Lesona 138: Mataupu Faavae ma Feagaiga 125–128

Mataupu Faavae ma Feagaiga 127–128, Vaega 2

“Papatisoga mo Outou Tagata Maliliu”

Sa tusi Iosefa Samita i le Au Paia e uiga i le aoaoga faavae o le papatisoga mo e ua maliliu. Sa ia faamalamalama atu e uiga i valoaga faatusi paia e fesoasoani ai i le Au Paia ia malamalama i le taua o le papatisoina e fai ma sui o o latou aiga o e ua maliliu. O lenei lesona e mafai ona fesoasoani i tagata aoga e sue ai faamatalaga e uiga i o latou tuaa ua maliliu ma saunia ai e faatino sauniga mo i latou i totonu o le malumalu.

Gaoioiga E Ono Mafai Ona Aoao Ai

Ou tuaa

Mafaufau e amata le vasega e ala i le fesoasoani i tagata aoga e mafaufau e uiga i o latou tuaa. E mafai ona e valaaulia tagata aoga e lisi le tele o o latou tuaa e mafai ona latou mafaufau i ai. E mafai ona faailoa mai e tagata aoga po o ai tuaa ua mauaina le sauniga o le papatisoga i Le Ekalesia a Iesu Keriso o le Au Paia o Aso e Gata Ai ma pe o ai foi e leai.

• O le a lou mautinoa i lou tomai o iai e faia ai talafaasolopito o aiga ma galuega o le malumalu mo ou tuaa?

Valaaulia tagata aoga e faasoa mai mea latou te manatua e uiga i le talaaga o le Mataupu Faavae ma Feagaiga 127–128. E mafai foi ona e faasoa atu le talaaga faaopoopo lenei.

Sa tuuaia e taitai o Misuri ia Iosefa Samita i le fesoasoani ai i le fuafuaina o se osofaiga i le kovana muamua o Lilburn W. Boggs. Sa masalomia e Iosefa afai e toe foi o ia i Misuri, o le a fasiotia o ia. A o lafi i le fale o Eteuati Hunter, sa tele manatu ma lagona o Iosefa e uiga i papatisoga mo e ua maliliu (tagai i le Mataupu Faavae ma Feagaiga 128:1). Sa tusi atu Iosefa Samita i le Au Paia e aoao atu ai i a i latou aoaoga faavae taua e uiga i le sauniga o le papatisoga mo e ua maliliu (tagai Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 466–77).

“Papatisoga mo outou tagata maliliu”

Na aoao mai Elder Quentin L. Cook o le Korama a Aposetolo e Toasefululua e faapea, ua ia i tatou le tiutetauave e faatino ai sauniga o le malumalu mo tagata patino:

Ua manino le aoaoga faavae o le aiga e faatatau i talafaasolopito o aiga ma galuega o le malumalu. Na faatatau le Alii i uluai faatonuga faafaaaliga i le “papatisoga mo o outou tagata maliliu” [Mataupu Faavae ma Feagaiga 127:5; ua faaopoopoina le faamamafa]. O la tatou matafaioi faaleaoaoga faavae ua faatatau lea i o tatou lava tuaa. E mafua lenei mea ona o le faatulagaga faaselesitila o le lagi e faavae lea i aiga. (Quentin L. Cook, “O A’a ma Lala,”,” Liahona, Me 2014, 45)

Faitau le Mataupu Faavae ma Feagaiga 127:5–6, ma mafaufau e faailoga ia upu “papatisoga mo o outou tagata maliliu” lea na ta’ua e Elder Cook.

• O le a sou manatu i le tulaga o le a i ai le feiloai atu i ou tuaa ua maliliu? Mata e faapefea ona latou tali atu i galuega o le malumalu ma talafaasolopito o aiga na e faia?

Mafaufau e faaali le vitio “Hearts Bound Together” i le ChurchofJesusChrist.org mai le faailo taimi 14:30 i le 15:02. I lenei vitio, ua faasoa mai ai Peresitene Henry B. Eyring o le Au Peresitene Sili pe faape’ī le feiloaiga ma o tatou tuaa ua maliliu.

O lo latou faaolataga e taua i lo tatou faaolataga

Faitau le Mataupu Faavae ma Feagaiga 128:15–18, ma vaavaai mo mea na aoao mai e perofeta e uiga i le aoaoga faavae o aiga e faavavau ma le papatisoga mo e ua maliliu.

Ina ia suesue le Mataupu Faavae ma Feagaiga 128:15–18, e mafai ona vaevae tagata aoga i ni vaega se tolu e iloa ai mea na aoao mai e perofeta nei. Valaaulia se tagata aoga i vaega taitasi e avea ma taitai o le kulupu. E mafai e lenei tagata ona vaevae ia tiutetauave. O se tasi o tiutetauave o le aoteleina mo le vasega o mea na suesueina e le vaega i tusitusiga paia.

• Iosefa Samita—fuaiupu 15, 18

• O le Aposetolo o Paulo—fuaiupu 15–16

• O le perofeta o Malaki—fuaiupu 17

A uma ona faitau e tagata aoga nei fuaiupu, valaaulia vaega taitasi e aotele ia fuaiupu. E mafai foi ona tou talanoaina fesili latou te ono maua po o fasifuaitau latou te manatu e taua.

• O a mea na aoao mai e perofeta taitasi e uiga i le faaolataga o o tatou tuaa?

  A o faasoa mai tagata aoga, e mafai ona latou faailoa mai ni upumoni se tele, e aofia ai mea nei:

  • O le faaolataga o o tatou tuaa ua maliliu e taua i lo tatou faaolataga.

  • O o tatou tuaa o e ua maliliu e aunoa ma le talalelei e le mafai ona agai i luma i le atoatoaga seiloga e faatinoina sauniga o le malumalu mo i latou.

  Fesoasoani i tagata aoga ia malamalama pe aisea e taua ai nei upumoni i aso nei. E mafai ona fesoasoani nisi o fesili nei.

• O a ni auala ua faia ai e Iesu Keriso le faaolataga o o tatou tuaa ua maliliu?

• O le a sou manatu e mafai faapefea e le auai i galuega faalemalumalu ma talafaasolopito o aiga ona fesoasoani ia te oe e mulimuli i le faataitaiga a le Faaola?

Na molimau mai Peresitene Henry B. Eyring o le Au Peresitene Sili e uiga i lo tatou tiutetauave taua:

O le toatele o ou tuaa sa lei mauaina na sauniga. Ae i le sauniaina ai e le Atua, na e maua ai. Ma e sa silafia e le Atua o le a e lagonaina le tosina atu i ou tuaa i le alofa ma o le a e mauaina le tekinolosi talafeagai e saili ai i latou. Sa Ia silafia foi o le a e ola i se taimi o le a maua ai avanoa i malumalu paia, e mafai ona faatinoina ai sauniga, ua sili atu i lo se isi lava taimi muamua i le talafaasolopito. Ma sa Ia silafia e mafai ona Ia faatuatuaina oe ia faataunuu lenei galuega e fai ma sui o ou tuaa. …

… O le toatele o talavou ua iloaina o le foai atu o o latou taimi e faia ai sailiga o talafaasolopito o aiga ma galuega faalemalumalu ua faalolotoina ai la latou molimau o le fuafuaga o le faaolataga. Ua faateleina ai le uunaiga a le Agaga i o latou olaga ma faaitiitia ai faatosinaga a le fili. Ua fesoasoani ai i a i latou e lagona le latalatala atili i o latou aiga ma latalata atili ai i le Alii o Iesu Keriso. Ua latou aoaoina o lenei galuega e le na o tagata ua maliliu e faaolaina ai; e faaolaina ai foi i tatou uma [tagai i le Mataupu Faavae ma Feagaiga 128:18]. (Henry B. Eyring, “Faapotopotoina o le Aiga o le Atua,” Liahona, Me 2017, 21, 22)

• O le a se mea ua e faia e auai ai i galuega o le malumalu ma talafaasolopito o aiga? O faapefea ona faamanuiaina oe e le Alii mo le faia o lea mea?

• E faapefea i le auai ai i lenei galuega ona fesoasoani e te lagona ai le latalata atili ia Iesu Keriso?

Auai i galuega o le malumalu ma talafaasolopito o aiga

O lenei vaega o le lesona ua faamoemoe e fesoasoani i tagata aoga e auai i le faatinoga o le galuega o talafaasolopito o aiga ma atonu foi e saunia ai e faatino ia sauniga i le malumalu. E tele auala e mafai ona e valaaulia ai tagata aoga e auai. O nisi nei o faataitaiga:

• Faaali atu le lisi o gaoioiga lenei, ma fesili i tagata aoga pe mafai ona latou aoao atu le vasega e uiga ia i latou. Ona mafai lea e tagata aoga ona faaali pe faapefea ona faataunuu ia galuega.

• Vaevae le vasega i ni vaega toalaiti ma valaaulia tagata aoga e galulue faatasi i gaoioiga. E mafai e tagata aoga ua lava aafiaga ona fesoasoani i tagata aoga e leai ni aafiaga.

• Fai ni nofoaga e aoao ai mo nisi o gaoioiga. Valaaulia se tagata aoga e masani i le gaoioiga e taitai ai le nofoaga. E mafai e tagata aoga ona faataamilo i nofoaga latou te filifilia.

Mafaufau e valaaulia se faufautua o le malumalu ma talafaasolopito o aiga mai lau uarota e fesoasoani atu. Afai e tapulaa le faaaogaina o tekinolosi, e mafai ona e mafaufau e taulai atu i le gaoioiga muamua o loo lisi atu i lalo.

• Faamaea gaoioiga eseese i le tamaitusi O Lo’u Aiga: O Tala e Aumaia Faatasi ai i Matou .

• Ia faamasani i lou gafa o le aiga i le FamilySearch.

• Faaaoga le vaega o le “Ordinances Ready” i le FamilySearch e sue ai igoa e ave i le malumalu.

• Fai se taimi faatulagaina e auai ai i le malumalu temples.ChurchofJesusChrist.org.

• Ia faamasani i le auala e faaopoopo ai tagata pe faapipii faamaumauga faasolopito i lau gafa o le aiga i le FamilySearch.

• Faaopoopo manatuaga i tagata i lau gafa o le aiga i le FamilySearch.

• Suesue le vaega o “Gaoioiga” o i le FamilySearch.org.

• Suesue le vaega o le “Malumalu ma Talafaasolopito o Aiga” i le Potutusi o le Talalelei.

A uma ua lava se taimi, ona valaaulia lea o ni tagata aoga e faasoa mai i le vasega mea na latou faia po o mea ua latou maua. E mafai foi e tagata aoga ona talanoaina pe na faapefea ona faateleina lo latou mautinoa e auai i galuega o le malumalu ma talafaasolopito o aiga.

Fesoasoani i tagata aoga ia lagona le faaaloalogia ma le faatauaina: Ina ia aoao atili e uiga i le faaali atu i tagata aoga e te faaaloalo ma faatauaina i latou, tagai i le aoaoga ua faaulutalaina “Auina atu se savali i se matua o se tamaitiiti aoga e uiga i se mea lelei ua e matauina i le la tama.” O lenei aoaoga o loo maua i le Tomai o le Atinaega o Faiaoga: Alofa ia i Latou E te Aoaoina.

Faitau le Mataupu Faavae ma Feagaiga 128:24, ma vaavaai mo ni taulaga e mafai ona tatou avatu i le Alii.

• O le a sou manatu o le a le galuega o le malumalu ma talafaasolopito o aiga tatou te faia o se taulaga amiotonu i le Alii?

• O le a le taulaga o galuega o le malumalu ma talafaasolopito o aiga ua e lagona le musuia e avatu i le Alii?

Valaaulia tagata aoga e faatino uunaiga na latou maua. Uunaia tagata aoga e auai i galuega o malumalu ma talafaasolopito o aiga i le fale faatasi ma o latou aiga.

Punaoa Faaopoopo

Mataupu Faavae ma Feagaiga 128:20. O le a le “tisipenisione o le atoaga o taimi”?

O le tisipenisione o se vaega o taimi lea o le a faaalia ai e le Alii Ana aoaoga faavae, sauniga, ma le perisitua. O le tisipenisione o i ai nei na amata ia Iosefa Samita ma ua ta’ua o le tisipenisione o le atoaga o taimi. Na aoao mai e le Perofeta o Iosefa Samita (1805-44): “O le tisipenisione o le atoaga o taimi o le a aumaia i luma mea ua faaalia mai i tisipenisione uma ua mavae faapea foi isi mea e lei faaalia mai muamua. O le a Ia auina mai Elia, le Perofeta, ma isi, ma toefuatai mai mea uma ia Keriso” (Aoaoga a Peresitene o le Ekalesia: Iosefa Samita [2007], 510–11; tagai foi i le Mataupu Faavae ma Feagaiga 128:18).

E mafai faapefea e le faatinoina o sauniga mo o tatou tuaa ona fesoasoani ia i tatou ia avea faapei o Iesu Keriso?

Na tautino mai Elder Gerrit W. Gong o le Korama a Aposetolo e Toasefululua:

Ua tuuina mai e le Alii ia i tatou le avanoa paia e avea atili ai e faapei o Ia a o tatou ofoina atu sauniga faaola sui o le malumalu e manaomia e isi ae le mafai ona faia mo i latou lava. E oo ina tatou atoatoa atili ma faaatoatoaina a o avea i tatou ma “faaola … i luga o le Mauga o Siona” [Opetaia 1:21]. (Gerrit W. Gong, “Fiafia ma le Faavavau,” Liahona, Nov. 2022, 84–85)

Sa aoao mai Peresitene Henry B. Eyring o le Au Peresitene Sili:

E mafai ona oo mai le aso pe a latou mauaina, o se talavou, se pepa faataga o le malumalu e faia ai papatisoga sui i le malumalu. I lena aafiaga, e mafai ai ona tuputupu ae o latou lagona faapea e faasino atu pea sauniga o le malumalu i le Faaola ma Lana Togiola. A o latou lagona o loo latou ofoina atu i se tagata i le lalolagi o agaga le avanoa e faamamaina ai mai agasala, o le a tupu a’e o latou lagona o le fesoasoani lea i le Faaola i Lana galuega paia o le faamanuiaina o se alo a lo tatou Tama Faalelagi. (Henry B. Eyring, “Ou Te Fia Vaai i le Malumalu,” Liahona, Me 2021, 30–31)

O a faamanuiaga na folafola ia i latou e auai i galuega o le malumalu ma talafaasolopito o aiga?

Na folafola mai Elder David A. Bednar o le Korama a Aposetolo e Toasefululua:

E le o se mea na faafuaveta ona oo mai le FamilySearch ma isi meafaigaluega i se taimi ua matua masani lelei ai tupulaga talavou ma se vaega tele o faamatalaga ma fesootaiga tau tekinolosi. Ua outou iloa auina feau feaveai i telefoni ma komepiuta e faatelea’i ai ma faalautele le galuega a le Alii—e le na ona fesootai vave ai ma a outou uo. O tomai ma taleni ua molimauina i le toatele o tupulaga talavou i ona po nei, o se tapenapenaga e saofagā ai i le galuega o le faaolataga.

Ou te valaau atu i tupulaga talavou o le Ekalesia ina ia aoao ma ia iloa le Agaga o Elia. Ou te faamalosiau atu ia te outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo o outou aiga ua maliliu (tagai i le MF&F 124:28–36). Ma ou te uunaia outou ia fesoasoani atu i isi tagata ia iloa o latou talafaasolopito o aiga.

A outou tali atu ma le faatuatua i lenei valaaulia, o le a liliu atu o outou loto i tamā. O folafolaga na faia ia Aperaamo, Isaako, ma Iakopo o le a totoina i o outou loto. O lou faamanuiaga faapeteriaka, faatasi ai ma le tautinoga mai o lou gafa, o le a faafesootaia oe i nei tamā ma o le a ‘anoa atili ai ia te oe. O le a faateleina lou alofa ma lou lotofaafetai mo ou tuaa. O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai i uunaiga faateleina a le tiapolo. A outou auai i le faatinoga ma outou fiafia i lenei galuega paia, o le a malupuipuia outou i lo outou talavou ma i o outou olaga. (David A. Bednar, “O Le a Liliu Atu Loto o Fanau,” Liahona, Nov. 2011, 26–27)

Na folafola mai e Elder Dale G. Renlund o le Korama a Aposetolo e Toasefululua:

A o tatou auai i talafaasolopito o aiga ma galuega o le malumalu i aso nei, ua tatou agavaa foi e maua faamanuiaga o le “faamalologa” ua folafola mai e perofeta ma aposetolo. O nei faamanuiaga e maofa ma ofoofogia ona o lo latou aotelega, natura patino, ma taunuuga i le olaga faaletino. O lenei lisi umi e aofia ai faamanuiaga nei:

• Faateleina le malamalama e uiga i le Faaola ma Lana taulaga togiola;

• Faateleina le tosinaga a le Agaga Paia e lagona ai le malosiaga ma le taitaiga mo tatou lava olaga;

• Faateleina le faatuatua, ina ia mafai ona faalolotoina ma tumau le liuaina i le Faaola;

• Faateleina le tomai ma le faaosofia e aoao ai ma salamo ona o le malamalama po o ai i tatou, o fea tatou te o mai ai, ma se vaaiga manino i le mea tatou te o i ai;

• Faateleina le faaleleia, faapaiaina, ma le puleaina o faatosinaga i o tatou loto;

• Faateleina le olioli e ala i se tomai faateleina e lagona ai le alofa o le Alii;

• Faateleina faamanuiaga faaleaiga, e tusa lava po o a o tatou tulaga faaleaiga i le taimi nei, tuanai, po o le lumanai pe o le a foi le lē atoatoa e ono i ai o tatou gafa faaleaiga;

• Faateleina le alofa ma le talisapaia mo tuaa ma tagata soifua o aiga, ina ia tatou lē toe lagonaina le tuuatoatasi;

• Faateleina le mana e iloatino ai vaega e manaomia ona faamaloloina ma o lea la, faatasi ai ma le fesoasoaniga a le Alii, e auauna atu ai i isi;

• Faateleina le puipuiga mai faaosoosoga ma faatosinaga malolosi a le fili; ma le

• Faateleina fesoasoaniga e foia ai ni loto atuatuvale, nutimomoia pe popole ma toe faamaloloina ai e manunu’a.

Afai na e tatalo mo soo se tasi o nei faamanuiaga, ia e auai i talafaasolopito o aiga ma galuega o le malumalu. A e faia lea mea, o le a taliina mai au tatalo. A faatinoina sauniga e fai ma sui o e ua maliliu, o le a faamaloloina fanau a le Atua i luga o le fogaeleele. (Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 47)

Gaoioiga Faaopoopo e Aoao Ai

O faamanuiaga o galuega o talafaasolopito o aiga ma galuega faalemalumalu

Afai e te lagona o le a manuia au tagata aoga mai le suesueina o nisi o faamanuiaga folafolaina mo le auai i galuega o talafaasolopito o aiga ma le malumalu, e mafai ona e faaali atu se tasi po o vitio uma nei: “The Promised Blessings of Temple and Family History Work” (3:26); “O Faamanuiaga Folafolaina o le Galuega o le Malumalu ma Talafaasolopito o Aiga 2” (4:04).

E mafai foi ona e valaaulia tagata aoga e faitau ma matau ia faamanuiaga ua folafola mai i faamatalaga o loo i le “Punaoa Faaopoopo.” Talanoa po o a faamanuiaga na oo i ai tagata aoga i o latou olaga ma pe o a faamanuiaga latou te mananao i ai.

Aoao e faaaoga le FamilySearch

Pe a galulue i gaoioiga a le vasega, e mafai e tagata aoga ona faaaoga le itulau “Aoaoga Faavitio i le Auala e Faaaoga ai le FamilySearch.”

Mataupu Faavae ma Feagaiga 128:18. O se sooga mau

E mafai ona fesoasoani lenei gaoioiga i tagata aoga e malamalama ai i le aoao atu e uiga i se sooga mau. E mafai ona e faaali atu se filifili a o outou talanoaina pe faapefea e le faatinoina o sauniga o le malumalu mo tagata o o tatou aiga ua maliliu ona faia se sootaga mau i le va o i tatou ma i latou. E mafai foi e tagata aoga ona faia se filifili pepa ma tusi igoa o tagata o o latou aiga ma tuaa i soo se sootaga. E mafai foi e tagata aoga ona faasoa mai pe faapefea e le faatinoina o sauniga o le malumalu ona fesoasoani latou te lagona ai le latalata atu i o latou tuaa.

Vitio

O nei vitio o loo faaalia ai aafiaga o le autalavou o e ua faamanuiaina i le auai i galuega o malumalu ma talafaasolopito o aiga. O le vaavaai atu ia i latou e mafai ona saunia ai tagata aoga e faasoa mai o latou lava aafiaga.

• “Faaleleia Lou Aafiaga Faalemalumalu; Sui Lou Olaga” (3:21)

• Vitio i le faaputuga “Tala Patino: Malumalu ma Talafaasolopito o Aiga”