“O le Suiga o le Loto o Farid,” Mo le Malosi o le Autalavou, Aperila 2022
O le Suiga o le Loto o Farid
Na amata uma lava i se valaaulia faatauvaa i se feau tusitusia.
Ina ua 14 tausaga o Farid, sa ia manatu na ia iloa le mea sa ia manao ai i le olaga, ma sa le’i lavea le lotu i se vaega o lena mea. Sa ia ta‘u atu i lona aiga na te le manao e auai i se lotu.
Sa manaia lona olaga i le aai matagofie o San Pedro Sula, Honduras. O ana gaoioiga e fiafia i ai o musika, siva, soka, volipolo, aau, ma savaliga sopo. Sa ia faaaluina le tele o lona taimi e faitau ai tusi ma tafafao ma ana uo. Sa galue Farid agai atu i se galuega i vailaau faafomai, ma sa na ona ia manao lava ia fiafia i le olaga.
Fai mai Farid o ia o se tagata manatu faapito e 14 tausaga le matua—sa na o ia lava na ia mafaufau i ai. “Ou te le’i popole i lo’u aiga po o o latou manaoga,” o lana tala lea. “Ma te misa ma lo’u tausoga i le tele o taimi.”
Ona oo lea i se tasi Aso Sa, na suia faafuasei ai le olaga o Farid. A o faaivaivā solo o ia i le fale, sa tesi atu lana uo o Isaia ma fesili atu ia te ia pe fia sau la te o i lana lotu. O le taimi muamua lena na asiasi ai Farid i Le Ekalesia a Iesu Keriso o le Au Paia o Aso e Gata Ai. Ona valaaulia lea o ia e Isaia e auai i le seminare, ma sa ia fiafia tele i ai.
“Sa ou lagonaina se mea i lo‘u agaga na ta’u mai ai ia te a‘u sa ou i ai i le nofoaga sa’o, faatasi ma tagata sa‘o, ma le ekalesia sa’o,” o le tala lea a Farid.
E le’i leva ona ia auai i le seminare mo le taimi muamua, ae auai o ia i le Ekalesia. Ma e lei leva lena, ae amata ona ia iloaina ni suiga e le’i faamoemoeina ia te ia lava.
Mai le Manatu Faapito i le Le Manatu Faapito
Fai mai Farid, “Sa ou sui mai se tamaitiiti laitiiti e 14 tausaga le matua, o le sa na ona manao ia fouvale, i se alii talavou e i ai ni vaaiga e faavavau. Sa matauina foi, e lo‘u aiga.”
Sa le toe tauaimisa Farid ma lona tausoga. Nai lo lena, ua ia taumafai nei e saili ni auala e auauna atu ai ia te ia e pei o le faia o lana meaai o le aoauli, faamama lona potu, po o le fesili atu ia te ia pe na te manaomia se fesoasoani. Ae e ui lava i suiga lelei i le olaga o Farid, sa le fiafia nisi o tagata o lona aiga ina ua ia faatoa auai i le Ekalesia.
“Ou te le faatagaina lava o latou manatu faaalia e suia ai lo‘u manatu e uiga i le Ekalesia,” o le tala lea a Farid. Ou te faafetai ona e le’i muta lava lo’u faatuatua. Nai lo lena, sa faateleina pea lava pea. Ua talia nei e lo‘u aiga o’u talitonuga aua ua latou vaai i la‘u faataitaiga ma le ala ua ou suia ai.
Sa i ai foi isi suiga tetele i le aiga o Farid. Ua fai nei lesona a lona tina mai faifeautalai, ma ua manao o ia e papatiso!
“Ua folafola mai e le Tama Faalelagi ia i tatou afai tatou te faia le taumafaiga, o le a tatou maua faamanuiaga,” o le tala lea a Farid. “Ae o loo ia te Ia Lana taimi. Ua toeitiiti atoa le fa tausaga mo se tagata e toatasi o lo‘u aiga e mauaina se lagona e fia papatiso. E le’i faigofie mo a’u. Sa faaosoosoina a’u e mafaufau e sese le Ekalesia. Ae ina ua ou ole atu i le Tama Faalelagi e uiga i le moni o le Ekalesia, na ou maua la’u molimau, lea e faatumauina ai lo’u malosi.”
O Aiga e Faavavau
Fai mai Farid o le faamanuiaga aupito tele ua ia maua talu mai le auai i le Ekalesia o le malamalama lea e mafai ona faatasia aiga e faavavau. E tasi le tausaga talu ona auai Farid i le Ekalesia, ae maliu lona tamamatua. “Sa ou alofa tele ia te ia,” o le tala lea a Farid. “O ia o se tasi o a‘u faataitaiga sili . Sa ou lagona le le mautonu po o fea o le a alu i ai o ia i le isi olaga.
Sa la talanoa ma se tasi o ana uo i le lotu e uiga i le fuafuaga o le faaolataga ma le auala e mafai ai ona ia faia galuega o le malumalu mo lona tamamatua. Sa amata ona galue Farid i le talafaasolopito o lona aiga, ma sa alu o ia i le malumalu ma sa papatisoina mo lona tamamatua.
“E i ai lo’u faatuatua a ou oti ma ui atu i le veli, o le a ia faatalitalli mai mo a’u,” o le tala lea a Farid. “E le muta le galuega a le Alii i lenei olaga. Ua ou iloa nei pe a maliliu o’u matua matutua po o matua, ua tatou maua le avanoa e toe vaai ai le tasi i le isi i le olaga a sau. O le a avea i matou o se aiga e faavavau
Tumau e oo i le Iuga
O le toatele o le autalavou i Honduras e feagai ma luitau o le siomiaina e fualaau faasaina ma gaoioiga faikegi. E maua e Farid le malosi i le mafaufau e uiga i faamanuiaga e oo mai i le tausia o poloaiga a le Atua. O le taulai atu i na faamanuiaga e fesoasoani ia te ia e tumau ai.
“I le seminare sa ou aoao ai e uiga i le vaaia o mea uma i le olaga ma se vaaiga e faavavau,” o lana tala lea. “O lena mea na suia ai lo’u olaga. Ou te mafaufau nei i faamanuiaga o le auauna atu i se misiona talai o le a aumaia i lo’u olaga. Ou te iloa afai ou te tausia lo‘u agavaa, o le a ou maua le tele o faamanuiaga. Ou te mafaufau i la‘u fanau i le lumanai. O le a mafai ona latou iloa o lo latou tama sa faifeautalai, ma pe a ou valaaulia i latou e auauna atu i se misiona, o le a latou maua la‘u faataitaiga e faalagolago i ai.”
E manao foi Farid i isi talavou e tumau i lo latou faatuatua. Ua ia te ia lenei mea e fai atu ia i latou:
“Taumafai pea, ma ole atu i le Tama Faalelagi e faatumu oe i le faatuatua ma le malosi e le fiu ai lava. Aua le taofia lau molimau ia te oe lava. Faasoa atu i se tasi i taimi uma: se uo, se tuaoi, se tausoga—po o ai lava—ma o le a e vaai i isi ua amata ona fiafia i le lotu. O le mea lena na tupu ia te a’u. E ese le galue a le Tama Faalelagi ia i tatou taitoatasi. Aua lava ne’i fiu. Tumau e oo i le iuga, ma o le a tuuina atu e le Tama Faalelagi ia te oe lou taui i le taimi e tatau ai.