Lesona 136: Mataupu Faavae ma Feagaiga 125–128

Mataupu Faavae ma Feagaiga 126

Na Talia e le Alii le Auaunaga a Polika Iaga

I le aso 9 o Iulai, 1841, na tuuina mai ai e le Alii se faaaliga ia Polika Iaga e ala mai i le Perofeta o Iosefa Samita. Ina ua uma ona auauna atu Polika i ni misiona se tele i le Iunaite Setete, Kanata, ma Egelani, sa fetalai le Alii ua ia taliaina ana malaga faafaifeautalai. Sa ia fai mai ua oo i le taimi mo Polika e tausia faapitoa ai lona aiga. O lenei lesona e mafai ona fesoasoani i tagata aoga e faateleina ai lo latou manao e galulue ma le filiga mo le Alii e pei ona sa faia e Polika Iaga.

Gaoioiga E Ono Mafai Ona Aoao Ai

Auauna Atu i le Alii

Tusi le fasifuaitau Auauna atu i le Alii i luga o le laupapa, ma valaaulia tagata aoga e fai mea nei:

Vaai faalemafaufau e faapea, sa iloiloina e se taitai o le siteki po o le itu ia tagata talavou o le Ekalesia i la outou eria ma fai atu fesili nei. Faamata o a nisi o a latou tali?

• O a ni auala o e taumafai ai e auauna atu i le Tama Faalelagi ma Iesu Keriso? Aisea e te auauna atu ai ia i Laua ?

• O le a le mea e faalavelave i le ala o le auauna atu i le Alii? Aisea atonu tatou te le mananao ai i taimi uma e auauna atu ia te Ia?

A uma ona faasoa mai tagata aoga, fai atu ia i latou e mafaufau loloto pe faapefea ona latou taliina e i latou lava ia fesili o loo i luga.

A o latou suesue e uiga i le faataitaiga a Polika Iaga i le taimi o lenei lesona, valaaulia tagata aoga e saili le Agaga Paia e fesoasoani ia i latou e faatoilalo soo se faafitauli i le auauna atu ma le filiga i le Alii.

O lagona o le Alii e uiga ia Polika Iaga

Mafaufau e tuu atu faamatalaga nei i ni nai tagata aoga i le amataga o le vasega. Valaaulia i latou e aotele mai mea sa anoa pe mata’ina ia i latou e uiga ia Polika Iaga .

• Na ola ae Polika Iaga ma le mativa, o le lona iva o fanau e toasefulutasi.

• I le 14 o ona tausaga, na maliu ai lona tina.

• I le 16 o ona tausaga, sa ia malaga ese atu ai e fai lona lava ala i le lalolagi, avea ma se faipisinisi faataitai, tagata faigaluega tioata, ma se tagata vali.

• I le 23 o ona tausaga, sa faaipoipo atu ai o ia ia Miriam Works, ma maua ai le la fanau teine e toalua.

• Sa suesueina e Polika le Tusi a Mamona mo le lua tausaga, ma faatusatusa i le Tusi Paia, a o lei auai o ia i le Ekalesia. Sa ia lipoti mai mulimuli ane, “Sa ou iloa e moni, e pei ona sa ou iloa e mafai ona ou vaai i ai i o’u mata, pe lagonaina e ala i le pa’i mai o o’u tamatamailima” (Aoaoga a Peresitene o le Ekalesia: Brigham Young [1997],2).

• Na auauna atu Polika i misiona e 10 i le Iunaite Setete, Kanata, ma Egelani.

• Sa avea o ia ma sui o se tasi o le Korama a Aposetolo e Toasefululua i le 33 o ona tausaga.

• I le aso 9 o Iulai, 1841, na tuuina mai ai e le Alii se faaaliga ia Polika Iaga e ala mai i le Perofeta o Iosefa Samita.

Faitau le Mataupu Faavae ma Feagaiga 126:1–3, ma vaavaai mo le mea na ta’u mai e le Alii ia Polika e uiga i lana auaunaga.

• O a ni mea sa e fiafia ai pe na aoaoina mai i nei fuaiupu?

  Faalogo ma le toto’a a o faasoa mai tagata aoga. Afai e te iloa e aoga, fai atu fesili tulitatao e pei o nei: “O a upu o loo faaaogaina i le faaaliga e faasino ia Polika?” “O le a sou manatu o a ni lagona o Polika i nei upu?” O le a se mea o aoao mai e nei fuaiupu e uiga i le Alii?”

  Afai e le masani ona faailoa mai e tagata aoga se mataupu faavae, mafaufau e fesili, “E mafai faapefea e faatonuga a le Alii ia Polika Iaga ona faatatau ia i tatou?” E mafai ona faaaoga e tagata aoga ni upu eseese, ae e tatau ona faailoa mai le mataupu faavae e tutusa i lenei: Afai tatou te galulue ma le filiga mo le Alii, o le a faapea ona Ia talia a tatou taulaga amiotonu. Atonu e te fautua atu i tagata aoga e faamaumau lenei mataupu faavae i a latou tusitusiga paia.

• O le a sou manatu i se mea e iloa e tagata e pei o Polika Iaga e faaosofia ai i latou e auauna atu ma le filiga i le Alii? E faapefea ona fesoasoani ai ia i tatou?

O le faataitaiga a Polika Iaga

O le tufaaga lenei e tolu ni talanoaga e ono i ai e fesoasoani ai i tagata aoga e aoao e uiga i le galulue ma le filiga mo le Alii mai le faataitaiga a Polika Iaga. A o lei amataina le vasega, valaaulia ni tagata aoga se toatolu e auauna atu i le vasega e ala i le taitaia o se tasi o talanoaga nei. Pe vaevae le vasega i ni vaega taitoatolu ma valaaulia tagata taitasi o le vaega e taitaia se tasi o talanoaga. Ta’u i tagata aoga e mafai ona latou fetuunaia soo se fesili ina ia atili anoa ai le talanoaga pe aoga mo a latou uo i le vasega.

O Le Faataitaiga a Polika Iaga

Talanoaga 1

O Le Luitau o le Tautala i Nofoaga Faitele

Amata i le fai o fesili e pei o nei:

• O le a sou lagona e uiga i le tautala i nofoaga faitele? Aisea?

Faitau pe aotele ia tala nei:

O se tasi luitau aupito maoae a Polika Iaga o le tautala i nofoaga faitele. Sa ia fai mai, “Sa itiiti lava lo’u tomai i le gagana e pei ona lelei ai se tagata” (i le Journal of Discourses, 5:97). Sa ia toe manatuaina se taimi i le tasi le vaiaso talu ona uma lona papatisoga ina ua ia faamoemoeina ni failauga se toafa ua i ai se poto masani o e sa avea ma tagata o le Ekalesia e talai atu, ae latou te lei faia. Sa ia fai mai:

Sa nao a’u o se tamaitiiti, o le taimi lea o le tautala i nofoaga faitele ma se malamalama o le lalolagi sa o se atugaluga, peitai sa i o’u luga le Agaga o le Alii, ma sa ou lagonaina e peiseai o le a mu o’u ivi i totonu ia te a’u vagana ai ua ou tautala atu i tagata ma ta’u atu ia te i latou mea sa ou vaai i ai, faalogo ma aoaoina—o mea sa ou oo i ai ma olioli ai; ma o le lauga muamua lava sa ou laugaina e silia ma se itula. Sa matala lo’u gutu ma sa faatumuina e le Alii. (Brigham Young, i le Journal of Discourses,, 13:211)

• O le a le mea na faigata i le mea na faia e Polika Iaga?

Valaaulia tagata aoga e faitau le Mataupu Faavae ma Feagaiga 100:5–6 (tagai foi Esoto 4:12; Faataoto 16:1). Ona fesili atu lea:

• Na faapefea ona fesoota’i aafiaga o Polika Iaga i nei fuaiupu?

• O le a se mea ua e aoaoina e uiga i le Alii e mafai ona fesoasoani ia te oe?

Faasoa atu ou lagona e uiga i le faalagolago i le Alii ma le naunau e faasoa atu mea ua e iloa.

Talanoaga 2

Osigataulaga a Polika e Auauna Atu

Amata i le fai atu o se fesili e pei o nei:

• O a ni osigataulaga e manaomia e auauna atu ai i se misiona?

Faitau pe aotele le tala lenei:

O le tausaga lava na papatisoina ai Polika Iaga, na maliu ai lona toalua. I se osigataulaga tele, sa ia faatulagaina ai le tausiga o lana fanau e toalua ma auauna atu i ni misiona i Niu Ioka ma Kanata i luga, lea na ia papatisoina ai ni nai tagata.

Ina ua maea ona auauna atu i se misiona pe tusa ma se tausaga, sa faamatala e Polika lona taunuu atu i Katelani, Ohaio:

Afai e i ai se tagata na potopoto faatasi ma le Au Paia sa sili atu ona mativa nai lo au—ona sa leai ni ana mea. … Sa i ai la’u fanau e toalua e tausi. … Sa avea au o sē ua oti lana avā. … [Sa leai so’u] seevae i lo’u vae, sei vagana ai se pea seevae nono mai. Sa leai ni o’u lavalava o le taumalulu, sei vagana ai se ofutele sa sui i le fale lea sa ia te au i le tolu pe fa tausaga. … Sa ou malaga ma talai atu ma tuuina atu tupe uma o a’u meatotino. (Aoaoga a Peresitene o le Ekalesia: Polika Iaga [1997], 243)

Valaaulia se tagata e faitau le Luka 18:18–23, ma vaavaai pe na faapefea ona ese le tali a Polika Iaga i valaaulia e auauna atu mai le tagata sa fesoota’i ma le Faaola i lenei tala.

• O le a se mea ua e iloa e uiga i le Alii e mafai ona fesoasoani ia i tatou ia naunau ai e faia ni osigataulaga e pei ona faia e Polika Iaga?

• E faaopoopo atu i le auauna atu i misiona, o a nisi o auala atonu e finagalo le Alii tatou te ositaulaga ai e auauna atu ia te Ia?

Faasoa atu ou lagona e uiga i le naunau e ositaulaga e auauna atu i le Alii.

Talanoaga 3

Misiona a Polika i Egelani

Amata i le fai atu o se fesili e pei o nei:

• O a nisi o mafuaaga e manaomia ai e se faifeautalai le fesoasoani a le Alii?

Faitau pe aotele le tala lenei:

Ina ua uma ona toe faaipoipo ma auauna atu i isi misiona e lima, sa valaauina Polika, faatasi ma isi Aposetolo, e auauna atu i se misiona i Egelani.

Sa faamatala e Polika lana misiona:

Sa matou tulaueleele … i le avea ai ma tagata ese i se laueleele ese ma le leai o se tupe, ae e ala i le alofa mutimutivale o le Atua na matou maua ai le tele o uo, na faavaeina ai Ekalesia i le toetoe lava o taulaga ma aai uma aloaia i le malo o Peretania Tele, na papatisoina i le va o le fitu ma le valu afe, 5,000 Tusi a Mamona na lolomiina, … ma ua tuu e ia i loto o le tele o afe o fatu o le upumoni e faavavau …: o nei mea uma ou te faailoa atu ai le aao o le Atua. (Aoaoga a Peresitene o le Ekalesia: Polika Iaga [1997], 6)

Valaaulia se tagata aoga e faitau upu a Amona i le Alema 26:12–13. Ona fesili atu lea:

• E faapefea ona faatusatusa le faamatalaga a Polika Iaga i le faamatalaga a Amona?

• Aisea e te manatu ai e taua le faalagolago i le Alii pe a taumafai e auauna atu ia te Ia?

• Na faapefea ona e taumafai e faalagolago i le Alii a o e auauna atu ia te Ia?

Faasoa atu ou manatu po o lagona e uiga i le faalagolago i le Alii a o e auauna atu ia te Ia.

O mea ua e aoaoina

A uma ia talanoaga, e mafai ona e uunaia tagata aoga e saili le taitaiga a le Agaga Paia ma tusi i lalo mea o loo latou aoaoina ma lagonaina e uiga i le auauna atu i le Alii. Atonu latou te taliina fesili nei:

• O le a se mea ua e aoaoina mai le faataitaiga a Polika Iaga ma pe na faapefea ona fesoasoani le Alii ia te ia?

• O le a le mea ua faateleina ai lou naunau e auauna atu i le Alii?

Faai’u i le valaaulia o tagata aoga e faasoa mai ni o latou manatu ma lagona na latou tusia. E mafai foi ona e faʻasoa atu.

Punaoa Faaopoopo

O le a se isi mea ua tatou iloa i le malaga a Polika Iaga i Egelani?

Sa mulimuli Polika ma isi Aposetolo i faatonuga a le Alii e malaga mo le misiona a Egelani mai Fa Uesi, Misuri, i le aso 26 Aperila, 1839 (tagai i le Mataupu Faavae ma Feagaiga 118). Sa latou faaaluina ni nai masina na sosoo ai i Aioua ma Ilinoi, i le faia ai o nisi o sauniuniga e malaga atu ai i Peretania Tele. Sa taia e se faamai pipisi o le malaria le eria i le taumafanafana o le 1839, ma, sa faapea foi ona mama’i ai i latou. Sa ma’i tigaina Polika, sa le mafai ona ia oso i totonu o se taavale solofanua e aunoa ma se fesoasoani. Na ia tusia:

Sa ou naunau e alu i Egelani po o le oti a o taumafai pea. O lau tautinoga maumaututu o le faia o mea e manaomia ai au i le Talalelei o le ola ma le faaolataga, po o lo’u oti ao taumafai pea e faia. (Aoaoga a Peresitene o le Ekalesia: Polika Iaga [1997], 5)

Ina ua mavae le maliu o lona faletua muamua, sa faaipoipo atu Polika ia Mary Ann Angell i le 1834. Sa ia lagolagoina o ia, e ui sa ma’i foi o ia ma i ai sana pepe faatoa fanau. O le misiona lona lima lenei na auauna atu ai Polika talu ona la faaipoipo. O le a ia auauna atu i le aofaiga atoa e 10.

I se tasi taimi, a o malaga Polika i le vaa ausa mai Fairport, Ohaio, i Pafalo, Niu Ioka, sa oso a’e se matagi lea na faalavelaveina ai le alualu i luma o le vaa. Sa ia faamatala mai le mea lenei:

Sa siisii le malosi o le savili pe a ma le ta o le tasi i le taeao. Sa ou alu i luga o le fola ma lagona le uunaiga i le agaga e tatalo i le Tama, i le suafa o Iesu, mo se faamagaloga o a’u agasala uma, ona ou lagona lea e poloa’i atu i matagi ia taofi, ma ia matou o saogalemu i la tatou malaga. Sa mou le matagi, ma sa ou lagona le tuuina atu o le faaneetaga ma le mamalu ma le viiga i lena Atua o lē e pulea mea uma. (Brigham Young, “History of Brigham Young,” Millennial Star, Oke. 17, 1863, 663–64)

Mataupu Faavae ma Feagaiga 126:3. Na faapefea ona “tausi faapitoa lelei” e Polika Iaga lona aiga?

Ina ua mae’a lana misiona i Peretania Tele, sa faapea ona mulimuli Polika Iaga i le poloaiga a le Alii e “tausi faapitoa lelei [lona] aiga” (Mataupu Faavae ma Feagaiga 126:3). Sa ia faaaluina le taimi e aoao atu ai ma tatalo faatasi ma lana fanau i aso uma.

E oo lava a o lei faalogo i le faaaliga o le Mataupu Faavae ma Feagaiga 126 i le 40 o ona tausaga, sa faaalia e Polika le tuu atu o lona loto i lona aiga. O loo faaalia lenei mea i le tala lenei:

Ina ua atoa lona 23, sa ia faaipoipo atu ia Miriama Angeline Works. Na la fanauina ni tama teine se toalua. Sa tausia e Polika lona aiga i le faia ma le lipeaina o nofoa, laulau, ma kapoti ma le faapipiiina o faamalama, faitotoa, fasitepu, ma tulaga o magalafu. …

Ina ua faataotolia Miriama i le gasegase o le fatafata vaivai, sa tauaveina e Polika le tele o galuega a lona toalua e faaopoopo i ana lava foi galuega. Ina ua faateteleina lona gasegase ma ua le mafai ai ona tula’i, e saunia e ia meaai i le taeao mo le aiga, fai lavalava o ona afafine, faamama le fale, ma ‘sii lona toalua i lona nofoa faalue i tafatafa o le magalafu, ma tuu ai iina seia oo ina toe foi ane i le afiafi,’ ona ia kukaina lea o le meaai o le afiafi, faamomoe lona aiga, ma faauma feau i totonu o le fale. (Aoaoga a Peresitene o le Ekalesia: Polika Iaga [1997], 2)

O a isi faamanuiaga na maua e Polika mai le mulimulita’i ai i lenei faaaliga?

Ina ua mavae lenei faaaliga, sa mafai ona tele atu se taimi o Polika Iaga e faaalu e faatasi ai ma lona aiga. Sa latalata foi o ia i le Perofeta o Iosefa Samita mo le 28 masina o masina mulimuli e 36 o le soifuaga o Iosefa. O le taimi lea na fesoasoani e saunia ai Polika e auauna atu o se peresitene o le Ekalesia ina ua mavae le maliu o Iosefa.

Gaoioiga Faaopoopo e Aoao Ai

Se isi amataga

Valaaulia tagata aoga e vaai faalemafaufau i le tuua ai o o latou aiga ina ia auauna atu i ni misiona i taumafanafana e lima o le a sosoo ai, ona toe valaauina lea e auauna atu i se misiona i se atunuu mamao mo le toeitiiti lua o tausaga. Fai fesili nei:

• O a ni ou lagona e uiga i le tuua faafia o lou aiga?

• O a ni ou lagona e uiga i nei misiona pe afai sa e nafa ma le tuuina atu o mea e manaomia e lou aiga?

O se vitio

Afai e aoga le matamata i se ata vitio o Polika Iaga ma Heber C. Kimball o malaga ese atu i la laua misiona i Egelani, faaali atu le “The Heart and a Willing Mind” mai le faailo taimi 4:08 i le 7:57.

The Heart and a Willing Mind