“Ala o Faasalalauga Faaagafesootai: Mana e Suia ai Olaga,” Mo le Malosi o le Autalavou, Ape. 2022.

Ala o Faasalalauga Faaagafesootai: Mana e Suia ai Olaga

Saunia e Megan Thomson Ramsey

Mekasini a le Ekalesia

Ioe, e malie le vaai po o a mea a au uo o fai. Ae o lou faaaogaina o ala o faasalalauga faaagafesootai e mafai moni lava ona suia ai olaga.

Ata

o se tagata o loo faaaogaina le telefoni-poto

Pe na e mafaufau ea i le ala na musuia moni ai e le Alii ia tekinolosi ua fatuina e tagata e faanatinati ai Lana galuega?

Mafaufau i le vavega o le vaalele. Ua mafai nei e faifeautalai a le Alii ona oo atu i tulimanu uma o le lalolagi i ni nai itula. Ae faapefea le telefoni-poto? O uluai faifeautalai na ona mafai ona oo atu i tagata i lo latou potu e tasi. Ae o se telefoni o loo fesootai i ala o faasalalauga faaagafesootai e mafai ona avea o se meafaigaluega e faasoa vave atu ai le talalelei i se numera toetoe lava a le faatapulaaina o tagata.

O se faama‘i oti i le lalolagi atoa ua faateleina ai le faaaogaina o ala o faasalalauga faaagafesootai e fesoasoani ai i faifeautalai ma tagata o le ekalesia e aapa atu i le toatele o fanau a le Atua. Afai e te faaaogaina ala o faasalalauga faaagafesootai, o nisi nei o mataupu faavae e mafai ona e mulimuli ai e fesoasoani ai e faapotopoto Isaraelu. A o e faitau, mafaufau loloto pe mafai faapefea ona e faaaogaina ala o faasalalauga faaagafesootai e fesoasoani ai i lenei galuega taua.

Faasoa Pe Aisea Ua E Fiafia Ai

A o i ai Ashlee Steede i lana misiona, sa ia fesootai ma se tamaitai talavou sa aapa atu ia te ia ona sa fiafia o ia i ata o lona aiga fiafia. “E tusa ai ma la‘u talaaga otooto sa mafai ona ia iloa ai e taua le Atua ia te a’u. Sa ia lagona sa i ai se mea faapitoa e uiga i lo‘u aiga. Sa ia fai mai sa matou foliga fiafia lava, ma o se mea lena sa ia manao ai. Sa fiafia o ia i mea uma sa ma aoaoina, ma sa papatisoina o ia.”

Faataitai i ai:

Afai e te fiafia moni lava i se mea, o le a e manao e faasoa atu i isi. Amata i le atiina ae o lou lava alofa mo le talalelei ona faasoa atu lea pe aisea na te faafiafiaina ai oe.
Faasoa atu mea e te faafetai ai ma faaaofia ai nisi o ata.
Faasoa atu ni faamatalaga e musuia ai oe, atonu mai au faifeautalai i le lotoifale pe mai le Au Pulega Aoao.

Ia Faamaoni ma ia Fatufatua’i

E masani ona iloa e tagata pe o le mea o loo e tuuina i luga e faamaoni ma moni. Pe a tatou tuuina i luga ma le Agaga, e mafai ona tatou pa‘i atu i le tele o loto.

Sa tuuina i luga e se toeaina i Niu Ioka se tala patino agamalu. O se teineitiiti na vaai i le tala sa fesootai atu i faifeautalai. O le molimau faamaoni a le toeaina na fesoasoani ia te ia e filifili ai e papatiso.

Na tuuina atu e faifeautalai i Niu Sila ni faasalalauga mo auaunaga maua fua i luga o le Facebook. Sa pisi tele i la’ua i le faia o auaunaga lea sa faaalia ai i ni nusipepa se lua i le lotoifale.

E fatuina e faifeautalai i Romania ni faasalalauga mo tatalo e aunoa ma se totogi. E auina atu e tagata a latou numera, ona valaau atu ai lea o faifeautalai i lo latou aai ia i latou, faamalamalama atu le tatalo, ma latou tatalo faatasi.

“Sa ou faia ni tatalo ma tagata e matuai malosi ai le Agaga,” o le tala lea a Sister Maci Sorensen. “E ese le ofoofogia o le valaau atu i nei tagata uma ma tatalo faatasi ma i latou.”

Faataitai i ai:

Faasoa atu se aafiaga po o se mau na e latalata atili ai ia Keriso.
Tuu i luga vitio o ou tomai faamusika, faatufugaga, afeleti, po o le kuka ma faatatau i mataupu faavae faigofie o le talalelei po o tusitusiga paia.

Taula’i atu i le Fesoasoani i le Tasi

“Sa ou auai i se vaega Kerisiano i luga o le Facebook ma tuu i luga se faamatalaga e uiga i le lagonaina o le alofa o le Atua,” o le tala lea a Sister Ashton Petty. “I totonu o le 24 itula sa i ai ni manatu faaalia pe tusa ma le 200. O se tasi o manatu na faapitoa lava le tulaga ese ia te a’u. Sa ou tusi atu ia te ia, ma sa ia ta’u mai ia te a’u e le tatau ona ia lagonaina le alofa o le Atua. Sa ou ta‘u atu ia te ia e uiga i le Togiola a Iesu Keriso. Na iu lava ina papatisoina o ia. I au faitotoa o ala o faasalalauga faaagafesootai, molimau atu i le alofa o le Atua, aua e te le iloa lava po o ai e manaomia ona faalogo i ai.”

Faataitai i ai:

Mafaufau e galulue taitoatasi ma au uo e tali atu i a latou fesili ma manatu faaalia. Faasoa atu ia i latou mataupu faavae o le talalelei na fesoasoani ia te oe.
Ofo atu e tali fesili e uiga i le Ekalesia i se faasalalauga.
Ia valaaulia patino au uo i gaoioiga a le seminare po o le Ekalesia.

Ata

alii talavou o loo taina le kitara

Na saunoa mai Elder David A. Bednar o le Korama a Aposetolo e Toasefululua: “Ou te talitonu ua oo mai le taimi mo i tatou o ni soo o Keriso e faaaoga lelei ai nei meafaigaluega musuia ma sili atu ona lelei e … folafola atu le moni o le Toefuataiga o le talalelei i aso e gata ai. …

“… Ou te apoapoai atu ia te outou ia tafiina le lalolagi i savali ua faatumulia i le amiotonu ma le upumoni—savali e faamoni, faagaeetia, ma tauleleia.” ¹