“O Iesu Keriso O Lou Faaola,” Mo le Malosi o le Autalavou, Ape. 2022.
O Iesu Keriso O Lou Faaola
O le Togiola a Iesu Keriso e mo oe.
O Loo Soifua o Ia, saunia e Simon Dewey
“E le o iinei o ia: aua ua toe tu mai o ia” (Mataio 28:6
O nisi nei o upu e sili ona anoa i tusitusiga paia. Sa fetalaia e agelu e lata ane i se tuugamau avanoa. Sa latou tautino mai o le Alii o Iesu Keriso ua faatoilaloina le agasala ma le oti e ala i Lana Togiola, ma faaiu ai i Lona Toetu mamalu.
Ou te manao ia e iloa o le Togiola a Iesu Keriso e mo oe! O Lana misiona o le olaga sa mo oe! O Lona maliu ositaulaga sa mo oe! Ma o Lona Toetu e mo oe! O nisi taimi e mafai ona faigofie ona lagona na faia e Iesu Keriso nei mea uma mo se isi tagata. Ae ou te molimau atu na Ia faia mo oe.
O le savali lenei o le uluai taeao o le Eseta: Ua alofa tele le Atua i le lalolagi ua Ia auina mai ai Lona Alo Pele e Toatasi e fesoasoani ia i tatou. Ma o Lona Alo, o Iesu Keriso, na foai maia Lona soifua mo i tatou.
O le taulaga a Iesu Keriso e aafia ai le lalolagi atoa—e aofia ai ma oe.
Valoia ma Muai Faaataata mai
Mai lava i le amataga, na aoao ai e le Atua tagata e uiga i le Faaola. Sa Ia auina atu se agelu e aoao Atamu ma Eva, “O le mea lea, ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau” (Mose 5:8). Mai lena aso e oo atu i le taimi o Iesu Keriso, sa ositaulaga ai e tagata manu e fesoasoani ai ia i latou e tulimatai atu i le taulaga o le a faia e le Alo o le Atua i se taimi mulimuli ane.
E le gata i lea, ua leva ona muai ta‘u mai le Togiola a Iesu Keriso a o lei taitai soifua mai o Ia i Peteleema. Na valoia e perofeta lena mea mo le tele o augatupulaga.
O Lana Togiola e le Iu ma le Toetu
E le mafai ona tatou malamalama moni i mea uma na faia e Iesu Keriso mo i tatou. E le mafai ona tatou malamalama i le maoae o Ona puapuaga ma le mamao o aafiaga o Lana taulaga. Ae e mafai ona e lagonaina aafiaga o Lana Togiola i aso uma.
I Ketesemane ma luga o le satauro, sa Ia “mafatia … i le tiga o tagata uma, ina ia mafai ona salamo tagata uma ma o mai ia te ia” (Mataupu Faavae ma Feagaiga 18:11). Sa Ia tauaveina i Ona luga le mamafa o agasala a tagata uma. O le tauaveina o se avega tele na afua ai ona tafe toto mai o Ia mai pu afu uma (tagai Luka 22:44; Mataupu Faavae ma Feagaiga 19:18).
Mulimuli ane sa fasia o Ia ma sasaina. Sa oomi atu i luga o Lona ao se pale tuitui maai. Ona faamalosia ai lea o Ia e amoina Lona lava satauro i Kalevaria, lea na faamae’aina ai le tiga o le Togiola a o tutu’i atu o Ia i lena satauro ma faia ia mafatia ai i le tiga e le gafatiaina. Sa Ia faia le finagalo o Lona Tama. Sa puapuagatia o Ia ma tuuina atu Lona soifua.
O Le Faasatauroga, saunia e Harry Anderson
E pei lava ona sa valoia e Ia ma Ana perofeta, sa Toetu mai o Ia mai le tuugamau i le aso lona tolu. Na avea o Ia ma tagata muamua na toetu mai. Ona o Ia, o i latou uma o e na ola o le a maua le meaalofa o le toetu. Faafetai ia te Ia, o le a toefuataiina tino taitasi i o latou autino atoatoa.
Sa totogi e le Faaola le tau mo a tatou agasala ma solitulafono. Ona o Ia, e mafai ai ona togiolaina tagata uma mai le agasala—pe afai latou te salamo.
O le Togiola a Iesu Keriso e le i‘u. Sa Ia laveaiina tagata uma mai le oti e le iu. Sa matua puapuagatia o Ia, e sili atu i mea e mafai ona mafatia ai soo se tagata. O Lona puapuagatia sa mo tagata uma sa i ai i se aofaiga e le iu o lalolagi na foafoaina e Ia (tagai Mataupu Faavae ma Feagaiga 76:24; Mose 1:33).
E na o Iesu lava e mafai ona ofoina atu lea ituaiga Togiola e le i’u, talu ai ona sa soifua mai o Ia i se tina faitino, ma se Tama e tino ola pea. O lena mea na avea ai Iesu o se Tagata e leai se gataaga—na o Ia lava e mafai ona filifili e tuuina atu Lona soifua ma toe aveina i luga (tagai Ioane 10:14–18). O le soifuaga atoatoa o le Faaola o se agavaa taua foi mo Ia ina ia mafai ai ona faamalie manaoga o le faamasinotonu mo i tatou (tagai Alema 34:8–14).
O Lana misiona i le lalolagi—lea e aofia ai Lana Taulaga Togiola ma Lona Toetu mai le oti—ua tuuina mai ai ia i tatou taitoatasi avanoa mo le togiolaina mai le agasala ma se toetu mamalu! O la tatou aitalafu ia te Ia e le mafai ona fuatiaina.
E Le I‘u ma Patino
E le i’u le Togiola a Iesu Keriso. Ae sa patino foi. E faaopoopo atu i le alofa atoatoa sa ia te Ia mo Lona Tama, sa uunaia foi o Ia e Lona alofa mo fanau taitoatasi a le Tama Faalelagi. Ma o Lana Togiola ua faamanuiaina ai i tatou taitoatasi i se auala patino lava. Faitau ma le faaeteete le faamalamalamaga lenei mai le Faaola:
“Aua faauta, o A’u le Atua na puapuagatia i nei mea mo tagata uma, ina ia latou le puapuagatia pe afai latou te salamo;
“Ae afai latou te le salamo, o le a latou mafatia e pei lava o A’u;
“O le mafatia lea na oo ai ia te a’u lava, o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou le inu i le ipu oona, ma ma’e’e—
“A e ui i lea, ia i le Tama le viiga, ma na ou inu ma faaumaina ai a’u tapenapenaga mo le fanauga a tagata” (Mataupu Faavae ma Feagaiga 19:16–19).
Sa puapuagatia loloto Iesu aua e alofa tele o Ia ia te oe! E finagalo o Ia ia e salamo ma ia liua ina ia mafai ona Ia faamaloloina atoatoa oe.
O le Togiola a Iesu Keriso e mo oe. Na Ia tauaveina i Ona lava luga au agasala. Sa Ia totogia le tau mo au agasala ina ia mafai ai ona e salamo. Ua Ia tuuina mai le mana mo oe e aveese ai mauga uma o le afetaia’i ma oe. E te mauaina lena mana i lou faatuatua, faalagolago, ma le naunautaiga e mulimuli ia te Ia.
A o e tatalo ma suesue ma le faamoemoega, e mafai ona e aoao pe faapefea ona faamanuiaina oe e Lana misiona. Ma e mafai e le Agaga Paia ona aoao atu ma molimau atu ia te oe i le taua e faavavau o Lana Togiola.
Ou te faafetai i le Atua mo Lona Alo, o Iesu Keriso. O Ia “o le toetu, ma le ola” (Ioane11:25). O loo soifua o Ia. Ma lo‘u loto atoa, ou te alofa ia te Ia, ma ou te molimau atu ia te Ia. Ou te molimau atu o Ia o le Alo o le Atua soifua. O Iesu o le Keriso—o lo tatou Faaola ma le Togiola.