Faaopoopoga

Fatu se Aoaoga o le Taiala o le Faasologa

O Le Faatomuaga

I le seminare, e suesue ai e tamaiti aoga le talalelei a Iesu Keriso e ala i lesona uma o le Kosi o Tusitusiga Paia ma lesona o Sauniuniga mo le Olaga. O loo lisiina i le siata lenei ia vaega eseese e fesootai ma nei ituaiga o lesona.

Vaega o lesona o le Kosi o Tusitusiga Paia	Vaega o lesona Sauniuniga mo le Olaga
Vaega o lesona o le Kosi o Tusitusiga Paia Lesona e fesootai ma le faatulagaga faalevaiaso o le Sau, Mulimuli Mai ia te A’u Iloilo Lou Aoaoina Faataitaiga o le Atamai i Aoaoga Faavae	Vaega o lesona Sauniuniga mo le Olaga Atamai i Aoaoga Faavae: Mauaina o Tali i A’u Fesili Tomai i Suesuega o Tusitusiga Paia Mo Le Malosi o le Autalavou: Faia o Filifiliga Atiina A’e o le Ola Tutoatasi Soifua Maloloina Faaletino ma Faalelagona Sauniuniga mo Aoga ma Galuega i le Lumanai Famanuiaina i le Aoga Sauniuniga a le Faifeautalai Sauniuniga mo le Malumalu Aoaoga a Taitai o le Ekalesia

Pe a fatuina se taiala o le faasologa o lesona, e mafai ona faigata ona iloa le taimi ma le tele o taimi e faatulaga ai nei ituaiga lesona eseese i le aluga o le tausaga. O lenei aoaoga ua faamoemoe e tuuina atu ai le taitaiga i taitai o polokalama, taitai faamaopoopo, ma faiaoga i le fatuina o se taiala o le faasologa o lesona lea o le a mautinoa ai o loo aoaoina nei vaega o lesona i le paleni talafeagai.

Mataupu Faavae e Mulimuli Ai pe a Fatuina se Taiala o le Faasologa o Lesona

O mataupu faavae nei e fa e mafai ona fesoasoani e malamalama ai ma mulimuli ai pe a fatuina se taiala o le faasologa o lesona.

Mataupu Faavae 1: Mulimuli i le faatulagaga faalevaiaso o le Sau, Mulimuli Mai ia te A’u pe a faatulagaina lesona o le Kosi o Tusitusiga Paia

O anotusi i lesona o le Kosi o Tusitusiga Paia ua faamoemoe e ogatasi ma mea o loo suesueina e tamaiti aoga taitoatasi ma o latou aiga i le fale. O le mea lea, e tatau ai i faiaoga ona aoao atu lesona o le Kosi o Tusitusiga Paia lea e fai i le vaiaso lava lea e tasi ua faatulagaina ai i le tusi lesona Sau, Mulimuli Mai ia te A’u . I nisi taimi, e mafai ona aoaoina lesona o le Kosi o Tusitusiga Paia i le seminare pe a le ogatasi ma le faasologa o lesona o le Sau, Mulimuli Mai ia te A’u , ae o nei tuusaunoaga e tatau ona seāseā tupu, ma e tatau i faiaoga ona aloese mai le aoaoina atu o lesona ua mamao atu pe muamua atu foi i le Sau, Mulimuli Mai ia te A’u.

Mataupu Faavae 2: Faatulaga tatau lesona o le Kosi o Tusitusiga Paia ma Sauniuniga mo le Olaga i vaiaso taitasi.

Lesona o le Kosi o Tusitusiga Paia (e aofia ai le Faataitaiga o le Atamai i Aoaoga Faavae ma le Iloilo Lou Aoaoina lesona e Aoao ai) ma lesona o Sauniuniga mo le Olaga e taua i le aafiaga o le seminare. Taumafai e tuuina atu se faiga paleni i le auala e te faatulagaina ai nei lesona i vaiaso taitasi. Mo se faataitaiga, i le averesi o polokalama e faalima ona feiloai i le vaiaso, e masani lava ona aoaoina ni lesona se tolu o le Kosi o Tusitusiga Paia ma ni lesona se lua o Sauniuniga mo le Olaga.

Atonu e i ai ni nai vaiaso e talafeagai ai ona fetuunai lenei paleni fautuaina. Mo se faataitaiga, i le taimi o le kosi o le Tusi a Mamona, e mafai e faiaoga ona vaevaeina le tele o o latou taimi i lesona o le Kosi o Tusitusiga Paia i le aluga o le vaiaso o loo latou aoao atu ai e uiga i le faaali mai o le Faaola o loo faamaumauina i le 3 Nifae. Atonu e i ai isi vaiaso e mafai ai e faiaoga ona faaaluina le tele o le taimi i lesona o Sauniuniga mo le Olaga. Ina ia fesoasoani i faiaoga ma taitai o polokalama e faia nei faaiuga, o nisi taimi o le mataupu aoaoina o loo i ai ni lesona se lua pe fa o le Kosi o Tusitusiga Paia i le vaiaso nai lo lesona masani e tolu. O vaiaso faapenei e mafai ona fesoasoani ia te oe e iloa ai le taimi e ono tuu ai le faamamafa sili atu i lesona o le Kosi o Tusitusiga Paia po o le Sauniuniga mo le Olaga. A itiiti ifo ma le tolu lesona o le Kosi o Tusitusiga Paia, e mafai ona e faaaofia ai nisi lesona o Sauniuniga mo le Olaga i lena vaiaso. Afai e sili atu ma le tolu lesona o le Kosi o Tusitusiga Paia, e mafai ona faaitiitia lou taimi i lena vaiaso i lesona o Sauniuniga mo le Olaga.

Ae peitai, ia fai le mea sili e te mafaia e aoao atu ai lesona taitasi o Sauniuniga mo le Olaga i le aluga o le tausaga aoga. O lesona o Sauniuniga mo le Olaga e mafai ona maua pe a maea lesona o le Kosi o Tusitusiga Paia i le tusi lesona.

O taiala nei e mafai ona fesoasoani ia te oe e faia ai ni faaiuga e uiga i le taimi e faatulaga ai vaega eseese o lesona o Sauniuniga mo le Olaga.

• Faatulaga se aofaiga faapena o lesona o Sauniuniga mo le Olaga mo afa taitasi o le kosi. O le a fesoasoani lenei mea i faiaoga ia maua le paleni i le va o lesona o le Kosi o Tusitusiga Paia ma le Sauniuniga mo le Olaga i le aluga o le tausaga.

• Ia mautinoa o loo aoao atu e faiaoga o loo e vaavaaia ia lesona lava nei e tasi i lesona o Sauniuniga mo le Olaga i le afa lava lea e tasi o le kosi. O le a fesoasoani lenei mea e taofia ai le toe faia o lesona o Sauniuniga mo le Olaga o le a maua e tamaiti aoga pe afai e fesuiai o latou faiaoga pe a maea le afa o le kosi.

• Mulimuli i faatonuga ua tuuina mai eria o le lotoifale, itulagi, po o polokalama. E mafai e eria o le lotoifale, itulagi, po o polokalama ona tuuina atu le taitaiga i le taimi e aoao atu ai nisi po o lesona uma o Sauniuniga mo le Olaga.

• Tagai i fautuaga o le faasologa o lesona i vaega o le Vaaiga Aoao mo vaega taitasi o Sauniuniga mo le Olaga. O vaega taitasi o lesona o Sauniuniga mo le Olaga e aofia ai fautuaga o le faasologa o lesona i lana vaega o le “Vaaiga Aoao”. O nei fautuaga e mafai ona fesoasoani ia te oe e faia ai ni faaiuga e uiga i le taimi e sili ona aoaoina ai nisi o lesona o Sauniuniga mo le Olaga. Mo se faataitaiga, i le vaaiga aoao o le “Saunia mo Aoga ma Galuega”, o loo faia ai le fautuaga e aoao atu le lesona ua faaulutalaina “O Le Taua o le Aotauina” i le amataga o le tausaga aoga. O vaega o le “Vaaiga Aoao” e mafai foi ona tuuina mai ai le taitaiga e uiga i lesona patino o Sauniuniga mo le Olaga ia e sili atu ona aoga pe a aoaoina i le faasologa pe felata’i faatasi.

• Faailoa mai taimi o le tausaga e ono sili ona faamanuiaina ai tamaiti aoga mai lesona faapitoa o Sauniuniga mo le Olaga. Atonu e i ai taimi o le tausaga e sili ai ona aoao atu ni lesona faapitoa o Sauniuniga mo le Olaga. Mo se faataitaiga, atonu e sili atu le aoao atu o lesona o Sauniuniga mo Faifeautalai i le faaiuga o le tausaga aoga pe afai e i ai ni tamaiti aoga i se vasega seminare o le a vave ona o ese atu i misiona. Po o nisi o lesona o le Soifua Maloloina Faaletino ma Faalelagona e mafai ona aoaoina i se taimi o le tausaga e ono lagona ai e tamaiti aoga ni tulaga maualuluga atu o le atuatuvale.

• Faailoa mai lesona o le Kosi o Tusitusiga Paia e fesootai i se tasi o vaega o lesona o Sauniuniga mo le Olaga. O lesona o le Kosi o Tusitusiga Paia e masani ona i ai anotusi e mafai ona fausia ai lesona o Sauniuniga mo le Olaga. Mo se faataitaiga, atonu e te manao e faatulaga ni lesona o Sauniuniga mo le Malumalu e latalata i poloka mau o loo taulai atu i le malumalu, e pei o le Mataupu Faavae ma Feagaiga 95; 109–10; 124; 127–28; Esoto 35–40; po o le 1 Tupu 6–9.

Mataupu Faavae 3: E tatau i tamaiti aoga ona maua avanoa e le aunoa e mafaufau ai, faasoa atu, ma faataitai atu mea o loo latou aoaoina.

O loo i ai i le tusi lesona ia lesona o le Iloilo Lou Aoaoina ma le Aoaoga Faavae o le Faataitaiga o Aoaoga Faavae lea e tupu mai lea taimi i lea taimi i lesona o le Kosi o Tusitusiga Paia. O vaega taua nei o le aafiaga o tamaiti aoga i le seminare. O lesona o le Iloilo Lou Aoaoina e tuuina atu ai i tamaiti aoga avanoa e faamatala ai aoaoga faavae autu ma toe mafaufau ai i le auala o loo latou tuputupu ae ai faaleagaga. O le auai i nei lesona o se tulaga manaomia foi mo tamaiti aoga ina ia maua ai togi o le seminare. O lesona Faataitai o le Atamai i Aoaoga Faavae e maua ai avanoa mo tamaiti aoga e galulue ai agai i le ausiaina o taunuuga o le atamai i aoaoga faavae.

A o e fatuina lau taiala o le faasologa o lesona, aua le faamisia lesona faataitai o le Iloilo Lou Aoaoina o lesona Faataitai o Aoaoga Faavae e tutupu pe a faia le seminare. Ae peitai, e te le manaomia ona aveese lesona o le Iloilo Lou Aoaoina po o lesona Faataitai o le Atamai i Aoaoga Faavae lea o le a faia pe a tuua tamaiti aoga, e pei o malologa o le taumafanafana po o le taumalulu.

Mataupu Faavae 4: Faatulaga lesona o le Kosi o Tusitusiga Paia o le a e iloiloina mulimuli ane.

I nisi vaiaso, atonu e tele atu lesona o le Kosi o Tusitusiga Paia e mafai ona aoaoina nai lo aso o avanoa e aoao ai i latou. O lea la, e masani ona manaomia ona faia ni filifiliga po o ā lesona o le Kosi o Tusitusiga Paia e faatulaga. Pe a faia nei faaiuga, faamuamua lesona o le Kosi o Tusitusiga Paia e (1) fesootai ma mea o le a talanoaina i lesona o le Iloilo Lou Aoaoina ma le (2) o loo i ai fuaitau o le atamai i aoaoga faavae. O le faia faapea o le a atili ai ona faatulagaina lesona o le Kosi o Tusitusiga Paia e sili ona talafeagai ma taua i mataupu faavae.

O lesona nei e mafai ona fesoasoani ia te oe e iloa ai le auala e faailoa ai lesona o le Kosi o Tusitusiga Paia e fesootai ma lesona Faataitai o le Iloilo Lou Aoaoina ma le Atamai i Aoaoga Faavae:

• Faailoaina o lesona o le Kosi o Tusitusiga Paia e fesootai i lesona o le loilo Lou Aoaoina. O gaoioiga mai lesona eseese o le Kosi o Tusitusiga Paia e masani ona faasino i lesona o le Iloilo Lou Aoaoina. O le faitauina o lesona o le Iloilo Lou Aoaoina ua e faatulagaina e mafai ona fesoasoani ia te oe e nofouta ai i lesona o le Kosi o Tusitusiga Paia e mafai ona e faamuamuaina i lau taiala o le faasologa o lesona.

• Faailoaina o lesona o le Kosi o Tusitusiga Paia faatasi ma fuaitau o le atamai i aoaoga faavae. O tausaga taitasi o mataupu aoaoina o le seminare o loo i ai ni fuaitau e 24 o le atamai i aoaoga faavae. E mafai ona maua se lisi o nei fuaitau i le Pepa Autu o le Atamai i Aoaoga Faavae (2023). Afai o loo a’e le aoga i le taimi e tulai mai ai lesona o le Kosi o Tusitusiga Paia o loo i ai se fuaitau o le atamai i aoaoga faavae, e tatau ona aoaoina na lesona. Ae peitai, e le manaomia ona aoao atu lesona o le Kosi o Tusitusiga Paia faatasi ma fuaitau o le atamai i aoaoga faavae pe a tulai mai na lesona ae e le o aoaoga tamaiti aoga, e pei o le taimi o le malologa o le taumafanafana po o le taumalulu.

Faataitaiga Faasolosolo o le Fatuina o se Taiala o le Faasologa o Lesona.

E eseese auala e mafai ona e fatuina ai se taiala o le faasologa o lesona e faaaoga ai mataupu faavae o loo lisiina i luga. Mo se faataitaiga, e mafai ona e faamaeaina lau taiala o le faasologa o lesona i le faasologa lenei:

1. Faatulaga lesona o le Kosi o Tusitusiga Paia, e aofia ai:

   • Lesona o le Iloilo Lou Aoaoina.

   • Lesona Faataitai o le Atamai i Aoaoga Faavae.

   • Lesona o le Kosi o Tusitusiga Paia e saunia ai tamaiti aoga mo soo se lesona o loo lisiina i luga.

2. Faatulaga lesona o Sauniuniga mo le Olaga.

3. Fai suiga pe a talafeagai ai.

Tulaga suesueina

O Sister Mendoza o se faiaoga seminare i le taeao po. O loo la fatuina ma lona taitai faamaopoopo, o Uso Amasio, se taiala o le faasologa o lesona mo le kosi o le Mataupu Faavae ma Feagaiga lea o le a amata ia Ianuari. O se faamatalaga lenei o le auala na mafai ai e Sister Mendoza ma Uso Amasio ona faaaoga laasaga e tolu o loo lisiina i luga e fatu ai la laua taiala o le faasologa o lesona.

Laasaga 1: Faatulaga lesona o le Kosi o Tusitusiga Paia

Sa amata ona fatuina e Sister Mendoza ma Uso Amasio la laua taiala o le faasologa o lesona e ala i le faatulagaina o lesona uma o le kosi o tusitusiga paia i vaiaso o le a faia ai le seminare. Sa la’ua faamautinoaina ua la faatulagaina lesona ina ia ogatasi ma anotusi o loo suesueina i le Sau, Mulimuli Mai ia te A’u.

Sa la’ua vaavaai i lesona o le Kosi o Tusitusiga Paia ma faailoa mai lesona uma o le Iloilo Lou Aoaoina ma lesona Faataitai o le Atamai i Aoaoga Faavae i afa taitasi o le kosi. Sa latou matauina e lima lesona o le Iloilo Lou Aoaoina o le a tupu pe a i ai tamaiti aoga i le aoga: lua i le afa muamua o le tausaga aoga ae tolu i le afa lona lua.

O le isi, na matauina e Sister Mendoza ma Uso Amasio e lima lesona Faataitai o le Atamai i Aoaoga Faavae o le a faia pe a faia le seminare: tolu i le afa muamua o le tausaga aoga ma le lua i le afa lona lua.

Ona tilotilo lea o Sister Mendoza ma Uso Amasio i lesona taitasi o le Iloilo Lou Aoaoina sa la tuuina i la laua taiala o le faasologa o lesona. Sa la’ua matauina po o fea lesona o le Kosi o Tusitusiga Paia o gaoioiga taitasi o le iloiloga e taulai atu i ai. Sa la’ua tusia se faamatalaga (*) i autafa o nei lesona taitasi i le taiala o le faasologa o lesona ina ia mafai ai e Sister Mendoza ona faamamafaina ma le talafeagai ma faailoa atu i tamaiti aoga po o a gaoioiga o le a latou tulitataoina i se taimi mulimuli ane.

O le isi, na faailoa mai ai e Sister Mendoza ma Uso Amasio ia fuaitau e 24 o le Atamai i Aoaoga Faavae mo le kosi. Na la’ua iloa ai o le 11 o fuaitau o le atamai i aoaoga faavae o loo aofia ai i lesona o le a aoaoina pe a faia le seminare mo le afa muamua o le tausaga aoga ae na o le 7 o le a aoaoina i le afa lona lua. Sa la filifili e faamamafa atu le autu o nei lesona taitasi i la latou taiala o le faasologa o lesona ina ia iloa ai e Sister Mendoza le taimi e mautinoa ai e faamamafa atu fuaitau o le atamai i aoaoga faavae o se vaega o le lesona.

Laasaga 2: Faatulaga Lesona o Sauniuniga mo le Olaga

Ina ua uma ona faatulagaina lesona uma o le Kosi o Tusitusiga Paia, sa amata ona faatulaga e Sister Mendoza ma Uso Amasio ia lesona o Sauniuniga mo le Olaga i la laua taiala o le faasologa o lesona.

Sa tuuina atu muamua e Uso Amasio le taitaiga i faiaoga uma na te vaavaaia po o fea lesona o Sauniuniga mo le Olaga e tatau ona aoaoina i afa taitasi o le kosi. Sa ia tuuina mai lenei taitaiga ina ia mautinoa ai o le a le faia faalua ni lesona o Sauniuniga mo le Olaga lea o le a aoaoina ai tamaiti aoga i afa taitasi o le kosi. Sa ia lagonaina o le a faapitoa lava le taua o lenei mea ina nei valaauina se faiaoga ese e aoao atu le afa lona lua o le kosi.

O faatonuga a Uso Amasio sa lisiina atu i lalo.

Lesona o Sauniuniga mo le Olaga na ia naunau e faaaofia i le afa muamua o le kosi:

• Atamai i Aoaoga Faavae: Mauaina o Tali i A’u Fesili (lesona uma e lima)

• Tomai mo le Suesueina o Tusitusiga Paia (lesona uma e lima)

• Faamanuiaina i le Aoga (lesona uma e fa)

• Soifua Maloloina Faaletino ma Faalelagona (lesona uma e fitu)

• “Sauniuniga mo le Konafesi Aoao” (aoao atu a o lei oo i le konafesi aoao ia Aperila)

• “Suesueina o Savali a Auauna a le Alii” (aoao atu agai i le amataga o le kosi)

• E valu savali mai taitai o le Ekalesia e faaaoga ai le “Mataupu: Aoaoga a Taitai o le Ekalesia” (faasafua tutusa i le afa muamua o le kosi)

Lesona o Sauniuniga mo le Olaga na ia naunau e faaaofia i le afa lona lua o le kosi:

• Fausiaina o le Ola Tutoatasi (lesona uma e fa)

• Mo Le Malosi o le Autalavou: Faia o Filifiliga (lesona uma e ono)

• Sauniuniga mo Aoga ma Galuega i le Lumanai (lesona uma e fa)

• Sauniuniga mo Faifeautalai (lesona uma e lima)

• Sauniuniga mo le Malumalu (lesona uma e fa)

• “Sauniuniga mo le Konafesi Aoao” (aoao atu a o lei oo i le konafesi aoao ia Oketopa)

Sa faatulagaina e Sister Mendoza ma Uso Amasio lesona uma o Sauniuniga mo le Olaga i la laua taiala o le faasologa o lesona. O nisi o lesona o Sauniuniga mo le Olaga na tuuina i ni vaiaso faapitoa ina ia ogatasi ma vaega o le Mataupu Faavae ma Feagaiga na suesueina i le Sau, Mulimuli Mai ia te A’u ona o fautuaga na faia i vaega o le “Vaaiga Aoao” mo vaega eseese o lesona. Sa la’ua faatulagaina isi e faavae i le taimi na latou lagona ai o le a sili atu ona manuia tamaiti aoga mai autu.

Ina ua uma ona faatulagaina lesona o Sauniuniga mo le Olaga i la la’ua taiala o le faasologa o lesona, sa i ai pea ni a latou vasega se fa i le afa muamua o le kosi ma le fa i le afa lona lua o le kosi e lei faatulagaina ai se lesona. Sa la’ua naunau o nei vasega o le a avea ma lesona i lauga mai taitai o le Ekalesia mai le konafesi aoao aupito lata mai. E faaaoga e Sister Mendoza le “Mamanu: Aoaoga a Taitai o le Ekalesia” e aoao atu ai nei lesona.

Laasaga 3: Fai ni fetuunaiga pe a manaomia

Sa tilotilo faatasi Sister Mendoza ma Uso Amasio i le taiala o le faasologa o lesona na la fatuina faatasi e vaai pe i ai ni fetuunaiga e ono manaomia. Sa la’ua iloaina sa la’ua le amanaiaina se vaiaso o le a le faia ai le seminare ona o se malologa o le a faia e tamaiti aoga i a latou faatulagaga o le aoga. I le vaiaso lenei, o le a suesue ai foi e tamaiti aoga se fuaitau o le atamai i aoaoga faavae. Sa manatu uma Uso Amasio ma Sister Mendoza e tatau ona faatulaga lenei lesona i le vaiaso a o lumanai po o le vaiaso e sosoo ai. Sa la filifili e tuu atu i le vaiaso ua tuana’i. Ina ia mafai ona faia lenei mea, e manaomia ona la’ua suia se tasi o isi lesona ua faatulagaina. Sa la filifili e tuu e sui ai se tasi o lesona o Aoaoga a Taitai o le Ekalesia. Na pau lea o le fetuunaiga sa manaomia ona la’ua faia i la latou taiala o le faasologa o lesona.

Sa lagona uma e Sister Mendoza ma Uso Amasio le fiafia e uiga i faaiuga na la faia. Sa lagona e Sister Mendoza le mautinoa o le a maua e ana tamaiti aoga se aafiaga lelei i le seminare lea o le a latou latalata atili ai i le Tama Faalelagi ma Iesu Keriso. Sa faafetai o ia ona o nei faaiuga na faia a o lei amata ona ia aoaoina ina ia mafai ai ona ia taulai atu i le tausaga aoga i le sauniaina o le lesona o le a sosoo ai. Sa ia lagonaina se avega taua ua aveesea ina ia aua nei fuafuaina po o a lesona e aoao atu i le aluga o le vaiaso e faaopoopo atu i le sauniaina o na lesona.