“O Auala e 7 e Mafai e le Alii ona Laveai ai Oe,” Mo le Malosi o le Autalavou, Ape. 2022.
Sau, Mulimuli Mai ia te A’u
O Auala e7 e Mafai e le Alii ona Laveai ai Oe
Aoao i le pe a ma le fitu o auala e tele e mafai e le Alii ona laveai ai i tatou mai o tatou luitau o aso taitasi.
Pe a e feagai ma se luitau e foliga mai e le o i ai se vaifofo, o le a lau mea e fai?
A o i ai Isaraelu anamua i Aikupito, sa latou feagai ma faigata tetele. Sa avea i latou ma ni pologa. Sa faamalosia i latou e fai ni galuega faigata. Sa leai so latou faamoemoe mo se olaga sili atu. O le a la le mea na latou faia? “Ua alalaga foi … i le Atua” mo se fesoasoani (Esoto 2:23).
Ma na tali mai le Alii. Sa Ia manatuaina Lona nuu o le feagaiga ma auina atu Mose e fesoasoani e faasaoloto i latou. E ala mai ia Mose, na aumaia ai e le Alii ia faailoga ma mea ofoofogia, mala ma vavega. Sa faamaaa e Farao lona loto mo se taimi umi lava. Ae ina ua mavae ni mala matautia, sa iu ina ia tuu le aiga o Isaraelu e o (tagai Esoto 2–12).
Ae e oo lava ina ua uma ona faasaolotoina i latou, sa lei uma ai faafitauli o Isaraelu. Sa latou feagai ma tofotofoga ina ua mavae tofotofoga, faafitauli ma lea faafitauli.
I le gasologa atoa, sa taumafai pea lava pea le Alii, e aoao atu se lesona faigofie se tasi: Afai e te faalagolago ia te Ia, o le a Ia laveaiina oe.
Ituaiga Eseese o Laveai
Ua i ai i le Alii le mana e laveai ai i tatou mai luitau ma faafitauli tatou te feagai. Ae e tele auala eseese Na te laveaiina ai i tatou, ma o nisi taimi atonu e le o ni auala ia tatou te faamoemoeina. E mafai ona tatou aoao mai tusitusiga paia po o a nisi o na ituaiga eseese o le laveai.
O auala eseese nei e fitu na laveaiina ai e le Alii ia Mose ma lona nuu—ma le ala e mafai ai ona Ia laveaiina oe.
1
Faamaluluina lou loto
Atonu e lei faigofie i le aiga o Isaraelu ona talitonu na auina mai Mose e le Alii. Ae mo i latou na faatinoina le faatuatua, e mafai e le Alii ona faamaluluina o latou loto i le savali a Mose. (E pei lava o le mea na Ia faia mo Nifae ina ia talitonu ai o ia i upu a lona tama [tagai 1 Nifae 2:16]).
Atonu o nisi taimi e faigata ia te oe ona talitonu, malamalama, pe taliaina se mea na fai mai ai auauna a le Alii. Ae afai e te lotomaualalo ma faamaoni, e mafai e le Alii ona laveai oe mai le fenumiai, tiga, ma le le fiafia e ala i le faamaluluina o lou loto.
2
Faamaluluina o loto o isi
Ina ua mavae le fanau mai o Mose, sa tautino atu e farao e faapea o tama Isaraelu uma e fananau mai i lena taimi e tatau ona fasiotia. Ae sa faasaoina Mose ona sa faaopeopea o ia e lona tina i lalo o le vaitafe i totonu o se ato. Na maua e le afafine o Farao ia Mose ma sa ootia o ia, o lea sa tonu ai ia te ia e tausi o ia e pei o sana tama. Sa faamaluluina lona loto. (Tagai i le Esoto 2:1–10.)
O nisi taimi o i latou e mafai ona faatiga ia te oe e tatala o latou loto ia lava mo le siufofoga o le Alii e ala mai ai, ma uunaia ai i latou i le alofa mutimutivale. E mafai e le Alii ona laveai oe mai faafitauli e ala i le fesoasoani e faamalulu loto o isi.
3
Tuuina atu ia te oe le malosi
Ina ua faatoa talosagaina e Mose ia Farao e tuu le aiga o Isaraelu e o, sa tali atu Farao e ala i le tuuina atu ia i latou o avega e sili atu nai lo le taimi muamua. O le toatele o le aiga o Isaraelu sa faitio, ae sa latou tauaveina na avega.
E finagalo le Alii ia e lafoai au avega i Ona luga. Afai e te faalagolago ia te Ia, e mafai moni lava ona Ia faia avega ia foliga mama (tagai Mosaea 24:13–15). E mafai ona Ia laveaiina oe mai mafatiaga faaletino, faalemafaufau, pe faalelagona e ala i le faamalosia o oe e tauave au avega.
4
Tuuina atu ia te oe se auala e solaese ai
Ina ua mavae mala, sa iu ina ioe Farao e tuu le aiga o Isaraelu e o. A o latou agai atu i luma, sa suia e Farao lona mafaufau ma auina atu kariota ia i latou. I le Sami Ulaula, na maua ai i latou e kariota a Farao, ma sa ta’u atu e le Alii ia Mose e vaeluaina vai. Ua sopoia e le aiga o Isaraelu le Sami Ulaula i le laueleele matutu. (Tagai Esoto 14.)
I tulaga faigata, e mafai e le Alii ona avatu ia te oe se auala e solaese ai. E faapitoa le moni o lenei mea pe a oo mai i faaosoosoga—o le a Ia fesoasoani ia te oe pe a e tatalo atu ia te Ia (tagai 1 Korinito 10:13; Mataupu Faavae ma Feagaiga 95:1; Alema 13:28).
5
Musuia oe e saili se fofo
A o feoa’i le aiga o Isaraelu i le vao, sa masani ona latou vaavaai atu ia Mose e foia o latou faafitauli. Ae e foliga mai o nisi taimi sa moomoo Mose e mafai ona latou aoao e maua musumusuga mai le Alii e i latou lava (tagai Numera 11:29). Ua faatuina e Nifae se faataitaiga lelei o lenei mea. Ina ua le tuuina atu e le Alii ia te ia ni faatonuga auiliili i le auala e foia ai se faafitauli, sa faia e Nifae se taumafaiga taulamua, faia le mea sa ia mafaia, sailia le taitaiga mai le Alii, ma maua ai ni vaifofo musuia i le faagasologa (tagai 1 Nifae 16:18–32).
E mafai e le Alii ona laveai oe mai faafitauli e ala i le musuia o oe i ni vaifofo.
6
Musuia isi e fesoasoani ia te oe
Ina ua tuua e Isaraelu ia Aikupito, sa asiasi atu le tamā o le ava a Mose, o Ietero ia te ia. Na vaai Ietero i le ala na aumai ai e tagata fesili uma ma finauga ia Mose. Sa ia fai atu o le a faavaivaia e lenei mea ia Mose. Sa ia fautuaina Mose e tuuina atu le pule i isi tagata e mafai ona fesoasoani ia te ia. Sa mulimuli Mose i lenei fautuaga ma sa faamanuiaina ai. (Tagai Esoto 18:13–24.)
E tele taimi e musuia ai e le Alii tagata o le aiga, faiaoga, taitai, perofeta ma aposetolo, po o uo e fesoasoani ia te oe i luitau. E mafai e le Alii ona laveai oe mai ou faafitauli e ala i le musuia o isi e fesoasoani ia te oe. (Ma e mafai foi ona musuia oe ia avea ma lena fesoasoani mo isi.)
7
Taulimaina o ou manaoga i vavega
I le vao, sa tele manaoga o Isaraelu, e aofia ai meaai ma vai. Na saunia e le Alii mea latou te manaomia i ni auala faavavega. Mo se faataitaiga, sa ia avatu ia i latou le manai e aai ai, lea na oo mai i taeao uma (tagai Esoto 16). Ina ua latou manaomia le vai, sa tuuina atu e le Alii ia Mose le mana e tuu atu ai ia i latou le vai faavavega—e oo lava i fafo mai le papa malo (tagai Esoto 15:23–26; 17:1–7).
Afai e te faalagolago ia te Ia, e mafai e le Alii ona faia vavega ma tuuina atu ia te oe mea e te manaomia. E mafai ona Ia laveaiina oe mai le le mautonu, popole, ma le fefe e ala i Lona mana faavavega.
O lo Tatou Laveai
Ua i ai i le Alii le mana e laveai ai i tatou mai faafitauli ma faigata mai lea aso i lea aso. A o tatou oo i Lona laveaiina i aso taitasi, tatou te faateleina lo tatou faatuatua i Lona mana tupito e laveai i tatou mai o tatou luitau silisili: agasala ma le oti.
A o tatou manatuaina le Alii ma Lana laveaiga, Na te manatuaina i tatou. Ua Ia ofoina mai ia i tatou feagaiga e fusia ai i tatou ia te Ia ma faamanuia ai i tatou i se fesoasoani sili atu ma le malosi e ala i Lona Agaga. O Ia moni lava o lo tatou Laveai.