Motugaafa mo le Mauaina o le Malosi Patino ma le Fesoasoani atu i Isi

Faatomuaga

Pe a feagai ma luitau, e masani ona oo i le tele o lagona, e aofia ai le atuatuvale, popole, faavauvau, ma le tuuatoatasi. Mo nisi, o nei lagona o le a puupuu ma e fuafua i le tulaga, ae mo isi, o nei lagona e mafai ona umi ma tumau. Afai e te feagai soo ma faigata o le soifua maloloina faaagafesootai pe faalelagona, e mafai ona e mafaufau e talanoa ma se tagata tomai faapitoa. E tusa lava pe faafia ona e feagai ma luitau faigata, e tele auala faigofie e mafai ona fesoasoani i le tausiga faalelagona.

E Mafai Faapefea Ona Ou Maua le Malosi i Taimi Faigata?

• Fesootai ma se tasi e te faatuatuaina.

• Faafou lou agaga e ala i le tatalo, manatunatu loloto, mafaufau i isi ma oe, ma le tausiga agaalofa mo le tagata lava ia ma isi.

• Taulai atu i mea i lou olaga o loo lelei ma e mafai ona e puleaina.

• Mafaufau i mea e taua ia oe.

• Faaauau le faaaogaina o auala maloloina e te maua ai le fesoasoani.

O Le A Se Mea e Mafai Ona Ou Faia e Faaitiitia ai le Atuatuvale?

Pe a e oo i lagona o le atuatuvale, o gaoioiga e pei o le faamalositino, fegalegaleaiga, lava o le moe, ma le taumafa maloloina e mafai ona fesoasoani. Mafaufau i manatu nei:

• Manava ma faaloloa aao

• Fai se gaoioiga malolo, e pei o le yoga po o le tai chi.

• Fai se koma e moe ai, malolo, po o le toe faafoisia [o le malosi].

• Faitau pe faalogologo i upega tafailagi musuia.

• Inu le vai ia tele, ma taumafa meaai paleni.

• Fai ni gaoioiga faafiafia ma isi.

• Faalogologo i, ta, pe usu ni musika musuia.

• Faaalu se taimi e aluese mai, mai ala o faasalalauga ma talafou.

• Alu e savalivali pe fai se isi ituaiga o faamalositino.

• Tusi mea e te faafetai ai.

• Saili ni auala e fesoasoani ai ma auauna atu i isi (tagai i le JustServe.org).

• Saili nisi manatu ma punaoa i le HowRightNow.org.

E Mafai Faapefea Ona Ou Fesoasoani i Isi o Loo Feagai ma Taimi Faigata?

• Faailoa atu le agaalofa: Faaali atu e te alofa. Tau lava o le i ai iina e mafai ona fesoasoani.

• Faalogo: Faataga ni faailoaga o mafaufauga ma lagona.

• Faailoa atu le alofa: Faaali atu o loo e taumafai e malamalama, ma fesoasoani ia latou lagona e le afaina le le lelei o lagona i le taimi nei.

• Talanoa i auala e taulima ai: Talanoa e uiga i faiga masani maloloina, e aofia ai taumafa tatau, lava le inu, tumama, faamalositino, moe, ma fualaau ua faatonuina.

• Ofo atu le faamoemoe: Faasoa atu faamalosiauga, lagolago, ma punaoa.

O Le A Se Mea e Mafai Ona Ou Fai Atu i se Tasi O Loo Tauivi Faalelagona?

O nisi tagata e fefefe o le a latou fai atu le mea sese i se tasi o loo feagai ma luitau. Atonu latou te popole nei latou saofaga atu i mafaufauga o le atuatuvale po o le pule i le ola. E taua lou faamautinoa ia iloa e tagata o loo tauivi o loo e i ai iina mo i latou. O le fesootai atu ma le agaalofa e mafai ona taitai atu ai i talanoaga mataalia ma aoga.

O nisi o mea e mafai ona e fai atu ai o le:

• Ou te alofa ma popole mo oe.

• Ou te le malamalama atoatoa, ae ou te alofa.

• O loo o’u iinei mo oe, ma e mafai ona ou faalogo atu.

• O a au auala o taulima ai?

• O a ni ou popolega o i ai i le taimi nei?

• O le a se mea na fesoasoani ia te oe i le taimi ua tuanai?

• O a popolega o loo ia te oe e uiga i le lumanai?

• Ua ou i ai iinei faatasi ma oe ma mo oe.

• E le afaina lou lagonaina o na faalogona.

• Ou te iloa tagata e mafai ona fesoasoani atu.

Punaoa Faaopoopo

“Taiala mo Talanoaga: E Mafai Faapefea Ona Ou Auauna Atu i Isi i le Taimi o se Faalavelave?”

“Punaoa Fautuaina,” i Punaoa Fautuaina, Potutusi o le Talalelei