Lesona 135: Mataupu Faavae ma Feagaiga 124

Mataupu Faavae ma Feagaiga 124

“Ia Fausia Lenei Fale … Ina Ia Mafai Ona Ou Faaali Atu Ai … A’u Sauniga”

A o fausia e le Au Paia le aai o Navu, sa poloaiina i latou e le Alii e fausia se malumalu (tagai Mataupu Faavae ma Feagaiga 124:26–27). I le Mataupu Faavae ma Feagaiga 124, na faaali atili mai ai e le Alii le faamoemoega o malumalu o se nofoaga e maua ai sauniga paia. O lenei lesona e mafai ona fesoasoani i tagata aoga ia malamalama i le taua o le malumalu o le Alii ma sauniga na faatinoina iina, e aofia ai faaeega paia.

Gaoioiga E Ono Mafai Ona Aoao Ai

O le faamoemoega o malumalu

Manatua: O lenei lesona e taulai atu i feagaiga ma sauniga o le malumalu. E paia ma e tatau ona talanoaina ma le migao (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 27.0, ChurchofJesusChrist.org).

Ina ia fesoasoani i tagata aoga e mafaufau i mea latou te iloa i le taimi nei e uiga i malumalu, valaaulia i latou e mafaufau loloto pe tusi i lalo mea o le a latou fai atu ai i o latou uo i le tulaga o i lalo.

Vaai faalemafaufau e faapea, sa vaai se uo i se ata o se malumalu i luga o ala o faasalalauga faaagafesootai pe na ui atu i se malumalu lana tietiega ma fesili atu ma le faamaoni ia te oe, “O le a le malumalu? O a mea e fai e tagata iina?”

Mafaufau e faaali atu lenei ata:

I le faaaogaina o lanu o le moli mo taavale (lanu mumu = e le mautinoa; samasama = fai sina mautinoa; lanumeamata = matuai mautinoa lava), filifili se lanu e sili ona atagia ai lau tali i fesili nei:

• O le a lou mautinoa e mafai ona e faamalamalama manino atu ai le malumalu ma ona sauniga i lau uo?

• O le a sou talitonuga mautinoa e mafai ona e faamalamalama atu ia i latou i se auala e mafai ona fesoasoani ai i lau uo ia iloa le ala e faaalia ai e le Alii Lona alofa e ala i le malumalu?

Ina ia fesoasoani ia te oe ia iloa pe na faapefea ona tali mai tagata aoga, mafaufau e valaaulia i latou e tali fesili e pei o le “E toafia outou sa lanumeamata? lanu samasama? mumu?” ma “Aisea na e filifilia ai le lanu na e faia?”

Uunaia tagata aoga e tatalo mo le malamalama e ala i le Agaga Paia, lea e mafai ona fesoasoani ia i latou e tali ai fesili e pei o fesili o loo i luga, faapea foi a latou lava fesili e uiga i le malumalu ma sauniga o le malumalu.

O le Malumalu o Navu

A o faamautu le Au Paia i Navu, Ilinoi, sa poloaiina i latou e le Alii e fausia se malumalu (tagai i le Mataupu Faavae ma Feagaiga 124:31) e pei ona sa Ia faia muamua i Katelani, Ohaio; Itumalo o Siakisone, Misuri; ma Fa Uesi, Misuri (tagai i le 88:119; 97:10; 115:7–8). I le taimi o le poloaiga a le Alii e fausia le Malumalu o Navu, ua uma ona Ia faaali mai le aoaoga faavae o papatisoga mo e ua maliliu i le Perofeta o Iosefa Samita (tagai i Autu ma Fesili, “Papatisoga mo e ua Maliliu,” topics.ChurchofJesusChrist.org).

Mafaufau e tusi “Ua poloaiina pea lo’u nuu e fausia [malumalu] i lo’u igoa paia” (Mataupu Faavae ma Feagaiga 124:39) i luga o le laupapa. E mafai e tagata aoga ona faailoga lenei fasifuaitau i a latou tusitusiga paia.

Valaaulia tagata aoga e suesue fuaiupu nei ma mafaufau e maka ia tali latou te maua. Ona mafai lea ona latou talanoaina mea na latou aoaoina i ni vaega toalaiti.

Fesoasoani i tagata aoao e talanoaina talitonuga o le talalelei ma isi: Mo nisi faataitaiga i lenei mea, tagai i le aoaoga ua faaautuina “Valaaulia mo tagata aoga e faasoa i le tasi ma le isi mea o loo latou aoaoina,” o loo maua i le Tomai o le Atinaega o Faiaoga: Valaaulia le Aoaoina ma le Filiga.

Faitau le Mataupu Faavae ma Feagaiga 124:25–30, 36–41, 55, ma vaavaai mo mafuaaga na poloaiina ai e le Alii le Au Paia e fausia malumalu.

• O le a se mea sa e mauaina?

• O le fea o faamoemoega po o folafolaga a le Alii mo le fausiaina o malumalu e sili ona tāua ia te oe? Aisea?

Atonu e maua e tagata aoga ni upumoni eseese, e pei ona poloaiina ai i tatou e le Alii e fausia malumalu “mo le Silisili Ese e afio ai” (fuaiupu 27); e “toefuatai mai mea na leiloa” (fuaiupu 28); o se nofoaga “mo le sulufaiga” (fuaiupu 36); ma “ina ia ou faamanuiaina outou, ma faapaleina outou i le mamalu, ola pea, ma le ola e faavavau” (fuaiupu 55). Afai e le o ta’ua mai e tagata aoga, valaaulia i latou e toe iloilo le fuaiupu 40 ma faaopoopo i ai le upumoni faapea ua poloaiina i tatou e le Alii e fausia malumalu ina ia mafai ai ona tatou maua sauniga paia. O lenei upumoni mulimuli o le taulaiga lea o lenei lesona.

Afai e manaomia e tagata aoga se fesoasoani i le faailoaina o upumoni i nei fuaiupu, mafaufau e tusi ia numera o fuaiupu o loo ta’ua i luga o le laupapa i le koluma e tasi ma fasifuaitau o loo ta’ua i se isi faasologa i se isi koluma. Ona mafai lea e tagata aoga ona faafetaui le fasifuaitau ma le fuaiupu e o faatasi ai.

Ua fesoasoani Elder David A. Bednar o le Korama a Aposetolo e Toasefululua ia i tatou ia malamalama i le faamoemoega o le Alii i le tuuina mai ia i tatou o sauniga o le malumalu.

Tatou te le o fausiaina pe ulufale atu i malumalu paia e tau na ona maua ai se aafiaga faaletagata lava ia pe faaleaiga e manatua pea. Ae, o feagaiga e mauaina ma sauniga e faatinoina i totonu o malumalu e taua i le faapaiaina o o tatou loto ma mo le faaeaga mulimuli o atalii ma ni afafine o le Atua. (David A. Bednar, “Ia Fausia Lenei Fale mo Lo’u Igoa,” Liahona, Me 2020, 85)

• O le a se mea na e aoaoina mai ia Elder Bednar?

• O le a se mea ua e aoaoina e mafai ona fesoasoani ia te oe e faamalamalama ai malumalu i se uo?

I le Malumalu o Katelani, na faaali mai ai le Faaola ma isi avefeau faalelagi (tagai Mataupu Faavae ma Feagaiga 110). O le Malumalu o Katelani o se nofoaga foi o musumusuga ma aoaoga. I Navu, na faaali mai ai e le Alii sauniga faaopoopo ia e faia i malumalu i aso nei. O aso nei i malumalu, e faatino ai e tagata faamaoni o le Ekalesia ia papatisoga mo e ua maliliu, maua faaeega paia (e aofia ai mulumuluga ma faauuga), ma auai i faamauga i le malumalu.

• O fea o nei sauniga na ta’ua e le Alii i fuaiupu sa e suesueina? (Tagai i le Mataupu Faavae ma Feagaiga 124:29–30, 37, 39.)

O lesona i le lumanai o le a taulai atu i papatisoga mo e ua maliliu ma faamauga i le malumalu. O le vaega o totoe o lenei lesona o le a taulai atu i le faaeega paia.

O le faaeega paia

O se tasi o sauniga na faaali mai e le Alii i le Au Paia i Navu o le faaeega paia.

A o lei suesueina le faaeega paia, e mafai ona e tuu atu i tagata aoga ni nai minute e mafaufau ai po o a ni a latou fesili e ono i ai e uiga i le faaeega paia ma pe aisea e taua ai mo i latou ona mauaina. Faamalamalama atu a o latou suesue i le faaeega paia, e mafai e le Agaga Paia ona fesoasoani ia i latou e saili tali i a latou fesili o i ai.

Ina ia fesoasoani i tagata aoga ia malamalama atili e uiga i le faaeega paia ma le mafuaaga e finagalo ai le Alii e faamanuia i latou e ala i lenei sauniga i le malumalu, mafaufau e faaaoga se tasi o manatu nei:

1. Tuu atu i tagata aoga se taimi e suesue ai punaoa o a latou filifiliga mai le lisi lenei.

2. Tuu atu i tagata aoga le tufaaga o loo avatu e su’esu’e ai.

3. Tuu tagata aoga e suesue i latou lava, faatasi ma se paga, po o ni vaega toalaiti.

Suesue nisi o punaoa nei, ma vaavaai pe faapefea ona faamanuiaina i tatou e le Alii a o tatou mauaina o tatou faaeega paia i le malumalu.

• Taiala i Tusitusiga Paia, “Faaeega Paia,” scriptures.ChurchofJesusChrist.org

• “E Uiga i le Faaeega Paia” ma isi punaoa o loo maua i le temples.ChurchofJesusChrist.org

• Autu ma Fesili, “Faaeega Paia,” topics.ChurchofJesusChrist.org

• “O Le a le Faaeega Paia o le Malumalu?” (1:59) maua i le ChurchofJesusChrist.org

O Le Faaeega Paia

Faitau le faamatalaga lenei o loo maua i le temples.ChurchofJesusChrist.org, ma vaavaai mo tali i le fesili lenei:

• E faapefea ona faamanuiaina a’u e le Alii a o ou mauaina o’u faaeega paia?

Afai e te auai i le Ekalesia, e te mauaina ni sauniga se lua—papatisoga ma le faamauga. E faapena foi, o le faaeega paia o le malumalu e maua i ni vaega se lua.

I le vaega muamua, o le a e mauaina i se tulaga patino ma na o oe lava se mea ua ta’ua o le “uluai” sauniga. O nei sauniga e aofia ai ni faamanuiaga faapitoa e faatatau i lou tofi paia ma ou gafatia. O se vaega o nei sauniga, o le a faatagaina ai foi oe e ofu ofusa paia o le malumalu.

I le vaega lona lua, o le a e mauaina ai le vaega o totoe o lou faaeega paia i se faatulagaga faalevaega. E faia lenei mea i se potu o aoaoga faatasi ma isi o auai atu i le malumalu. O mea tutupu o vaega o le ata o le faaolataga ua tuuina mai ai. Ua aofia ai le Foafoaga, le Pau o Atamu ma Eva, le Togiola a Iesu Keriso, le Liliuese, ma le Toefuataiga. O le a e aoao atili ai foi e uiga i le auala e mafai ona toe foi atu ai tagata uma i le afioaga o le Alii. O nisi o vaega o le faaeega paia e tuuina atu i le vitio ma o nisi e tuuina atu e taitai o le malumalu.

Ao faia le sauniga o le faaeega paia, o le a valaaulia oe e osia ni feagaiga faapitoa ma le Atua. O nei feagaiga e aofia ai mea nei:

• “Tulafono o le Usiusitai, lea e aofia ai le taumafai e tausi poloaiga a le Atua

• Tulafono o le taulaga, e aofia ai le faia o mea uma tatou te mafaia e lagolago ai le galuega a le Alii ma salamo ma se loto momomo ma se agaga o le salamo

• Tulafono o le talalelei, o le tulafono maualuga atu lea na aoao mai e Iesu a o i ai o Ia i le lalolagi

• Tulafono o le ola mama, o lona uiga o le faia o sootaga feusuai ma na o i latou o e ua tatou faaipoipo i ai faaletulafono ma i la le tulafono e tusa ai ma le tulafono a le Atua

• Tulafono o le faapaiaga, e aofia ai le tuuto atu o o tatou taimi, taleni, ma mea uma ua faamanuiaina ai i tatou e le Alii i le atinaega o le Ekalesia a Iesu Keriso i le lalolagi

A e tausia au feagaiga, o le a e latalata atili atu i le Faaola ma o le a faateleina le mamana o lou sootaga ma Ia. Ua folafola mai e le Atua o i latou o e tausia a latou feagaiga o le a maua faamanuiaga i lenei olaga ma le avanoa e toe foi atu ai ma mafuta faatasi ma Ia e faavavau.

I le faaiuga o le faaeega paia, e ulu atu tagata auai faafaailoga i le afioaga o le Alii ao latou ulu atu i le potu selesitila. O iina e mafai ai ona e faaalu le taimi e mafaufau loloto ai, tatalo, faitau tusitusiga paia, pe faasoa filemu atu ai ou lagona ma aiga ma uo. O se nofoaga lenei o le filemu, lea e mafai ai foi ona e maua le mafanafana ma le taitaiga faalelagi. (Tagai i le “E Uiga i le Faaeega Paia o le Malumalu,” temples.ChurchofJesusChrist.org.)

Tuu atu se avanoa mo tagata aoga e faamatala ai po o le a le faaeega paia ma pe mafai faapefea ona faamanuiaina i latou e le Alii pe a latou mauaina. Ina ia faia lenei mea, e mafai ona e tusia le “O le a le faaeega paia o le malumalu?” ma le “Aisea e taua ai le faaeega paia o le malumalu?” i luga o le laupapa. Valaaulia ni nai tagata aoga eseese e tali mai. E mafai foi e tagata aoga ona faasoa mai po o a ni a latou fesili o i ai e uiga i le faaeega paia, ma e mafai e isi tagata aoga ona faasoa mai mea na latou suesueina e ono fesoasoani.

O le malumalu ma a’u

Mafaufau e toe faaali atu le faataitaiga o le uo mai le amataga o le lesona. Valaaulia tagata aoga e mafaufau i mea na aoao atu e le Agaga Paia ia i latou i le asō pe faaopoopo o latou malamalamaaga i mea na latou tusia i le amataga o le vasega. Valaaulia tagata aoga e faasoa mai pe faapefea ona latou tali atu i a latou uo i se auala o le a fesoasoani latou te lagona ai le alofa o le Alii.

Punaoa Faaopoopo

O fea e mafai ona ou aoao atili ai e uiga i le malumalu ma sauniga o le malumalu?

• “Aisea e Fausia ai e le Au Paia o Aso e Gata Ai ia Malumalu,” temples.ChurchofJesusChrist.org

• “E Uiga i Papatisoga Sui ma Faamauga,” temples.ChurchofJesusChrist.org

• Autu o le Talafaasolopito a le Ekalesia: “Papatisoga mo e Maliliu,”ChurchofJesusChrist.org/study/history/topics

• Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 27.2, ChurchofJesusChrist.org

• “E Uiga i Faamauga i le Malumalu,” temples.ChurchofJesusChrist.org

• “Totonu o Malumalu,” temples.ChurchofJesusChrist.org

E mafai faapefea e sauniga o le malumalu ona tosinaina ai au?

Na faamatala mai e Elder Gerrit W. Gong o le Korama a Aposetolo e Toasefululua e faapea:

O le Atonement—at-one-ment [Togiola—to-gi-ola] ia Keriso—e oo mai pe a tatou faatinoina le faatuatua ma aumai fua e salamo ai. E pei ona i ai i le olaga nei, e faapena foi i le tino ola pea. O sauniga o le malumalu e le suia ai e i latou lava i tatou po o i latou o i le lalolagi o agaga. Ae o nei sauniga paia e mafai ai ona faia feagaiga faapaiaina ma le Alii, lea e mafai ona aumaia le ogatasi ma Ia ma le tasi ma le isi. (Gerrit W. Gong, “Fiafia ma le Faavavau,” Liahona, Nov. 2022, 84)

Aisea ou te moomia ai ona maua sauniga o le malumalu?

Na aoao mai Elder Robert D. Hales (1932–2017) o le Korama a Aposetolo e Toasefululua:

O le faamoemoega autu o le malumalu o le tuuina mai ai lea o sauniga e manaomia mo lo tatou faaeaga i le malo selesitila. O sauniga o le malumalu e taitaiina atu ai i tatou i lo tatou Faaola ma tatou maua ai faamanuiaga lea e oo mai ia i tatou e ala i le Togiola a Iesu Keriso. (Robert D. Hales, “O Faamanuiaga o le Malumalu,” Ensign, Oke. 2009, 48)

“O Le Aiga: O Se Folafolaga i le Lalolagi” o loo aoao mai mea nei:

Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau. (“O Le Aiga: O Se Folafolaga i le Lalolagi,” ChurchofJesusChrist.org)

Gaoioiga Faaopoopo e Aoao Ai

Filifiliga o le vitio

O vitio nei e mafai ona fesoasoani i tagata aoga e vaai ai i totonu o le malumalu ma le mea e faia ai le faaeega paia.

• “Afio Maia i le Malumalu o Uosigitone D.C.”

  • O le faailo taimi 0:00 i le 1:05 o loo faaalia ai Peresitene Russell M. Nelson o tali pe aisea e fausia ai e le Ekalesia malumalu.

  • O le faailo taimi 5:00 i le 7:00 e talanoaina ai le faaeega paia.

• ““Malumalu o Uosigitone D.C. 360 Maimoaga Faavitio”

  • O le faailo taimi 3:49 i le 4:59 e fesoasoani i tagata aoga e vaai ai i potu amata, le potu o faaeega paia, ma le potu selesitila.

• “Toalua Aposetolo na Taitaia se Maimoaga Taamilo o le Malumalu i Roma Italia”

  • O le faailo taimi 4:59 i le 7:35 o loo faaalia i totonu o le potu o faaeega paia i le Malumalu o Roma Italia.

• “Laei Paia o le Malumalu”

  • O lenei vitio o loo maua ai faamatalaga aoga mo tagata aoga o e atonu e i ai ni fesili e uiga i laei o le malumalu ma le ofusa o le malumalu.

O se folafolaga o la’u talalelei

I le Mataupu Faavae ma Feagaiga 124:2, na faatonuina ai e le Alii le Au Paia e “faia se folafolaga paia o la’u talalelei.” Mo faamatalaga aoga e uiga i lenei folafolaga, tagai i le Tusi Lesona o le inisitituti a le Tagata Aoga o le Mataupu Faavae ma Feagaiga (2018), 707–10.

E mafai ona e fesili i tagata aoga po o a folafolaga a le Ekalesia ua latou masani ai ma pe aisea ua tuuina mai ai e le Ekalesia ia folafolaga.

E mafai e tagata aoga ona faitau le Mataupu Faavae ma Feagaiga 124:3–7 ma tali fesili e pei o nei:

• O ai na faamoemoe i ai le folafolaga?

• Na faapefea ona tusia le folafolaga?

Ona mafai lea ona e tuuina atu i tagata aoga ni nai minute e tusi ai a latou “Folafolaga i le Lalolagi.” E mafai ona latou faaaofia ai nisi o mea latou te talitonu o le a latou faasoa atu i isi i le lalolagi. E mafai foi ona e valaaulia tagata aoga e mafaufau po o a mea e mafai ona latou faaaofia ai e uiga i malumalu i la latou folafolaga.

Faamaoni

E mafai ona e fesoasoani i tagata aoga ia malamalama i le taua o le amiosa’o e ala i le faia o mea nei. E mafai e tagata aoga ona faitau le Mataupu Faavae ma Feagaiga 124:15 ma le 20, ma vaavaai mo se uiga masani o Ailama Samita ma Siaosi Mila sa fiafia i ai le Alii.

Ona mafai lea e tagata aoga ona faitau mea nei mai le Mo Le Malosi o le Autalavou: O Se Taiala mo le Faia o Filifiliga:

O le ola ma le faamaoni o lona uiga e te fiafia i le upumoni ma lou loto atoa—e sili atu nai lo lou alofa i le faamafanafanaga faaletagata lava ia, lauiloa, po o le faafaigofieina. O lona uiga o le faia o le mea sao ona e sao. (Mo Le Malosi o le Autalavou: O Se Taiala mo le Faia o Filifiliga [2022], 31)

E mafai ona e fesoasoani i tagata aoga ina ia loloto lo latou malamalama i nei mataupu faavae i le fesili atu o fesili nei:

• Faamata e faapeī le fiafia o se talavou i le upumoni nai lo le mafanafana faaletagata lava ia, lauiloa, po o le faafaigofieina?

• E faapefea i le ola ai ma le faamaoni ona fesoasoani ia i tatou e avea ai ma soo sili atu o Iesu Keriso?

Ona mafai lea e tagata aoga ona mafaufau loloto i auala e mafai ona latou atiina ae ai le faamaoni sili atu i le aiga, i le aoga, ma a latou fegalegaleaiga ma isi.

O le faaeega paia i Navu

Na iu lava ina tutuliese le Au Paia mai Navu. Maimoa i le “Faaeeina i le Mana” e vaai ai i le manao o le Au Paia ia maua o latou faaeega paia ae latou te lei tuua le malumalu.