ai se savali po o faaaliga e mafai ona aofia ai fuaiupu autu, fesili e mafai ona taliina e le tala o tusitusiga paia, upumoni e faavavau, ata, ma isi mea faapena. E mafai ona faataamilo tagata aoga ma vaai i galuega a isi vaega.

Tusi se tusiga mo se mekasini a le Ekalesia

E mafai ona vaai faalemafaufau tagata aoga o loo latou tusia se tusiga i mekasini o le Mo Le Malosi o le Autalavou, Uo, po o le Liahona e faasoa mai ai mea sa latou suesueina ma le auala e mafai ona fesoasoani ai i le autalavou i le lalolagi atoa. E mafai ona e faaali atu se mataupu e fai ma faataitaiga. Uunaia tagata aoga e faaopoopo i ai ata, siata, ma ata faamatalaga.