Fesili ma Tali

“E mafai faapefea ona ou maua le ‘olioli i le faigamalaga’ pe a foliga e faigata tele?”

“O le a i ai ni ou aso o le a e matuai lotovaivai ai lava. O lea ia tatalo ai mo le malosi ia aua le fiu! … Ma o nisi o mea o le a foliga mai lava e le talafeagai. Ae peitai, ou te folafola atu ia te oe ao e mulimuli ia Iesu Keriso, o le a e maua le filemu tumau ma le olioli moni.”

Peresitene Russell M. Nelson, “O Le Lumanai o le Ekalesia: Sauniaina o le Lalolagi mo le Afio Mai Faalua o le Faaola” (Ensign, Ape. 2020, 17).

Manatua Mea e Faaosofia ai Oe

“O nisi taimi e mafai ona faigata ona vaai ifo le tagata ia te ia lava mo le faaosofia. Ina ia fesoasoani ia i tatou, e mafai ona tatou manatua mea e uunaia ai i tatou e agai i luma, e pei o o tatou aiga ma a tatou sini faaletagata lava ia ma le faaleagaga. E mafai ona tatou maua le talitonuga e faapea, i nisi taimi o le a faigofie atu le malaga. O faafitauli taitasi tatou te feagai o le a fesoasoani ia i tatou e tuputupu ae ai.”

Karime R., 17, Mekisiko

E Aumai e le Molimau le Filemu

alii talavou

“O le tausaga na te‘a nei, sa ou faalagolago tele ai i la’u molimau o le Tusi a Mamona ma le Ekalesia toefuataiina. Mai se faama‘i oti i le maliu o lo’u tama, ou te iloa o loo i ai le Atua iina ma o loo i ai se fuafuaga. O le iloaina e moni le talalelei na fesoasoani lea ou te faatumauina ai se lagona o le filemu a o siomia a‘u e afa o le olaga.”

Ethan G., 17, Iuta, ISA

Liliu Atu ia i Latou E te Faatuatuaina

alii talavou ma se tamaitai talavou

“E tatau ona tatou faalagolago i le Atua ma Iesu Keriso. E mafai ona tatou lagonaina le olioli, aua e faatasi pea i La‘ua ma i tatou. O le a La fesoasoani ia i tatou e fai le mea sa‘o e tusa lava pe faigata. E tofu uma i tatou ma faigata, ae e i ai foi tagata e mafai ona tatou faalagolago i ai e fesoasoani ia i tatou, e pei o o tatou matua ma taitai.”

Caique O., 16, ma Kaylane O., 14, Potukale

Manatua Pe O Ai Oe

tamaitai talavou

“Pe a ou lagona ua le mafai ona ou faaauau, ou te tu ma mafaufau e uiga i le silisiliese o le Tama Faalelagi. O le manatuaina o a‘u o le afafine o se Atua mamana faapena e fesoasoani ia te a‘u ia iloa lo‘u gafatia paia ma uunaia a‘u e faaauau pea.”

Solene M., 15, Pasila

Maua le Malosi i Mea o Aso Taitasi

tamaitai talavou

“E manaomia ona tatou tumau malolosi i taimi faigata. O le tumau malosi e faigata, ae e faigofie atu pe a ou faia mea o aso taitasi e taua moni lava, e pei o le faitauina o tusitusiga paia ma le tatalo. Pe a i ai ni a‘u tatalo anoa, ou te lagonaina le malosi ma le naunautaiga e fai le mea sa‘o.”

Emily H., 16, Kanata

Mulimuli i le Agaga i Aso Taitasi

tamaitai talavou

“O nisi taimi ou te fesili ai foi ia te a‘u lava i lenei fesili. Ae a o tatou vaavaai atu i le Faaola i mea uma tatou te faia, e mafai ona tatou maua le olioli ma le fiafia i lenei olaga e ui lava i mea o loo tatou feagai ai. Aoao e mulimuli i le siufofoga o le Agaga i aso taitasi, ma o le a e maua le olioli moni i le olaga.”

Pauline K., 17, Fiti

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

“E mafai faapefea ona ou iloaina aafiaga faaleagaga o aso uma i lo‘u olaga?”

Auina mai lau tali ma le ata ae lei oo i le aso 15 o Me, 2022.

Imeli mai ia i matou i le [e-mail]. Pe alu i le ftsoy. ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono faapupuuina ia tali mo le uumi po o le manino.