Ia Setema 1830, a o lei faia le konafesi lona lua a le Ekalesia i Faiete, Niu Ioka, sa faamoemoe nisi o uluai tagata o le Ekalesia ia vave ona faataunuu ia valoaga a le Tusi a Mamona e uiga ia Siona ma le faapotopotoina o le au filifiliia a le Atua. Sa potopoto se vaega e toaono o toeaina ma isi tagata o le Ekalesia ma fesili atu i le Alii e uiga i nei valoaga. O le tali atu i la latou talosaga, na maua ai e Iosefa Samita le faaaliga ua tusia i le Mataupu Faavae ma Feagaiga 29. I lea faaaliga, na aoao mai ai le Alii e uiga i le faapotopotoina o le au filifilia a le Faaola a o loma Lona Afio Mai Faalua, ma e uiga i le togiolaina mai le Pau o Atamu ma Eva e ala i le Togiola a Iesu Keriso.
Iuni–Oketopa 1830Na faalau mai ai e Iosefa Samita le Mose 1–5 a o galue ai o ia i le faaliliuga musuia o uluai mataupu o le Kenese.
Aokuso–Setema 1830Sa feseseta’i tagata o le Ekalesia i faaaliga le faavaea a Hiram Page.
E faapotopoto e Iesu Keriso Lana ʼau filifilia e sauniuni ai mo Lona Afio Mai Faalua
A o lei amataina le vasega, ia tusi upu nei i luga o le laupapa: puapuaga ma le faatafunaga.
A amata le vasega, valaaulia tagata aooga e faamalamalama mai pe mafai faapefea ona faaaoga nei upu e faamatala ai o tatou taimi ma aso e tau atu i le Afio Mai Faalua o Iesu Keriso.
Ta’u i ai e ui e i ai ni nai tagata e lagona le popole e uiga i puapuaga ma le faatafunaga o loo i ai i le lalolagi, a ua faaalia mai e le Alii upumoni o le a taiala ai ma fesoasoani ia i tatou i nei taimi faigata. Valaaulia tagata aooga e vaavaai mo upumoni a o latou suesueina le Mataupu Faavae ma Feagaiga 29 o loo aoao mai ai mea e tatau ona tatou faia ina ia puipuia mai ai ma sauniuni ai mo aso o le puapuaga ma le faatafunaga.
Faamalamalama atu o Setema 1830, ae toeitiiti fai se konafesi a le Ekalesia i Faiete, Niu Ioka, e toaono toeaina ma le isi toatolu o tagata o le Ekalesia sa potopoto e talanoaina ni autu, e aofia ai le solitulafono a Atamu ma Eva ma le valoaga e faatatau i le aumaia i luma o Siona (tagai Isaia 52:8; 3 Nifae 16:18; 21:22–24.) Sa latou auau faatasi i le tatalo e faatatau i nei autu, ma o le tali, na tuuina atu ai e le Alii ia Iosefa Samita le faaaliga o loo tusia i le Mataupu Faavae ma Feagaiga 29.
Valaaulia se tagata aoga e faitau leotele le Mataupu Faavae ma Feagaiga 29:1–3 . Fai i le vasega e mulimuli i le faitauga, ma vaavaai po o le a le mea na fetalai mai le Alii o le a Ia faia mo Lona nuu.
O le a se mea na fetalai le Faaola o le a Ia faia mo Lona nuu?
Faaali i tagata aooga se ata o se matuamoa o ofoofotai lana toloai.
E faape’i le Alii o se matuamoa o ofaofatai lana toloai i lalo o ona apaau? (E saili le Alii e faapotopoto ma puipui i tatou ona o Lona alofa mo i tatou.)
O le a le mataupu faavae e mafai ona tatou faailoa mai i le fuaiupu 2 e faatatau i mea e tatau ona tatou faia ina ia ofaofatai ai i tatou e le Faaola? (E ui atonu latou te faaaogaina nisi upu, e tatau i tagata aooga ona faailoa mai faapea a tatou faalogo i le siufofoga o le Faaola, faalotomaualalo i tatou lava, ma valaau atu i le Atua i le tatalo, o le a ofaofatai i tatou e le Faaola ma puipuia. Tusi le mataupu faavae lenei i le laupapa.)
O le a le uiga o le “faalogo” i le siufofoga o le Faaola?
O a ni nai mea tatou te manaomia ona puipuia mai ai i o tatou aso?
Valaaulia ni tagata aooga se toalua e feauauai e faitau leotele mai le Mataupu Faavae ma Feagaiga 29:3–8, ma fai i le vasega e mulimuli ai, ma vaavaai mo mea na valaauina ai toeaina e le Alii e fai ma pe aisea.
E tusa ai ma fuaiupu e 4, 7–8, o le a le mea na valaauina ai toeaina e le Alii e fai? (Folafola le talalelei ma faapotopoto mai le au filifilia a le Ali.)
Faamalamalama atu ina ua tuuina mai lenei faaaliga, sa toaitiiti le faitau aofai o le Ekalesia ma sa poloaiina le Au Paia e faapotopoto i se “nofoaga e tasi”MF&F 29:8). Peitai, a o faatupulaia le Ekalesia, sa poloaiina le Au Paia e le Alii ina ia nonofo i o latou lava laueleele ma faapotopoto ai i nofoaga ua i ai. I le taimi nei, ua tatou faapotopoto ma le Au Paia i siteki o Siona po o fea lava o tatou nonofo ai.
E tusa ai ma le fuaiupu 7, o faapefea ona faamatala e le Alii le au filifilia?
Valaaulia tagata aooga e faailoa mai le aoaoga faavae o loo aoao mai i le fuaiupu 8 e faatatau i le mafuaaga e faapotopoto ai e le Alii Lana au filifilia. (E tatau i tagata aooga ona faailoa mai faapea e faapotopoto mai e le Alii le au filifilia ina ia mafai ai ona saunia i mea uma mo taimi o puapuaga ma le faatafunaga o le a oo mai i luga o e amioleaga. Tusi lenei aoaoga faavae i le laupapa.)
O le a sou manatu o le a le uiga o le “ia saunia i mea uma” (fuaiupu 8)?
Aisea e te manatu ai o le faapotopoto faatasi ma isi Au Paia e mafai ona fesoasoani e saunia ai i tatou mo taimi o puapuaga?
O a nofoaga tatou te potopoto ai o ni Au Paia i nei aso lea o le a fesoasoani tatou te saunia ai mo puapuaga?
Aotele le Mataupu Faavae ma Feagaiga 29:9–13 i le faamalamalama o nei fuaiupu, ua tautino mai ai e le Faaola o le a Ia toe afio mai i le “mana ma le mamalu tele” (fuaiupu 11), o e amioleaga o le a susunuina i Lona afio mai, ma o e amiotonu o le a mau faatasi ma Ia mo le afe tausaga i luga o le fogaeleele.
Fai atu i tagata aooga e faitau leleoa le Mataupu Faavae ma Feagaiga 29:14–21 ma vaavaai mo puapuaga o le a tutupu i aso amuli. A o lei faitau tagata aooga, faamalamalama atu o le tele o mea ua faamatala mai i fuaiupu 18–21 o le a tutupu i au amioleaga e faapotopoto e faasagatau ia Isaraelu i le taua faaiu a Amaketo (tagai MF&F 29:21; tagai foi i le faaulutala o mataupu o le Esekielu 36–39 ma le Sakaria 12–14). Fai atu i ni nai tagata aooga e lipoti mai ia mea na latou mauaina.
Aisea o le a e manao ai e faapotopoto mai o se tasi o le au filifilia a le Faaola pe a tutupu nei puapuaga?
Faamalamalama atu e ui ina o le a faapotopoto le au filifilia ma saunia mo puapuaga i aso amuli, e le faapea ai o le a latou sosola ese ai mai faigata. Valaaulia se tagata aoga e faitau leotele le saunoaga lea a le Perofeta o Iosefa Samita (1805–1844), o le sa faamatalaina le mafuaaga o le a aafia ai nisi o e amiotonu i mea e tutupu i aso amuli:
Ata
Perofeta o Iosefa Samita
“O se manatu sese e faapea o le Au Paia o le a sosola ese mai faamasinoga uma, ae o e amioleaga o le a tigaina; aua o tino uma ua i ai ina ia tigaina, ma o e amiotonu o le a faigata ona sosola ese [tagai i le MF&F 63:34]; ae o le toatele o le Au Paia o le a sosola, aua o e amiotonu e tatau ona ola i le faatuatua [tagai i le Sapakuka 2:4]; ae peitai o le toatele o e amiotonu o le a pauu atu i tulaga o faamai, ma faamai pipisi, ma isi, e mafua ona o le vaivai o le tino, ae peitai e faasaoina i le Malo o le Atua” (Aoaoga a Peresitene o le Ekalesia: Iosefa Samita [2007], 269).
Molimau atu afai tatou te filifili e ofaofatai i le Alii, o le a saunia i tatou mo puapuaga ma le faatafunaga o le a tulai mai i aso amulli.
Valaaulia se tagata aoga e faitau leotele le Mataupu Faavae ma Feagaiga 29:17 ma fai i le vasega e mulimuli ai, ma vaavaai mo mea o le a tutupu ia i latou o e mumusu e salamo ma faalogo i le siufofoga o le Alii.
E tusa ai ma le fuaiupu 17, o le a le mea o le a tupu ia i latou o e mumusu e salamo ma faalogo i le siufofoga o le Alii? (A uma ona tali mai le vasega, tusi le mataupu faavae lea i le laupapa: Afai tatou te mumusu e salamo ma faalogo i le siufofoga o le Alii, o le a le faamamaina i tatou i Lona toto togiola.)
O a ni nai faataitaiga o le ala e mafai ona tatou faalogo atu ai i le siufofoga o le Alii? (O tali e mafai ona iai e ono aofia ai le mulimuli i le perofeta soifua, suesue i tusitusiga paia, ma le mulimuli i uunaiga a le Agaga Paia.)
O a ni nai taunuuga o le le faamamaina e ala i le Togiola a Iesu Keriso?
Ina ia fesoasoani i tagata aooga e tali lenei fesili, aotele le Mataupu Faavae ma Feagaiga 29:22–29 i le faamalamalama atu sa faaalia mai e le Alii mea o le a tutupu i le faaiuga o le Meleniuma, e aofia ai le Toetutu o e ua oti ma le Faamasinoga Mulimuli o e amiotonu ma e amioleaga. Valaaulia se tagata aoga e faitau leotele le faamatalaga o le Faamasinoga Mulimuli e le Alii i le fuaiupu 27.
O le a le mea o le a tupu ia i latou o e filifili e faamamaina mai a latou agasala? O le a le mea o le a tupu ia i latou o e e le faamamaina ma tumau ia latou agasala?
Molimau atu o le sauniuniga aupito taua a se tagata e mafai ona fai mo le Afio Mai Faalua o Iesu Keriso ma le Faamasinoga Mulimuli o le faalogo lea i le Faaola, salamo, ma ia faamamaina mai agasala.
Valaaulia tagata aooga e toe faitau leleoa le Mataupu Faavae ma Feagaiga 29:4–7 . Tata’i atu mafaufau o tagata aooga i mataupu faavae e tolu ua tusia i luga o le laupapa, ma fesili:
Aisea ua matua taua ai le valaau a le Alii e folafola le talalelei ma fesoasoani e faapotopoto mai Lana au filifilia e tusa ai ma nei upumoni?
Valaaulia tagata aooga e mafaufau loloto pe o a mea e mafai ona latou fai e faapotopoto ai i le Faaola ma fesoasoani ai foi i isi ia faapotopoto i le Faaola ma Lana Ekalesia. Uunaia i latou e faatino i soo se uunaiga latou te maua.
Ua tautino mai e le Faaola na Ia laveaiina i tatou mai le Pa‘ū, ma ua Ia ofoina mai ia i tatou le faaolataga mai a tatou agasala
Faamanatu i tagata aooga o le Mataupu Faavae ma Feagaiga 29 na oo mai o se tali i se vaega toaitiiti o toeaina ma isi tagata o le Ekalesia o e sa potopoto e talanoaina ni manatu faaleaoaoga faavae, aofia ai le Pau o Atamu ma Eva. O nisi o lenei vaega sa ese ni manatu e uiga i le solitulafono a Atamu ma Eva i le Faatoaga o Etena.
Tusi le upu Foafoaga i luga o le laupapa. Valaaulia se tagata aoga e faitau leotele le Mataupu Faavae ma Feagaiga 29:30–33 Fai i le vasega e mulimuli i le faitauga, ma vaavaai mo mea na aoao mai e le Alii e uiga i le Foafoaga.
Ina ia fesoasoani i tagata aooga ia malamalama i nei fuaiupu, faailoa atu i ai ina ua maea le Foafoaga, o Atamu ma Eva, o le lalolagi, ma isi mea uma sa i le lalolagi, sa i ai i se tulaga faaleagaga. O lona uiga, e ui lava ina sa i ai tino faaletino o Atamu ma Eva, ae sa lei ola i la le tino (ua mafai ona oti) ma semanu e nonofo faavavau i le afioaga o le Atua. Peitai, o se vaega o le fuafuaga a le Tama, o Ana foafoaga uma lava sa oo ina faaletino, pe ua ola i la le tino, ona o le Pau. A mavae le Toetutu, o le a la toe foi atu i se tulaga faaleagaga—e faitino ae e ola pea.
Valaaulia se tagata e faitau leotele le Mataupu Faavae ma Feagaiga 29:34–35. Fai i le vasega e mulimuli ai, ma vaavaai mo mea sa aoao mai e le Alii e uiga i Ana poloaiga, e aofia ai le poloaiga na Ia tuu atu ia Atamu ma Eva i le Faatoaga o Etena e aua nei aai i le fua o le laau e iloa ai le lelei ma le leaga.
O le a se mea ua tatou aoao mai nei fuaiupu e uiga i poloaiga uma a le Atua, e aofia ai Lana poloaiga ia Atamu ma Eva e aua nei aai i le fua o le laau?
Tusi le O Le Pau i le laupapa, ma valaaulia ni nai tagata aooga e feauauai i le faitauina leotele mai le Mataupu Faavae ma Feagaiga 29:36–41. Fai i le vasega ia mulimuli i le faitauga, ma vaavaai mo mea na aoao mai e le Alii e uiga i le Pau o Atamu ma Eva.
O a nisi o taunuuga o le Pau? (Faatasi ai ma isi mea, ona o le Pau ua mafai ai ona tatou oti faaleagaga ma le faaletino.)
Faamalamalama atu o le fuaiupu 41 na aoao mai ai e le Alii talu ai le solitulafono a Atamu ma Eva, na tutuli ese ai i laua mai le Faatoaga o Etena ma mai le afioaga o le Alii. O le aveesea mai le afioaga o le Atua ua ta’ua o le oti faaleagaga. Ona o le Toetu o Iesu Keriso, o le a toetutu ai tagata uma ma toe aumaia i le afioaga o le Atua ina ia faamasinoina ai. O i latou o e sa fouvale ma le iloa i le upumoni o le a tuliesea mai le afioaga o le Atua ma oo ai i se oti faaleagaga faalua.
Tusi le upu Togiola i luga o le laupapa. Fai atu i se tagata aoga e faitau leotele le Mataupu Faavae ma Feagaiga 29:42–45 ma valaaulia le vasega e mulimuli i le faitauga, ma vaavaai mo le mea na fetalai ai le Alii o le a Ia faia mo Atamu ma Ana fanau. Fai i ni nai tagata aooga e lipoti atu mea sa latou maua.
E tusa ai ma fuaiupu 42–43 o le a le mea ua ofo mai e le Faaola ia i latou o e faatuatua ia te Ia ma salamo ia latou agasala? (A uma ona tali mai tagata aooga, tusi le mataupu faavae lea i le laupapa: E ala mai i Lana Togiola, ua ofo mai ai e Iesu Keriso le faamagaloga ma le ola e faavavau ia i latou uma o e faatuatua ia te Ia ma salamo ia latou agasala.
E tusa ai ma fuaiupu 44–45, o le a le mea o le a tupu ia i latou o e le salamo ia latou agasala?
Aotele le Mataupu Faavae ma Feagaiga 29:46–50 i le faamalamalama atu na tautino mai e le Faaola e faapea talu ai o fanau laiti ma i latou e aunoa ma se malamalama, e le tali atu, e togiolaina foi i latou e ala i Lana Togiola.
Molimau atu ona o le Togiola a Iesu Keriso, ua manumalo ai i tatou taitoatasi i le oti faaletino e ala i le Toetutu. E ala i le Togiola a Iesu Keriso, ua mafai ai foi e i tatou ona manumalo i le oti faaleagaga pe afai tatou te salamo ia tatou agasala ma faalogo i le siufofoga o le Faaola.
Valaaulia le vasega e faaaoga mea sa latou aoaoina i le aso e ala lea i le filifili e faalogo i le siufofoga o le Faaola, salamo ia latou agasala, ma ia ofaofatai atu ia te Ia.