“Agai i Luma ma Faalagolago i le Alii,” Mo Le Malosi o le Autalavou, Ape. 2022.
Sau, Mulimuli Mai ia te A’u
Esoto
Agai i Luma ma Faalagolago i le Alii
Pe a e tuu atu lou faalagolago i le Alii, ua ia te oe Lana fesoasoani i aso taitasi.
Mafaufau faapea sa e i ai faatasi ma Mose a o ia taitaia le fanauga a Isaraelu mai Aikupito ma noataga o le pologa. A o tolauapi ai i tafatafa o le Sami Ulaula, ua e vaaia le ami a Aikupito o agai atu ia te outou i a latou kariota. Ua auina atu e Farao i latou ia te outou.
O le Sami Ulaula o loo i tou luma. O loo i tou tua le autau a Farao. Ua maileia outou!
O le toatele o loo siomia oe ua fefefe. Ua latou fai mai sa sili ai le nonofo i Aikupito nai lo le oti i le vao. Ua e faalogo o ta‘u atu e Mose i tagata uma e talitonu “o le a tau Ieova mo outou” (Esoto 14:14).
Ona uu lea e Mose lona tootooma faaloaloa atu lona lima i luga o le Sami Ulaula. Na faafuasei lava, ona mafai e oe ma le fanauga uma a Isaraelu ona ui atu i le eleele matutu (tagai Esoto 14:16–22). Ua saunia e le Alii se ala e solaese ai.
O le vaeluaina o le Sami Ulaula o se tasi lea o vavega aupito ofoofogia i le Tusi Paia. Sa mafai e Mose ona faia lenei vavega ona sa ia tuu atu lona faalagolago i le Alii. Vaai faalemafaufau i mea e mafai ona e ausia a o e faia foi faapena!
O Le Mana o le Faalagolago
Atonu e le valaauina i tatou e fetaiai ma luitau na oo ia Mose, ae o le a i ai pea o tatou lava luitau tulaga ese. O le tali i o tatou luitau e tutusa lava ma le tali mo Mose: faalagolago i le Alii.
Sa iloa e Mose ua na o le Alii lava e mafai ona laveaiina le fanauga a Isaraelu. Sa ia iloaina lenei mea ona sa ia maua ni aafiaga i le aoao e faalagolago i le Alii i le amataga o lona olaga (tagai Esoto 1:12; 3:2–10; 7–11).
Mafaufau e uiga i aafiaga na e maua po o isi e te iloa na ta‘u atu ai ia te oe e mafai ona e faalagolago i le Alii. O i latou e mafai ona fesoasoani ia te oe ia faatuatua ia te Ia i le taimi nei. O ni nai auala nei e mafai ai e le tuuina atu o lou faalagolago i le Alii ona fesoasoani ia te oe a o e i ai i aso taitasi.
Talitonu o Le A Lelei Mea Uma
O nisi taimi, o le faalagolago i le Alii e mafai ona faigata, ae maise lava pe a le mafai ona e iloa pe o a mai mea o le a tutupu. I taimi faapenei, ua uunaia i tatou ia “saili ma le filiga, tatalo e lē aunoa, ma ia talitonu, ma o le a galulue faatasi mea uma mo lo outou lelei” (Mataupu Faavae ma Feagaiga 90:24). Na aoao mai Elder Gerrit W. Gong o le Korama a Aposetolo e Toasefululua, e moni lenei mea ona o le Tama Faalelagi ma Iesu Keriso, “ua silafia le ala e mafai ona galulue faatasi ai mea uma, ma La te silafia le mea e lelei mo i tatou.” 1
Faalagolago i Faaaliga
Na faapefea ona iloa e Mose le mea e fai ina ua maileia o ia ma le fanauga a Isaraelu? Ua aoao mai tusitusiga paia e faapea o le “agaga o faaaliga” (Mataupu Faavae ma Feagaiga 8:3). E pei o Mose, e mafai ona tatou faalagolago i uunaiga ma musumusuga e tuuina mai e le Alii ia i tatou e ala i le Agaga Paia.
Na aoao mai Peresitene Russell M. Nelson e mafai ona tatou “maua mai le taiala ma le taitaiga, ia lapata’ia e uiga i mea lamatia ma mea faalavefau, ma ia mafai ai ona faataunuu mea e le mafai ona tatou faia e i tatou lava ia.” 2
Fai le Laasaga Muamua
Sa faaalia e Mose ma le fanauga a Isaraelu lo latou faalagolago i le Alii ina ua latou faia a latou laa muamua i le eleele matutu i le mea sa i ai le sami.
Tatou te faaalia lo tatou faalagolago i le Alii pe a tatou maua le lototele e faia ai mea ua poloaiina ai i tatou e le Alii. O nisi taimi o lona uiga e tatau ona tatou “savavali i le faatausiusiuga o le malamalama, ona sosoo ai lea ma ni nai laa i le pogisa; ona susulu mai ai lea o le malamalama ma faaali atu le ala i o outou luma.” 3
Manatua le Galuega Sili e Faia e le Alii mo Oe
Ina ua mavae lo latou aafiaga i le Sami Ulaula, sa “vaai le fanauga a Isaraelu i lena galuega tele na faia e le Alii … ma sa talitonu i le Alii, ma lana auauna o Mose” (Esoto 14:31). Ae paga lea, sa galo ia i latou nei mea i le aluga o taimi. E le lava le vaaia o le galuega sili a le Alii i o tatou olaga; e manaomia foi ona tatou manatua mea sa Ia faia mo i tatou. A o tatou faia, o le a tatou maua le faatuatua e toe tuu atu ai lo tatou faalagolago ia te Ia.