Aoaoga mo Ie Iloiloga

O Le Faatomuaga

O le Iloiloga o se vaega taua o le aoaoina. Sa faamamafa mai e Elder David A. Bednar o le Korama a Aposetolo e Toasefululua le taua o le iloiloga ina ua ia faamatala le matafaioi o su’ega i le aoaoina faaleatamai.

O su’ega i lea taimi ma lea taimi e matuai taua lava i le aoaoina. O se su’ega lelei, e fesoasoani ia i tatou e faatusatusa ai mea tatou te manaomia ona iloa i mea ua tatou iloa moni e uiga i se mataupu patino; e saunia ai foi se fua e mafai ona tatou iloilo ma fua i ai lo tatou aoaoina ma le atina’ega (David A. Bednar, “O Le a Tatou Tofotofoina i Latou,” Liahona, Nov. 2020, 8).

O le iloiloga i le seminare e faatinoina ai se faamoemoega faapena e pei o suega i le aoaoina faaleaoaoga. O iloiloga e mafai ona fesoasoani i tamaiti aoga e faaalia ai lo latou malamalama faaleagaga, malamalama, ma le tuuto atu i le Tama Faalelagi ma Iesu Keriso. O nei ituaiga iloiloga faatulagaina e mafai ona fesoasoani i tamaiti aoga ia nofouta atili ai i mea o loo latou aoaoina ma pe o faapefea foi lo latou tuputupu ae ai.

O le iloaina o lo latou aoaoina ma le tuputupu ae e mafai ona avea o se aafiaga tauia ma uunaia o tamaiti aoga. E talitutusa lenei mea ma le taimi e vaai ai se tagata tamoe faatautava i lona taimi i luga o se uati po o le taimi e vaai ai se tamaitiiti laitiiti i lona tuputupu ae i luga o se siata o le maualuga. E masani lava ona le iloa e tamaiti aoga le auala o loo latou tuputupu ae ai e aunoa ma ni avanoa masani e iloilo ai a latou aoaoga. E oo lava i avanoa e vaai ai e leai so latou alualu i luma pe ua latou toe foi i tua i lo latou tuputupu ae, e mafai ona avea ma ni aafiaga taua e aoao ai. O iloiloga masani e mafai ona valaaulia ai nisi faaaliga patino i o latou olaga ma fesoasoani ai i tamaiti aoga e fatu ni fuafuaga mo le tuputupu ae ma le aoaoina i le lumanai. O nisi o faataitaiga o gaoioiga o le iloiloga i mataupu aoaoina o le seminare e aofia ai lesona o le Iloilo Lou Aoaoina ma faataitaiga o le atamai i aoaoga faavae. O lenei aoaoga o le a taulai atu i gaoioiga o le iloiloga o loo maua i lesona o le Iloilo Lou Aoaoina.

Lesona o le Iloilo Lou Aoaoina

I le faagasologa o mataupu aoaoina a le seminare, o le a e maua ai lesona o le Iloilo Lou Aoaoina. O nei lesona ua faatulagaina pe a ma le tai fa i le ono vaiaso ma tuuina atu ai i tamaiti aoga se avanoa e iloilo ai i latou i taunuuga o le aoaoina i le tulaga o le kosi. O nei taunuuga o le aoaoina i le tulaga o le kosi e fesoasoani i tamaiti aoga:

• Faamatala aoaoga faavae ua latou aoaoina.

• Mafaufau i o latou lagona, uiga faaalia, ma manaoga e faatatau i le fuafuaga a le Tama Faalelagi ma le talalelei a Iesu Keriso.

• Toe iloilo fuafuaga po o sini o loo latou galulue ai e faaaoga mea ua latou aoaoina ma faalolotoina ai lo latou avea ma soo ia Iesu Keriso.

Atonu e aoga le faaalu o se taimi e vaai ai i se lesona se tasi pe sili atu o le Iloilo Lou Aoaoina ina ia faamasani ai. A o e vaavaai i se lesona pe lua, maitau e amata lesona taitasi i se auala lautele, ma tuuina atu i tamaiti aoga se avanoa e faasoa atu ai soo se mea na latou aoaoina talu ai nei mai a latou suesuega o tusitusiga paia taitoatasi, faatasi ma o latou aiga, i sauniga a le Ekalesia, po o le seminare. Ona vaai lea i gaoioiga taitasi o le iloiloga i le lesona o le Iloilo Lou Aoaoina. Ia gauai faapitoa atu i le auala e faia ai gaoioiga taitasi o iloiloga:

• E muamua atu i se ulutala o loo ta’ua ai le taunuuga o le aoaoina o le tulaga o le kosi.

• E faatatau i aafiaga e aoao ai mai lesona ua mavae i le mataupu aoaoina.

• Tuuina atu i tamaiti aoga se avanoa e fai ai se mea e faaalia ai lo latou aoaoina.

E taua le manatua e mafai ona faateleaiina le aoaoina e tamaiti aoga pe a malamalama manino tamaiti aoga i le taunuuga mo se gaoioiga e aoao ai ma tuuina atu i ai se avanoa e faaalia ai lo latou aoaoina. E ono fesoasoani se talafaatusa e faata’ita’ia ai lenei mea. Afai o loo aoao se tagata talavou i le auala e fana ai se aufana ma se ufanafana, e manaomia e ia se taunuuga manino e taumafai iai, faapea foi ma le aoaoina i le auala e uta ai le aū, uu le aufana, vaai toto’a, ma faamamulu. Afai e le tuuina atu ia te ia se avanoa e taumafai ai e fana le au, o le a le iloa lava e ia pe ua ia aoaoina. E na o le taimi lava e faamamulu ai le aū e iloa manino ai pe na lavea ia te ia le mea e taulai atu i ai pe leai. E moni foi lena mea i se aafiaga e aoao ai le talalelei. E manaomia e tamaiti aoga aoaoga ma fesoasoaniga, ae latou te manaomia foi avanoa e faaalia ai lo latou aoaoina. O le auala e faaalia ai e tamaiti aoga lo latou aoaoina e manaomia ona manino le fesootai atu i le taunuuga. O aafiaga uma e aoao ai i mataupu aoaoina ua mamanuina ma le mafaufau i lenei mea; ae peitai, ua sili atu ona faaalia i lesona o le Iloilo Lou Aoaoina. Mafaufau e faasoa atu i tamaiti aoga po o a taunuuga o le aoaoina o loo i ai i nei lesona taitasi.

E mafai ona avea faiaoga ma tamaiti o le vasega ma punaoa e fesoasoani i tamaiti aoga ia iloa manino atili lo latou aoaoina. O oe o se faiaoga e mafai ona tuuina atu ni manatu faaalia i le alualu i luma o loo latou faia pe o tauivi foi e fai. E mafai ona e mafaufau i ni manatu pe faasoa atu ni aafiaga mai lou lava olaga. Ia manatua, e le tatau ona avea o se faamoemoega le lipoti mai e tamaiti aoga o a latou sini po o fuafuaga ia te oe po o tagata o le vasega. O nisi o nei sini ma fuafuaga e mafai ona patino tele i le tagata lava ia. Ae peitai, atonu e i ai taimi e lagona ai e se tamaitiiti aoga le toafimalie e faasoa atu ana fuafuaga po o sini ia te oe. Fefautuaai faatasi ma tamaiti aoga pe a talafeagai ai. Atonu e i ai isi taimi e tatau ai ona toe faasino atu se tamaitiiti aoga i matua, se epikopo, po o se peresitene o le paranesi.

O nisi gaoioiga i lesona o le Iloilo Lou Aoaoina ua mamanuina mo tamaiti aoga e faasoa atu ai o latou manatu ma aafiaga i tamaiti o le vasega, ae o isi gaoioiga e sili atu ona patino. Mo se faataitaiga, pe a faamatala mai e tamaiti aoga le aoaoga faavae, atonu o se taimi lelei lea e galulue faatasi ai i latou e faataitai le faamalamalamaina po o le faatinoina. Pe a iloiloina e tamaiti aoga o latou lagona, uiga faaalia, ma manaoga, atonu o se gaoioiga e sili atu ona talafeagai mo le mafaufau loloto faaletagata lava ia.

O le mea e sili ona taua, a o e aoaoina atu nei lesona, valaaulia tamaiti aoga e saili le fesoasoani ma le taitaiga mai lo latou Tama oi le Lagi e ala mai i le Agaga Paia. E leai se isi soa e sili atu nai lo le Agaga Paia e fesoasoani i tamaiti aoga ia iloa manino le auala latou te aoao ma tuputupu ae ai i lo latou ala e fo’i atu ai i le Tama Faalelagi. Tuu atu i tamaiti aoga ni avanoa e le aunoa e saili ai le fesoasoani a le Agaga Paia i le iloiloina o lo latou aoaoina ma le tuputupu ae o ni soo o Iesu Keriso.

Togi o le Kosi mo le Iloiloga

E manaomia ona auai tamaiti aoga ia le itiiti ifo ma le tasi se lesona Iloilo Lou Aoaoina i afa taitasi o le kosi ina ia maua ai togi mo le faauuga o le seminare.

Afai e le auai tamaiti aoga i soo se lesona o le Iloilo Lou Aoaoina i le aluga o le semesa, o le a manaomia ona e tuuina atu ia i latou le lesona talafeagai o le Iloilo Lou Aoaoina o loo i ai i le faaopoopoga o le tusi lesona a le faiaoga seminare. “Iloilo Lou Aoaoina, Vaega 1” e mafai ona tuuina atu i tamaiti aoga e fai ai le iloiloga mo le afa muamua o le kosi. “Iloilo Lou Aoaoina, Vaega 2” e mafai ona tuuina atu i tamaiti aoga e fai ai le iloiloga mo le afa lona lua o le kosi. Valaaulia tamaiti aoga e faamaumau a latou tali i gaoioiga taitasi o le iloiloga. Uunaia i latou e faasoa atu foi a latou tali e le patino tele i se matua, tei, po o se taitai o le Ekalesia. O lenei avanoa mo tamaiti aoga e faasoa atu ai e mafai ona faatagaina ai le Agaga Paia e aoao atu ma molimau atu ia i latou e uiga i upumoni o le talalelei ma valaaulia i latou e faia ni laasaga faaopoopo i lo latou avea ma soo e totonugalemu ia Keriso. A latou toe faafoi atu ia te oe, e mafai foi ona e valaaulia i latou e faasoa mai se tasi pe lua o a latou tali pe afai e le patino tele.

Fetuuna’i Lesona o le Iloilo Lou Aoaoina

E i ai taimi, atonu e manaomia ai ona e fetuunai lesona o le Iloilo Lou Aoaoina. Ona o le faatulagaga o le aoga, atonu e lei suesueina ai e tamaiti aoga se lesona e faatatau i ai se lesona o le Iloilo Lou Aoaoina. Atonu foi e i ai taimi sa faapitoa le anoa o se upumoni i tamaiti aoga ae sa le’i talanoaina i le lesona o le Iloilo Lou Aoaoina. I tulaga nei, e ono e filifili e suia se tasi o gaoioiga i le lesona o le Iloilo Lou Aoaoina i se gaoioiga e te fatuina e fesoasoani ai i tamaiti aoga e iloilo lo latou malamalama po o le alualu i luma i lena autu.

O laasaga nei e mafai ona fesoasoani ia te oe e fetuuna’i pe fatu ai se gaoioiga aoga o le iloiloga.

• Laasaga 1: Amata i le faailoaina o le faamoemoega o le lesona e te manao e iloilo.

  O faamoemoega taitasi o lesona o loo lisiina i le fuaiupu mulimuli o le parakalafa faatomuaga o lena lesona ma i le pepa o faamatalaga aoao mo le vaiaso.

• Laasaga 2: Mafaufau i mea e mafai ona fai e tamaiti aoga e iloilo ai lo latou tuputupu ae ma le aoaoina mo le faamoemoega o lena lesona. O faataitaiga e aofia ai mea nei:

  • Malamalama: E mafai e tamaiti aoga ona aoao atu pe faamalamalama se manatu faaleaoaoga faavae a le o le faaleoina po o se tusitusiga. E mafai ona ausia lenei mea i ni auala eseese, e pei o le tali atu i se tulaga po o se uunaiga i le api talaaga.

  • Lagona, uiga faaalia, po o manaoga: Atonu na valaaulia tamaiti aoga i se lesona na muamua atu e iloilo o latou lagona, uiga faaalia, po o manaoga e ala i se tusiga i le api talaaga, sailiiliga, po o se isi lava metotia. Afai o lea, e mafai ona valaaulia tamaiti aoga e toe faamaea lena gaoioiga. Ona mafai lea ona latou faatusatusa a latou tali mai le lesona na muamua atu i a latou tali i le taimi o le lesona Iloilo Lou Aoaoina.

  • Faaaogaina: E mafai e tamaiti aoga ona iloilo mea na latou lagonaina le uunaiga e fai po o le fuafuaga na latou fatuina o se vaega o se lesona. Ona mafai lea ona latou tomanatu pe sa faapefea ona latou faatinoina la latou fuafuaga. E mafai e ni nai tamaiti aoga naunautai ona faasoa mai o latou aafiaga pe afai e le patino tele ia i latou lava. E mafai foi ona latou faaalia i le vasega nisi o mea atonu na latou faia, e pei o le faaaogaina o le polokalama o le Gafa o le Aiga i le FamilySearch po o le faaaogaina o se tomai mo le suesueina o tusitusiga paia.

Taumafai e saili ni auala e avea ai gaoioiga ma mea e anoa ma fiafia i ai. Ma le isi, ia tuu atu le tele o le taimi mo tamaiti aoga e mafaufau ai ma iloilo lo latou tuputupu ae. E le tatau ona taitai atu e gaoioiga ia tamaiti aoga e faatusatusa lo latou tuputupu ae ma isi tagata ae fesoasoani ia i latou e iloilo ai o latou lava aafiaga. O nisi tamaiti aoga atonu e le fiafia i lo latou tuputupu a’e i le taimi nei. Fesoasoani ia i latou ia malamalama o nei iloiloga e le tatau lava ona vaaia o se taunuuga mulimuli. Ae, e tatau ona uunaia tamaiti aoga i taimi uma e mafaufau po o le a le isi laasaga i lo latou aoaoina po o le tuputupu ae ma pe faapefea ona latou liliu atu i le Alii mo se fesoasoani.

Manatua: E mafai e faiaoga seminare ona faaleleia lesona o loo loma o le Iloilo Lou Aoaoina e ala i le faaaofia ai o gaoioiga o le iloiloga e faatatau i vaega o Sauniuniga mo le Olaga ia na suesueina talu ai nei e tamaiti aoga i le seminare. E mafai ona latou faaopoopoina nei gaoioiga i lesona o le Iloilo Lou Aoaoina pe suia foi iloiloga o loo i ai nei. E mafai ona e maua iloiloga fautuaina mo vaega taitasi o lesona o Sauniuniga mo le Olaga i le faaopoopoga o le tusi lesona a le faiaoga seminare.

Faaiuga

Na fautuaina e Elder Jeffrey R. Holland o le Korama a Aposetolo e Toasefululua ia faiaoga ina ia, “manatua o se tamaitiiti aoga e le o se koneteina ia faatumuina; o se tamaitiiti aoga o se afi ia faamumuina” (“Angels and Astonishment” Church Educational System training broadcast, June 12, 2019). O avanoa e maua e tamaiti aoga o se vaega o gaoioiga o le iloiloga i le seminare o se auala taua lea e faaosofia ai tamaiti aoga i lo latou aoaoina. E mafai ona latou fesoasoani e faamumu se manao e faaloloto le liua o tamaiti aoga ia Iesu Keriso ma Lana talalelei. O le tuuina atu i tamaiti aoga o se avanoa e faamatala ai le aoaoga faavae; mafaufau i o latou lagona, uiga faaalia, ma manaoga; ma iloilo fuafuaga po o sini o loo latou galulue ai o le a fesoasoani ia i latou ina ia matua tuuto i a latou taumafaiga ia avea atili e faapei o le Tama Faalelagi ma Iesu Keriso.