Mataupu Faavae ma Feagaiga 125–128

Mataupu Faavae ma Feagaiga 125–128

Vaaiga Aoao

Talu mai lona papatisoga, sa auauna atu Polika Iaga i le tele o misiona e talai atu le talalelei. Ia Iulai o le 1841, sa ia toe foi mai ai mai se misiona i Egelani. E le i leva ona toe fo’i mai, ae maua e le Perofeta o Iosefa Samita le faaaliga o loo ua iai nei i le Mataupu Faavae ma Feagaiga 126. I le 1842, na tuuaia sese ai e taitai o Misuri ia Iosefa i le fuafuaina o se osofaiga i le kovana muamua o Lilburn W. Boggs. Sa faamalosia Iosefa e alu e lafi ina ia aloese ai mai le pu’e faapagotaina. A o lafi ai, sa tele ona mafaufauga ma lagona e uiga i le aoaoga faavae o papatisoga mo e ua maliliu. Sa ia tusia ni tusi i le Au Paia e aoao ai i latou i le taua o le tausia o se faamaumauga o papatisoga na faatinoina mo o latou tuaa ua maliliu. Sa ia folafola atu foi isi aoaoga faavae taua e uiga i papatisoga mo e ua maliliu.

Fesoasoani i tagata aoga ia lagona le faaaloalogia ma le faatauaina: O tagata aoga taitasi o se atalii/afafine o le Atua e i ai uiga, taleni, ma meaalofa tulaga ese. Ia mataala ma iloa pe a taumafai tagata aoga e saofaga i ni auala lelei. Uunaia se uiga faaalia o le taliaina ma le alofa i tagata uma o le vasega. Mo nisi faamatalaga i le ala na faia ai e le Faaola lenei mea, tagai i le vaega “Na Faaalia e le Faaola Lona Alofa mo i Latou na Ia Aoaoina” i le Aoao Atu i le Ala a le Faaola. E mafai foi ona e vaai i se faataitaiga o le auala e faia ai lenei mea i le lesona o lenei vaiaso ua faaulutalaina “Mataupu Faavae ma Feagaiga 127–128 Vaega 2.”

Ia saunia e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia ai mo lesona taitasi.

Mataupu Faavae ma Feagaiga 126

Faamoemoega o le lesona: Ina ia fesoasoani i tagata aoga ia faateleina lo latou manao e galulue ma le filiga mo le Alii e pei ona sa faia e Polika Iaga.

• Sauniuniga a le tagata aoga: Valaaulia tagata aoga e vaavaai mo avanoa e auauna atu ai i le Alii a o lei oo i le isi vasega ma mafaufau loloto pe o le a se mea e ono faigata ai.

• Pepa e tufa atu: “O le Faataitaiga a Polika Iaga (Vaega 1 ma le Vaega 2)”

Mataupu Faavae ma Feagaiga 127–128, Vaega 1

Faamoemoega o le lesona: Ina ia fesoasoani i tagata aoga ia lagona le alofa o le Tama Faalelagi mo i latou, e faaalia e ala i sauniga o le malumalu.

• Sauniuniga a le tagata aoga: Valaaulia tagata aoga e sue a latou faamatalaga e saini ai i totonu mo le FamilySearch pe fai se faitotoa o le talalelei. O le a fesoasoani lenei mea ia i latou e faaaoga ai le FamilySearch i le lesona e sosoo ai.

• Ata: O se potu papatiso o le malumalu

Mataupu Faavae ma Feagaiga 127–128, Vaega 2

Faamoemoega o le lesona: Ina ia fesoasoani i tagata aoga e sue faamatalaga e uiga i o latou tuaa ua maliliu ma saunia e faatino sauniga mo i latou i totonu o le malumalu.

Manatua: O le tele o gaoioiga i lenei lesona e manaomia ai le faaaogaina o le FamilySearch.org po o le polokalama o le FamilySearch. Afai e le o iai se initoneti i lou nofoaga masani o le vasega, atonu e te manao e fai lenei vasega i se fale o le Ekalesia po o se isi nofoaga e faaaoga ai le initoneti.

Afai e te le masani i le FamilySearch.org, mafaufau e faaalu se taimi e faamasani ai oe lava i gaoioiga o loo i le lesona. Atonu foi e te manao e valaaulia se faufautua o le malumalu ma talafaasolopito o aiga mai lau uarota po o le paranesi e fesoasoani atu.

• Sauniuniga a le tagata aoga: Valaaulia tagata aoga e faaaoga o latou igoa faaaoga ma uputatala o latou faitotoa a le Ekalesia e saini ai i totonu o le FamilySearch.org. Afai e i ai ni tagata aoga e leai se faitotoa a le Ekalesia, valaaulia i latou e fai atu i se matua po o se taitai o le Ekalesia e fesoasoani ia i latou e fai se faitotoa a le Ekalesia].

• Aitema: Kopi o le tamaitusi O Lo’u Aiga: O Tala e Aumaia Faatasi ai i Tatou

• Vitio: “O Loto ua Fili Faatasi” (16:08; matamata mai le faailo taimi 14:30 i le 15:02)