Դաս 114. Վարդապետություն և Ուխտեր 98–101

Վարդապետություն և Ուխտեր 101․1–42

«Չնայած նրանց մեղքերին, որովայնս լի է կարեկցանքով նրանց հանդեպ»

Միսսուրիի Սրբերը ձգտում էին արդար ապրել, ինչպես պատվիրել էր Տերը: Սակայն դրա հետևանքով նրանք կորցրին Տիրոջ զորության ու պաշտպանության մեծ մասը և թշնամիների կողմից վտարվեցին իրենց տներից: Չնայած դրան, Տերը վստահեցրեց նրանց, որ Ինքը լի է սիրով և կարեկցանքով նրանց հանդեպ: Այս դասը նախատեսված է օգնելու ուսանողներին զգալ Փրկչի կարեկցանքն ու ողորմածությունն իրենց հանդեպ:

Հնարավոր ուսումնական վարժություններ

Տառապանքի պատճառները

Կարող եք ցուցադրել հետևյալ նկարը և ուսանողներին հարցնել երիտասարդ կնոջ վշտացած լինելու պատճառների մասին: Կարող եք գրատախտակին գրել ուսանողների պատասխանները:

Բավարար ժամանակ տրամադրելուց հետո կիսվեք ուսանողների հետ, որ մեր փորձությունները կարող են առաջանալ տարբեր պատճառներով: Դրանցից մի քանիսը տեղի են ունենում մեր սեփական ընտրության, կյանքի բնականոն ընթացքի կամ ուրիշների վատ ընտրության պատճառով: Կարող եք գրատախտակի մեկ այլ մասում գրել այս երեք անվանակարգերը և թույլ տալ ուսանողներին տեսակավորել իրենց թվարկած պատճառները յուրաքանչյուր անվանակարգի տակ:

Տառապանքի այս երեք պատճառների մասին ավելին իմանալու համար կարող եք հղում կատարել «Օժանդակ նյութեր» Թեմաներ և հարցեր բաժնի «Դժվարություն» հոդվածին։

Տիրոջ պատասխանը Սրբերի տառապանքին

Կարող եք կարդալ կամ ձեր խոսքերով ամփոփել հետևյալ համատեքստային տեղեկատվությունը:

1833 թվականին Միսսուրիում ընդդիմությունը դարձավ կատաղի, քանի որ ամբոխը սկսեց ուժ կիրառել՝ Սրբերին Ինդեփենդենսից հեռացնելու համար: Սրբերը վստահ չէին՝ կանգուն մնալ իրենց դիրքերում, թե փախչել, քանի որ եղանակը ցրտում էր և լարվածությունն աճում էր: Մարգարե Ջոզեֆ Սմիթն այդ պահին գտնվում էր Կիրթլենդում (Օհայո), սակայն անընդհատ թարմ տեղեկատվություն էր ստանում Սրբերի վիճակի մասին: Իմանալով նրանց ցավի և նեղության մասին՝ Մարգարեն աղոթեց Երկնային Հորը և հարցրեց՝ արդյոք նրանք կարող են վերադառնալ իրենց տները Միսսուրիում: Նա ստացավ հայտնություն, որն այժմ հայտնի է որպես Վարդապետություն և Ուխտեր 101: (Սրբերի փորձությունների մասին լրացուցիչ տեղեկությունների համար տես Սրբեր, հ․1, Ճշմարտության դրոշը, գլուխ 17):

Կարդացեք Վարդապետություն և Ուխտեր 101․1–2 հատվածները՝ ուշադրություն դարձնելով, թե ինչու է Տերը թույլ տվել, որ Սրբերն այդպես չարչարվեն:

• Ի՞նչ գտաք:

• Նրանց տառապանքի ի՞նչ այլ պատճառներ կարող էին լինել:

Ուսանողներին օգնեք հասկանալ, որ բացի իրենց օրինազանցությունների պատճառով տառապելուց, Սրբերը տառապում էին նաև ուրիշների վատ ընտրության (ամբոխ) և կյանքի բնականոն ընթացքի (ձմռան ցուրտ) պատճառով:

Հետևյալ վարժությունը կատարելու համար կարող եք ուսանողներին բաժանել զույգերի: Կարող եք առաջարկել նրանց կարդալ հատվածները, որոնցից մեկը կփնտրի այն, ինչը կարող է դժվար լինել լսել, իսկ մյուսը կփնտրի այն, ինչը հաճելի կլինի լսել։

Կարդացեք Վարդապետություն և Ուխտեր 101.3–9 հատվածները՝ փնտրելով, թե ինչը հաճելի կլիներ լսելը և ինչը դժվար կլիներ լսել:

• Ի՞նչ գտաք:

• Ըստ հատվածներ 3-ի և 9-ի ինչպե՞ս է Տերը նայում նրանց, ովքեր մեղք են գործել:

  Ուսանողները կարող են բացահայտել ճշմարտությունները, ներառյալ այն, որ անգամ այն ժամանակ, երբ մենք մեղք ենք գործում, Տերը կարեկցանք և ողորմածություն է ցուցաբերում մեր հանդեպ։

  Ուսանողներին օգնեք քննարկել, թե ինչպես կարող է այս սկզբունքն օգնել մեզ փնտրել Տիրոջը մեր օրերում: Հետևյալ հարցերը կարող են օգնել:

• Ի՞նչ եք դուք սովորում Տիրոջ մասին, երբ Նա մեր մեղքերն անտեսելու փոխարեն կարեկցանք և ողորմածություն է ցուցաբերում մեր հանդեպ, երբ մենք մեղք ենք գործում:

• Ըստ ձեզ, ինչո՞ւ է Հիսուս Քրիստոսն ընդունակ կարեկցանքի և ողորմածության՝ ի պատասխան մեր մեղքերի:

Քրիստոսի բնավորությամբ մղված

Ուսանողներին առաջարկեք խորհել, թե ինչի համար իրենք ունեն Փրկչի կարեկցանքի և ողորմածության կարքը: Խնդրեք նրանց մտածել, թե Նրա կարեկցանքն ու ողորմությունը ստանալն ինչպես կարող է օրհնել իրենց կյանքը:

Ուսանողներին հնարավորություն տվեք քննարկելու ավետարանի ճշմարտությունները: Հետևյալ վարժությունը խրախուսում է ուսանողներին ուսումնասիրել, այնուհետև քննարկել ավետարանի այն ճշմարտությունները, որոնք իրենք սովորում են: Դա անելու վերաբերյալ լրացուցիչ ուսուցման համար տես «Խրախուսեք սովորողներին կիսվել իրենց սովորած ճշմարտություններով» վերնագրով դասընթացը՝ Ուսուցիչների զարգացման հմտություններ ուսուցողական բաժնում։ Կարող եք կիրառել հմտությունը՝ առաջարկելով ուսանողներին միմյանց հետ կիսվել իրենց սովորածով:

Կարող եք ուսանողներին բաժանել զույգերի և առաջարկել նրանց կարդալ ստորև բերված խոսքերը և սուրբգրային հատվածը: Այնուհետև նրանք կարող են միասին քննարկել հարցերը:

Կարդացեք հետևյալ խոսքերը և սուրբգրային հատվածը՝ փնտրելով, թե ինչ եք սովորել Հիսուս Քրիստոսի բնավորության մասին, որը կարող է օգնել այն մարդուն, որը մեղք է գործել:

Տասներկու Առաքյալների Քվորումից երեց Ուլիսես Սոարեսն ուսուցանել է.

Փրկիչի անփոփոխ կարեկցանքը

Ի տարբերություն մեզ՝ Քրիստոսն ունակ է հստակ տեսնել տվյալ իրավիճակի բոլոր կողմերը: Նույնիսկ, իմանալով մեր բոլոր թուլությունները, Փրկիչը հապճեպ չի դատապարտում մեզ, այլ շարունակում է ժամանակի ընթացքում կարեկցանքով աշխատել մեզ հետ: (Ուլիսես Սոարես, «Փրկչի անփոփոխ կարեկցանքը», Լիահոնա, նոյեմբեր 2021, 15)։

Եբրայեցիս 4.14–16

• Ի՞նչ գտաք: Դա ինչպե՞ս կօգնի այն մարդուն, որը մեղք է գործել:

Կարող եք կիսվել անձնական փորձառությամբ, թե ինչպես եք օրհնվել Փրկչի կարեկցությամբ և ողորմածությամբ: Պատրաստակամ ուսանողներին առաջարկեք նույնպես կիսվել իրենց փորձառություններով: Հիշեք, որ դուք կամ ուսանողները կարող եք չկիսվել փորձառություններով, որոնք խիստ անձնական են կամ չխոստովանել անցյալի մեղքերը:

Ի՞նչ կասեք Սիոնի մասին

Կարող եք ուսանողների հետ կիսվել, որ Միսսուրիի Սրբերը հույս ունեին կառուցել Սիոնն Ինդեփենդենսում, սակայն ստիպված էին հեռանալ: Թեև ուսանողներին կարող է չառընչվել Սիոնի կորուստը, սակայն նրանք կարող են զգալ, որ կորցրել են իրենց համար թանկ կամ սուրբ մի բան, օրինակ՝ ընկերներին կամ հոգևոր առումով աճելու հնարավորությունը: Առաջարկեք նրանց կարդալ հետևյալ հատվածները և մտածել այն մասին, թե ինչ են իրենք ուսուցանում Փրկչի մասին:

Կարդացեք Վարդապետություն և Ուխտեր 101․16–19 հատվածները՝ փնտրելով մխիթարություն և հեռանկար, որն առաջարկում է Տերը:

• Այս հատվածների օգնությամբ ինչպե՞ս ենք հասկանում Փրկիչի տեսակետը:

• Ի՞նչ է ուսուցանել Տերը Սիոնի մասին, որը կարող է առնչվել մեր կյանքին այժմ:

  Կարող եք առաջարկել ուսանողներին մտածել իրենց դժվարությունների և ընտրությունների մասին: Նրանք կարող են իրենց օրագրերում պատասխանել հետևյալ հարցերին։

• Վարդապետություն և Ուխտեր 101․1–19 հատվածներից ո՞ր հատվածն եք ուզում հիշել:

• Ի՞նչ եք զգացել Փրկչի կարեկցանքի կամ ողորմածության վերաբերյալ, որը կարող է օրհնություն լինել ձեր կյանքի համար:

• Ի՞նչ քայլ կձեռնարկեիք, որպեսզի գործեիք ըստ ձեր զգացածի:

Օժանդակ նյութեր

Որո՞նք են մեր տառապանքի այլ աղբյուրները:

«Դժվարությունները գալիս են տարբեր աղբյուրներից: Փորձությունները կարող են առաջանալ անձի հպարտության և անհնազանդության հետևանքով: Այս փորձություններից կարելի է խուսափել արդար ապրելու միջոցով: Այլ փորձությունները կյանքի բնականոն ընթացքի մաս են կազմում և կարող են առաջանալ այն ժամանակ, երբ մարդիկ արդար են ապրում: Օրինակ՝ մարդիկ կարող են փորձություններ ունենալ հիվանդության, անորոշության կամ սիրելի մարդկանց մահվան ժամանակ։ Դժվարությունը երբեմն կարող է առաջանալ ուրիշների վատ ընտրությունների և վիրավորական խոսքերի ու արարքների պատճառով» (Թեմաներ և հարցեր բաժին, «Դժվարություն» հոդված topics.ChurchofJesusChrist.org կայքում)։

Հնարավո՞ր է, որ իմ սխալները վեր են ինձ փրկելու Փրկչի կարողությունից:

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Այգու մշակները

Որքան էլ կարծեք, թե ուշացել եք, բաց եք թողել հնարավորություններ, որքան էլ կարծեք, թե շատ սխալներ եք գործել կամ շատ տաղանդներ չունեք, որքան էլ տնից, ընտանիքից և Աստծուց հեռացած զգաք ձեզ, ես վկայում եմ, որ դուք չեք հեռացել աստվածային սիրո հասանելիության սահմաններից։ Որքան էլ խորը լինի ձեր անկումը, Քրիստոսի Քավության անսահման լույսի շողը ձեզ հասանելի է: (Ջեֆրի Ռ. Հոլլանդ, «Այգու մշակները», Լիահոնա, մայիս 2012, 33)

Յոթանասունից երեց Ս. Սքոթ Գրոուն ասել է.

The Miracle of the Atonement

Հիսուս Քրիստոսը մեր հոգիների Մեծ Բժիշկն է: Բացի աններելի մեղքից, չկա այնպիսի մեղք կամ մեղսագործություն, ցավ կամ վիշտ, որը Նրա Քավության բժշկող զորությունից դուրս է:

Երբ մենք մեղք ենք գործում, սատանան մեզ ասում է, որ մենք կորած ենք: Ի հակադրություն սրա, մեր Քավիչը բոլորին՝ ներառյալ ձեզ և ինձ, փրկագնում է պարգևում, անկախ նրանից, թե ինչ սխալ ենք մենք գործել: (Ս․ Սքոթ Գրոու, «Քավության հրաշքը», Լիահոնա, մայիս 2011 թ․, 109)

Երիտասարդների հավաքի հեռարձակման ժամանակ Տասներկու Առաքյալների Քվորումից երեց Ջերիթ Վ. Գոնգը կիսվեց մի երիտասարդի հետևյալ օրինակով, որն իրեն չէր համարում Աստծո սիրուն արժանի.

Worldwide Event for Youth: I Can Do All Things Through Christ

Վարդապետություն և Ուխտեր 101․5։ Ինչո՞ւ է Տերը խրատում մեզ:

Աստվածային խրատն ունի առնվազն երեք նպատակ. (1) համոզել մեզ ապաշխարել, (2) կատարելագործել և սրբագործել մեզ, և (3) երբեմն փոխել մեր կյանքի ուղին, դարձնելով այն ավելի լավ ուղի՝ ըստ Աստծո իմաստության: (Դ. Թոդ Քրիստոֆերսոն, «Ես որոնց որ սիրում եմ, հանդիմանում և խրատում եմ», Լիահոնա, մայիս, 2011, 98)

Վարդապետություն և Ուխտեր 101․2։ Որո՞նք էին Սրբերի որոշ օրինազանցությունները:

Նախքան Սրբերը կտեղահանվեին Միսսուրիի Ջեկսոն գավառից, նրանք մի քանի նախազգուշացումներ ստացան այն մասին, որ իրենք կչարչարվեն, եթե չապաշխարեն։ Օրինակ՝ 1833 թվականի հունվարին Ջոզեֆ Սմիթը խրատեց Վիլյամ Վ. Ֆելփսին և Սիդնի Ջիլբերթին իրենց գրած քննադատական և բացասական նամակների համար: Օրսոն Հայդը և Հայրում Սմիթը նամակ գրեցին Միսսուրիի Եկեղեցու ղեկավարներին՝ նախազգուշացնելով նրանց «ցածր, անտեղյակ, & մեղսավոր ակնարկների» վերաբերյալ, որ արվել էին Մարգարե Ջոզեֆ Սմիթի մասին: Այս օրինազանցությունները և այլ բաները հաշվի առնելով՝ Օրսոն Հայդը և Հայրում Սմիթը նախազգուշացրել են, որ Միսսուրիի Սրբերը կկանգնեն «բարձրագույն & դատաստանի» առջև (Ջոզեֆ Սմիթի գրառումները, Փաստաթղթեր, հատոր 2․ հուլիս 1831–հունվար 1833, հր։ Մեթյու Ս. Գոդֆրի և ուրիշներ [2013 թ․], 367, 373–74)։

Լրացուցիչ ուսումնական վարժություններ

Սցենար

Եթե կարծում եք, որ սցենարը կօգնի ուսանողներին հասկանալ ճշմարտությունը, որը նրանք բացահայտել են Վարդապետություն և Ուխտեր 101.3, 9 հատվածներից, կարող եք օգտագործել հետևյալ սցենարը.

Գրեյսը երիտասարդ կին է, որը մի քանի տարի է Եկեղեցու անդամ չէ և կապ չունի ավետարանի հետ: Այս ընթացքում նա շատ ընտրություններ է կատարել, որոնք չեն համապատասխանում Փրկչի ուսմունքներին: Այս ընտրությունները ստիպել են նրան հեռանալ Եկեղեցուց և իր ծխի տարեկից երիտասարդներից: Նրա տեսակետը Հիսուս Քրիստոսի մասին այն է, որ Նա կատարյալ էակ է, ով հավանություն չի տալիս իր ընտրությանը: Նա իր կյանքում իրեն ավելի հարմարավետ է զգում՝ անտեսելով կրոնական մտքերը կամ հարցերը: Նա նաև զգում է, որ այդքան երկար ժամանակ բացակայելուց հետո նա բաց է թողել սովորելու և զարգանալու հնարավորությունները՝ ի տարբերություն իր տարիքի մյուս երիտասարդների:

• Ի՞նչը կարող է օգտակար լինել Գրեյսի համար, որպեսզի նա հասկանա այն, ինչ սովորել կամ զգացել եք այսօր:

• Հիսուս Քրիստոսի կարեկցանքի ու ողորմածության ըմբռնումն ինչպե՞ս կարող է ազդել ապաշխարելու մեր ոգեշնչման վրա:

• Ձեր կյանքից Փրկչի կարեկցանքի և ողորմածության մասին ո՞ր վկայությամբ կամ փորձառությամբ կարող եք կիսվել Գրեյսի հետ:

Վարդապետություն և Ուխտեր 101․27–35։ Հազարամյակի պայմանները

Ուսանողների համար օգտակար կլինի իմանալ Հազարամյակի պայմանների մասին:

Կարող եք բացատրել, որ Սրբերին ուղղված Իր մխիթարության մեջ Տերը նրանց հետ կիսվեց Սիոնի և Սրբերի հավաքման ու օրհնության ընդլայնված հեռանկարով (տես Վարդապետություն և Ուխտեր 101.16–19): Տերն ավելի առաջ տարավ այդ հեռանկարը՝ ուսուցանելով Սրբերին գալիք Հազարամյակի մասին, որը կհետևեր Սիոնի կառուցմանը և Երկրորդ Գալուստին (տես Վարդապետություն և Ուխտեր 101.20–23):

Կարող եք ուսանողներին առաջարկել կարդալ Վարդապետություն և Ուխտեր 101․27–35 հատվածները՝ ուշադրություն դարձնելով, թե, ըստ Տիրոջ հայտնության, ինչ պետք է տեղի ունենար Հազարամյակի ընթացքում: Կարող եք հարցնել ուսանողներին, թե իրենց համար ինչ հետաքրքիր բան են իրենք սովորել: Կարող եք առաջարկել ուսանողներին տալ ցանկացած հարց այս հատվածների վերաբերյալ: Ուսանողներն իրենց սուրբ գրություններում կարող են նշել, որ այս հատվածները վերաբերում են Հազարամյակին: Այս հատվածների մեկնաբանության համար կարող եք դիտարկել Վարդապետություն և Ուխտեր․ Ուսանողի ձեռնարկը (2025)։

Այնուհետև կարող եք առաջարկել ուսանողներին կարդալ Վարդապետություն և Ուխտեր 101.36–38 հատվածները և կիսվել, թե ինչպես են այս հատվածներն օգնում իրենց պատասխանել հետևյալ հարցերին.

• Ի՞նչ կցանկանար Փրկիչը, որ դուք զգաք, երբ իմանաք, թե ինչ է սպասվում։

• Ինչպե՞ս կարող է ապագայի մասին մեր իմացությունը փոխել մեր հեռանկարը ներկայիս դժվարությունների հանդեպ:

Վարդապետություն և Ուխտեր 101․39–41։ «Երկրի աղը»

Որպեսզի օգնեք ուսանողներին ավելի լավ հասկանալ Վարդապետություն և Ուխտեր 101.39–41 հատվածները (տես նաև Մատթեոս 5.13), կարող եք հարցնել նրանց, թե ինչի համար է օգտակար աղը: Օգնեք նրանց հասկանալ, որ աղը հարստացնում է սննդի համը, պահպանում է սնունդը, ինչպես նաև ունի բուժիչ հատկություններ: Առաջարկեք նրանց կարդալ հատվածներ 39–40՝ փնտրելով, թե Փրկիչն ինչ է ուսուցանել մարդկանց և աղի մասին:

Կարող եք կիսվել Երեց Կառլոս Է. Ասեյի (1926–1999) հետևյալ խոսքերով. «Աշխարհահռչակ քիմիկոսն ինձ ասաց, որ աղը տարիքի հետ չի կորցնում իր համը: Համը կորչում է խառնուրդի և աղտոտման պատճառով» (Կառլոս Է. Ասեյ, «Երկրի աղը․ Մարդկանց համը և մարդկանց փրկիչները», Ensign, մայիս 1980 թ․, 42): Կարող եք տալ հետևյալ հարցերը.

• Ինչպե՞ս կարող են տղամարդիկ և կանայք աղի պես լինել երկրի մարդկանց համար:

• Ինչպե՞ս կարող է այս այլաբանությունը համեմատվել Միսսուրիի Սրբերի հետ:

• Ինչպե՞ս կարող է Տիրոջ ժողովուրդը պահպանել իր համն այսօր:

Կարդացեք Վարդապետություն և Ուխտեր 101.41–42 հատվածները՝ փնտրելով, թե, ըստ Փրկչի ուսուցանածի, ինչ պետք է տեղի ունենար, որպեսզի Սրբերը վերագտնեին իրենց համը: Ուսանողներին հնարավորություն տվեք կիսվել և օգնեք նրանց հասկանալ, որ Տերը կամեցել է, որ իր Սրբերը մաքրվեն՝ Իր առջև խոնարհվելու և խրատվելու միջոցով:

• Ինչպե՞ս կարող է երևալ Տիրոջ սերն այս հատվածներում: