Ao salalau atu le galuega faafaifeautalai i le lalolagi i le seneturi lona 20, na tatalo taitai o le Ekalesia mo se taitaiga e faatatau i le tapulaa faasaina sa i ai o le faauuga o le perisitua ma sauniga o le malumalu mo tagata o le Ekalesia e tupuga mai tagata uli o Aferika. I le aso 1 Iuni, 1978, na faaalia mai ai e le Alii ia Peresitene Spencer W. Kimball, o ona fesoasoani i le Au Peresitene Sili, ma sui o le Korama a Aposetolo e Toasefululua i le Malumalu o Sate Leki ua tatau ona aveesea nei tapulaa faasaina. I le aso 8 Iuni 1978, sa fofogaina mai ai e le Au Peresitene Sili lenei faaaliga i se tusi i taitai o le Ekalesia. O lenei tusi o loo faamaumauina i le Tautinoga 2.
30 Tesema. 1973Sa faauuina Spencer W. Kimball e fai ma Peresitene o le Ekalesia.
1 Iuni, 1978.Sa mauaina ai e Peresitene Kimball, o ona fesoasoani i le Au Peresitene Sili, ma sui o le Korama a Aposetolo e Toasefululua se faaaliga e tuuina atu le perisitua ma faamanuiaga o le malumalu i tagata agavaa uma o le Ekalesia.
8 Iuni, 1978Na tuuina mai e le Au Peresitene Sili se tusi e fofoga mai ai le faaaliga.
30 Setema, 1978O le faaaliga na maua i le aso 1 Iuni na tuuina atu i tagata o le Ekalesia i le taimi o le konafesi aoao ma sa lagolagoina i le finagalo autasi e avea “o le afioga ma le finagalo o le Alii” (Tautinoga Aloaia 2).
(Novema–Tesema 1978)Sa taunuu ai faifeautalai i Kana ma Nigeria e faavae le Ekalesia i Aferika i Sisifo.
Ua faaali mai e le Alii e faapea o le perisitua ma faamanuiaga o le malumalu e mafai ona faasafua atu i tagata agavaa uma o le Ekalesia
Ina ia fesoasoani ia malamalama tagata aoao i le talaaga faasolopito o le Tautinoga Aloaia 2, faamalamalama atu faapea “e mai le ogatotonu o le vaitau o le 1800 seia oo i le 1978[,] sa lei faauuina e le Ekalesia ia alii e tupuga mai i tagata uli o Aferika i le perisitua pe faatagaina alii po o tamaitai uli ia maua faaeega paia o le malumalu po o sauniga o faamauga” (“Race and the Priesthood,” Mataupu o le Talalelei, topics.lds.org).
Valaaulia tagata o le vasega e mafaufau pe faapei ni o latou lagona pe ana faapea e fesiligia i latou e faamalamalama pe aisea na faia ai nei tapulaa faasaina.
Valaaulia se tagata e faitau leotele le faatomuaga o le Tautinoga Aloaia 2 o loo maua i le lomiga o le 2013 o le Mataupu Faavae ma Feagaiga. Fai atu i le vasega ia mulimuli i le faitauga, ma vaavaai po o a mea o loo aoao mai e lenei palakalafa e uiga i “le faapogai,” po o le amataga, o nei tapulaa faasaina.
O le a se mea o aoao mai e le faatomuaga i le Tautinoga Aloaia 2 ia i tatou e uiga i le faapogai o le tapulaa faasaina o le perisitua ma faamanuiaga o le malumalu?
Ta’u i ai e ui ina ta’ua e nisi ni mafuaaga mo le tapulaa faasaina o le perisitua ma faamanuiaga o le malumalu, o nei faamalamalamaga o ni manatu faaletagata ma e atonu e le sa’o. Faaali atu le fuaitau lenei, ma valaaulia se tamaitiiti aoga e faitau leotele:
“O nisi o faamalamalamaga e tusa ai ma le [tapulaa faasaina o le perisitua] sa faia e aunoa ma se faaaliga tuusao ma mau faasino i nei faamalamalamaga o nisi taimi e ta’ua ai i lomiga. O nei muai faamatalaga faaletagata e le o se faamaoniga o aoaoga faavae a le Ekalesia” (“Race and the Church: All Are Alike Unto God,” 29 Fep. 2012, mormonnewsroom.org; tagai foi “Race and the Priesthood,” Mataupu o le Talalelei, topics.lds.org).
Faamalamalama atu o le Tautinoga Aloaia 2 o loo i ai se tusi na tusia i le aso 8 Iuni, 1978, i taitai o le Ekalesia i le lalolagi atoa e faasilasila atu ai se faaaliga na maua e Peresitene Spencer W. Kimball. Valaaulia se tamaitiiti aoga e faitau leotele le palakalafa muamua o le tusi (amata i lalo ifo o upu “Uso Pele”). Valaaulia le vasega e mulimuli i le faitauga, ma vaavaai mo mea na fai mai taitai o le Ekalesia na latou “molimauina” i le salafa o le lalolagi.
O a mea na molimauina e taitai o le Ekalesia?
Faamalamalama atu e faapea, i vaitau o le 1960 ma le 1970, e faitau afe tagata e tupuga mai i Aferika sa aoao i le moni o le talalelei ma sa latou mananao e papatiso. Sa talosagaina e tagata taitoatasi i atunuu e pei o Nigeria ma Kana mo faifeautalai ia auina atu i Aferika. Sa tele tusaga sa mafaufau ai ma le agaga tatalo ia taitai o le Ekalesia i a latou talosaga ae sa latou le’i lagonaina ua tonu le taimi. A aunoa ma le perisitua, o le a le mafai e tagata i le lotoifale ona pulefaamalumalu i aulotu pe faatino ia sauniga e tatau ai. I Pasila, sa galulue faamaoni ai se aofai ua faatupulaia o tagata uli i le Ekalesia. E toatele foi sa saofaga atu ma le limafoai i le fauina o le Malumalu o São Paulo Brazil, e ui ina o le a le faatagaina i latou e ulu atu i le malumalu ona o le tapulaa faasaina.
O le a se manao na musuia ai taitai o le Ekalesia a o latou molimauina le faateleina o le galuega a le Alii?
Valaaulia se tagata aoao e faitau leotele le palakalafa lona lua o le tusi o loo tusia i le Tautinoga Aloaia 2 (amata i le “I le matou iloa lelei o folafolaga”). Fai i le vasega e mulimuli i le faitauga, ma vaavaai po o a isi mea na saofaga i le manao o taitai e faasafua atu faamanuiaga o le talalelei i tagata agavaa uma o le Ekalesia.
O le a se isi mea sa saofaga i lenei manao?
Na faapefea ona galulue taitai o le Ekalesia e faatino lenei manao?
O le a le mataupu faavae e mafai ona tatou faailoa mai i lenei palakalafa e uiga i mea e fai e perofeta a o latou taialaina le Ekalesia? (A uma ona tali mai tagata aoao, tusi le mataupu faavae lea i le laupapa: E sailia e perofeta ia le taitaiga faalelagi ia iloa ai le finagalo o le Alii e faatatau i le Ekalesia.)
Faamanatu i le vasega le ata faataitai na e folasia atu i le amataga o le lesona.
Pe a talanoaina faaiuga ma aoaoga a le Au Peresitene Sili ma le Korama a Aposetolo e Toasefululua, aisea e aoga ai le manatua o perofeta e sailia le taitaiga faalelagi ia iloa ai le finagalo o le Atua e faatatau i le Ekalesia?
Ta’u i ai o le 1978, na matua faapitoa ai le popole o Peresitene Kimball e uiga i le tapulaa faasaina o le perisitua ma le malumalu, ma sa tele ona ia mafaufau loloto ma tatalo i le malumalu mo lea faafitauli. E tele foi ona ia fefautuaai ma isi o le Pulega Aoao ma valaaulia i latou e faaali atu o latou lagona e uiga i le mataupu. (Tagai Bruce R. McConkie, “The New Revelation on Priesthood,” i le Priesthood [1981], 127).
Valaaulia se tagata aoga e faitau leotele le faamatalaga lenei a Peresitene Kimball:
Ata
Peresitene Spencer W. Kimball
“Sa ou iloaina e i ai se mea sa i o tatou luma sa matuai taua tele i le toatele o fanau a le Atua. Sa ou iloaina e mafai ona tatou maua faaaliga a le Alii i le na o le agavaa ai ma ua saunia mo na faaaliga ma saunia e talia ma faatulaga tonu. Mai lea aso i lea aso sa ou alu ai toatasi i le faamaoni, ma le naunautai tele i le potu i luga o le malumalu i [Sate Leki], o iina sa ou tuuina atu ai lo’u agaga ma tuuina atu au taumafaiga e agai ai i luma ma le polokalama. Sa ou manao e fai le mea sa ia finagalo ai. Sa ou talanoa ia te ia i lenei mea ma faapea atu, ‘Le Alii e, na o le mea sa’o lava ou te manao ai. … Na pau le mea matou te mananao i ai o le mea e te finagalo ai, ma matou te mananao i ai i le taimi e te finagalo ai ae le o le seia afea’” (Aoaoga a Peresitene o le Ekalesia: Spencer W. Kimball [2006], 238).
O le a se mea o tulaga ese mai ia te oe e uiga i taumafaiga a Peresitene Kimball e saili le taitaiga a le Alii?
E mafai faapefea ona fesoasoani le faataitaiga a Peresitene Kimball ia i tatou a o tatou sailia le taitaiga a le Alii?
Faamalamalama atu o le aso 1 Iuni, 1978 na tauaofia ai le Au Peresitene Sili ma le Korama a Aposetolo e Toasefululua i le Malumalu o Sate Leki. Na latou o mai i le malumalu o anapopogi. Sa toe laga e Peresitene Kimball la latou talanoaga talu ai e uiga i le faasafuaina atu o faamanuiaga o le perisitua ma le malumalu i tagata agavaa uma o le Ekalesia. Sa ia talosagaina tagata taitoatasi sa i ai e faasoa atu ona manatu e faatatau i le mataupu. Ona fautuaina lea e Peresitene Kimball ia latou auaufaatasi i le tatalo.
Valaaulia se tagata aoao e faitau leotele ia le palakalafa lona tolu ma le fa o le tusi o loo tusia i le Folafolaga Aloaia 2 (e amata i le “Ua faafofogaina e Ia a matou talosaga”). Fai i le vasega e mulimuli i le faitauga, ma vaavaai pe na faapefea ona tali atu le Alii i aioiga ma le agaga tatalo o nei taitai o le Ekalesia.
O le a le mea na faamautu e le Alii ia Peresitene Kimball ma isi taitai o le Ekalesia e ala i le faaaliga?
O le a se aoaoga faavae e mafai ona tatou faailoa mai nei palakalafa e faatatau i le ala e taitaia ai ma faatonutonu le Ekalesia? (A uma ona tali mai tagata aoga, tusi le aoaoga faavae lenei i luga o le laupapa: E faatonutonu e le Alii Lana Ekalesia e ala i faaaliga i Ana perofeta.)
Ina ia faapupula atili lenei upumoni, valaaulia ni tagata se toalua e faitau leotele tala ia a Peresitene Gordon B. Hinckley (1910–2008) ma Elder Bruce R. McConkie (1915–1985) o le Korama a Aposetolo e Toasefululua, o e na faamatalaina mea na aafia ai i laua ina ua maua mai le faaaliga i le aso 1 Iuni, 1978:
Ata
Peresitene Gordon B. Hinckley
“Na i ai se lagona o le paia ma le faamamaina i totonu o le potu. Mo au, o se lagona e pei o se faitotoa vaapiapi ua matala i le va o le nofoalii faalelagi ma le perofeta a le Atua o loo tootuli, ma augani atu lea na faatasi atu i ai ona Uso. Na i ai iina le Agaga o le Atua. Ma i le mana o le Agaga Paia na oo mai i lena perofeta se faamautinoaga o le mea na ia tatalo ai ua sao lea, ma ua oo mai le taimi, ma o faamanuiaga ofoofogia o le perisitua ua tatau nei ona faasafuaina atu i alii agavaa uma i soo se mea e tusa lava po o le a le tupuaga.
“O alii uma i lena li’o, e ala i le mana o le Agaga Paia, sa iloaina lea lava mea e tasi. …
“E leai se leo na lagona e o matou taliga faaletino. Ae o le leo o le Agaga sa musumusu mai ma se mautinoa i o matou mafaufau ma o matou lava agaga. …
“… Sa matou tuua lena tauaofiaga ma le toafilemu ma le migao ma le olioli. E leai se tasi o i matou sa i ai i lena taimi, sa tumau ai ni lagona tuai ina ua mavae lena aafiaga. Na faapena foi i le Ekalesia ia” (Gordon B. Hinckley, “Toefuataiga o le Perisitua,” Ensign, Oke. 1988, 70).
“I lea taimi, ona o le finafinau ma le faatuatua, ma ona ua oo mai le itula ma le taimi, na liligi mai ai e le Alii … le Agaga Paia i luga o le Au Peresitene Sili ma le Toasefululua i se auala faavavega ma le ofoofogia, e sili atu i soo se mea na oo muamua i soo se tasi na auai i lena taimi. Na oo mai le faaaliga i le Peresitene o le Ekalesia; na oo mai foi i tagata taitoatasi na i ai i lena taimi. … O le taunuuga na silafia e Peresitene Kimball, ma sa iloa foi e i matou taitoatasi, tutoatasi mai soo se isi lava tagata, e ala mai i se faaaliga tuusao ma patino ia i matou, faapea ua oo mai le taimi e tuuina atu ai le talalelei ma ona faamanuiaga uma ma ona tiute uma, e aofia ai le perisitua ma faamanuiaga o le maota o le Alii, ia i latou o soo se atunuu, aganuu, ma ituaiga” (Bruce R. McConkie, “All Are Alike unto God” [Church Educational System Religious Educators’ Symposium, 18 Aok, 1978, 4, speeches.byu.edu).
E faavae i le tala a Elder McConkie, aisea na oo mai ai le faaaliga ina ua oo mai? (Atonu e te faamamafaina faapea na oo mai le faaaliga o se taunuuga o le faatauanau atu i le faatuatua ma ona ua oo mai le taimi ma le itula.)
O le a sou manatu i le taua o sui taitasi o le Au Peresitene Sili ma le Korama a Aposetolo e Toasefululua, o mauaina le faaaliga faamaonia e tasi mai le Alii?
Faasino i upumoni e lua na tusia i le laupapa: “E sailia e perofeta le taitaiga faalelagi ia iloa ai le finagalo o le Alii e faatatau i le Ekalesia” ma e “E taitaia e le Alii Lana Ekalesia e ala i faaaliga i Ana perofeta.”
E mafai faapefea e le malamalama i nei upumoni ona fesoasoani ia i tatou ina ia maua le faatuatua e mulimuli ai i fautuaga e maua mai e perofeta mai le Alii?
Fai i le vasega e mafaufau i taimi i o latou olaga ina ua latou lagonaina pe oo foi ina latou iloa e taitai e le Alii Lana Ekalesia e ala i faaaliga i Ana perofeta. Valaaulia ni nai tagata aoao e faasoa mai a latou aafiaga ma le vasega. Fuafua e faasoa atu foi sou lava aafiaga.
Molimau atu e faaali mai e le Alii Lona finagalo i Ana perofeta, ma fautuaina tagata aoao e mulimuli i fautuaga ma le taitaiga a perofeta a le Alii.
Faamalamalama atu o le tusi na faasilasila mai ai le faaaliga o le aso 1 Iuni, 1978, sa tuuina atu i le aso 8 Iuni, 1978. I ni nai masina mulimuli ane, sa tauaao atu ai e Peresitene N. Eldon Tanner o le Au Peresitene Sili le faaaliga i tagata o le Ekalesia i se konafesi aoao faaleafatausaga mo se palota lagolago.
Valaaulia se tagata aoga e faitau leotele le palakalafa lona lua o le Tautinoga Aloaia 2 (amata i le “I le amataga o Iuni i le tausaga nei”). Fai atu i le vasega e mulimuli i le faitauga, ma vaavaai po o le a le mea na faatonuina e Peresitene Kimball ia Peresitene Tanner e ta’u atu i tagata o le Ekalesia e uiga i le faaaliga. Fai atu i tagata aoao e lipoti mai mea ua latou mauaina.
Aisea e te manatu ai e taua mo tagata o le Ekalesia ona latou iloa sa faamaonia e le Au Peresitene Sili ma le Korama a Aposetolo e Toasefululua i le finagalo autasi le faaaliga?
Faamalamalama atu o tagata o le Ekalesia sa auai i le konafesi sa taliaina i le agaga autasi le faaaliga “o le afioga ma le finagalo o le Alii” (Tautinoga Aloaia 2). O le taunuuga o le faaaliga, na faamuta ai le tapulaa faasaina o le perisitua ma le malumalu, a ua folafola atu nei e faifeautalai le talalelei i le toetoe o atunuu uma i Aferika, ua fausia foi talu mai lena taimi ia malumalu i lena konetineta, ma ua faitau selau afe tagata e tupuga mai i Aferika ua talia ma maua sauniga o le talalelei mo i latou lava faapea foi o latou tuaa ua maliliu.
Faaiu le lesona i le valaaulia o ni nai tagata aoao e faasoa mai a latou molimau e uiga i perofeta o ona po nei ma upumoni na faailoa mai i lenei lesona.