Faaaogaina ma le Fetuunaiina o Aoaoga o Mataupu Aoaoina a le Seminare

E tele auala aoga e saunia ai e aoao atu le talalelei a Iesu Keriso. O lenei sauniuniga e aofia ai i taimi uma le suesueina ma le agaga tatalo o le afioga a le Atua ma le sailia o le taitaiga a le Agaga Paia ia iloa ai le auala sili e fesoasoani ai ia i latou o loo e aoaoina ina ia faaloloto lo latou liua ia Iesu Keriso ma Lana talalelei toefuataiina.

O mataupu aoaoina a le seminare o se punaoa e mafai ona e faatuatuaina e taiala ai oe i au sauniuniga o lesona ma fesoasoani ia te oe e aoao atu aoaoga faavae moni. A o e faaaogaina lenei punaoa, saili muamua e faaaoga mea o loo i le mataupu aoaoina, ona mafaufau lea i manaoga o au tamaiti aoga ma le taitaiga a le Agaga Paia ina ia malamalama ai i le mea atonu e te manaomia e fetuunai ai nisi o manatu o mataupu aoaoina.

Mafaufau i le fautuaga o loo i lalo a Peresitene Dallin H. Oaks o le Au Peresitene Sili e uiga i le faaaogaina o le mataupu aoaoina e saunia ai lesona o le seminare:

E muamua ona tatou faaaoga, ona tatou fetuunaia ai lea. Afai ua tatou malamalama lelei i le lesona o le a tatou tuuina atu, ona mafai lea ona tatou mulimuli i le Agaga e fetuunaiina. Ae e i ai le faaosoosoga, a tatou talanoa e uiga i lenei fetuunaiga, e amata muamua i le fetuunaiina nai lo le faaaogaina. O se faapaleniina. O se luitau e faaauau pea. Ae o le fautuaga o le faaaoga muamua ona fetuunai ai lea o se auala lelei e tumau ai i luga o se nofoaga mautu. (“A Panel Discussion with Elder Dallin H. Oaks” Faasalalauga faasatelite mo Seminare ma Inisitituti Faalelotu, Aok. 7, 2012], broadcasts.ChurchofJesusChrist.org)

• Aisea e te manatu ai e taua le faaaoga muamua o mea o loo i mataupu aoaoina a o lei fetuunaia le lesona?

Faaaogaina o Mataupu Aoaoina

O le sini faamoemoeina o Seminare ma Inisitituti o Mataupu Faalelotu o loo faapea mai tatou te “fesoasoani i le autalavou ma talavou matutua ia faalolotoina lo latou liua ia Iesu Keriso ma Lana talalelei toefuataiina.” O le faamoemoega o loo faaauau ona tau mai ai mea nei e uiga i le fesoasoani i tamaiti aoga e faaloloto le liua:

Tatou te faatotonugalemuina aafiaga taitasi e aoao ai e uiga ia Iesu Keriso ma Lana faataitaiga, uiga auaumama, ma le mana togiola. Tatou te fesoasoani i tamaiti aoga e aoao atu le talalelei toefuataiina a Iesu Keriso e pei ona i ai i tusitusiga paia ma upu a perofeta. Tatou te fesoasoani i tamaiti aoga e faataunuu la latou matafaioi i le aoaoina mo i latou lava. Tatou te tauivi e valaaulia le Agaga Paia e faataunuu Lana matafaioi i aafiaga taitasi e aoao ai.

Ua mamanuina ma le faaeteete le mataupu aoaoina o le seminare e fesoasoani ia te oe e tuuina atu ai lenei ituaiga o aafiaga e aoao ai. O lesona taitasi e taulai atu le aafiaga e aoao ai ia Iesu Keriso (e totonugalemu ia Keriso), fesoasoani i tamaiti aoga e aoao le talalelei mai tusitusiga paia ma upu a perofeta (e faavae i tusitusiga paia), ma tuuina atu avanoa mo tamaiti aoga e faataunuu ai la latou matafaioi i le aafiaga o le aoaoina (taulai atu i tagata aoao). O le tuufaatasia o nei elemene taua e tolu o le faamoemoega, tatou te valaaulia ai le Agaga Paia e faataunuu Lana matafaioi i le aafiaga o le aoaoina. O leAoao Atu i le Ala a le Faaola ua faailoa mai ai “O le Agaga o le faiaoga moni ma le punavai moni o le liua.” Seiloga lava e auai le Agaga ona mafai moni lea ona tupu le faalolotoina o le liua i le Faaola.

O lenei siata o loo faaalia ai se aafiaga e totonugalemu ia Keriso, e faavae i tusitusiga paia, ma taulai atu i tagata a’oa’o lea e valaaulia ai le Agaga Paia e faatino Lana matafaioi. O le lanu samasama e faailoa mai ai le maualuga e sili atu ona valaaulia ai e le aafiaga o le aoaoina le Agaga Paia. O le ogatotonu o lenei siata o loo faaalia ai le taimi o loo taitaia ai e le Agaga le aafiaga o le aoaoina ma faalolotoina ai e tamaiti aoga lo latou liua ia Iesu Keriso ma Lana talalelei toefuataiina. O le faaaogaina o mataupu aoaoina o le seminare, tatou te faateleina ai le avanoa o le a maua ai e tamaiti aoga se aafiaga e aoao ai e taitaia e le Agaga i le seminare. Ua iloiloina ma le faaeteete ma faamaopoopoina mataupu aoaoina o le seminare e fesoasoani ia te oe:

• Ia mautinoa le sa’o o mataupu faavae.

• E atagia mai ai le faamoemoega o le tusitala musuia.

• Ia faatumauina se faiga paleni i le faataitaia o mataupu faavae o aoaoga faaKeriso o loo maua i le Aoao Atu i le Ala a le Faaola.

• Tuuina atu ni aafiaga e aoao ai mo tamaiti aoga e faasoa atu ma faataitai mea o loo latou aoaoina.

• Faaaoga metotia eseese.

E tele ni manatu taua e tatau ona manatua pe a saunia se lesona. O le faaaogaina o mataupu aoaoina e mafai ona fesoasoani e taiala ai oe i mea uma ma le auala e aoao atu ai. E mafai foi ona fesoasoani ia te oe e tumau ai i se faavae mautu o mataupu faavae.

O nisi nei o auala e mafai ona e faaaogaina ai le mataupu aoaoina:

• Faitau ma le totoa le faamoemoega o le lesona. O loo maua lenei mea i le pepa o faamatalaga o le vaaiga aoao ma le fuaiupu mulimuli o le folasaga i lesona taitasi. O anotusi ma gaoioiga uma e ogatasi ma lenei faamoemoega po o le taunuuga o le aoaoina.

• Faitau i le lesona. Mafaufau pe mafai faapefea e mau filifilia o le a faitauina e tamaiti aoga, o upumoni, upusii, ma gaoioiga ona ogatasi ma le faamoemoega o le lesona ma tuuina atu ai se aafiaga e totonugalemu ia Keriso, e faavae i tusitusiga paia, ma taulai atu i tagata aoao. Ia gauai lelei atu i le gaoioiga e aoao ai i le latalata i le faaiuga o le lesona, lea e tuuina atu ai i tamaiti aoga se avanoa e faataitai ai le faamoemoega o le lesona.

• Mafaufau e tali fesili ma faia gaoioiga e pei o oe o se tamaitiiti aoga. E mafai ona fesoasoani lenei mea ia te oe e aoao ai e ala i le Agaga ma ulufale atu ai i le potuaoga ua faagaeetia, siitiaina, ma saunia lelei e tuuina atu se aafiaga faapena mo au tamaiti aoga.

• Ia saili ia malamalama ma aoao atu ituaiga uma o lesona o loo maua i le mataupu aoaoina, e tusa lava pe fou ia te oe. (O ituaiga o lesona e aofia ai lesona o le Kosi o Tusitusiga Paia, lesona Faataitai o le Taulotoina o Aoaoga Faavae, lesona e Iloilo ai lou Aoaoina, ma lesona o Sauniuniga mo le Olaga.) O nei aafiaga taitasi e aoao ai e saofaga i ni auala tulaga ese e faalolotoina ai le liua o tamaiti aoga ia Iesu Keriso ma Lana talalelei.

O le filifili e faaaoga mea o loo i le mataupu aoaoina atonu e faapitoa lava le taua i lesona o Sauniuniga mo le Olaga. O nei lesona e taulai atu i autu taua eseese mo olaga o tamaiti aoga. Na atiina ae faatasi ma le fesoasoani a matagaluega eseese a le Ekalesia ma isi tagata tomai faapitoa i mataupu. O nisi faiaoga atonu e lagona e le agavaa e aoao atu ni mataupu faapitoa o Sauniuniga mo le Olaga ae e manatu ifo iai lo latou tomai i isi mataupu o Sauniuniga mo le Olaga. I soo se tulaga lava, o le a atamai faiaoga e faaaoga le mataupu aoaoina a o lei saili e fetuunai. (Tagai i mataupu faale-suesuega a Brother Alvarez ma Sister Sato o loo i lalo.)

Suesuega o tulaga mo le faaaogaina o mataupu aoaoina

Uso Alvarez—O se faiaoga e lagona le le agavaa e aoao atu se lesona faapitoa o Sauniuniga mo le Olaga

O Uso Alvarez o se tagata liliu mai i le Ekalesia ma e lei auauna atu i se misiona faafaifeautalai. E lagona e ia le le agavaa e aoao atu sauniuniga faafaifeautalai, aua na te lei auauna lava i se misiona ma mafaufau e faamisi le vaega o Sauniuniga mo Faifeautalai o le lesona o Sauniuniga mo le Olaga. Ae peitai, a o amata ona ia vaai i lesona, na ia matauina o loo taulai atu ia Keriso o se faataitaiga atoatoa o le faasoaina atu o Lana talalelei ae e le faalagolago i ona lava aafiaga. E aofia ai mau malamalama ma gaoioiga e fiafia i ai e fesoasoani ai i ana tamaiti aoga e saunia e auauna atu o ni faifeautalai mo le Alii. Na ia iloaina o lesona o mataupu aoaoina e mafai ona fesoasoani i ana tamaiti aoga ia maua se aafiaga maoae e ui lava i le leai o sona lava poto masani i sauniuniga faafaifeautalai.

Sister Sato—O se faiaoga e tele lona tomai i se mataupu faapitoa i Sauniuniga mo le Olaga

O loo sauniuni Sister Sato e aoao atu se lesona o le Sauniuniga o le Olaga e uiga i le puleaina o mea tautupe. O ia o se tagata e fuafuaina mea tautupe faapolofesa ma e fiafia e faasoa atu lona malamalama ma aafiaga i lana vasega seminare. A o ia suesueina ma le agaga tatalo le mataupu aoaoina, sa ia iloaina le faigofie o le anomea ma le faamamafa ia Iesu Keriso ma tusitusiga paia. Ua ia fuafuaina o le aoaoina atu o le lesona e pei ona otootoina i le mataupu aoaoina o le a fesoasoani i ana tamaiti aoga e faamalosia ai lo latou faatuatua ia Iesu Keriso ma tuuina atu ai ia i latou mataupu faavae autu o mea tautupe e talafeagai mo o latou tulaga i le olaga. Nai lo le sauniuni e aoao atu ni mataupu faavae e sili atu ona maualuga o mea tautupe, ua filifili Sister Sato e pipii vavalalata i le lesona o loo i le mataupu aoaoina.

Fetuunaiina o Mataupu Aoaoina

I le avea ai ma se faiaoga seminare, ua e i ai i se tulaga faamanuiaina e fesoasoani ai i au tamaiti aoga e o mai ia Iesu Keriso. E ala i au fegalegaleaiga masani ma au tamaiti aoga, o le a e iloa lelei ai ma alofa ia i latou. O le iloaina ma le alofa i au tamaiti aoga o le a faateleina ai lou gafatia e maua musumusuga mai le Agaga Paia e uiga i le taimi ma le auala e faia ai fetuunaiga i mataupu aoaoina. A o e saunia lesona e faaaoga ai mataupu aoaoina, amata lau sauniuniga i le tatalo. O le a musuia oe e le Tama Faalelagi e ala i le Agaga Paia i fetuunaiga, pe afai e i ai, e mafai ona e faia i le anotusi o le lesona ina ia fetaui lelei ai ma manaoga ma tomai o au tamaiti aoga.

O mafuaaga e mafai ona e fetuunai ai se lesona e aofia ai:

• Ina ia fesoasoani i tamaiti aoga i mataupu ma fesili o le taimi nei. (Tagai i le tulaga suesueina a Brother Jones.)

• Ina ia sili atu ona talafeagai se vaega o le lesona e faavae i manaoga, tomai, aganuu, po o punaoa o loo maua a au tamaiti aoga. (Tagai i tulaga suesueina a Sister Dube, Brother Reyes, ma Sister Rodriguez.)

• Ina ia faaaoga faamatalaga, taitaiga, po o punaoa e sili atu ona lata mai na saunia e taitai o le Ekalesia. (Tagai i le tulaga suesueina a Sister Schmidt.)

• Ina ia maua se auala sili atu e ausia ai se vaega patino o le lesona. O faataitaiga e mafai ona aofia ai le fetuunaia o se lesona o mea faitino i se auala e saunia ai pea mafaufau ma loto o tamaiti aoga ina ia aoaoina pe valaaulia tamaiti aoga e faatino se tala mai tusitusiga paia nai lo le matamata i se vitio o loo faaalia ai le mea lava lea e tasi na tupu. (Tagai i le tulaga suesueina a Brother Li.)

A o lei fetuunai le mataupu aoaoina, mafaufau e fesili ifo ia te oe lava i fesili e pei o nei:

• Pe o maua pea e la’u fetuunaiga se aafiaga e aoao ai e totonugalemu ia Keriso, e faavae i tusitusiga paia, ma e taulai atu i tagata aoao?

• Pe o ogatusa la’u fetuunaiga ma uunaiga a le Agaga Paia ma mataupu faavae o aoaoga faaKeriso o loo maua i le Aoao Atu i le Ala a le Faaola?

• Pe o atagia mai i le fetuunaiga le faamoemoega o le tusitala musuia?

• Pe o taulai atu le fetuunaiga i mataupu faavae o le liua?

• Pe ua ou malamalama i le auala e mafai ai e la’u fetuunaiga ona aafia ai lesona ma aafiaga o le iloiloga i le lumanai mo tamaiti aoga?

Suesuega mo le fetuunaiina o mataupu aoaoina

Uso Jones—Fetuunai o se lesona e faavae i mataupu o loo tutupu i le taimi nei ma manaomia vave ona talanoaina.

Sa saunia ma le filiga Uso Jones i le Aso Faraile a o lumanai le faaiuga o le vaiaso o le konafesi aoao e aoao atu se lesona o le Kosi o Tusitusiga Paia mo le Aso Gafua e sosoo ai. I lona ofo, sa ia faalogo ai i le perofeta o faasilasila mai o le a fausia se malumalu fou i le eria o loo ia faiaoga ai. Na ia silafia o le a o mai tamaiti aoga i le vasega ma le naunau e talanoa e uiga i le malumalu ma e toatele o le a i ai ni fesili e uiga i ai.

Ua lagona e Uso Jones le uunaia e le Agaga Paia e fetuunai lana taiala o le faasologa o lesona e aoao atu ai se tasi o lesona o Sauniuniga o le Malumalu mai le vaega o Sauniuniga o le Olaga o mataupu aoaoina i le Aso Gafua nai lo le lesona o le Kosi o Tusitusiga Paia.

Uso Reyes—Fetuunai o se gaoioiga e faavae i tomai o tamaiti aoga

A o suesueina se lesona, na matauina e Uso Reyes e faalagolago tele le lesona i se faatulagaga o fetufaaiga mo tamaiti aoga. Ua matauina e Uso Reyes e masani lava ona filemu ana tamaiti aoga ma e le tali lelei atu i talanoaga. Peitai, e latou te fiafia lava e tusitusi i a latou api talaaga. Nai lo le taitaiina o se talanoaga, ua ia filifili e tusi ni fesili se lua mai le mataupu aoaoina i luga o le laupapa ma valaaulia tamaiti aoga e tusi a latou tali. Ua ia fuafua e tuu atu i tamaiti aoga e mananao ai e faasoa mai mea na latou tusia.

Sister Rodriguez—Fetuunai o se lesona e faavae i aganuu a le lotoifale

O loo sauniuni Sister Rodriguez e aoao atu se lesona e aofia ai mau faasino e uiga ia Maria, le Tina o Iesu. O loo i ai se aganuu o lagona malolosi ma talitonuga eseese e uiga ia Maria i le nuu e nofo ai Sister Rodriguez. E toatele foi sa tapuai ia Maria ona o lana matafaioi o le tina o Iesu Keriso. A o ia suesueina le lesona mai le mataupu aoaoina, e vaavaai Sister Rodriguez mo se nofoaga talafeagai e fesoasoani ai i tagata aoga ia malamalama i mea na aoao mai e tusitusiga paia ma taitai o le Ekalesia e uiga ia Maria. Ua filifili Sister Rodriguez e fetuunai le lesona e ala i le faaopoopoina o fesili nei e lua i mea o loo aofia ai i le mataupu aoaoina.

“O le a le mea ua fesoasoani le Alema 7:10 ia i tatou ia malamalama ai e uiga ia Maria? A o tatou faamamaluina ma alolofa ia Maria ma isi soo faamaoni i tusitusiga paia, e faapefea ona fesoasoani le Alema 7:11–13 ia i tatou ia malamalama i le mafuaaga tatou te tapuai ai i le na o le Tama Faalelagi ma Iesu Keriso?”

Sister Dube—Fetuunai o se lesona e faavae i punaoa o loo maua

A o saunia e Sister Dube se lesona, sa ia matauina o se tasi o valaaulia o le saili lea e tamaiti aoga o o latou tuaa i le FamilySearch.org. Ua ia iloa o le toatele o ana tamaiti aoga e le mafai ona maua le initoneti. Na te fetuunai ma le atamai le valaaulia ina ia amata ona faatumu e tamaiti aoga pepa o vaega faaleaiga ma talanoa ma le faufautua o le malumalu ma talafaasolopito o aiga a le latou uarota e aoao ai pe faapefea ona latou sailiili i isi igoa o aiga.

Sister Schmidt—Fetuunai o se lesona e faaaoga ai faamatalaga e sili atu ona lata mai mai taitai o le Ekalesia

I le taimi o lana sauniuniga o le lesona, o loo faitau ai e Sister Schmidt se lesona o le a ia aoaoina atu i le aso e sosoo ai. A o faitauina se faamatalaga mai se taitai o le Ekalesia i le lesona, na te manatuaina se faamatalaga e sili atu ona lata mai e mafai ona ausia ai lea lava faamoemoega e tasi. Sa ia suesueina talu ai nei le lauga i lana suesuega patino, ma o loo fou i lona mafaufau. Ua ia filifili e faaaoga le faamatalaga e sili atu ona lata mai i lana lesona nai lo le faamatalaga o loo i le mataupu aoaoina.

Uso Li—Fetuunai o se gaoioiga e aoao ai ina ia ausia lelei ai le faamoemoega

A o sauniuni Uso Li e aoao atu se lesona mai le mataupu aoaoina, sa ia faitauina se fautuaga e aumai se polo soka i le vasega. Na ia matauina o le faamoemoega o le lesona o mea faitino o le fesoasoani lea i tamaiti aoga ia iloa ai o le taua o se polo soka e mafai ona uunaia e ala i le iloa atili e uiga i lona talafaasolopito.

I le manao ai e faataunuu lenei faamoemoega i le auala sili ona aoga mo ana tamaiti aoga, sa ia mafaufau loloto ai mo se minute po o le a le mea e mafai ona ia aumaia i le vasega e sili ona fesootai i ai ana tamaiti aoga. Ua ia filifili e fetuunai le lesona e ala i le aumaia o se asoa faatauvaa i le vasega. A uma ona faasoa mai e tamaiti aoga le tele o o latou manatu pe fia le tau o le asoa, o le a ia faasoa atu po o ai na faia le asoa ma pe aisea e sili atu ai le taua ia te ia o le iloaina o lona talafaasolopito nai lo le mea e ono i ai.

Fautuaga mo le Faaaogaina ma le Fetuunaiina

E ui lava e mafai ona fetuunai soo se mea o i le mataupu aoaoina, ae o le siata o loo i lalo o loo faaalia ai se vaega o le auala e ono sili atu ai ona talafeagai vaega eseese o se lesona e fetuunai nai lo isi.

Mo se faataitaiga, o le faamoemoega o le lesona, o le talaaga o se poloka, po o le upumoni faamatamatatetele atonu e itiiti le talafeagai e fetuunai ai nai lo le auala e amata ai se lesona po o a foi faataitaiga e ono faasoa mai e se faiaoga o se upumoni ua faamatamatateteleina. O mea e latalata atu i le itu agavale e ono tele ina faaaogaina, ae o mea o loo i le itu taumatau e ono masani ona fetuunai. Ia manatua o fautuaga mea nei. E le o faamoemoeina faiaoga e fetuunai mea uma i le itu taumatau, e pei lava ona le faamoemoeina i latou e faaaoga mea uma i le itu tauagavale.

Faaiuga

O le a taialaina oe e le Tama Faalelagi e ala i le Agaga Paia a o e suesue ma le agaga tatalo i Lana afioga ma saunia lesona e faamanuia ai Ona atalii ma afafine. E mafai ona ia fesoasoani ia te oe ia malamalama i le auala e faaaoga ai mea ua saunia i le mataupu aoaoina ma le taimi e fai ai ni fetuunaiga e fesoasoani atili ai i au tamaiti aoga.