Tatalo i Vaitafe Malulu

Ata

teineitiiti o loo tauivi i le vai, o le isi teineitiiti i le vaa alo

Ata na tusia e Corey Egbert

I le taimi o se malaga tolauapi ma o matou aiga, sa ma o atu ai ma la‘u uo o Bayley i ni vaa alo i luga o le vaitafe. Sa tele ni a‘u faataitaiga o le alovaa, ae e lei faia lava e Bayley. Ina ua uma ona ou aoaoina o ia i tulaga faavae, sa ma faamauina o ma ofu faaola ma feosofi i totonu o ma vaa.

O se tautotogo malulu, ma sa matuai malulu le vai. Sa ma aloalo solo ina ua ou faalogoina se faapisi. Sa ou toe tepa i tua ma vaaia le pito i lalo o le vaa lanumeamata a Bayley. Sa amata ona televave lo‘u mafaufau. Sa ou tatalo ina ia toe sau o ia i luga.

Mulimuli ane, na sau i luga Bayley, ma tau manava. O le mea e faafetai ai, sa papa‘u le vai sa mafai ona ia pa’i atu i le eleele. Ae sa tauivi pea o ia e faau lana vaa i le itu sa’o. Sa ou taumafai e fesoasoani ia te ia, ae sa faigata a o ou i ai i totonu o la’u va’a.

Sa ta’u mai e Bayley ia te a’u sa pepe ona vae. Na amata ona popole o ia. Sa uunaia a’u e fai se tatalo faatasi ma ia. O le taimi lava na uma ai le tatalo mo le saogalemu ma le taitaiga, sa ou lagona le faamafanafanaina; Sa ou iloa o le a lelei mea uma.

Sa ou oso i totonu o le vai malulu. Sa ou fesoasoani ia Bayley e oso i totonu o la‘u va’a ma faau sa’o lana va’a. Sa ou uuina au o vaa uma ma tausavali i le vai palapala agai atu i le matafaga.

Ou te faafetai na aoaoina a’u e o’u matua e tatalo e le aunoa, aemaise lava i tulaga faigata. O la‘u tatalo na taialaina a’u e fesoasoani i la‘u uo o loo manaomia le fesoasoani.

O nisi taimi tatou te o ai i le lotu ma tatou te le faalogo. Pe tatou te faitau i tusitusiga paia ma lagona e le faatatau ia i tatou. Ae a oo mai faigata ma tofotofoina lo tatou faatuatua, o mea faigofie e aoaoina ai i tatou e mafai ona faamanuiaina ai i tatou.

Adaline L., Motu o Prince Edward, Kanata