“Faatoilaloina o Lo‘u Vaivaiga Silisili,” Mo Le Malosi o le Autalavou, Ape. 2022.
O le Autu ma A’u
Ua faasoa mai e le autalavou le ala o loo latou ola ai i upu o Autu a Tamaitai Talavou ma le Korama a le Perisitua Arona
Faatoilaloina o Lo‘u VaivaigaSilisili
“Ou te faapelepele i le meaalofa o le salamo ma saili ia faaleleia atili i aso taitasi.”
A o o’u laitiiti, sa i ai so‘u faafitauli tele o le pepelo i o’u matua. Sa amata o se mea sese taumamaina, ae i le aluga o tausaga sa amata ona avea o se mausa leaga tele.
Sa ou pepelo ia i la’ua e toetoe lava o aso uma e uiga i mea e sili ona faigofie. Sa oo i le tulaga sa la’ua le toe faatuatuaina ai a’u. E tusa lava pe sa ou faamatalaina le mea moni, la te le’i talitonu ia te a’u. Na ou lagona lo’u faanoanoa. Sa taumafai lo‘u tina ma lo’u tama i mea uma e fesoasoani ia te a‘u e taofi le pepelo, ae sa le mafai lava ona ou taofia.
I se tasi Aso Sa ina ua tuua le lotu, sa matou nonofo ai i lalo ma ou matua i le matou laulau o le umukuka. Na la faitauina mai upu a le Faaola mai le Eteru 12:27 : “Ma afai e o mai tagata ia te a’u o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”
Ou te le’i faalogo lava i se mau e sili ona aoga. Sa ou taulotoina ma taumafai e suia ai lo‘u loto.
I ni nai vaiaso, i le mavae ai o ni itula uumi o le tatalo, tagi, ma faamaualaloina o a’u lava i luma o le Atua, sa le toe i ai so‘u faafitauli o le pepelo. Sa ou faatagaina le mana o le Togiola a Iesu Keriso e galue i lo‘u olaga!
Talu mai lena aso i le lima tausaga talu ai, ou te le’i toe pepelo i o’u matua i se taimi e tasi. E ese lo’u mitamita i a’u taumafaiga. Na iu lava ina ou filifili e salamo ma, faatasi ai ma le fesoasoani a Keriso, ia suia. Ou te iloa moni lava o le “alofa tunoa o [Iesu Keriso] ua lava lea mo tagata uma o e e faalotomaualaloina i latou lava i luma o [Ia].”
O lena aafiaga na fesoasoani ia te a’u e maua ai se molimau sili atu o le Tusi a Mamona. Ou te molimau atu e moni tusitusiga paia. Ou te valaaulia outou ia saili Keriso e ala i tusitusiga paia.
E alala le tusitala i Virgina, ISA.