“Aoaoga i le Atamai i Aoaoga Faavae,” Aoaoga o Mataupu Aoaoina mo le Seminare (2025)

Aoaoga o le Atamai i Aoaoga Faavae

Faatomuaga i le Atamai i Aoaoga Faavae: O Se Mamanu mo le Sailia ma le Mauaina o Tali Paia

I le Tusi a Mamona, na faamatala ai e Iakopo se aafiaga na ia maua ma se alii e igoa ia Serema. Sa aoaoina Serema ma faaaoga le tele o le faaviivii ma le mana o le tautala e taitai ese ai loto o le toatele ma “faatoilalo ai le aoaoga faavae a Keriso” (tagai Iakopo 7:2–4). Na faamatala e Iakopo o Serema “na saili ai e ia se avanoa tele e mafai ona sau ai o ia ia te a’u. … Ma sa faamoemoe o ia e lūlū ese a’u mai le faatuatuaga” (Iakopo 7:3, 5). Ae peitai, na tusia e Iakopo e faapea “sa lē mafai ai ona lūlūina o a’u” (Iakopo 7:5). Ona o taumafaiga filiga na faia e Iakopo i lona olaga atoa, e leai se fesili po o se tulaga e mafai ona aveesea ai Iakopo mai lona faavae ua faatuina mausali ia Iesu Keriso ma Lana talalelei.

Faamatalaga o le Mausali i le Lotolotoi o Afā

I o tatou aso, o loo feagai le autalavou o le Ekalesia ma le tele o fesili faigata ma tulaga e ono lūlūina ai i latou mai lo latou faatuatua. O le taulotoina o aoaoga faavae o se tasi lea o auala e mafai ai e tamaiti aoga ona saunia mo nei luitau. A o atiina ae e tamaiti aoga le taulotoina o aoaoga faavae, o le a sili atu ona latou saunia e le lūlūina lava mai lo latou faatuatua ia Iesu Keriso. Na faasoa mai e Peresitene M. Russell Ballard o le Korama a Aposetolo e Toasefululua le mea lenei i faiaoga i seminare ma inisitituti e uiga i le taulotoina o aoaoga faavae:

[O le Atamai i Aoaoga Faavae] o le a taulai atu i le fausiaina ma le faamalosia o le faatuatua o a tatou tamaiti aoga ia Iesu Keriso ma faamausali i latou i gafatia faateleina e ola ma faaaoga ai le talalelei i o latou olaga. …

O lenei taulamua ua musuia ma o le a faatino i le taimi sao. O le a i ai se aafiaga matagofie i luga o o tatou tagata talavou. Peitai, o le manuia o le atamai i aoaoga faaavae, ma isi polokalama uma o suesuega i le OAE, o le a faalagolago i le tulaga taua ia te outou. (M. Russell Ballard, “O Avanoa ma Tiutetauave a Faiaoga o le OAE i le Seneturi 21” [o se faasauga ma se Pulega Aoao, Fep. 26, 2016], broadcast.ChurchofJesusChrist.org

Atamai i Aoaoga Faavae i le Mataupu Aoaoina

I le tusi lesona a le faiaoga, ua aofia ai aafiaga e aoao ai le atamai i aoaoga faavae i vaiaso taitasi e fesoasoani ai i tamaiti aoga ia ausia taunuuga o le atamai i aoaoga faavae. O le ata lenei o loo faaalia ai taunuuga o le taulotoina o aoaoga faavae. Mo nisi faamatalaga, tagai i le Pepa Autu o le Atamai i Aoaoga Faavae (2023).

Siata o le Aoaoga o le Atamai i Aoaoga Faavae

O mataupu aoaoina o le seminare e fesoasoani i tamaiti aoga e ausia ai taunuuga o le taulotoina o aoaoga faavae i auala nei e tolu:

Lesona amata i le taulotoina o aoaoga faavae ma mataupu faavae o le mauaina o le malamalama faaleagaga
O fuaitau o mau tauloto o aoaoga faavae o loo aoaoina i le talaaga faatasi ai ma le faatulagaga o le Sau, Mulimuli Mai ia te A’u
Lesona faataitai o le Atamai i Aoaoga Faavae

E pei lava ona manaomia e se tagata a’e papa ni meafaigaluega e faasolo saogalemu ai i lalo o se puipui tifato o le vanu, o nei aafiaga e aoao ai e fesoasoani e faaauupegaina ai tamaiti aoga i tomai e faafoeina ai fesili ma tulaga faigata faatasi ma le faatuatua ia Iesu Keriso.

Faamatalaga i Tomai e Faatautaia ai Luitau

Faatomuaga i le taulotoina o aoaoga faavae ma le mauaina o lesona o le malamalama faaleagaga

E lima lesona o le atamai i aoaoga faavae, ua mamanuina e fesoasoani ai i tamaiti aoga ia malamalama i le faamoemoega o le atamai i aoaoga faavae ma aoao e uiga i mataupu faavae o le mauaina o le malamalama faaleagaga.

Faamalosia o Lou Faavae Faaleagaga: Faatomuaga i le Atamai i Aoaoga Faavae. Tuuina atu i tamaiti aoga se vaaiga aoao po o le a le atamai i aoaoga faavae ma ituaiga o aafiaga e aoao ai e mafai ona latou faamoemoe e fesoasoani ia i latou e atiina ae ai le atamai i aoaoga faavae. E sili ona aoaoina i le amataga o le tausaga aoga pe afai e toatele tamaiti aoga e fou i le seminare po o le fai foi o se toe faamanatu i le ogatotonu o le tausaga.
Sailiina o Faaaliga Patino mo A’u Fesili: Mauaina o le Malamalama Faaleagaga, Vaega 1. Fesoasoani i tamaiti a’oga ia malamalama pe mafai faapefea ona latou maua le taitaiga ma faaaliga mai le Atua e ala i le Agaga Paia. E sili ona aoaoina i le amataga o le tausaga aoga.
Faatino i le Faatuatua e Maua ai Tali: Mauaina o le Malamalama Faaleagaga, Vaega 2. Fesoasoani i tamaiti a’oga ia malamalama i le ala e faatino ai ma le faatuatua ia Iesu Keriso ao latou sailia tali o a latou fesili. E sili ona aoaoina i le amataga o le tausaga aoga.
Iloiloina o Autu ma Fesili o le Talalelei ma se Vaaiga e Faavavau: Mauaina o le Malamalama Faaleagaga, Vaega 3. Fesoasoani i tamaiti aoga ia vaai i manatu faavae ma fesili ia tai pei o Iesu Keriso a o iloiloina e tamaiti aoga faatasi ma se vaaiga e faavavau. E sili ona aoaoina i le amataga o le tausaga aoga.
Liliu atu i Punavai ua Filifilia Faalelagi e Fesoasoani e Maua ai Tali: Mauaina o le Malamalama Faaleagaga, Vaega 4. Fesoasoani i tamaiti a’oga e malamalama ai i le taua o le saili o le mea moni mai punavai ua tuuina mai ma le alofa e le Tama Faalelagi ma Iesu Keriso. E sili ona aoaoina i le amataga o le tausaga aoga.

Fuaitau o le atamai i aoaoga faavae o loo aoaoina i le talaaga

Pe a aoao atu se lesona mai se poloka mau lea e aofia ai se fuaitau o le atamai i aoaoga faavae, vaavaai mo auala e faamamafa ai le fuaitau. Aoao atu le fuaitau i le talaaga, ma taulai atu i le aoaoga faavae o loo aoao mai ai. O le a e matauina lenei aikona i soo se taimi lava e i ai se fuaitau o atamai i aoaoga faavae. Atonu e te manao e uunaia tamaiti aoga e faailoga fuaitau taitasi ina ia mafai ai e tamaiti aoga ona maua i se taimi mulimuli ane.

O le Pepa Autu o le Atamai i Aoaoga Faavae (2023) o loo i ai se lisi o fuaitau o atamai i aoaoga faavae e 24 mo kosi taitasi. O lau taiala o le faasologa o lesona atonu o le a le aofia ai lesona uma e talanoaina ai fuaitau o atamai i aoaoga faavae i le talaaga a o faia le seminare, o lea ia mautinoa ai e vaavaai mo avanoa e fesoasoani ai i tamaiti aoga e iloilo fuaitau uma e 24.

A suesueina fuaitau o le atamai i aoaoga faavae i le vasega, ia mautinoa e lava le taimi e faaalu e suesue ai le mataupu faavae o loo aoaoina i le fuaitau o atamai i aoaoga faavae ina ia iloa ma malamalama ai tamaiti aoga. O lesona taitasi e i ai se fuaitau o le atamai i aoaoga faavae e aofia ai se fautuaga e fesoasoani ai i tamaiti aoga e faataitai le taulotoina o mau faasino ma fuaitau autu o mau o se vaega o le lesona ma toe faataitai i lesona i le lumanai. O le a manaomia e tamaiti aoga le faataitai e le aunoa e tauloto ai mau faasino ma fuaitau autu o mau. “Manatu mo le Toe Faamanatuina o Aoaoga Faavae” o loo aofia ai fautuaga mo auala e mafai ona e fesoasoani ai i tamaiti aoga e faataitai le taulotoina o mau faasino ma fuaitau autu o mau. E mafai ona maua lenei mea i le faaopoopoga o le tusi lesona a le faiaoga seminare.

Lesona faataitai o le Atamai i Aoaoga Faavae

O lesona Faataitai o le Taulotoina o Aoaoga Faavae e faatulagaina mai lea taimi i lea taimi, pe tusa ma le fa i le ono vaiaso. Latou te tuuina atu i tamaiti aoga ni avanoa e galulue ai agai i le ausiaina o taunuuga o le atamai i aoaoga faavae. O lesona faataitai taitasi o le atamai i aoaoga faavae o loo i ai ni vaega se lua:

Toefaamanatu o le Atamai i Aoaoga Faavae
Aoao ma Faaaoga Mataupu Faavae o le Mauaina o le Malamalama Faaleagaga

Toefaamanatu o le Atamai i Aoaoga Faavae

I le vaega o le Toe Faamanatu o le Atamai i Aoaoga Faavae, o le a faataitai ai e tamaiti aoga le malamalama ma faamalamalamaina aoaoga faavae e faaaoga ai fuaitau o atamai i aoaoga faavae, sue fuaitau o mau o le atamai i aoaoga faavae ma tauloto fuaitau autu o mau, ma faaaoga le aoaoga faavae o loo aoaoina i nei fuaitau. E ui lava o nei toe faamanatu e taua ma e tatau ona avea o se vaega masani o aafiaga e aoao ai tamaiti aoga, ae ia pulea lelei le taimi o le vasega ina ia tele ai le taimi e tuuina atu i le vaega o le Aoao ma le Faaaogaina o Aoaoga Faavae o le Mauaina o le Malamalama Faaleagaga.

Aoao ma Faaaoga Mataupu Faavae o le Mauaina o le Malamalama Faaleagaga

O le vaega o le Aoao ma le Faaaogaina o Mataupu Faavae o le Mauaina o le Malamalama Faaleagaga e tatau ona tele se taimi e alu ai i lesona o le Faataitaiga o le Atamai i Aoaoga Faavae. O le vaega lenei ua tuuina atu ai i tamaiti aoga avanoa e faataitai ai le faaaogaina o le aoaoga faavae o le talalelei a Iesu Keriso ma mataupu faavae o le mauaina o le malamalama faaleagaga i tulaga moni o le olaga.

O faataitaiga taitasi e amata i se avanoa e toe faamanatu ai mataupu faavae o le mauaina o le malamalama faaleagaga. Manatua e tusa lava pe iloa lelei e se tagata se toatasi pe toalua ia mataupu faavae, ae o isi atonu e manaomia pea le tele o le taimi ma le faataitai. Ia fai le mea sili e te mafaia e fesoasoani ai i tamaiti aoga uma ia mautinoa e faaaoga mataupu faavae o le mauaina o le malamalama faaleagaga. “Manatu mo le Toe Faamanatuina o Mataupu Faavae o le Mauaina o le Malamalama Faaleagaga” e aofia ai fautuaga mo le auala e toe faamanatu ai nei aoaoga faavae. O loo i ai lenei mea i le faaopoopoga o le tusi lesona a le faiaoga seminare.

O le a tuuina atu loa i tamaiti aoga se tulaga faataitai e faapupula mai ai se fesili po o se tulaga e mafai ona fesoasoani ai se malamalamaaga sa’o i mataupu faavae moni. Ina ia tali atu i le fesili po o le tulaga, e mafai e tamaiti aoga ona faataitai le faaaogaina o aoaoga faavae o le mauaina o le malamalama faaleagaga ma aoaoga faavae o loo aoaoina i fuaitau o atamai i aoaoga faavae, isi mau, po o aoaoga a taitai o le Ekalesia ia na suesueina talu ai nei e tamaiti aoga.

O le tuuina atu i tamaiti aoga o le tele o avanoa e faataitai ai e manaomia mo lo latou manuia i le atamai i aoaoga faavae. Mafaufau pe faapefea ona manaomia e se tasi i le karate mo puipuiga le tele o faataitaiga e atiina ae ai uaua o maso. O lenei mea e saunia ai i latou e tali atu i osofaiga eseese. E faapena foi, e manaomia e tamaiti aoga ni faataitaiga e tele i le atamai i aoaoga faavae. A o auai tamaiti aoga i faataitaiga e le aunoa, o tali faamaoni i luitau o le a avea ma mea masani ma le faaosofia.

Ina ia vaai i se faataitaiga o se polokalama faataitai, mafaufau e matamata i se tasi po o vitio uma nei, o loo i le ChurchofJesusChrist.org. A o e matamata, vaavaai pe faapefea ona fesoasoani le faiaoga i tamaiti aoga e faataitai le faaaogaina o mataupu faavae uma e tolu o le mauaina o le malamalama faaleagaga.

E mafai ona e fetuunaia tulaga ma fesili fautuaina po o isi gaoioiga e aoao ai pe a manaomia ina ia ausia lelei ai manaoga o tamaiti aoga. E mafai foi ona eseese le faasologa e faaaoga ai e tamaiti aoga mataupu faavae o le mauaina o le malamalama faaleagaga. Ia mautinoa o soo se fetuunaiga lava e tuuina atu ai i tamaiti aoga ni avanoa e faataitai ai le faaaogaina o mataupu faavae o le mauaina o le malamalama faaleagaga ma le aoaoga faavae i se tulaga moni talafeagai. Afai e fetuunai ni tala faataitai, taumafai e faasao le fesili autu po o le popolega o le tala faataitai. O fesili po o popolega o loo i le fatu o tala faataitai taitasi ua fuafuaina ma le faaeteete mo tausaga uma e fa o le seminare.

Mo ni manatu i le auala e faia ai ni fetuunaiga talafeagai e faataitai ai polokalama, mafaufau e matamata i se tasi pe sili atu o vitio nei o loo i le ChurchofJesusChrist.org.

Tomai e Aoao Atu ai ma le Mataalia le Atamai i Aoaoga Faavae

O aoaoga nei e aoao atu ai tomai e mafai ona fesoasoani i tamaiti aoga e atina ae ai le atamai i aoaoga faavae. Atonu e aoga le faaaogaina o nei tomai i ni vaega laiti i le taimi e tasi.

Tomai: Faamatala le mafuaaga mo se gaoioiga o le atamai i aoaoga faavae.

Faamatalatala

O le faasoaina atu po o le fai atu i tamaiti aoga e faasoa mai se mafuaaga mo le faia o se gaoioiga o le atamai i aoaoga faavae e mafai ona uunaia ai tamaiti aoga e auai i ai. E mafai foi ona faatagaina ai le Agaga Paia e aoao i latou e uiga i le taua o le gaoioiga. A uma ona e faasoa mai mea o le a faia e le vasega, faasoa mai se mafuaaga se tasi pe lua pe aisea ua e faia ai le gaoioiga pe fai atu i tamaiti aoga e faasoa mai pe aisea latou te manatu ai e mafai ona fesoasoani le gaoioiga.

Faataitaiga

“Vasega, mo nai minute o le a sosoo ai o le a tatou faamatala atu ai le aoaoga faavae ua tatou aoaoina mai le Luka 2:10–12, e faapea o Iesu Keriso o le Faaola o le lalolagi. O se tasi o mafuaaga ua tatou faia ai lenei mea o le fesoasoani lea ia i tatou ia mafai ona tali atu ma le mautinoa pe a fesili mai se tasi tatou te iloa pe aisea e taua ai Iesu Keriso ia i tatou.”

Ina ia vaai i se faataitaiga o le auala e mafai ona faia ai lenei mea, matamata i se tasi pe sili atu o vitio nei o loo i ChurchofJesusChrist.org.

Faataitai

Filifili se tasi o uunaiga nei ma faamaea le fuaiupu.

“Sei o tatou faia se gaoioiga o le a fesoasoani ia i tatou e tauloto ai le mau o le atamai i aoaoga faavae faatasi ma le fasifuaitau autu. O se tasi o mafuaaga o loo tatou galulue ai e tauloto lenei mea o le …”

“Mo nai minute e sosoo ai, o le a tatou iloiloina ai mataupu faavae o le mauaina o le malamalama faaleagaga. O le iloaina o nei mataupu faavae e mafai ona fesoasoani ia i tatou …”

“O le a tatou faataitaia le faaaogaina o mataupu faavae e tolu o le mauaina o le malamalama faaleagaga. O le faaaogaina o nei mataupu faavae e mafai ona …”

Auiliili

O le a se mea ua e aoaoina a o e faataitai ona faamalamalama atu mafuaaga mo le faia o se gaoioiga o le atamai i aoaoga faavae?

Faaaoga

A o e saunia ina ia faataitai e tamaiti aoga se gaoioiga o le atamai i aoaoga faavae, tusi i lalo ia le itiiti ifo ma le tasi se mafuaaga o le a taua ai i tamaiti aoga.

Tomai: Valaaulia tamaiti aoga e toe faamanatu ia mataupu faavae o le mauaina o le malamalama faaleagaga.

Faamatalatala

A o e toe faamanatuina e le aunoa ia mataupu faavae o le mauaina o le malamalama faaleagaga faatasi ma lau vasega, e mafai e le Agaga Paia ona fesoasoani i tamaiti aoga ia manatua ma faaaoga mataupu faavae i taimi e manaomia ai. E mafai ona e valaaulia tamaiti aoga e toe faamanatu nei mataupu faavae ae e te lei faasoaina atu se tala faataitai pe a o latou galulue i tala faataitai. O nei valaaulia e aofia ai se avanoa mo tamaiti aoga e toe faamanatu ai ia le itiiti ifo ma le tasi se mataupu faavae, faatonuga po o le a le umi e tatau ona latou toe faamanatu ai le mataupu faavae, ma se avanoa mo i latou e faasoa mai ai mea sa latou aoaoina. O le faia o lenei mea, o le a sili atu ai ona mafai e tamaiti aoga ona faaaoga mataupu faavae o se vaega o le polokalama faataitai. Mo ni manatu i le auala e faia ai lenei mea, tagai i le “Toe Faamanatuina o Mataupu Faavae o le Mauaina o le Malamalama Faaleagaga” i le faaopoopoga o le tusi lesona a le faiaoga seminare.)

Faataitaiga

O le asō o le a tatou toe faamanatu ai mataupu faavae o le mauaina o le malamalama faaleagaga mai le Pepa Autu o le Atamai iAoaoga Faavae (2023). O le a tatou vaevae i ni vaega taitoatolu. O le a toe faamanatu e tamaiti aoga taitasi i le vaega se mataupu faavae ese.

“Faaaoga le tolu i le fa minute e faitau ai ma sauni e faasoa atu i lau vaega se auala se tasi e mafai ai e lau mataupu faavae ona fesoasoani i se tasi o loo feagai ma se fesili po o se tulaga faigata.”

Mo se faataitaiga o se auala e fesoasoani ai i tamaiti aoga e toe faamanatu mataupu faavae o le mauaina o le malamalama faaleagaga, matamata i le “Tuu atu i tamaiti aoga avanoa e toe faamanatu ai mataupu faavae uma e tolu o le mauaina o le malamalama faaleagaga,” o loo i le ChurchofJesusChrist.org.

2:54

Faataitai

Tusi i lalo se isi auala e mafai ona e valaaulia ai tamaiti aoga e toe faamanatu ia mataupu faavae o le mauaina o le malamalama faaleagaga.

Auiliili

O le a se mea ua e aoaoina e uiga i le tuuina atu o valaaulia mo tamaiti aoga e toe faamanatu ai mataupu faavae o le mauaina o le malamalama faaleagaga?

Faaaoga

A o e saunia le isi au lesona Faataitai o le Atamai i Aoaoga Faavae, fuafua pe faapefea ona e valaaulia tamaiti aoga e toe faamanatu mataupu faavae o le mauaina o le malamalama faaleagaga.

Tomai: Fai atu fesili e fesoasoani i tamaiti aoga e faamatalaina ai le auala e mafai ai e mataupu faavae o le mauaina o le malamalama faaleagaga ona fesoasoani i tulaga moni o le olaga.

Faamatalatala

A uma ona toe faamanatuo e tamaiti aoga ia mataupu faavae o le mauaina o le malamalama faaleagaga, faasoa atu ia i latou le vaaiga ma valaaulia i latou e talanoa i ni vaega ma mulimuli ane faatasi ma le vasega po o a mataupu faavae latou te lagona e ono fesoasoani i lena tala faataitai. O le faia o lena mea e mafai ona fesoasoani i tamaiti aoga e fausia ai lo latou talitonuga i le faaaogaina o nei mataupu faavae i o latou lava olaga.

Faataitaiga

A uma ona toe faamanatu mataupu faavae o le mauaina o le malamalama faaleagaga ma le faailoaina atu o le vaaiga faataitai, e mafai ona e fai atu fesili e pei o fesili nei:

“O le fea mataupu faavae o le mauaina o le malamalama faaleagaga e te manatu e mafai ona fesoasoani i lenei vaaiga faataitai, ma aisea?”
“E mafai faapefea e nei mataupu faavae ona fesoasoani ia te oe pe a e feagai ma se fesili e pei o lea o loo i vaaiga faataitai?”

Mo se faataitaiga, matamata i se tasi po o vitio uma nei o loo i le ChurchofJesusChrist.org.

Faataitai

Tusi i lalo ni nai fesili e mafai ona e fai atu e ono fesoasoani i tamaiti aoga e faamatala ai pe faapefea e mataupu faavae o le mauaina o le malamalama faaleagaga ona fesoasoani ia i latou e tali atu ai i a latou uo i le tulaga lenei.

O se tasi o au uo e le lotu sa vaaia se soa o faifeautalai o talanoa i ni tagata i le paka. Sa fesili atu lau uo ia te oe, “Aisea e o ai faifeautalai mai le tou ekalesia ma tala’i e uiga ia Iesu? E pei o loo e taumafai e fosi a outou talitonuga i isi tagata. Aisea e le mafai ai ona tou tuu ai pea latou ia e fiafia i le mea o latou i ai?”

Auiliili

Aisea e te manatu ai e taua mo tamaiti aoga ona faaupu pe faapefea ona latou faaaogaina mataupu faavae o le mauaina o le malamalama faaleagaga?
E faapefea i lou manatu ona uunaia olaga o tamaiti aoga i le faaaogaina o mataupu faavae o le mauaina o le malamalama faaleagaga?

Faaaoga

O le a se mea e mafai ona e faia e fesoasoani ai i tamaiti aoga e faaleo mai pe mafai faapefea e mataupu faavae o le mauaina o le malamalama faaleagaga ona fesoasoani ia i latou ma isi pe a feagai ma se fesili po o se tulaga faigata?

Faaiuga

Vaai faalemafaufau pe faapefea ona mafai e au tamaiti aoga ona taliina fesili po o popolega pe a uma ona galulue e le aunoa i taunuuga o le atamai i aoaoga faavae i le seminare. I le amataga, o le a manaomia e tamaiti aoga se fesoasoani ma se lagolago sili atu mai ia te oe o se faiaoga e faaaoga ai mataupu faavae o le mauaina o le malamalama faaleagaga ma le aoaoga faavae i tulaga moni o le olaga. E umi se taimi e alu mo tamaiti aoga e malamalama ai i le aoaoga faavae ma maua le lototele e faaaoga mataupu faavae o le mauaina o le malamalama faaleagaga. Ae peitai, a o faaauau pea ona e tuuina atu i tamaiti aoga ni avanoa e le aunoa e faataitai ai, o le a avea lenei mea ma se mea e masani ona latou faia. O se tasi lea o auala e mafai ona e fesoasoani ai i au tamaiti aoga e fausia ma le mausali o latou faavae i luga o le papa o Iesu Keriso ma faaloloto lo latou liua ia te Ia ma Lana aoaoga faavae.