Lesona 81: Mataupu Faavae ma Feagaiga 67–70

Mataupu Faavae ma Feagaiga 68:25–31

Aoao Atu ma le Aoaoina o le Talalelei i le Aiga

O le aoaoina o le talalelei a Iesu Keriso e fesoasoani e saunia ai tamaiti e feagai ma luitau o le olaga ma faaosoosoga ma le faatuatua i le Faaola. E i ai i matua le gafatia tulaga ese e fesoasoani ai ia latou fanau e aoao le talalelei. O lenei lesona e mafai ona fesoasoani i tagata aoga ia malamalama atili i le poloaiga a le Alii mo matua e aoao a latou fanau i le talalelei i le aiga.

Gaoioiga E Ono Mafai Ona Aoao Ai

Fesoasoani i la tatou malaga faaletino

Mafaufau e faamanatu i tagata aoga ina ua tatou o mai i le lalolagi, ua tatou le manatuaina le muai olaga faatasi ma lo tatou Tama Faalelagi. Ma le isi, na tatou o mai i se lalolagi pa’ū lea e aofia ai aafiaga taufaasese ma faataumaoi a Satani. O nei mea moni e faatupuina ai luitau i le ola faamaoni i le fuafuaga a le Tama Faalelagi.

• O a nisi o mea ua tuuina mai e le Tama Faalelagi e fesoasoani ai ia i tatou e aoao e uiga ia te Ia ma faatautaia luitau faaletino?

  E mafai ona e lisiina tali o le vasega i luga o le laupapa. Afai e le ta’ua maia e tagata aoga, faaopoopo “matua po o tagata e vaaia” i le lisi.

• Na faapefea ona faamanuiaina oe e se tasi o nei aafiaga?

• Aisea e te manatu ai e mafai e matua po o tagata e vaaia ona avea ma faatosinaga i le fanau e feagai ai ma luitau o le olaga nei?

Mafaufau e faasoa atu i tagata aoga o le asō o le a latou aoao ai mai se fuaitau o mau o loo faamatala ai tiutetauave o matua i le fesoasoani i tamaiti e aoao le talalelei. Ia nofouta i le mea moni e faapea, o tagata aoga taitasi e o mai mai se tulaga ese faaleaiga ma o nisi tagata aoga atonu e leai se tulaga manaomia i le fale.

Ia iloa tulaga o tagata aoao taitasi: Mo nisi aoaoga e aoao ai pe faapefea ona nofouta i tulaga o tagata aoga taitasi, tagai i le aoaoga ua faaautuina “Vaai i tagata aoao i le ala e silasila mai ai le Atua ia i latou” i le Tomai o le Atinaega o Faiaoga: Alofa ia i Latou E te Aoaoina. Mafaufau e faataitai le tomai “Taofi, manatunatu, ma tali fesili tatou te fesili ifo ai ia i tatou lava.”

Mafaufau e faamalamalama atu mea nei:

E tele na’uā eseesega i tulaga faaleaiga. O nisi tagata, e pei o Nifae, na fananau i matua o e na taumafai e taiala i latou e mulimuli i le Faaola (tagai i le 1 Nifae 1:1). O nisi, e pei o Peresitene Russell M. Nelson po o Elders David A. Bednar ma Quentin L. Cook o le Korama a Aposetolo e Toasefululua, na ola ae faatasi ma se tasi pe sili atu foi o matua e le o ni tagata o le Ekalesia pe sa lei toaaga foi i le lotu. O isi, e pei o Peresitene Dallin H. Oaks o le Au Peresitene Sili, na vave maliu se matua i o latou olaga. O nisi talavou e ola mamao mai o latou matua, e pei ona sa faia e Mose (tagai Esoto 2:10) ma Samuelu (tagai 1 Samuelu 1:24–28). Ma o isi foi, e pei o Aperaamo ma Limae, sa i ai se matua sa taumafai malosi e fai mea leaga (tagai i le Aperaamo 1:1–17, 27; Mosaea 7:9; 11:1–5).

I lau api talaaga mo tusitusiga paia, faamatala ai le tulaga o lou aiga. Mafaufau loloto i mea o loo e aoaoina mai i lou aiga. Atonu e te faaaofia ai ou lagona e uiga i le avea ma se matua i le lumanai ma pe faapefea ona e manao e avea ma matua.

Afai e lagona e tagata aoga le to’a lelei, atonu latou te faasoa mai nisi o o latou manatu.

Valaaulia tagata aoga e mafaufau pe mafai faapefea e mea ua latou aoaoina i le aso ona fesoasoani ia i latou e lagolago ai i latou o e o loo taumafai e aoao atu ia i latou le talalelei a Iesu Keriso, e aofia ai matua po o tagata o loo vaaia i latou. Atonu foi latou te mafaufau pe mafai faapefea ona latou faaaogaina mea latou te aoaoina i le lumanai.

O mea na poloaiina e le Alii ia matua e aoao atu i a latou fanau

A o faapotopoto mo se konafesi i Ohaio, e toafa alii na sailia le taitaiga a le Alii e ala mai i le Perofeta o Iosefa Samita. Ina ua uma ona tuuina atu ni fautuaga i nei alii e uiga i o latou tiute, sa tuuina mai e le Alii nisi fautuaga lautele i aiga uma o e o se vaega o Siona.

Mafaufau e tusi le fuaiupu e lei maea ua poloaiina e le Alii e aoao e matua a latou fanau … i luga o le laupapa. Ona mafai lea e tamaiti ona faaopoopo upu po o fasifuaitau i le faamatalaga o i le laupapa a o latou mauaina i fuaiupu nei. I se isi itu, e mafai ona e valaaulia tagata aoga e tusi le fuaiupu i a latou api talaaga ma faaopoopo i ai a latou tali iina.

Faitau le Mataupu Faavae ma Feagaiga 68:25–31, ma vaavaai mo le mea ua poloaiina e le Alii ia matua e aoao atu i a latou fanau.

A lava loa le taimi na tuu atu i tagata aoga e faauma ai le fuaiupu i mataupu faavae eseese e finagalo le Alii i matua e aoao atu, valaaulia i latou e tali fesili nei:

• Afai e le o i ai i tagata le talalelei i o latou aiga, o a isi auala ua saunia e le Alii mo i latou e aoao ai nei mataupu faavae?

• O ai na aoaoina oe i se tasi o mataupu faavae i nei fuaiupu a o e tuputupu ae? O i ai ni ou manatuaga o i latou o loo aoaoina oe? Afai o lea, o a na manatuaga?

• Na faapefea ona aafia lou olaga i mataupu faavae o i nei fuaiupu, pe na faapefea foi ona aafia ai?

E mafai e tagata aoga ona mafaufau loloto pe na faapefea ona fesoasoani aoaoga mai lena tagata po o fuaiupu pe mafai foi ona fesoasoani ia i latou e lagona ai le alofa o le Alii ma Lona finagalo mo i latou e aoao nei mataupu faavae.

Faaaogaina o le Mataupu Faavae ma Feagaiga 68:25–31

Ina ia mafaufau pe mafai faapefea e le Mataupu Faavae ma Feagaiga 68:25–31 ona fesoasoani i tupulaga talavou i tulaga eseese, tuu atu i tagata aoga ni tulaga e suesue ai. E mafai ona e faaaogaina tulaga ma fesili o loo tuuina atu i lalo pe fatu ni au lava fesili e aoga mo tagata aoga. E mafai e tagata aoga ona mafaufau i nei tulaga o se vasega, i ni vaega, pe taitoatasi.

Gaoioiga A

O se alii talavou e i ai matua o loo taumafai e avea ma faataitaiga o le mulimuli i le Faaola, ae e masani ona ia faitio pe a valaaulia o ia e ona matua i suesuega faaleaiga o tusitusiga paia po o le tatalo. E foliga mai na te le amanaiaina i laua pe taalo i lana telefoni pe a laua taumafai e fautuaina o ia.

• E mafai faapefea e aoaoga a le Alii i le Mataupu Faavae ma Feagaiga 68:25–31 ona fesoasoani ia te ia e malamalama ai i lagona o le Alii e uiga i mea o loo taumafai ona matua e fai?

• O a mau e ono taialaina o ia e tali lelei atu ai i lea tulaga? (O nisi o faataitaiga o le Efeso 6:1–3; Mosaea 4:14–15; ma le faataitaiga a le Faaola i le 12 o ona tausaga i le Luka 2:51–52.)

• O a nisi o auala e mafai ona ia lagolagoina ai ona matua? E mafai faapefea e nei faatinoga ona faia se eseesega i lona aiga?

Gaoioiga E

Ua tetea matua o se tamaitai talavou. Na te vaeluaina lona taimi i lo laua va. E ula lona tina i le Ekalesia ma e le o faamoemoe e mulimuli lana tama teine i aoaoga o le talalelei pe a i ai i lona aiga. E uunaia o ia e lona tama ia ola i le talalelei ma auai malosi i gaoioiga a le seminare, lotu, ma le autalavou. Faatusatusa i le faatasi ai ma lona tina, o le olaga faatasi ma lona tama e lagona ai le taofiofia ma le faasaina.

• E mafai faapefea e le Mataupu Faavae ma Feagaiga 68:25–31 ona fesoasoani e taiala lenei tamaitai talavou?

Faitau le Esoto 20:12.

• O a nisi o auala e mafai ai e lenei tamaitai talavou ona ava ai i ona matua uma a o mulimuli pea i le Alii?

• O a nisi manatu, aoaoga mai taitai o le Ekalesia, po o aafiaga e mafai ona fesoasoani ia te ia?

Gaoioiga I

O se alii sa i ai ona faigata tele i taimi o lona talavou ma ua le o toe i ai faatasi ma ona matua. E tiga ia te ia le mafaufau i ai i laua.

• E mafai faapefea ona fesoasoani i lenei alii talavou le mafaufau loloto i mea na auina mai e isi tagata na auina mai e le Alii e aoao atu ia te ia ia mataupu faavae o loo lisi mai i le Mataupu Faavae ma Feagaiga 68:25–31?

• E mafai faapefea ona fesoasoani le Mataupu Faavae ma Feagaiga 68:25–31 i lenei alii talavou e saunia ai mo lona lumanai?

Ina ia faauma lenei gaoioiga, filifili se mataupu faavae se tasi na poloaiina e le Alii ia matua e aoao atu i le Mataupu Faavae ma Feagaiga 68:25–31, ona sue lea o se fuaiupu i mau e mafai ona e faaaogaina e aoao atu ai lena mataupu faavae. Faasoa atu pe mafai faapefea ona fesoasoani lenei mataupu faavae i le autalavou i aso nei.

Valaaulia tagata aoga e faasoa atu mea na latou aoaoina. E ono fesoasoani le tuu atu i tagata aoga o se avanoa e faasoa mai ai o latou lava aafiaga, fesili, po o atugaluga e faatatau i le aoaoina o le talalelei i totonu o le aiga. Mafaufau e tuu atu i tagata aoga e tali i fesili po o atugaluga a a latou uo e ala i le faaaogaina o punaoa mamana ua filifilia ma o latou lava aafiaga.

Fesoasoani i tagata aoga ia malamalama po o a lava o latou tulaga faaleaiga, e finagalo le Alii mo i latou ia maua le liliuga loloto ma tumau ia te Ia ma Lana talalelei i le auala sili latou te mafaia. Mafaufau e valaaulia tagata aoga e saili faaaliga faaletagata lava ia i le auala latou te ono faaaoga ai mea sa latou aoaoina. E mafai lenei mea e ala i le lagolagoina o o latou matua a o latou taumafai e faataunuu lo latou tiutetauave e fesoasoani ia i latou ia o mai ia Iesu Keriso, talisapaia o isi ua saunia e le Alii e aoao i latou i mataupu faavae o loo suesueina i le aso, po o le saunia e aoao a latou lava fanau i le lumanai.

Punaoa Faaopoopo

O faapefea ona taumafai le Ekalesia e fesoasoani i matua i lo latou tiutetauave e aoao atu le talalelei a Iesu Keriso i le aiga?

Na aoao mai Peresitene Russell M. Nelson:

O le mataupu aoaoina fou ua tuufaatasia e faatotonugalemu-i-le-aiga, ma lagolagoina-e-le-Ekalesia ua i ai le gafatia e tatala mai ai le mana o aiga, pe a mulimulitaia e aiga taitasi ma le toto’a ma le faaeteete ina ia liua o latou fale i se malutaga o le faatuatua. Ou te folafola atu pe a e galue filiga e toe faafou lou fale e avea ma se nofoaga autu e aoaoina ai le talalelei, i le gasologa o taimi o le a avea au aso Sapati ma aso fiafia. O le a fiafialau fanau e aoao ma ola i aoaoga a le Faaola, ma o le a faaitiitia le faatosinga a le fili i lou olaga ma i lou aiga. O suiga i lou aiga o le a iloga ma tumau. (Russell M. Nelson, “Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 113)

O le a le tulaga paleni i le va o le tiutetauave o matua e aoao atu ma le tiutetauave o se tamaitiiti e aoao le talalelei?

Na faasoa mai e Elder David A. Bednar o le Korama Aposetolo e Toasefululua lenei manatu:

O lo tatou tautinoga e aoao ma ola e tusa ma le upumoni ua faatuputeleina le taua i se lalolagi o loo “vāvāō” [Mataupu Faavae ma Feagaiga 45:26] ma ua matua faateteleina le fenumiai ma le amioleaga. E le mafai ona tatou faamoemoe e tau na ona auai i sauniga a le Ekalesia ma auai i polokalama ma faapena ona maua ai uma atina’ega faaleagaga ma le puipuiga o le a tatou mafai ai ona “tetee atu pe a oo i le aso vale” [Efeso 6:13].

“Ua i ai i matua se tiute paia e tausia a latou fanau i le alofa ma le amiotonu” [“O Le Aiga: O Se Folafolaga i le Lalolagi,” ChurchofJesusChrist.org]. E fesoasoani atu taitai musuia o le Ekalesia, o faiaoga, ma gaoioiga i taumafaiga a tagata taitoatasi ma aiga ia tuputupu a’e faaleagaga. Ma e ui tatou te manaomia uma le fesoasoani e fetaomi ai i luma i le ala o feagaiga, ae o le tiutetauave sili lava mo le atia’eina o le malosiaga faaleagaga ma le tumau mausali ua taoto lea i luga o i tatou taitoatasi. …

Afai na o le pau le mea e te iloa ma ou iloa e uiga ia Iesu Keriso ma Lana talalelei toefuataiina o mea e aoao mai e isi tagata pe ta’u mai ia i tatou, o lona uiga o le faavae o a tatou molimau ia te Ia ma Lana galuega mamalu i aso e gata ai o loo fausia i luga o le oneone. E le mafai ona tatou faalagolago atoa atu pe nono mai le malamalama ma le iloa o le talalelei mai i isi tagata—e oo lava ia i latou tatou te alolofa ma faatuatuaina. (David A. Bednar, “Saunia e Maua Mea Manaomia Uma,” Liahona, Me 2019, 102)

Gaoioiga Faaopoopo e Aoao Ai

Mataupu Faavae ma Feagaiga 68:27. “Papatisoina … pe a valu tausaga le matua.”

Afai e mananao tagata aoga ia malamalama pe aisea e papatiso ai tamaiti i le valu tausaga, mafaufau e valaaulia tagata aoga e faitau le Mataupu Faavae ma Feagaiga 20:71 ma le 29:47. E mafai ona e fai atu i tagata aoga e faasoa mai ni malamalamaaga latou te maua. Mafaufau e valaaulia tagata aoga e faailoa mai le fasifuaitau i le Mataupu Faavae ma Feagaiga 29:47 o loo ta’u mai ai o le tali atu o se faagasologa e sili atu nai lo o se mea e tupu. E mafai ona e fesili pe faapefea e le poloaiga a le Tama Faalelagi e saunia e matua a latou fanau mo le papatisoga i le ta’i valu tausaga ona faaalia ai Lona alofa mo fanau.

Mataupu Faavae ma Feagaiga 68:30–31. “Ona o loo iai le paie i totonu o i latou.”

Afai e taua mo au tagata aoga le i ai o se malamalama sili atu i le manatu faavae o le aloese mai le paie, e mafai ona e valaaulia i latou e faasoa mai faamanuiaga ua latou vaaia e sau mai le galue malosi. E mafai e tagata aoga ona faitau le Mataupu Faavae ma Feagaiga 68:30–31 ma faailoa mai ni taunuuga le lelei o le nofonofovale (po o le paie). E mafai ona e fesili atu i tagata aoga po o le a se mea e mafai ona fesoasoani i se tagata e faatoilalo ai se faiga ua matele i le paie.

Saunia e aoao atu fanau i le lumanai

E ui o fuaiupu o loo suesueina i lenei lesona ua tusia i matua, e mafai foi ona faatatau i tagata aoga o ni matua i le lumanai. Ina ia fesoasoani i tagata aoga e mafaufau e uiga i lenei manatu, e mafai ona e valaaulia i latou e filifili se tasi o mataupu faavae e tatau ona aoao atu e matua ia latou fanau. Ona valaaulia lea o i latou e fai se lesona puupuu i lena mataupu faavae e mafai ona latou faaaogaina e aoao atu ai o latou lava fanau.

Fautuaga mo tamaiti

O se tasi auala e fesoasoani ai i tagata aoga e fesootai i le poloaiga a le Alii mo matua e aoao fanau o le tuu atu lea i tagata aoga e mafaufau i le matafaioi a tamaiti i le faagasologa o le aoaoina. Ina ia faia lenei mea, e mafai ona e valaaulia tagata aoga e tusi se fuaiupu e mulimuli ai i le Mataupu Faavae ma Feagaiga 68:28 ua tusia atu i tamaiti. Valaaulia tagata aoga e faaaofia i a latou fuaiupu fautuaga i tamaiti e uiga i le avea ma tagata aoao o le talalelei i le aiga.