Lesona 192: Saunia mo Aoaoga ma Galuega i le Lumanai

Aoaoga mo le Agaga Atoa

Sailia o Aoaoga Faaleagaga ma Aoaoga Faalelalolagi

Ua valaaulia i tatou e le Alii e tulitulimatagauina aoaoga faaleagaga ma aoaoga faalelalolagi “ina ia mafai ona [tatou saunia] i mea uma” (Mataupu Faavae ma Feagaiga 88:80). O lenei lesona e mafai ona fesoasoani i tagata aoga e faia se fuafuaga e faaauau ai a latou aoaoga faalelotu a o tulitulimatagauina a latou aoaoga faalelalolagi i le lumanai.

Gaoioiga E Ono Mafai Ona Aoao Ai

Faaavanoa se taimi mo le Alii i lau a’oga

Mafaufau e amata le lesona i le faasoa atu o le vaaiga faataitai lenei:

Vaai faalemafaufau e faapea ua e ta’u atu i se tasi o au uo e te auai i le seminare. A uma ona e faamatalaina po o le a le seminare, ona fesili lea o lau uo, “Aisea o le a manao ai se tasi e faaavanoa se taimi faapena mo lena vasega?”

• O le a se mea o le a e faasoa atu i lau uo?

  Mafaufau e fai atu ni fesili faaopoopo e pei o nei e fesoasoani ai i tagata aoga ia iloa pe na faapefea ona faamanuiaina o latou olaga i le auai i le seminare.

• Na faapefea ona faamanuiaina oe i le faaavanoaina o se taimi mo le Alii i lau aoga e ala i le auai i le seminare?

• Ua faapefea e le auai atu i seminare ona maua suiga i au suesuega o le poto salalau?

Faamalamalama atu a uma ona faamaea e tagata aoga o latou aafiaga i le seminare, o le a latou maua avanoa i tausaga o latou talavou matutua e faaauau ai a latou aoaoga faalelotu. O lenei lesona o le a faailoa atu ai i tagata aoga nei avanoa.

Fautuaina tagata aoga e gauai atu i uunaiga a le Agaga, lea e mafai ona fesoasoani ia i latou e iloa ai le taua o le tulitulimatagauina o aoaoga faaleagaga i a latou suesuega faaleaoaoga uma. E mafai foi ona e valaaulia tagata aoga e saili le taitaiga mai le Tama Faalelagi pe o a filifiliga mo aoaoga faalelotu e tulitulimatagauina i le lumanai.

O le taua o le aoaoina faaleagaga

I le Mataupu Faavae ma Feagaiga, ua aoao mai ai le Alii e tatau ona tatou tulitulimatagauina le tele o mataupu o le malamalama ina ia mafai ai ona tatou saunia e auauna atu i isi. Faitau le Mataupu Faavae ma Feagaiga 88:78–80, 118, ma vaavaai mo le fautuaga a le Alii.

• E faavae i mea ua e aoaoina i nei fuaiupu, o le a le mea ua poloaiina i tatou e le Alii e aoao ina ia mafai ai ona tatou saunia e auauna atu i isi?

  Atonu e faailoa mai e tagata aoga se upumoni e talitutusa ma lenei: Ua valaaulia i tatou e le Alii e taulai atu i le malamalama faaleagaga ma malamalama masani a o tatou sailia le aoaoina. Atonu e fesoasoani le faamalamalama atu o aoaoga faalelalolagi e faatatau i aoaoga e le fesootai tonu i aoaoga o le talalelei.

• O le a sau tala e fai atu i se tasi e lagona e leai so latou taimi mo aoaoga faalelotu aua ua latou taulai tele atu i a latou aoaoga faalelalolagi?

  I le avea ai ma se vaega o la outou talanoaga o fesili na muamua atu, atonu e fesoasoani le valaaulia o tagata aoga e suesue le Mataupu Faavae ma Feagaiga 29:34. E mafai ona latou vaavaai mo aoaoga e fesoasoani ia i latou e iloa lelei ai le mafuaaga e finagalo ai le Alii e taulai atu i aoaoga faalelotu ma aoaoga faalelalolagi.

• E mafai faapefea e le taulai atu i aoaoga faalelotu faatasi ai ma isi au suesuega faaleaoaoga ona faamalosia ai lou sootaga ma le Tama Faalelagi ma Iesu Keriso?

A uma ona talanoaina e tagata aoga ia fesili na muamua atu, mafaufau e faaali atu ma faasoa atu le saunoaga lenei a Peresitene Henry B. Eyring.

Na faamatalaina e Peresitene Henry B. Eyring o le Au Peresitene Sili ia faamanuiaga e mafai ona tatou maua a o tatou taumafai e faapaleni le aoaoina faaleagaga ma le aoaoina faalelalolagi:

O lo tatou uluai faamuamua lava o le aoaoina faaleagaga. … Ua manino foi o le faamuamua o le aoaoina faaleagaga o le a le tuuesea ai i tatou mai le aoaoina o mea faaletino. I se isi itu, e na te tuuina mai i lo tatou aoaoina faaletino le faamoemoe ma uunaia i tatou e galulue malosi atu i ai.

Afai o le a tatou tuuina le aoaoina faaleagaga i lona tulaga talafeagai, o le a manaomia ona tatou faia o ni filifiliga faigata i le auala tatou te faaaogaina ai o tatou taimi. Ae e le tatau lava ona i ai se filifiliga e faia ma le iloa e tuu ai le faaleagaga e avea ma vaega lona lua o o tatou olaga. E le tatau lava. O le a taitai atu ai i puapuaga. Atonu e le manino le puapuaga i le taimi muamua, pe o le a manino foi i le olaga faitino. Ae ia manatua, e te naunau i aoaoga, ia le gata mo le ola faaletino ae mo le ola e faavavau. A e vaai manino i lena mea moni i le vaaiga faaleagaga, o le a e faamuamua le aoaoina faaleagaga ae e te le manatu faatauvaa foi i aoaoga faalelalolagi. O le mea moni, o le a e galue malosi atu i lou aoaoina faalelalolagi nai lo lou galue e aunoa ma lena vaaiga faaleagaga. (Henry B. Eyring, “Education for Real Life,” Ensign, Oke. 2002, 17–18).

Filifiliga i aoaoga faalelotu i le Ofisa o Aoga a le Ekalesia

Ua faamanuiaina i tatou e le Tama Faalelagi i faalapotopotoga faaleaoaoga e lagolagoina e le Ekalesia lea e mafai ona fesoasoani ia i tatou e faamuamua le aoaoina faaleagaga. O nei faalapotopotoga na foafoaina e faamanuia ai fanau a le Atua.

Fesoasoani i tagata aoga ia faamasani i filifiliga mo aoaoga faalelotu i tausaga o o latou talavou. E mafai ona e faia lenei mea e ala i le faaali atu o le vitio “The Growth and Momentum of the Church Educational System.”

E mafai foi ona e tufatufaina atu le pepa e tufa atu ua faaautuina “Ofisa o Aoga a le Ekalesia” ma tuu atu i tagata aoga se taimi e faitau ma aoao ai e uiga i filifiliga eseese.

I le avea ai o se vasega, faaalu se taimi e faitau ma talanoaina ai le vaega ua faaautuina “Inisitituti o Aoaoga Faalelotu.” Tuu atu i tagata aoga se avanoa e fai ai fesili e uiga i le inisitituti. Atonu e aoga le valaaulia o se faiaoga i le lotoifale po o se tagata aoga e talanoa e uiga i le inisititutia ma tali fesili.

A uma ona talanoaina le inisitituti, tuu atu i tamaiti aoga se taimi e faitau ma aoao ai e uiga i isi filifiliga o loo lisi atu i le pepa e tufa atu. Valaaulia tagata aoga e vaavaai mo faamaoniga o le alofa o le Atua ma Ona manaoga mo i tatou a o latou suesue i filifiliga eseese. E ui ina auai tagata aoga mai le salafa o le lalolagi i inisitituti taitasi a le Ofisa o Aoga a le Ekalesia (OAE), e mafai ona fesoasoani le faaali atu i tagata aoga o filifiliga e sili ona talafeagai i la outou eria. E mafai ona fesoasoani atu le siata lenei:

Faataatiaga o Faafaafanua ua Taulai Atu i Ai	Inisitituti o Ofisa o Aoga a le Ekalesia (OAE)
Faataatiaga o Faafaafanua ua Taulai Atu i Ai Lalolagi Atoa	Inisitituti o Ofisa o Aoga a le Ekalesia (OAE) Inisitituti o Mataupu Faalelotu; BYU–Pathway Worldwide
Faataatiaga o Faafaafanua ua Taulai Atu i Ai Iunaite Setete ma Kanata	Inisitituti o Ofisa o Aoga a le Ekalesia (OAE) Iunivesite Polika Iaga; BYU–Idaho
Faataatiaga o Faafaafanua ua Taulai Atu i Ai Motu o Asia ma le Pasefika	Inisitituti o Ofisa o Aoga a le Ekalesia (OAE) BYU–Hawaii
Faataatiaga o Faafaafanua ua Taulai Atu i Ai Iuta ma setete lata ane	Inisitituti o Ofisa o Aoga a le Ekalesia (OAE) Kolisi a Ensign

A o lei valaauliaina tagata aoga e aoao e uiga i isi inisitituti a le OAE, mafaufau e fesoasoani i tagata aoga e iloilo po o le fea o inisitituti o le a sili ona talafeagai ia i latou.

O se tasi o auala e mafai ona e faia ai lenei mea o le fatuina lea o ni nai mataupu suesue e faamatala ai tagata e fetaui lelei mo inisitituti taitasi. O le isi filifiliga o le tuuina atu lea i tagata aoga o pepa e tufa atu ua faaautuina “O Le Fea le Inisitituti a le OAE e Fetaui mo A’u?” A uma ona faitau e tagata aoga le pepa e tufa atu ma faailoa mai o latou manaoga, valaaulia i latou e vaavaai mo inisitituti e ono fetaui lelei mo i latou.

O Le Fea le Inisitituti a le OAE e Fetaui mo A’u?

Maka ia faamatalaga e te lagona e sili ona lelei e faamatala ai oe:

1. Ona o le galuega po o isi tiutetauave, o le a ou manaomia ai le fetuunaiga i la’u taimi faatulagaina.

2. Na ou maua ni togi lelei i le taimi ua tuanai.

3. O le a ou manuia mai le i ai o se faufautua i au meaaoga.

4. O le a faigata ia te au ona maua le tupe e manaomia e totogi ai mo le kolisi.

5. Atonu e faigata ia te au ona agavaa mo le tele o kolisi po o iunivesite.

6. Ou te fiafia i se aafiaga tau aoaoga maualuga.

7. Ou te fiafia i vasega e laiti le aofai.

8. O loo ou fuafua e auai i le kolisi ae le o se tasi o kolisi po o iunivesite a le Ekalesia.

Ofisa o Aoga a le Ekalesia

Misiona a le OAE: O le atiina a’e lea o soo o Iesu Keriso o e o loo avea ma taitai i o latou aiga, le Ekalesia, ma o latou nuu.

[Itulau 1]

Faapotopotoina o Isaraelu:

“O loo faaaoga e le Alii aoaoga i le faapotopotoina tele o Isaraelu o loo tutupu i le Ekalesia i aso nei. O loo Ia saunia le lalolagi mo Lona toe afio mai, ma o le Ofisa o Aoga a le Ekalesia o se tasi lea o le tele o punaoa o le a Ia faaaogaina i lena taumafaiga. O loo faia e inisitituti taitasi se mea e ese e faamanuia ai se Ekalesia i le lalolagi atoa. Ua i ai i inisitituti taitasi se faamoemoega ese ma se poloaiga mai le autaitai a le Ekalesia ina ia ese mai le lalolagi ma, o le mea e malie ai, e ese mai le tasi ma le isi.”

—Elder Clark G. Gilbert, Komesina o le Ofisa o Aoga a le Ekalesia

• SAINI E ALU I TOTONU e maua ai nisi faamatalaga e uiga i avanoa: cesinfo.byu.edu.

• INA IA APALAI i se tasi o nei filifiliga, alu i le apply.ChurchofJesusChrist.org.

• AOAO ATILI e uiga i inisitituti taitasi i le itulau e sosoo ai o lenei pepa e tufa atu.

[Itulau 2]

Inisitituti o Mataupu Faalelotu

O le inisitituti o se nofoaga mo le autalavou matutua e faapotopoto ai ma uo—i le aoga pe leai—o e faasoa atu se manao e ola i upumoni e faavavau a o feagai ai ma mea moni faalelalolagi o le olaga i aso taitasi. O le faamoemoega o le inisitituti o le fesoasoani lea i talavou matutua ia iloa ma faaaoga auala aoga e avea atili ai e faapei o Iesu Keriso.

E feiloai le inisitituti i tagata aoga i le mea o latou i ai i la latou malaga o le faatuatua. O se nofoaga o le a latou oo i ai:

• Mataupu aoaoina e faatotonugalemu ia Keriso mai tusitusiga paia ma aoaoga faaperofeta.

• O le sailiiliga i aafiaga o le auala e faatautaia ai tulaga faaleagaga ma aoga o le olaga.

• O se nofoaga o le faaaloalo, malamalama, ma le saogalemu e faaauai ai, fai ai fesili, ma maua ai ni vaaiga.

• Aoaoga i luga o le initoneti ma le tagata lava ia, mafutaga faaleaoaoga, ma talanoaga fesootai.

Aoao atili i le institute.ChurchofJesusChrist.org.

BYU–Pathway i le Lalolagi Atoa

O le BYU–Pathway i le Lalolagi Atoa ua mafai ai ona maua se faailoga o le iunivesite mo tagata uma.

O tagata aoga o e mananao i le fetuunaiga o aoaoga i luga o le initoneti, e mananao e fausia se talitonuga faaleaoaoga, pe manaomia nisi taimi e fuafua ai po o le a le mea e fai pe a uma le aoga maualuga po o le aoga tulagalua e mafai ona manuia mai le BYU–Pathway Worldwide.

• Ua tautuaina e le BYU–Pathway Worldwide ia tagata aoga i le silia ma le 180 atunuu.

• O polokalama atoa e i luga o le initoneti, ma o tau o pili e matuai maualalo lava nai lo isi aoga.

• E mafai e tagata aoga ona maua ni tusi faamaonia e mafai ona maketiina ma e mafai ona suia i tikeri i luga o le initoneti e ala i le BYU–Idaho ma le Ensign College.

• O tusi faamaonia taitasi e ofoina atu e tasi le tausaga pe itiiti ifo e faamaea ai.

Aoao atili i le cesinfo.byu.edu.

Iunivesite o Polika Iaga

O le misiona a le Iunivesite o Polika Iaga (BYU) o le fesoasoani lea i tagata taitoatasi i la latou sailiga mo le atoatoa ma le ola e faavavau. Ua tuuina mai e le BYU se vaitau o le aoaoina i se tulaga maualauga i nofoaga lea e faaosofia se tautinoga i le tulaga sili ona lelei ma le tulitulimatagauina ai le iloaina atoatoa o gafatia faaletagata soifua. Ua saili le BYU e atiina ae tagata aoga o le faatuatua, atamai, ma uiga tauleleia o e ua i ai tomai ma le manao e faaauau pea ona aoao ma auauna atu i isi i o latou olaga atoa.

• E i ai i le BYU ni avanoa tauoloa e aoao ai lea e tuufaatasia ai upumoni faaleagaga, aafiaga o sailiiliga, ma le aoaoina o lima mo tagata aoga uma.

• O se faalauiloa mo aoga maualuga ma le faataunuuina o galuega.

• E maua ai se aafiaga masani i le iunivesite ma afeleti NCAA ma faatufugaga ma faafiafiaga faamusika i le lalolagi.

Aoao atili i le cesinfo.byu.edu.

BYU–Idaho

O le BYU–Idaho e fausia ai molimau o le talalelei toefuataiina a Iesu Keriso ma atiina ae ai ona mataupu faavae i se siosiomaga lelei faaleaoaoga, faaleaganuu, ma faaleagafesootai. Ua mamanuina vasega e ofo atu ai aafiaga moni i le lalolagi e saunia ai tamaiti aoga e eseese mea e fiafia i ai ma tomai mo le aoaoina ma galuega i le olaga atoa. Ua saili le BYU–Idaho e ofo atu se aoaoga e maualuga le tulaga lelei i se tau maualalo i le toatele o tagata aoga e mafai ai.

• O tikeri o loo ofoina atu i le silia ma le 100 mataupu autu.

• O faiaoga o fuaiala o tagata tomai faapitoa i o latou lava mataupu ma e tuuina atu le aoaoina ma le fautuaina o tagata aoga e avea ma o latou faamuamua maualuga.

• O le averesi o le vasega e 30 tagata aoga.

Aoao atili i le cesinfo.byu.edu.

BYU–Hawaii

O le taulai atu i tagata aoga mai le Oceania ma le Asia Rim, e saunia ai e le BYU–Hawaii tagata aoga e avea ma faataitaiga i le lalolagi o le filemu faavavega ma le lotogatasi e ala i le ola ai i aoaoga a Iesu Keriso. Ua saunia le au faauu mai le BYU–Hawaii mo se auaunaga i le olaga atoa. Latou te faaalia tomai e mafaufau ai ma uiga o se auauna-taitai.

• E fuafua e tagata aoga o latou lava ala tulagaese faaleaoaoga e ala i le filifilia o se tikeri autu se tasi ma ni tikeri laiti se lua po o ni tusi faamaonia i vaega eseese o suesuega.

Aoao atili i le cesinfo.byu.edu.

Kolisi a Ensign

O le taulai atu i tagata aoga mai le eria tele o Iuta, e atiae ai e le Kolisi o Ensign ni soo e gafatia ma faatuatuaina o Iesu Keriso. O le mataupu aoaoina e faavae i tomai e faamautinoa ai ua maua e tagata aoga le poto masani lea e saunia ai i latou e maua se totogi faatautava i le tasi i le fa tausaga. O se siosiomaga faafaileleina faaleagaga e faaatoatoa ai le aoaoina loloto i totonu o le potuaoga.

• E mafai e soo se tasi ona talosaga.

• E silia ma le 25 filifiliga o tusi pasi, lea e mafai ona faaaoga agai atu i le faailoga o le tikeri o le tagata malaga.

• O loo maua tusi pasi ma tikeri i luga o le initoneti e ala i le BYU–Pathway Worldwide.

• O loo i ai se tino o tagata aoga eseese.

Aoao atili i le cesinfo.byu.edu.

A uma ua lava se taimi o tagata aoga e faitau ma suesue ai filifiliga, tuu atu ia i latou se taimi e faasoa mai ai mea na latou aoaoina e ala i le talanoaina o fesili e pei o nei:

• O a malamalamaaga na e maua mai i le suesueina o nei filifiliga?

• O le a se faamaoniga na e maua i le alofa ma le finagalo o le Atua mo Ana fanau?

• O a ni au fesili o loo i ai pea?

Fai se fuafuaga

Fatu se fuafuaga e faamuamua ai lau aoaoga faaleagaga i le taimi nei ma i le lumanai.

• Afai o i ai pea ni nai ou tausaga o totoe i le seminare, tusi i lalo se sini e faaauau pea ona avea aoaoga faaleagaga o se faamuamua.

• Afai ua e latalata i le faamaeaina o le seminare, tusi i lalo po o le a le isi au laasaga o le a i ai.

• O le a faapefea ona fesoasoani lau fuafuaga ia te oe e faaauau ai ona faalatalata atili atu i le Faaola?

Valaaulia ni tagata aoga naunautai e faasoa mai a latou fuafuaga i le vasega. Faamalosiau ia i latou e talanoa i se matua, taitai o le Ekalesia, po o se faufautua e uiga i a latou fuafuaga ma faamoemoega i le lumanai.

Faasoa atu lau molimau i le taua o le avea o le aoaoina faaleagaga o se mea e faamuamua.

Punaoa Faaopoopo

Aisea ou te manaomia ai le faapaleniina o a’u aoaoga faaleagaga ma aoaoga faalelalolagi?

Sa faamatala e Peresitene Gordon B. Hinckley (1910–2008) le taua o le avea o aoaoga faalelotu ma faamuamua i lou olaga.

Faatasi ai ma au aoaoga uma, aoao e uiga ia te ia. I au suesuega uma lava, e manaomia ona tatou saili i le malamalama i le Matai. O lena malamalama o le a faaatoatoaina i se auala matagofie o aoaoga faalelalolagi e te mauaina ma tuuina atu se atoaga i lou olaga ma uiga tauleleia lea e le mafai ona oo mai i se isi lava ala. (Gordon B. Hinckley, i le Conference Report, Oct. 1964, 118)

Na aoao mai Peresitene M. Russell Ballard o le Korama a Aposetolo e Toasefululua:

O outou talavou matutua ua tatau ona lesitala i se inisitituti o mataupu faalelotu. Afai o e a’oga i se aoga a le Ekalesia, ia e auai e le aunoa i se vasega o aoaoga faalelotu i semesa taitasi. I le taimi o lenei vaitau taua o sauniuniga mo se misiona, faaipoipoga e faavavau, ma le olaga o se tagata matua, e tatau ona e sailia pea lava pea auala e aoao ai ma tuputupu ae ai ma mauaina musumusuga ma le taiala e ala i le Agaga Paia. E mafai ona fesoasoani ia te oe mo lena sini se suesue toto’a ma le agaga tatalo i le talalelei e ala i le seminare, inisitituti, po o vasega faalelotu i aoga.

Pe o e aoga i aoga a le Ekalesia pe leai, pe o e alu i le iunivesite pe leai, aua lava nei e manatu ua e pisi tele e le mafai ai ona suesue i le talalelei. O le seminare, inisitituti, po o vasega faalelotu, o le a maua ai le paleni o lou olaga ma faaopoopo atu ai i le aotauina o oe i le aoaoga faalelalolagi, e ala i le tuuina atu ia te oe o se isi avanoa e faaalu ai se taimi e suesue ai tusitusiga paia ma aoaoga a perofeta ma aposetolo. (M. Russell Ballard, “O Le Tupulaga Silisili o Talavou Matutua,” Liahona,, Me 2015, 69)

E mafai faapefea ona faamanuiaina lo’u olaga e filifiliga a le inisitituti ma le OAE?

Na folafola mai e Peresitene Russell M. Nelson:

O se tasi o manaoga loloto o lo’u loto o le mauaina lea o mea uma ua saunia le Alii e faaali atu ia te oe. O le a fesoasoani le seminare ma le inisitituti ia te oe.

O le faauu mai i le seminare ma le inisitituti o le a faateleina ai lou gafatia e faaeaina ai i mea aupito taua o le a e faia i le olaga. O le a fai mo oe le olioli moni! (Russell M. Nelson, “A Personal Invitation to Participate in Seminary and Institute,” Feb. 4, 2019, ChurchofJesusChrist.org)

Gaoioiga Faaopoopo e Aoao Ai

E mo oe le inisitituti?

Afai e mafai ona manuia tagata aoga mai nisi faamatalaga e uiga i le inisitituti, mafaufau e faaali atu se tasi pe sili atu o vitio mai le faaputuga vitio o le “Institute Is for Me”. I nei vitio, o loo molimau mai ai le autalavou matutua mai le salafa o le lalolagi i le taua o le inisitituti.

Fatu se faamatalaga “aisea”

E mafai ona manuia tagata aoga mai le fatuina o se faamatalaga “aisea” e faamatala ai le mafuaaga e taua ai ia i latou le mauaina o se aoaoga faaleagaga. Mo se faataitaiga, e mafai e tagata aoga ona faauma le fuaiupu lenei i a latou api faamaumau mo suesuega: “O le sailia o aoaoga faaleagaga e taua ia te au aua …”

E mafai foi ona e fai atu ni fesili e pei o fesili nei e fesoasoani ai i tagata aoga e mafaufau pe aisea e taua ai le a’otauina faaleagaga ia i latou.

• Aisea e taua ai ia te oe le mauaina o le malamalama faaleagaga a o e sailia le malamalama masani?

• Aisea e taua ai i lou atinaega faaleagaga le maua o se aoaoga faaleagaga faatasi ai ma se aoaoga faalelalolagi?

Vaaiga faaleagaga

A uma ona faitau e tagata aoga le saunoaga a Peresitene Henry B. Eyring i le lesona, mafaufau e valaaulia i latou e faasoa mai mea na tulaga ese ia i latou mai ana upu. Ona mafaufau lea e fai atu fesili nei:

• O le a sou manatu e mafai faapefea e le avea o lou aoaoina faaleagaga o se faamuamua maualuga ona faaopoopo atu ai se manatu ma se vaaiga mamao faaleagaga?

Valaaulia tagata aoga e mafaufau e uiga i mea latou te faamuamuaina i le taimi nei mo le aoaoina ma mafaufau pe mafai ona faamanuiaina i latou mai le faia o soo se fetuunaiga.