o tamaitai talavou o loo suesue i tusitusiga paia

Aoaoga mo Lesona o Sauniuniga mo le Olaga

Vaaiga Aoao

Ina ua uma ona faamalo atu i faiaoga mo a latou taumafaiga e faamanuia le autalavou, sa saunoa Peresitene Henry B. Eyring o le Au Peresitene Sili, “Ae e tele atu mea e manaomia e [a tatou tamaiti aoga]. E toatele naua tagata faauu o le seminare e le agavaa mo le galuega faafaifeautalai. E toatele naua a tatou tamaiti aoga faamaoni e le mauaina ia faamanuiaga o sauniga o le malumalu. O le a faateleina le tele o na mala i totonu o i latou pe afai tatou te le suia” (“We Must Raise Our Sights” [Konafesi a le OAE, 14 Aok., 2001], Gospel Library).

Ua silia ma le 20 tausaga talu ona tuuina mai e Peresitene Eyring lena faamatalaga. E feagai o tatou talavou ma luitau ma mea faafeagai sili atu—e le na o lo latou faatuatua ae faapea foi i isi vaega o o latou olaga. O lesona o Sauniuniga mo le Olaga ua mamanuina e taulimaina ai manaoga o le autalavou o lenei augatupulaga. O nei lesona o Sauniuniga mo le Olaga e tuuina atu ai i tamaiti aoga avanoa e faaaoga ai aoaoga a le Faaola e:

• Taulimaina ai fesili faigata ma tulaga faigata o le olaga.

• Atiina ae le ola tutoatasi e tausia ai le tagata lava ia ma le aiga.

• Ia sili atu ona maloloina faaletino ma faalelagona.

• Atina ae ai tomai e faamanuiaina ai i le aoga.

• Fai ni fuafuaga e saunia ai mo aoaoga ma galuega i le lumanai.

• Saunia mo auaunaga faafaifeautalai ma i le Ekalesia.

• Saunia e osia ma tausia feagaiga i le malumalu.

O nei lesona o le a fesoasoani e taulima ai luitau o loo feagai ma le autalavou i se auala e taulai atu ia Keriso, e faavae i tusitusiga paia, ma taulai atu i tagata aoao lea e taitaia e le Agaga. Faatasi ai ma lesona o le Kosi o Tusitusiga Paia, o lesona o Sauniuniga mo le Olaga e mafai ona fesoasoani e faaloloto ai le liua o tamaiti aoga ia Iesu Keriso ma Lana talalelei toefuataiina.

Lesona o Sauniuniga mo le Olaga ma le Faamoemoega

I lenei aoaoga, o le a e maua ai le avanoa e suesue ai pe faapefea ona mamanuina lesona o Sauniuniga mo le Olaga e ausia ai le faamoemoega o le S&I e pei lava o lesona o le Kosi o Tusitusiga Paia. O lesona taitasi o Sauniuniga mo le Olaga na tusia e tusa ai ma tulaga faatonuina nei i le parakalafa “Aoao Atu” o le faamoemoega o le S&I:

Tatou te faatotonugalemuina aafiaga taitasi e aoao ai e uiga ia Iesu Keriso ma Lana faataitaiga, uiga auaumama, ma le mana togiola. Tatou te fesoasoani i tamaiti aoga e aoao atu le talalelei toefuataiina a Iesu Keriso e pei ona i ai i tusitusiga paia ma upu a perofeta. Tatou te fesoasoani i tamaiti aoga e faataunuu la latou matafaioi i le aoaoina mo i latou lava. Tatou te tauivi e valaaulia le Agaga Paia e faataunuu Lana matafaioi i aafiaga taitasi e aoao ai.

O Lesona o Sauniuniga mo le Olaga e Fesoasoani e Ausia ai le Faamoemoega o le S&I

Faamatalatala

A o e saunia lesona, e aofia ai lesona o Sauniuniga mo le Olaga, e mafai ona fesoasoani le vaavaai pe faapefea ona ausia e le lesona fuaiupu taitasi mai le parakalafa o le “Aoao Atu” o le faamoemoega.

Faataitaiga

O loo i lalo ni filifiliga se lua mai lesona o Sauniuniga mo le Olaga mo le 2025. O le lesona muamua o se lesona o le Soifua Maloloina Faaletino ma Faalelagona ua faaulutalaina “Atiina Ae o Mamanu o Mafaufauga Maloloina.” O le lona lua o se lesona o le Faamanuiaina i le Aoga ua faaulutalaina “Mauaina o Ou Malosiaga ma Tomai.” Vaavaai pe o faapefea ona mamanuina nei gaoioiga e aoao ai, lea e taulai atu i autu eseese, ona ausia ai le faamoemoega o le S&I.

Lesona 186: Atiina Ae o Mamanu o Mafaufauga Maloloina

Totonugalemu ia Keriso: O nisi nei o faataitaiga mai lenei lesona e fesoasoani e faatotonugalemu ai le aafiaga o le aoaoina ia Iesu Keriso. Matau pe o faapefea i nei tulaga, ona talosagaina ai tamaiti aoga e saili le fesoasoani a le Faaola ma aoao mai Ana faataitaiga ma aoaoga.

• E mafai ona e faasoa atu i tamaiti aoga o le a latou faataitai e valaaulia le fesoasoani a le Faaola e faasa’o ai mafaufauga e le sa’o pe le lelei.

• O le a sou manatu i le uiga o le vaai atu ia Iesu Keriso i o tatou mafaufauga? (O nisi o faataitaiga e aofia ai mea nei: mafaufau loloto pe faapefea ona tali atu le Faaola i tulaga tatou te feagai, vaavaai pe faapefea ona faatatau Ana aoaoga i le tulaga, ma manatua Lona alofa.)

Faavae i tusitusiga paia: O nisi nei o faataitaiga mai lenei lesona e fesoasoani i tamaiti aoga e aoao mai tusitusiga paia ma upu a perofeta. Ia matau ua tuuina atu i tamaiti aoga avanoa e suesue ai tusitusiga paia ma o upu a Peresitene Russell M. Nelson e mafai ona fesoasoani i tamaiti aoga ia malamalama ai i lenei mau.

• Faitau le Mataupu Faavae ma Feagaiga 6:36, ma vaavaai i mea ua valaaulia e Iesu Keriso i tatou e faia.

• I le saunoa ai e uiga i lenei mau, na aoao mai ai Peresitene Nelson: “E tatau ona tamau lo tatou taulaiga i le Faaola ma Lana talalelei. E faigata faalemafaufau le taumafai malosi e vaai atu ia te Ia i mafaufauga uma . Ae a tatou faia, ona sosola ese lea o o tatou masalosaloga ma le fefefe” (Russell M. Nelson,“Mauaina o le Mana o Iesu Keriso i o Tatou Olaga,” Liahona, Me 2017, 41).

Taulai atu i tagata a’oa’o: O nisi nei o faataitaiga mai lenei lesona e fesoasoani i tamaiti aoga e faataunuu ai la latou matafaioi i le aoaoina mo i latou lava. Matau ua valaaulia tamaiti aoga e iloa o latou lava manaoga e uunaia ai i latou e auai i le aafiaga o le aoaoina. Ua valaaulia foi tamaiti aoga e faasoa mai o latou lava mafaufauga ma manatu tulaga ese.

• Valaaulia tamaiti aoga e mafaufau loloto pe faafia ona latou matauina o latou lava mamanu o mafaufauga ma pe o na mamanu e foliga mai e aoga pe sa’o.

• O le a se mea ua faagaeetia ai oe mai le saunoaga a Peresitene Nelson?

Taitaiina e le Agaga: O se faataitaiga lenei o se auala e mafai ai e le lesona ona valaaulia le Agaga Paia e faataunuu Lana matafaioi i le aafiaga o le aoaoina. Ua fautuaina faiaoga ina ia faia ma le loto i ai le valaauliaina o tamaiti aoga e saili le taitaiga mai le Agaga Paia. O valaaulia faapenei e mafai ona fesoasoani i tamaiti aoga i a latou taumafaiga e maua musumusuga mai le Agaga Paia i a latou aoaoga.

• Valaaulia tamaiti aoga e saili le taitaiga e ala i le Agaga Paia ina ia malamalama lelei ai i a latou lava mamanu o le mafaufau, aemaise lava pe a tali atu i tulaga faigata.

Lesona 193: Iloaina o Ou Malosiaga ma Tomai

Totonugalemu ia Keriso: O nisi nei o faataitaiga mai lenei lesona e fesoasoani e faatotonugalemu ai le aafiaga o le aoaoina ia Iesu Keriso. Matau le auala e fesootai ai upumoni ua faamatamatatetele i lenei lesona ia Keriso ma valaaulia tamaiti aoga e liliu atu ia te Ia mo se fesoasoani. Ua faamanatu atu foi i tamaiti aoga lo latou faasinomaga paia ma o malosiaga ma tomai ua latou maua o ni faaaliga ia o le alofa ma le alofa mutimutivale o le Atua.

• E mafai ona faailoa mai e tamaiti aoga upumoni e talitutusa ma upumoni nei: E le vaai le Alii i foliga vaaia i fafo ae o totonu o le loto (tagai 1 Samuelu 16:7). Tatou te mafaia ona fai o mea uma e ala i le faamalosi mai o Keriso ia i tatou (tagai Filipi 4:13; Alema 26:12). Ua tele lava le taua o agaga i le silafaga a le Atua (tagai Mataupu Faavae ma Feagaiga 18:10).

• Faamanatu i tamaiti e faapea o le avea ai ma fanau a le Atua o e na foafoaina i Lona faatusa, ua faamanuiaina ai i tatou taitoatasi i malosiaga ma tomai eseese. Atonu e i ai tamaiti aoga e faigata ona iloa malosiaga ma tomai ua faamanuiaina ai i latou e le Atua.

Faavae i tusitusiga paia: O nisi nei o faataitaiga mai lenei lesona e fesoasoani i tamaiti aoga e aoao mai tusitusiga paia ma upu a perofeta. Matau o mau o le a suesueina e tamaiti aoga ua filifilia ma le faamoemoe e liliu atu ai tamaiti aoga ia Iesu Keriso mo Lana fesoasoani. Ona maua lea e tamaiti aoga o se avanoa e suesue ai fautuaga mai se Aposetolo e uiga i le auala e iloa ai nisi o a latou meaalofa na tuuina mai e le Atua.

• Suesue i ni nai fuaitau nei, ma vaavaai mo upumoni e faavavau e mafai ona fesoasoani ia i tatou e iloa ai tomai e ausia ai o tatou gafatia e ala ia Iesu Keriso. 1 Samuelu 16:7; Filipi 4:13; Iakopo 4:7; Alema 26:12; Mataupu Faavae ma Feagaiga 18:10.

• Na faasoa mai e Elder Ronald A. Rasband o le Korama a Aposetolo e Toasefululua nisi o auala e mafai ona tatou iloa ai taleni, malosiaga, ma tomai ua faamanuiaina ai i tatou e lo tatou Tama Faalelagi: “O taleni ua tuuina mai e le Atua ia i tatou e muamua ona iloagofie i mea tatou te fiafia e tulitulimatagauina. Afai o loo e tau mafaufau i au taleni, fai se lisi o mea e te fiafia e fai. Ia aofia ai gaoioiga uma e te fiafia i ai mai itu eseese o lou olaga—faaleagaga, musika, faatinoga, faaakatemia, afeleti, ma isi mea faapena. Suesue ma mafaufau loloto i lou faamanuiaga faapeteriaka mo malamalamaaga ma musumusuga. Faafesootai tagata o le aiga, uo faatuatuaina, faiaoga, ma taitai; o isi e masani ona iloa mai ia i tatou mea e faigata ona tatou vaai i ai ia i tatou lava” (Ronald A. Rasband, “Faataoto a Iesu: O Le Faataoto i Taleni,” Ensign, Aok. 2003, 34).

Taulai atu i tagata a’oa’o: O nisi nei o faataitaiga mai lenei lesona e fesoasoani i tamaiti aoga e faataunuu ai la latou matafaioi i le aoaoina mo i latou lava. Matau le auala e fesoasoani ai nei gaoioiga i tamaiti aoga e mafaufau ai i o latou lava aafiaga ma tulaga. Ua faamoemoe e fesoasoani i tamaiti aoga ia lagona le uunaia e faaaoga o latou loto ma mafaufau i le aafiaga e aoao ai e taulima ai manaoga o loo latou maua i le taimi nei. E maua foi e tamaiti aoga se avanoa e mafaufau ai i luitau moni o loo feagai ma i latou ma le auala e mafai ai e upumoni o loo maua i tusitusiga paia ona fesoasoani ia i latou.

• Mafaufau i tiutetauave po o avanoa faigaluega e te fiafia e tulitulimatagauina i le lumanai. Taumafai foi e faailoa mai tomai ma agavaa e te manaomia pea ona atiina ae o le a fesoasoani ia te oe e saunia lelei ai mo le lumanai.

• E mafai faapefea e nei upumoni ona fesoasoani ia i tatou pe a tatou lagona le lotovaivai e uiga i o tatou tomai?

Taitaiina e le Agaga: O se faataitaiga lenei o se auala e mafai ai e le lesona ona valaaulia le Agaga Paia e faataunuu Lana matafaioi i le aafiaga o le aoaoina. Matau ua valaaulia tamaiti aoga e saili musumusuga mai le Agaga Paia ina ia iloa manino atili ai o latou manaoga i le taimi nei ma isi laasaga ina ia saunia lelei ai mo le olaga.

• A o e suesue i le asō, saili le taitaiga a le Tama Faalelagi e ala i le Agaga Paia e fesoasoani ia te oe e faailoa mai ai malosiaga ma tomai ua uma ona e maua e mafai ona saunia ai oe mo nei tiutetauave.

Faataitai

Faailoa mai se lesona o Sauniuniga mo le Olaga o le a e aoao atu i se taimi vave, e faavae i lau taiala o le faasologa o lesona i le lotoifale. Toe faamanatu le lesona lenei ma vaavaai mo tali i fesili nei:

• E faapefea ona taulai atu le aafiaga o le aoaoina ia Iesu Keriso?

• E faapefea ona fesoasoani le lesona i tamaiti aoga e aoao le talalelei a Iesu Keriso e pei ona maua i tusitusiga paia ma upu a perofeta?

• O faapefesa ona fesoasoani le lesona i tamaiti aoga e faataunuu la latou matafaioi i le aoaoina mo i latou lava.

• O faapefea ona fesoasoani le lesona e valaaulia ai le Agaga Paia e faataunuu Lana matafaioi i le aafiaga o le aoaoina?

Fesoota’i Manino le Faasologa o Lesona

Atonu e le mautonu tamaiti aoga i le faia o se lesona o le Kosi o Tusitusiga Paia i se tasi aso ona sosoo ai lea ma se lesona o le Sauniuniga mo le Olaga i le aso e sosoo ai. A tuuina atu i tamaiti aoga se vaaiga lautele atu i mea o le a latou suesueina i le aluga o le vaiaso, e mafai ona fesoasoani ia i latou ia saunia lelei e aoao. O tomai nei o ni nai auala e mafai ona e faia ai lenei mea. Afai e te matauina ua le mautonu au tamaiti aoga pe a e fealuai i le va o ituaiga lesona eseese, e mafai ona e faataitaia se tasi pe sili atu o nei fautuaga po o se mea e te mafaufau i ai na o oe. O lenei aoaoga o le a fesoasoani ia te oe:

• Ia faailoa manino atu mea o le a aoaoina i le aluga o le vaiaso ma le mafuaaga.

• Ia fesootai manino i le aluga o le vaiaso pe afai e fesuiai le lesona po o le autu mai lesona o le Kosi o Tusitusiga Paia i lesona o Sauniuniga mo le Olaga.

Faailoa Manino Mea o le a Aoaoina i le Vaiaso ma le Aisea

Faamatalatala

I le amataga o vaiaso taitasi, e mafai ona e faailoa atu i tamaiti aoga ia lesona ma autu ua fuafuaina mo aso taitasi o le vaiaso. A malamalama tamaiti aoga i le taitaiga mo le vaiaso ma faamoemoega o le lesona, e mafai ona latou saunia atili e auai i le aafiaga o le aoaoina. O se tasi o auala e mafai ona e faailoa atu ai mea o le a aoaoina i le aluga o le vaiaso o le faaali atu lea o le ulutala o lesona taitasi o lena vaiaso, faatasi ai ma se aotelega puupuu o mea e mafai ona faamoemoe tamaiti aoga e aoaoina i na lesona.

Faataitaiga

Vasega, ua ou fiafia lava mo a tatou lesona o loo loma i lenei vaiaso. [E faaali mai e le faiaoga se ata o loo i ai le siata lenei]

Aso Gafua	Mataupu Faavae ma Feagaiga 3
Aso Lua	Mataupu Faavae ma Feagaiga 4
Aso Lulu	Mataupu Faavae ma Feagaiga 5
Aso Tofi	Lesona o le Iloilo Lou Aoaoina
Aso Faraile	Puleaina o le Atuatuvale ma le Popole

O le vaiaso lenei i le Aso Gafua e oo i le Aso Lulu o le a tatou suesueina ai vaega 3–5 o le Mataupu Faavae ma Feagaiga. O taimi faigata nei mo le Perofeta o Iosefa Samita a o ia feagai ma tofotofoga faigata tele. Mai nei vaega, o le a tatou aoao ai upumoni taua na faaalia mai e le Atua e mafai ona fesoasoani ia i tatou e liliu atu ai ia Iesu Keriso ma tutu mausali i taimi faanoanoa. I le Aso Tofi, o le a e maua ai se avanoa e toe mafaufau ai i mea o loo e aoaoina i se lesona Iloilo Lou Aoaoina. I le Aso Faraile, o le a tatou talanoaina ai le auala e faafoeina ai le atuatuvale ma le popole faatasi ai ma le fesoasoani ma le malosi o le Tama Faalelagi ma Iesu Keriso.

Faataitai

Vaai i lau taiala o le faasologa o lesona ma le vaaiga aoao o le vaiaso e sosoo ai. Tusi i lalo mea e mafai ona e faia e faailoa manino atu ai mea o le a aoaoina i le aluga o le vaiaso.

Fesootai Manino i le Vaiaso pe a Suia le Lesona po o le Autu mai Lesona o le Kosi o Tusitusiga Paia i Lesona o Sauniuniga o le Olaga

Faamatalatala

Pe a fesuiai mai lesona o le Kosi o Tusitusiga Paia i lesona o Sauniuniga mo le Olaga, e mafai ona e ta’u atu i tamaiti aoga le autu ma le faamoemoega o le lesona o lena aso. Atonu e fesoasoani le faasoa atu pe faapefea ona tutusa pe ese le lesona ma le anotusi mai le vasega na muamua atu. E le manaomia ona faia lenei mea i taimi uma, ae o nisi taimi atonu e aoga mo tamaiti aoga le malamalama i le faamoemoega ma le taitaiga.

Faataitaiga

O le a e vaaia i lalo se faataitaiga lea e sili atu ona ogatasi ai faamoemoega o le lesona o le Kosi o Tusitusiga Paia ma Sauniuniga mo le Olaga ma se lesona e le o ogatasi.

1. O lenei vaiaso, ua tatou aoao ai e uiga i nisi o tulaga faigata tele na feagai ma le Perofeta o Iosefa. E te manatua o a nisi o na mea? [Tali a tamaiti aoga] O le a tatou suia nei mai le suesue e uiga i nei tala i le Mataupu Faavae ma Feagaiga i le suesueina o tusitusiga paia ma upu a taitai o le Ekalesia e fesoasoani ia te oe e maua ai le malosi mai le Tama Faalelagi ma Iesu Keriso i le feagai ai ma ou lava tulaga faigata.

2. A o tatou suesueina nei tala i le Mataupu Faavae ma Feagaiga, ua tatou aoaoina le auala e mafai ona tatou maua ai le malosi mai le Alii e fetaiai ai ma tulaga faigata. O le a tatou suia nei i le aoaoina o le auala e mafai ona tatou maua ai le malosi mai le Alii ina ia avea ai ma tumau ai i le agavaa e ulufale atu ma tapuai ia te Ia i Lona malumalu.

Faataitai

Tagai i le mataupu aoaoina mo le faasologa o lesona o le vaiaso lenei. Tusi se auala e faailoa manino atu ai mea o le a taulai atu i ai le vasega i aso taitasi.

Lapataiga

O lesona o Sauniuniga mo le Olaga e maua ai avanoa mo tamaiti aoga i le seminare e aoao ai pe faapefea ona fesoasoani le Tama Faalelagi ma Iesu Keriso ia i latou e faafoeina luitau o le olaga faaletino. A o e aoaoina atu nei lesona, ia nofouta i lapataiga nei:

O Aafiaga Uma e Aoao ai e Tatau Ona Faatotonugalemu ia Keriso, Faavae i Tusitusiga Paia, ma Taulai Atu i Tagata Aoao

O aafiaga uma lava e aoao ai i le seminare e tatau ona fesoasoani e ausia ai le Faamoemoega o Seminare ma Inisitituti o Mataupu Faalelotu. O lona uiga o le a taulai atu pea i latou ia Keriso, taulai atu i tagata aoao, faavae i tusitusiga paia, ma taialaina e le Agaga. O lesona o Sauniuniga mo le Olaga e faigofie lava ona le paleni. Mo se faataitaiga, atonu e tele se poto masani o se faiaoga i se tasi o autu ma e mafai ona filifili e taulai tele atu i le faia o le aafiaga ia taulai atu i tagata aoao, ma faamamafa atu le tele o tomai ma fuafuaga mo le auala e taulima ai se manaoga o loo i ai i tamaiti aoga. Ae peitai, i le faagasologa, e faigofie lava ona le amanaiaina e le faiaoga le manaomia ona fesootai tamaiti aoga ia Keriso ma aoao i latou mai upu o tusitusiga paia ma perofeta.

Suesuega o Mataupu: Ua tele se poto masani o Sister Jones i le fuafuaina o mea tautupe. Ua filifili Sister Jones e aoao atu i ana tamaiti aoga le tele o tomai e uiga i le fuafuaina o mea tautupe i se auala e taulai atu i tagata aoao.

O a nisi o taunuuga faamoemoeina o le taulimaina e Sister Jones o le lesona i le ala lenei?

Faapaleni le Aofaiga o Lesona o Sauniuniga mo le Olaga e pei ona Otootoina i le Mataupu Aoaoina

Atonu e i ai nisi ituaiga lesona po o autu e mananao nisi faiaoga e faaalu ai le tele po o le itiiti foi o le taimi o le vasega nai lo isi. Ia manatua e toatele tagata, e aofia ai i latou mai isi matagaluega a le Ekalesia, na fefautuaai faatasi e fuafua le aofaiga o lesona i vaega taitasi. E oo lava i se autu atonu e foliga mai e le manaia mo se faiaoga atonu e matua taua tele mo ni tamaiti aoga faapitoa. O le faaaluina o le tele o le taimi o le vasega i nisi o lesona nai lo le mea o loo otootoina i le mataupu aoaoina e mafai ona taitai atu ai i le le faamamafaina o isi taunuuga taua o le aoaoina. O le “Fatu se Aoaoga Faamasani mo le Taiala o le Saoasaoa” ua fautuaina mai ai e masani lava e tatau ona tele atu lesona o le Kosi o Tusitusiga Paia nai lo lesona o Sauniuniga mo le Olaga i lau taiala o le faasologa. O le aofaiga o lesona mo vaega taitasi o Sauniuniga mo le Olaga e faailoa mai ai foi se paleni fautuaina. Mulimuli i nei taiala ma ni nai tuusaunoaga itiiti.

Tulaga Suesueina: Ua matua fiafia lava Uso Hendricks ona ua iu lava ina i ai ni taumafaiga fuafuaina i le seminare e saunia ai le autalavou mo misiona. Nai lo le na o le lima lesona e aoao atu e uiga i sauniuniga mo le misiona, na te faaaluina le lua vaiaso e aoao atu ai nei lesona faapea foi ma nisi na ia fatuina na o ia.

O a nisi o taunuuga faamoemoeina o le auala na faia ai e Uso Hendricks le aoaoina atu o lesona sauniuni mo faifeautalai?

Faaaoga le Mataupu Aoaoina e Tusa lava po o le a Lou Tulaga o le Poto Masani

E pei lava o le aofaiga o lesona, o faamoemoega taitasi o lesona sa fuafuaina foi i le galulue faatasi ai ma le toatele o tagata, e aofia ai tagata o isi matagaluega a le Ekalesia. O nei matagaluega e masani ona faalagolago i sailiiliga na faamaeaina e le Vaega o Suesuega o Faamaopoopoga a le Ekalesia mo manatu faaalia na latou tuuina mai. E pei lava o lesona uma o mataupu aoaoina a le S&I, ua iloiloina ma le faaeteete e le Matagaluega o Fesootaiga a le Ekalesia ia lesona o Sauniuniga mo le Olaga mo le sao ma le talafeagai o aoaoga faavae. Ua mamanuina lesona ina ia avea o se auala faigofie i le autu o loo latou talanoaina, ae le o se kosi atoatoa i le mataupu. Afai e te poto masani i le autu, atonu e te lagonaina ua le toe i ai ni manatu taua. Ia matua faaeteete i le faaopoopoina o se mea e le’i aofia ai. E tusa lava po o le a le tele po o le itiiti foi o lou poto masani i se autu patino, ia faaaoga le mataupu aoaoina e avea o se faavae mo le aafiaga aoaoina o le a e tuuina atu. Amata i le faaaogaina o le lesona a o lei faia ni faaiuga e uiga i mea e fetuunai. Mo nisi faamatalaga e uiga i lenei mea, tagai i le “Aoaoga Faamasani mo le Faaaogaina ma le Fetuunaiina o Mataupu Aoaoina o le Seminare” o loo maua i le Aoaoga o Mataupu Aoaoina a le Seminare.

Tulaga Suesueina: O Sister Benson o se tagata faigaluega lautele ua laiseneina. O loo ia mauaina i le taimi nei se faamanuiaga tele i se auala fou e fesoasoani ai i ana tagata o loo iai ni vaisu. Ua ia filifili e aoao atu i ana tamaiti aoga tomai e fesootai ma lenei auala fou nai lo se tasi o lesona o le soifua maloloina faalelagona.

O a nisi o taunuuga faamoemoeina o le auala na faia ai e Sister Benson ia lesona o le soifua maloloina faalelagona?

Manatua Lau Matafaioi o se Faiaoga

A o e aoaoina atu lesona o Sauniuniga mo le Olaga, ia manatua lau matafaioi o se faiaoga seminare. E mafai ona faasoa mai e tamaiti aoga ia te oe tulaga faigata o loo feagai ma i latou. O lau matafaioi o le faasino atu lea o i latou i o latou matua ma taitai perisitua, o e e mafai ona taialaina i latou i le fesoasoani latou te manaomia. Mo se fesoasoani i tulaga e ono aofia ai le sauaina, faamolemole tagai i le “Sauaina” i le Taiala mo le Tali Atu i Faalavelave Faafuasei a Seminare ma Inisitituti.

Tulaga Suesueina: Ua iloa e Sister Benson e faapea, ina ua uma ona aoao atu ana lesona, e toatele tamaiti aoga o loo nonofo pe a uma le vasega. Latou te mananao e faasoa atu ia te ia ni faamatalaga patino e uiga i o latou olaga. E feiloai taitoatasi o ia ma i latou i lona ofisa pe a uma le vasega ma pe a uma le aoga.

O a nisi o taunuuga faamoemoeina o fegalegaleaiga a Sister Benson ma ana tamaiti aoga?

Faaiuga

I le aluga o le fa tausaga i le seminare, o le a tele avanoa e aoao ai tamaiti aoga i le auala e faaaoga ai aoaoga a le Faaola i tulaga ma aafiaga eseese. O aafiaga aoaoina o lesona o Sauniuniga mo le Olaga e faaopoopo atu i lesona o le Kosi o Tusitusiga Paia o le a sili atu ona saunia ai se augatupulaga atoa e fetaiai ma luitau o le olaga e ala i le faaaogaina o le malosi, aoaoga, ma le talalelei a le Faaola. O le a sili atu ona latou faaauupegaina ia saunia i latou, o latou aiga ma isi i le ola faavavau ma lo latou Tama oi le Lagi.