Manai

O lenei mea itiiti e faamanatu mai ai ia i tatou nisi o vavega silisili a le Alii.

O Le a Lena Mea?

Na faapeī foliga o le manai? Sa laitiiti, lapotopoto, manifinifi e pei o se laumafo’e, ma pa‘epa’e (tagai Esoto 16:14, 31).

Na faapeī lona tofo? “E pei o masikeke manifinifi e fai i le meli” (Esoto 16:31) pe e pei o le “suauu fou” (Numera 11:8).

Na faapefea ona oo mai? Na oo mai ma le sau i taeao uma vagana ai i le Sapati. I le aso a o lumanai le Sapati, sa lava le faapotopotoina e tagata mo aso e lua. I isi aso, o mea faaopoopo na latou faapotopotoina sa faaleagaina. (Tagai Esoto 16:14–30.)

O le a le mea na faia e tagata i ai? Latou te olo ai lea i maaolo, pe tui i le tanoa, ona latou tunu ai lea i pani, ma fai ai potoi” (Numera 11:8). O nisi taimi latou te tunuina (tagai Esoto 16:23).

Mea Moni o Tusitusiga Paia

Manai o lona uiga “O le a lena mea?” i le faaEperu. E le’i vaai lava Isaraelu i se mea e faapena.
Na ta‘u atu e le Alii i a Isaraelu e tuu sina manai i totonu o se ulo ma ave ma i latou. Sa fesoasoani lenei mea ia i latou e manatua ai le mea sa Ia faia mo i latou (tagai Esoto 16:33–34; Eperu 9:4).
Sa i ai se taimi na faitio ai Isaraelu e uiga i le aai na o le manai. Sa latou moomoo mo meaai a Aikupito—e ui ina sa avea i latou ma pologa iina (tagai Numera 11:1–6).
Na aoao atu e Mose tagata o o latou mafatiaga sa faamoemoe e fesoasoani ai ia i latou ia faalagolago i le Alii. Na ia aoao atu ia i latou na tuuina mai e le Alii ia i latou le manai “ina ia na faailoa atu ia te oe e le na o mea e ‘ai e ola ai le tagata, a o mea uma e tulei mai i le fofoga o Ieova” (Teuteronome 8:3).
Ina ua mavae ona pasi atu le au Isaraelu i le nuu folafolaina, sa le toe oo mai le manai (tagai Iosua 5:12).
Sa fafagaina faavavega e le Faaola tagata e lima afe ona talanoa lea e uiga i le manai. Ona Ia fetalai atu lea, “O a’u le areto ola na alu ifo mai le lagi: pe a ai se tasi i lenei areto ona ola ai lea o ia e faavavau: o le areto foi ou te avatua, o lo’u tino lea, ou te avatua ma ola o le lalolagi” (Ioane 6:51).

O Le Mea e Mafai ona Tatou Aoaoina

E faaaoga e le Alii mea laiti ma faatauvaa e faataunuu ai mea tetele (tagai Alema 37:6).
E finagalo le Alii ia tatou faalagolago ia te Ia, manatua o Ia, ma usiusitai ia te Ia (tagai Faataoto 3:5–6; Mataupu Faavae ma Feagaiga 59:21).
O Iesu Keriso o lo tatou punavai o le ola ma le faaolataga (tagai Mosaea 4:6–8).
E fesoasoani le faamanatuga tatou te manatua ai mea na faia e Iesu Keriso mo i tatou (tagai Luka 22:19).
Ua faasaolotoina i tatou e Iesu Keriso mai le nofopologa i le agasala ma fafagaina i tatou faaleagaga (tagai i le 2 Nifae 31:17–20; 32:3).