“Nofo i Totonu o le Vaafaaola,” Mo Le Malosi o le Autalavou, Ape. 2022.
Nofo i totonu o le Vaafaaola
Pe a tau sa’e le lalolagi, e pei ona sa tupu i le Titanic, e amata e nisi tagata ona saili mo se vaafaaola. O Iesu Keriso ma Lana Ekalesia o le vaafaaola.
Ata na tusia e Melissa Manwill
“O se taimi leaga lenei e avea ai ma talavou,” sa fai mai ai se tasi o talavou ia te a’u. “E lagona le pei ua malepelepe le lalolagi.”
“Ua tatou feagai moni lava ma ni luitau,” sa ou tali atu ai. “Ae mafaufau i ai faapenei: O le lalolagi o le Titanic , ma o le Ekalesia o le vaafaaola! O se taimi sili lea mo oe e te avea ai ma talavou! O loo e i ai i totonu o le vaafaaola—o le nofoaga sili e aapa atu ai ma fesoasoani i isi.”
Ina ua alu le Titanic i lana mua’i malaga i le 1912, sa fai mai tagata o se vaa e le mafai ona magoto. Peitai, ina ua taia se poloka aisa i le ogatotonu o le Vasa o le Atelani i matu, sa amata ona magoto. Sa ta‘u atu e le kapeteni i tagata uma e o atu i vaafaaola, ae sa latou talitonu o loo latou i ai i se vaa e le mafai ona magoto. O le toatele o le pasese na latou le iloa le manaomia ona o i luga o le vaafaaola—seia oo ina oo i se tulaga lamatia le sa’e o le Titanic i le tasi itu. Ona mananao lea o tagata uma e o i luga o se vaafaaola. 1
Ae i lena taimi, ua tuai tele.
I le 2019 na folafola mai ai e nisi tagata, “E leai se mea e mafai ona taofia le tamaoaiga o le lalolagi. Ua maualalo le numera o tagata leai ni galuega i le salafa o le kelope nai lo se isi lava taimi.” Ona oo mai ai lea o se vairasi e le mafai ona tatou vaai i ai, ma na aafia ai le lalolagi. E lē gata na mamaʻi le faitau miliona o tagata ma maliliu ai le toʻatele, ae o le toʻatele foʻi na lē toe maua ni galuega ma na i ai le fefe i soo se mea. I le taimi o le faama‘i oti, e toatele tagata na oo ina iloa le ala ua avea ai Iesu Keriso ma Lana Ekalesia o se vaafaaola.
Talitonu i le Atua
O se suesuega lata mai faavaomalo na faaalia ai o le toatele o tagata talavou o loo tautino atu i latou lava o ni tagata le talitonu nai lo se isi lava taimi muamua. E manatu nei tagata o le talitonuga i le Atua e leai se eseesega pe a oo i le avea ma se tagata lelei, amio mama, ma faamaoni. 2
O le luitau lenei: Ua tuuina mai e le Atua ia i tatou le saolotoga e talitonu ai ia te Ia pe leai, ae e le sao le faapea atu e leai lava se eseesega. O lo tatou talitonuga i le Atua e aafia ai le ala tatou te vaai ai ia i tatou lava ma le auala tatou te vaai ma taulima ai isi. Ua faaalia i suesuega e faapea i taimi o faigata ma faalavelave, e sili atu le taulimaina e tagata talitonu nai lo tagata e le talitonu. 3
Faatauaina o Lotu Faatulagaina
E toatele tagata e talitonu i le Atua ae le o tapuaiga faatulagaina. Latou te fai mai, “O a’u o se tagata faaleagaga, ae le o se tagata lotu.” Na aoao mai Elder Jeffrey R. Holland o le Korama a Aposetolo e Toasefululua e faapea o le faaleagaga, atonu o le pau lea o le mea tatou te manaomia pe afai tatou te nonofo na o i tatou i luga o tumutumu mauga, ae o loo tatou nonofo i aiga, nuu, faalapotopotoga. 4 E faigofie ona nofo toatasi i luga o se tumutumu mauga ma fai atu, “Ou te alofa i tagata uma.” Faatasi ai ma le leai o ni tagata, e te le tau faatinoina lava lena talitonuga faaleagaga. Tatou te manaomia tulaga masani ma tulaga faatonuina o tapuaiga e fesoasoani ia i matou e aumaia faʻataʻitaʻiga e pei o le “alofa i tagata uma” e oʻo lava i le mea moni o le taimi e le alofagia ai se tasi. O le mea lena e fesoasoani le Ekalesia a Iesu Keriso ia i tatou e fai.
O nisi tagata e fai mai e le manaomia se tapuaiga faatulagaina, ae latou te manaomia ni a‘oga, nuu, faleoloa, ma falemai faatulagaina. Latou te vaaia le manuia o le o atu i se falemai lea e faatulaga ai le galuega ma le aufaigaluega ma o loo i ai tulafono ma faamoemoega mo tagata uma. Tatou te vaaia faamanuiaga lava ia i totonu o se Ekalesia faatulagaina.
Fesoasoani i Isi ia Maua le Vaafaaola
Pe a tau sa’e le lalolagi, e pei ona sa tupu i le Titanic, e amata e nisi tagata ona saili mo se vaafaaola. O Iesu Keriso ma Lana Ekalesia o le vaafaaola. O se taimi sili lenei e avea ai ma se tagata talavou aua e mafai ona e faia se eseesega! Ua e i ai i se tulaga matagofie e fesoasoani ai i isi ia maua mea na latou misia a o lei tuai. Aua le toe foi i le Titanic. Nofo i totonu o le vaa-faaola lea e mafai ona e maua ai le saogalemu, malosi, ma le avanoa e fesoasoani ai i isi e faatasi ma oe.