“Lesona 134—Faavaeina o Navu: O Le Aai Matagofie,” Tusi Lesona a le Faiaoga Seminare o le Mataupu Faavae ma Feagaiga (2025)
“Faavaeina o Navu,” Tusi Lesona a le Faiaoga Seminare o le Mataupu Faavae ma Feagaiga
Lesona 134: Mataupu Faavae ma Feagaiga 124
Faavaeina o Navu
O Le Aai Matagofie
Ina ua mavae le tutuliese faamalosi o le Au Paia mai Misuri, sa latou liliuina laufanua faataufusi i luga a’e o le Vaitafe o Misisipi i se aai olaola. O Navu, Ilinoi, na avea ma nofoaga matagofie ma avea ma laumua o le Ekalesia mai le 1839 i le 1846. O lenei lesona e mafai ona fesoasoani i tagata aoga e faatatau tusitusiga paia ma tala o le talafaasolopito o le Ekalesia ia i latou lava.
Gaoioiga E Ono Mafai Ona Aoao Ai
Faatusatusa mai ia i ma’ua
Valaaulia tagata aoga e mafaufau loloto pe faafia ona latou aoaoina upumoni i le Mataupu Faavae ma Feagaiga ma i le talafaasolopito o le Ekalesia e talafeagai ia i latou.
I le tasi itu o le potu, mafaufau e faaali atu se kopi o le Mataupu Faavae ma Feagaiga po o se ata o le Perofeta o Iosefa Samita e fai ma sui o le taimi o uluai Au Paia. Valaaulia se tagata aoga e tu i le isi itu o le potu e fai ma sui o o tatou taimi. Faasino atu le avanoa i le va o le taimi o Iosefa Samita ma le taimi nei, ma fai atu fesili nei.
-
O a ni auala e ono faigata ai mo i tatou ona fesootai ia Iosefa Samita ma uluai Au Paia?
-
A o e suesue i le Mataupu Faavae ma Feagaiga ma le talafaasolopito o le Ekalesia, o a nisi o mea e te faia e fesootai ai ia Iosefa Samita ma uluai Au Paia pe faatatau mea e te suesueina ia te oe lava?
Tusi tali a tagata aoga i le fesili mulimuli i le laupapa. Afai e le ta’ua e tagata aoga nei mataupu faavae e fa, mafaufau e tusi foi i luga o le laupapa. O le a faaaoga e tagata aoga i le gasologa o le lesona.
-
Saili mo auiliiliga taua.
-
Fai ni faatusatusaga i lou olaga.
-
Saili lesona aoga.
-
Filimaoti le faaaogaina patino.
Valaaulia tagata aoga e mafaufau loloto i mea e sili ona latou manaomiaina o le fesoasoani a le Alii i le taimi nei i o latou olaga.
Uunaia i latou e saili mo le taitaiga ma le fesoasoani mai le Atua i le mataupu a o latou suesue e uiga i le Au Paia i Navu. Molimau atu e mafai ona tali atu le Atua e ala i le Agaga Paia.
O anomea nei ua faamoemoe e fai ma taiala i tagata aoga i le tomai o le faatatauina ma saunia i latou e faia lenei mea e i latou lava.
Laasaga 1: Saili auiliiliga taua
Ina ia faataitai lenei laasaga, valaaulia tagata aoga e faalogologo mo faamatalaga taua a o e faitauina leotele pe faitau leotele e se tagata aoga le faamatalaga lenei:
A o i ai Iosefa Samita le Perofeta i le Falepuipui o Liperate, e faitau afe le Au Paia na tutuliese mai o latou fale i Misuri. Ina ua tatala o ia, sa toe faatasia Iosefa ma lona aiga ma le toeitiiti atoa le 5,000 o isi tagata sulufai mai Misuri o e na aveina e tagata agalelei o Kuinisi, Ilinoi.
Sa faatonuina e le Alii le Au Paia e faatau ma faapotopoto i luga o fanua faataufusi taugofie e latalata i le faatausiusiuga o le Vaitafe o Misuri. Sa latou nonofo i faleie ma taavale solofanua a o amata ona latou fausia se aai o le a latou faaigoaina mulimuli ane o Navu. O namu na aafia ai le toatele o le Au Paia i le malaria, lea na mafua ai fiva matuia, maalili, ma le tele o le oti.
-
O a faamatalaga o lenei tala e foliga mai e taua ia te oe?
Laasaga 2: Fai ni faatusatusaga i lou olaga
Valaaulia tamaiti aoga e faataitai le laasaga lona lua e ala i le taliina o le fesili lenei, ma manatua faamatalaga taua i le mafaufau mai le Laasaga 1.
-
E ui atonu e eseese o tatou tulaga, ae o a nisi o auala e mafai ona tatou faamatala atu ai le mea sa tupu i le Au Paia i lena taimi i o tatou olaga i aso nei?
O nisi tali e ono aofia ai le lagona e pei ua tatou faamaeaina se tofotofoga se tasi e na o le ulu atu i se isi, siitia atu i se nofoaga fou po o le toe amata, ola i ni tulaga faigata, po o le ma’i tigaina.
-
O le a se mea e te faia e faaalia ai le faatuatua i le Alii i nei ituaiga o tulaga?
Laasaga 3: Saili lesona e aoga
Valaaulia tagata aoga e vaavaai mo lesona taua a o latou faia mea nei: Matamata le “Iosefa Samita: Perofeta o le Toefuataina (lomiga 2002)” mai le faailo taimi 47:39 i le 50:54, pe faamalamalama atu o le aso 22 Iulai, 1839, na siitia atu ai Iosefa Samita ma isi mai lea fale i lea fale ma lea faleie i lea faleie, ma faamaloloina ai e mama’i. Ona faamalamalama atu lea o se tasi o tagata sa latou asia o Elia Fordham. Sa ma’i tigaina o ia na tagi ai lona toalua o Ana, ma sauni ona ofu e tanu ai. Fai atu i se tagata aoga e faitau le tala lenei:
Sa agai atu Iosefa ia Elia ma uu lona lima. “Uso Fordham,” na ia fesili atu ai, “e leai ea sou faatuatua e faamaloloina ai?”
“Ou te fefe ua tuai tele,” na ia fai mai ai.
“E te le talitonu ea o Iesu o le Keriso?”
“Ou te talitonu, Uso Iosefa.”
“Elia,” na fai atu ai le perofeta, “ou te poloaiina oe, i le suafa o Iesu le Nasareta, ia tulai ma ia atoatoa.”
Na pei e lulu e upu le fale. Na tulai Elia mai lona moega, ua toe foliga malosi. Na fai ona ofu, fesili mo se meaai, ma mulimuli atu i fafo ia Iosefa e fesoasoani e auauna atu i isi e toatele. (Au Paia: O Le Tala o le Ekalesia a Iesu Keriso o Aso e Gata Ai, vol. 1, O Le Tagavai o le Upumoni, 1815–1846 [2018], 402–3)
Faitau ia le itiiti ifo ma le lua ni fuaitau nei, ma vaavaai mo mea e tutusa ai mea na faia pe na faaali mai e le Faaola ma le tala o i luga: Mataio 4:23; 1 Nifae 11:31; Mataupu Faavae ma Feagaiga 42:44; 66:9; 84:68.
-
O a lesona na e aoaoina mai nei tusitusiga paia ma le Au Paia i Navu?
Lisi i luga o le laupapa ia tali a tagata aoga. O se tasi o faataitaiga e ala i lo tatou faatuatua ia Iesu Keriso ma le mana o Lana perisitua, e mafai ai e le Atua ona faamanuia ma faamalolosia i tatou.
Ina ia fesoasoani i tagata aoga ia malamalama i lenei mataupu faavae, mafaufau e fai atu fesili tulitatao e pei o le “O le a se mea o aoao mai e lenei upumoni ia i tatou e uiga i le Alii?” “O a ni aafiaga na e maua ua faamautu ai lenei mataupu faavae i lou olaga?” ma le “E ese mai le faamaloloina o i tatou, o a nisi o auala e mafai e le Alii ona faamalosia ma faamanuiaina ai i tatou?” Mafaufau e fesili atu pe i ai ni fesili a tagata aoga e uiga i nei mataupu faavae. Afai o lea, talanoai faatasi o se vasega.
Faamatala mea nei:
E ui lava i lena aso o faamalologa, sa faaauau pea le mamai o le Au Paia mo nai isi masina na sosoo ai. Peitai, sa faaauau pea ona latou tausia le tasi ma le isi ma faatino le faatuatua i le Alii. Sa latou eliina alavai e faatafe atu i ai le vai mai faataufusi e agai i le vaitafe, lea na sili ai ona aoga le laueleele ma faaitiitia ai le faafitauli i le namu. Sa latou fausia se nuu uluola ma mulimuli ane ai i le Malumalu o Navu.
Laasaga 4: Fuafua le faaaogaina patino
Mo lenei laasaga, valaaulia tagata aoga e faasoa mai ni auala e mafai ona latou faaaoga ai upumoni sa latou aoaoina. O a latou tali e mafai ona aofia ai auala e mafai ona latou faaaoga ai le faatuatua i le Alii, e aofia ai le ole atu mo faamanuiaga faaperisitua.
Lesona faaopoopo
Ina ia faaauau pea ona faataitai le faatatauina o tusitusiga paia ma le talafaasolopito o le Ekalesia ia i latou lava, e mafai e tagata aoga ona faia gaoioiga o loo i le pepa e tufa atu “Faatatauina o le Talafaasolopito o le Ekalesia ia i Tatou Lava.” E mafai ona faauma e tagata aoga gaioiga taitoatasi poo i ni vaega toalaiti. Valaaulia tagata aoga e tusi i lalo mea sa latou faia mo laasaga taitasi e fa.
Faatatauina o talafaasolopito o le Ekalesia ia i Tatou Lava
Gaoioiga A
Talaiina atu o le talalelei
Na tusia e le Perofeta o Iosefa Samita, “E lei taofia e sauaga le alualu i luma o le upumoni” (Talafaasolopito o le Ekalesia, 4:540). Ua tofia e le Alii ia Aposetolo fou ma valaauina uso o le Korama a Aposetolo e Toasefululua e faamisiona i atunuu i fafo. E ui i gasegase ma faigata, ae sa tuua ma le usiusitai e nei uso naunautai ia Navu e auauna atu. O se taunuuga, e faitau afe tagata—muamua mai Egelani—na mauaina se molimau mai le Atua, auai i le Ekalesia, ma malaga atu i Navu. Sa avea i latou ma malosiaga maoae i le Ekalesia.
Faitau le 1 Nifae 3:7 ma le Mataupu Faavae ma Feagaiga 3:1, ma mafaufau pe faapefea ona fesootai nei fuaiupu i lenei faataitaiga o le galuega faafaifeautalai.
Gaoioiga E
Faatuina o le Aualofa
A o fausia e le Au Paia le Malumalu o Navu, sa matauina e ni nai tuafafine e faapea, o le toatele o alii sa galulue i le malumalu sa le lava seevae, ofuvae, ma ofutino. I le musuia ai e le Alii, sa latou faamaopopoa ai se vaega o tamaitai ma amata ona galulue faatasi e saunia nei lavalava. E pei foi o vaega talitutusa o ia taimi, sa latou tusia se faavae. Sa latou tuuina atu le pepa o faamatalaga ia Iosefa Samita mo lana faamaoniga.
[Ina ua] vaai ai [Iosefa] sa ia fai mai, o le faatulagaga sili lea o lona ituaiga. “Ae e le o le mea lenei tou te mananao ai,” na fai atu ai o ia. Ta’u atu i tuafafine ua talia e le Alii la latou taulaga, ma ua ia te ia se mea e sili atu mo i latou. … “O le a ou faatulagaina tamaitai e ala i le perisitua e fua i le fua o le perisitua.” (Au Paia, 1:448)
I le aso 17 o Mati, 1842, na faatonuina ai Iosefa Samita e le Atua e faatulaga le Aualofa. O loo faaauau pea ona musuia e le Atua ia taitai o le Aualofa i aso nei e auauna atu ma faamalolosia tagata o le Ekalesia ma le anoanoai o isi.
Faitau Mataupu Faavae ma Feagaiga 58:26–28, ma vaavaai pe faapefea ona ono fesootai nei fuaiupu i tamaitai musuia o a latou faatinoga na taitai atu ai i le faatuina o le Aualofa.
A uma ona faia e tagata aoga a latou suesuega, valaaulia i latou e faasoa mai pe na faapefea ona latou faatatauina mea sa latou aoaoina i o latou olaga.
O nisi o faataitaiga o upumoni atonu latou te faailoa mai e aofia ai mea nei: E saunia e le Alii se ala mo i tatou e faataunuu ai mea ua Ia poloai mai ai. O galuega a le Atua e le mafai ona taofia. E tauia e le Atua i latou o e saili ma le naunautai ia faataunuuina le amiotonu.
-
O le a se mea na e aoaoina mai lenei aafiaga?
-
E mafai faapefea e le faatatauina o tusitusiga paia ma tala o le talafaasolopito o le Ekalesia i lou olaga ona fesoasoani ia te oe i le lumanai?