“O Se Avanoa e Aoao ai ma Tuputupu A’e Faatasi,” Mo le Malosi o le Autalavou, Ape. 2022.
Fesoasoanio le Olaga
O Se Avanoa e Aoao ai ma Tuputupu A’e Faatasi
E tele mea e mafai ona tatou aoaoina mai i tei o tagata e i ai manaoga faapitoa.
Ina ua mavae se aso faigata i le aoga, sa iu ina taunuu Lucy S. (13, mai Iuta, ISA) i le fale. Sa matauina e lona tuagane, o Tavita (12) lona le fiafia.
“O le a se mea ua tupu?” na fesili ai Tavita. “O a mai oe?”
O le popolega o Tavita na faia ai se eseesega tele mo Lucy. “Sa ou maua se faalogona sili atu ona lelei,” o le tala lea a Lucy. “O Tavita e ma’i e le lelei i le tautala ma agafesootai, ma e masani lava ona ia taulai atu i mea e fiafia i ai, ae a vaai o ia i se tasi o faanoanoa pe tuuatoatasi, o le a alu atu o ia ia i latou. E popole o ia i isi tagata. O le ituaiga tagata lena e i ai o ia—e lelei, moni, ma faamaoni o ia.”
E iloa e tei e pei o Lucy o le tuputupu ae faatasi ma se uso po o se tuagane e i ai se manaoga faapitoa e mafai ona luitauina, ae ua latou iloa foi le matagofie e mafai ona i ai. Ma ua latou iloa le tele o faamanuiaga e mafai ona oo mai. E mafai ona latou aoaoina i tatou i le tele o mea. Faitau mo ni faataitaiga o mea na aoaoina e nisi o nei tei e ono fesoasoani foi ia te oe.
Ia Matua Faamasani ia i Latou
O Anela (14), Chiyo (11), ma Tanielu (10) mai Filipaina e i ai le latou tei, o Bien (12), e maua i le supa. Latou te vaai ia te ia o se tagata tulaga ese ma ona lava malosiaga. Latou te moomoo maimau pe ana iloa e isi Bien i le ala latou te iloa ai o ia.
“O le mea o loo tatou nonofo ai, o loo i ai se maupuepue tifato matou te faaigoaina ma nai o’u tei o se ‘mauga,’” o le tala lea a Anela. “Matou te fiafia lava e tietie i a matou uila i luga o le mauga ma toe mili i lalo. O Bien e faigata ona alu i luga, o lea matou te fesoasoani ai ia te ia. O nisi taimi e sioa atu ai tagata ia te ia. E faalavelave ia te a’u pe a tupu lena mea. Ae e foliga mai e le popole i ai Bien. E ataata o ia ma talotalo ia i latou a o matou pasi atu.
“Ou te moomoo maimau pe ana iloa e tagata pe a latou vaai ia Bien o ia o se tagata e faauogofie ma fiafia e faatasi ma isi tagata. E matamuli o ia i le taimi muamua, ae e fiafia tele o ia i le taimi lava na te lagona ai le toafimalie. E le mafai ona ia faia mea e mafai e tagata malolosi ona fai, ae e fiafia o ia e aoao. Ua ou aoao mai ia Bien e le tatau ona tatou popole tele i mea e mafaufau i ai isi tagata uma e uiga ia i tatou, ma e tatau ona tatou taulimaina tagata uma ma le agalelei.
E Taua le Onosai
“O nisi taimi e faigata ona onosai ia Tavita, ae maise lava pe a le faalogo,” o le tala lea a Lucy “O nisi taimi e le mafai ona ia puleaina, o lea ou te le fia ita tele ai ia te ia, ae ou te manao foi ia mautinoa na te aoao ma malamalama. E taua le maua o le paleni. E fesoasoani ou te iloa ai le auala e fesoasoani ai i lo‘u tuagane.
Ua iloa e Chiyo o le onosai e fesoasoani ia Bien e aoao ai. “Ou te fesoasoani e aoao lo‘u tuagane i le alafapeta, lanu, numera, ma manu,” o le tala lea a Chiyo. “O nisi taimi e faigata ia te ia ona iloa manu. Ou te galue pea ma ia, ma ina ua mavae sina taimi, sa ou matauina ua lelei atili o ia. O le a ou faaigoaina se meaola, o le a ia faasino atu i se ata, ma e sa’o nisi o i latou! O le faataitaiga a Bien ua aoaoina ai a’u, e manaomia le taimi e aoao ai ni mea fou ma e mafai ona faigata, ae afai e ia te oe le onosai ma faaauau pea ona faataitai, o le a iu lava ina e sa‘o.
Tauivi ina Ia Tauaofia
“Ou te fiafia e mafaufau lo‘u aiga i lo’u tuagane ae matou te lei faia se gaoioiga ina ia mafai foi ona ia maua se taimi fiafia,” o le tala lea a Anela. “Matou te faaaofia ai foi Bien i le fesoasoani faataamilo i le fale,” o le tala lea a Chiyo. “E mafai ona ia gaugauina nisi o ona ofu ma salu le foloa.”
Ua vaaia foi e Lucy le auala e lagona ai e faiaoga ma uo i le lotu le taliaina o Tavita. “E manaia le vaai atu i tagata o taumafai ma aoao e uiga i mea e fiafia i ai Tavita,” o le tala lea a Lucy. “I le taimi nei, e fiafia lava o ia i le Star Wars, o lea o le a fesili atu ai tagata o le uarota ia te ia e uiga i ai. Latou te iloa o se mea o le a ia naunau e talanoa i ai. O se tasi o ana faiaoga e taumafai e faaaoga mea e fiafia i ai Tavita i lesona i se auala. E fesoasoani lea ia te ia e gauai atili atu ai i le vasega.
Atonu e foliga ese se tasi, ese le amio, pe eseese foi tomai, ae tatou te auai uma lava. E tele auala e fesoasoani ai i tagata uma ia lagona le faaaofiaina ma le taua. O le tele o lo tatou taumafai e faia, o le tele foi lena o lo tatou aoao uma ma tuputupu ae.
O Keriso ma le Tagata Supa, saunia e J. Kirk Richards