“Lesona 137—Mataupu Faavae ma Feagaiga 127–128, Vaega 1: O Le Faaolataga o e ua Maliliu,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 127–128, Vaega 1” Tusi Lesona a le Faiaoga Seminare o le Mataupu Faavae ma Feagaiga
Lesona 137: Mataupu Faavae ma Feagaiga 125–128
Mataupu Faavae ma Feagaiga 127–128, Vaega 1
O Le Faaolataga o e ua Maliliu
Ia Aokuso 1840, O le taimi muamua lea na aoao atu ai e Iosefa Samita le aoaoga faavae o le papatisoga mo e ua maliliu. Sa olioli tagata o le Ekalesia i le avanoa e tuuina atu ai sauniga faaola mo o latou aiga ua maliliu. Sa tusi atu e Iosefa Samita ni tusi i le Au Paia e faatonu ai i latou e faatatau i le sauniga o le papatisoga mo e ua maliliu. O lenei lesona e mafai ona fesoasoani i tagata aoga ia lagonaina le alofa o le Tama Faalelagi mo i latou, e faaalia e ala i sauniga o le malumalu.
Gaoioiga E Ono Mafai Ona Aoao Ai
O se tulaga faataitai
O le tulaga faataitai lenei e mafai ona fesoasoani i tagata aoga e toe manatunatu ai i o latou lagona e uiga i le aoaoga faavae a le Faaola o le papatisoga mo e ua maliliu. E mafai e tagata aoga ona fai faataitaiga faatino pe faapefea ona latou tali atu ia Ana.
I le taimi o se talanoaga ma faifeautalai, sa aoao ai Ana e uiga i le manaomia ona mulimuli i le faataitaiga a le Faaola ma ia papatisoina (tagai i le Mataio 3:13–17; Ioane 3:5; 2 Nifae 31:4–11). Sa ia manao ma le faamaoni ia maua le papatisoga, ae sa oo foi ina popole o ia i lona uso ua maliu. Sa fesili Ana i faifeautalai, “Ae faapefea lo’u uso na maliu a o lei mafai ona papatisoina o ia?”
-
A o e mafaufau i elemene o le aoaoga faavae a le Faaola, o a ni ou lagona o i ai o le a e faasoa atu?
Faamanatu i tagata aoga o tagata i le gasologa o tausaga, e aofia ai uluai tagata o le Ekalesia, na faia ni fesili e pei o fesili a Ana. E ala mai i le perofeta o Iosefa Samita, na faaali mai ai e le Tama Faalelagi le ala e mafai ai e Lana fuafuaga ona laveai i latou uma o e mananao ina ia faaolaina.
O le fuafuaga a le Tama Faalelagi
Sa faasolosolo malie ona faaali mai e le Alii ia Iosefa Samita le aoaoga faavae o le papatisoga mo e ua maliliu. Ia Aokuso 1840, sa lauga ai Iosefa Samita i le falelauasiga o Seymour Brunson. I le taimi o le lauga, sa ia tilotilo atu ia Jane Neyman, o se fafine ua oti lana tane ae lei papatisoina o ia. Sa ta’ua e Iosefa le 1 Korinito 15:29 ma aoao atu faapea o le fuafuaga a le Atua ua mafai ai e se tagata soifua ona papatisoina e fai ma sui mo se tasi ua maliu. Mulimuli ane, sa papatisoina Jane mo lona atalii o Kurusi. O le papatisoga muamua lenei mo e ua maliliu ua faatinoina i lenei tisipenisione (tagai i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 421–22).
Na faaalia mulimuli ane e le Alii e faapea, o papatisoga mo e ua maliliu e tatau ona faatinoina i totonu o le malumalu (tagai i le Mataupu Faavae ma Feagaiga 124:29–32). Ia Novema 1841, na amata ai ona papatisoina le Au Paia mo o latou tuaa i le Malumalu o Navu e lei maea ona fausia. Ia Setema 1842, na faatonu ai e Iosefa Samita le Au Paia ia tausia se talafaamaumau o na sauniga ma isi faamatalaga taua. O na faatonuga ua avea nei ma Mataupu Faavae ma Feagaiga 127 ma le128 (tagai i le Au Paia, 1:476–77). Sa faamatala e Iosefa Samita e faapea, o se tusitalafaamaumau e tatau ona avea o se molimau o le sauniga ma tausia faamaumauga sa’o o le a faamaumauina i se tusi aoao a le ekalesia. Sa ia aoao atu foi o isi e tatau ona avea ma molimau o le sauniga (tagai i le Mataupu Faavae ma Feagaiga 128:2–4). Ona ia faamalamalama mai lea pe aisea e manaomia ai ona faapitoa faatulagaga o lenei mea.
A o lei faitauina le Mataupu Faavae ma Feagaiga 128:5, atonu e fesoasoani le faamalamalama atu faapea “a o lei faavaeina le lalolagi” e faasino i le taimi a o lei foafoaina le lalolagi, ina ua i ai se aufono i le lagi (tagai ia Aperaamo 3:22–27).
Faitau le Mataupu Faavae ma Feagaiga 128:5, ma vaavaai mo mea ua e aoaoina e uiga i papatisoga mo e ua maliliu i le fuafuaga a le Tama Faalelagi.
-
O le a se mea o loo aoao mai e lenei fuaiupu ia oe e uiga i le Tama Faalelagi ma Lana fuafuaga?
Fesoasoani i tagata aoga e faailoa mai le upu moni lenei: Na saunia e le Tama Faalelagi se ala mo le faaolataga o i latou o e maliliu e aunoa ma se malamalama i le talalelei.
Mafaufau e tusi le upumoni i luga o le laupapa e fesoasoani ai i tagata aoga e talanoaina. O le faia o nisi o fesili nei e mafai ona fesoasoani ai i tagata aoga ia malamalama ai i lenei upumoni. E mafai ona e faaleleia le talanoaga e ala i le fai atu i tagata aoga e faasoa mai o latou manatu e uiga i manatu faaalia o tagata o le vasega.
-
O le a se mea ua aoao mai e lenei upu moni ia te oe e uiga i aga, uiga, po o faamoemoega a le Tama Faalelagi?
-
E mafai faapefea e lenei upu moni ona aafia ai oe ma lou aiga?
Ina ia fesoasoani i tagata aoga ia lagonaina le taua o lenei upumoni, mafaufau e faasoa atu lau molimau i ai. Pe e mafai foi ona e faasoa atu le faamatalaga lenei ma valaaulia tagata aoga e faasoa mai a latou tali i ai.
Na molimau mai Elder D.Todd Christofferson o le Korama a Aposetolo e Toasefululua ia Iesu Keriso ma le togiolaina o e ua maliliu.
O lo tatou tiute e faasafua atu i le mamao ma i le loloto e pei o le alofa o le Atua ia aofia ai Ana fanau i taimi ma atunuu uma. O a tatou taumafaiga e fai ma sui o e ua maliliu e fai ma molimau mamana o Iesu Keriso o le Faaola paia o tagata uma. O Lona alofa tunoa ma folafolaga e faapea foi ona oo atu ia i latou uma o ē e lē mauaina o Ia i lenei olaga. Ona o Ia, e moni lava o le a faasaolotoina ai pagota. (D. Todd Christofferson, “The Redemption of the Dead and the Testimony of Jesus,” Ensign, Nov. 2000, 11)
Tusifaamaumauina i le lalolagi ma i le lagi
Mafaufau e faaali atu se ata o le vai papatisoga o le malumalu. Valaaulia tagata aoga e faasino mai le tusitalafaamaumau ma molimau. Ona valaaulia lea o tagata aoga e sue ma faailoga nei galuega atofaina i le Mataupu Faavae ma Feagaiga 128:3. Afai na auauna atu tagata aoga o se molimau, e mafai ona latou faasoa mai o latou aafiaga.
O se tasi o auala e fesoasoani ai i tagata aoga ia maua le alagatatau i nei vaega o le toe foi lea i le tulaga faataitai e uiga ia Ana.
Ina ua uma ona papatisoina, sa auai Ana i le malumalu ma sa papatisoina mo lona uso na maliu. Ua mafaufau o ia pe mafai faapefea ona ia iloa o loo aoga le sauniga i le lagi.
Ao le i faitau e tagata aoga tusitusiga paia nei, atonu e te manao e faamalamalama atu o totonu o le Mataupu Faavae ma Feagaiga 128:8 i le fuaitau “propria persona [tagata patino]” e faatatau i tagata e papatisoina mo i latou lava, ae o le fuaitau “o latou lava sui,” e faatatau ia i latou o e e papatisoina mo isi.
Faitau le Mataupu Faavae ma Feagaiga 127:5–7; 128:6–8, ma vaavaai mo mea o le a e faasoa atu ia Ana e tali ai lana fesili.
-
O a upu po o fasifuaitau o le a e faasoa atu ia Ana?
-
Aisea e te manatu ai o le tausia o se talafaamaumau o sauniga e taua i le fuafuaga a le Tama Faalelagi?
-
E mafai faapefea e le malamalama i nei fuaiupu ona aafia ai lou aafiaga i le malumalu?
Faamalamalama atu o sauniga e faatinoina i totonu o malumalu e fusia ai i le lalolagi ma i le lagi ona o ki o le perisitua ua toefuatai mai e ala mai i le Perofeta o Iosefa Samita (tagai i le Mataupu Faavae ma Feagaiga 128:9–11).
“Ia olioli o outou loto, ma ia fiafia tele”
O le faamoemoega o lenei vaega o le fesoasoani lea i tagata aoga ia lagonaina le maoae o le ata o le faaolataga a le Tama Faalelagi. Mafaufau e tusi le fuafuaga a le Tama Faalelagi i luga o le laupapa ma valaaulia tagata aoga e faaopoopo upu po o fasifuaitau e faaalia ai o latou lagona e uiga i ai. Fai i ni nai tagata aoga e faasoa mai pe aisea ua latou lagonaina ai faapena.
E mafai foi e tagata aoga ona faaopoopo i le laupapa nisi o lagona na latou oo i ai pe a auai i papatisoga ma faamauga i le malumalu.
A o faitau e tagata aoga le fuaitau o mau lenei ma talanoaina fesili o loo avatu faatasi ai, e mafai ona latou faaopoopo upu po o fasifuaitau i le laupapa.
I lana tusi, sa faailoa mai ai e Iosefa Samita ona manatu e uiga i le aoaoga faavae mamalu o le togiolaina mo e ua maliliu. Faitau le Mataupu Faavae ma Feagaiga 128:22–23, ma vaavaai mo lagona faaalia e uiga i le fuafuaga a le Tama Faalelagi.
-
O a upu po o fasifuaitau mai nei fuaiupu e atagia ai ou lagona e uiga i le fuafuaga a le Tama Faalelagi mo le faaolataga o Ana fanau?
-
O anafea na e lagonaina ai se tasi o nei lagona a o e auai i le galuega o le malumalu ma talafaasolopito o aiga?
-
O le a sou manatu i le uiga o le “o le a faasaolotoina pagota”? (fuaiupu 22). Aisea e ono avea ai lenei mea ma mafuaaga mo le olioli tele?
Mafaufau e valaaulia tagata aoga e faamatala mai o latou lava lagona e uiga i le aoaoga faavae o le togiolaina o e ua maliliu. Valaaulia i latou e gauai atu i soo se uunaiga a le Agaga a o latou faia. E mafai ona latou tusia, tusi se ata, pe tusifaamaumau se savali. E mafai ona faaaoga e tagata aoga nisi o fasifuaitau o loo lisi i luga o le laupapa e faamatala ai pe faapefea ona saunia e le fuafuaga a le Tama Faalelagi le faamoemoe mo i latou o e maliliu e aunoa ma se malamalama i le talalelei. E mafai foi ona latou tusia e uiga i le aafiaga o le ata o le faaolataga i o latou lava aiga. Atonu e mananao tagata aoga e faamatala mai ni aafiaga anoa e auai ai i le galuega o le malumalu ma talafaasolopito o aiga.
A ua lava le taimi, valaaulia ni tagata aoga e naunau e faasoa mai le latou savali. E mafai foi ona e faasoa atu ou lagona e uiga i le togiolaina o e ua maliliu i le fuafuaga a le Tama Faalelagi.