Punaoa Faufautua

Toatele tagata o le au paia e feagai ma luitau eseese. I le avea ai ma se taitai, o se uso po o se tuafafine o auaunaga, po o se tagata tausi aiga po o se uo, ua ia te oe le avanoa e tuuina atu ai le fesoasoani. A o e auauna atu ai i manaoga o isi, e mafai ona e fesoasoani ia i latou ia lagonaina le olioli ma le faamalieina a o latou malamalama ma taliaina tiutetauave mo i latou lava ma o latou aiga. A o e auauna ai, o le a e galue faatasi ma latou o e saili le taitaiga ma o e o i ai faafitauli faigata faaletagata lava ia. A o e faatino le auaunaga, ia saili pea lava ia faia i se ala e tusa ai ma le fuafuaga a le Atua mo le tagata ma oe lava ia.

A o saili ai tagata i tali i olatou faafitauli faaletagata lava ia, e mafai ona latou maua le fesoasoani ma le faamalologa e ala ia Iesu Keriso ma Lana mana laveai. A o latou faatino le faatuatua ia te Ia, o le a Ia faamalosia i latou i taimi o o o latou manaoga. Ma le isi, o Lona mana o le a aumai ai le faamoemoe i o latou olaga a o latou malamalama ai, e naunau o Ia e fesoasoani ma laveai.

I le tele o tulaga, e mafai lava e tagata ona fofo o latou lava faafitauli e ala i le sailia e le tagata lava ia o le fesoasoani a le Alii ma faaaoga a latou lava punaoa. Uunaia i latou e mafaufau loloto ma tatalo e uiga i o latou faafitauli. Fesoasoani ia latou maua fautuaga i tusitusiga paia ma saunoaga a perofeta soifua. Uunaia i latou e tapa atu i tagata o le aiga ma uo mo tali ma le lagolago. Valaaulia i latou e saili punaoa i le alalafaga lea e mafai ona fesoasoani ia i latou i o latou luitau patino.

I talaatu o fesoasoani e te tuuina atu, e tele isi meafaigaluega ma punaoa e mafai ona fesoasoani i tagata taitoatasi ia sili ona ola tutoatasi faaleagaga, faalelagona, ma faaletino. I tulaga ia e latou te lagona ai o o latou luitau ua sili ona mamafatu, ia galulue faatasi ma le loto tatalo i lalo o le taitaiga a le epikopo, peresitene o le Aualofa, po o le peresitene o le korama a toeaina ina ia feasoasoani ia i latou. O faamanuiaga e fesootai ma o outou valaauga patino ma mea e fiafia i ai e mafai ona fesoasoani ia te oe e fesoasoani ai i isi i a latou taumafaiga ina ia maua faaaliga patino e foia ai luitau i o latou olaga.

O autu o loo lisiina i luga o le uepisaite lenei sa fatuina ina ia fesoasoani ia te oe e fesoasoani ai i tagata taitoatasi ia suesue i o latou faafitauli i o latou mafaufau (tagai i le Mataupu Faavae ma Feagaiga 9:8). O nei punaoa e auala atu ai aoaoga o le talalelei, fautuaga a taitai o le Ekalesia, tusi o mau, meafaigaluega mo iloiloga ma isi punaoa a le Ekalesia.

A o e fesoasoani atu i soo se tulaga maaleale pe faigata, mafaufau i mataupu faavae taiala nei:

Alofa muamua. O fanau uma a le Atua e agavaa mo le alofa ma le agalelei. Atonu tatou te le malamalama i aafiaga o se tagata lava ia, ae e mafai ona tatou faaali atu e le aunoa le alofa.

Faalogo ia malamalama. Ia faaeteete ia aua nei faia ni manatu taumatemate e uiga i lagona po o amioga. Fai ni fesili ma faalogo, ona fai atu lea ma le talimanao ma le loto malamalama. A o e faalogo, o le a mafai ona e faafailele le faatuatuaina ma maua le malamalama i auala e auauna atu ai.

Aoao atu upumoni. O mataupu faavae moni e tuuina mai ai le faavae mo filifiliga faamaoni. Pe a taitaiina ai e le Agaga, ia aoao atu ma le alofa na upumoni o le a fesoasoani ai i le tagata e tumau i luga o se auala e agai atu i le olioli e faavavau.

Fafaga le faatuatua. O le faatuatua e faavae i luga o le faatuatuaina o se Tama Faalelagi agaalofa, i luga o se malamalamaaga o le Togiola a Iesu Keriso, i luga o le talitonu mautinoa i le taitaiga a le Agaga Paia, ma i luga o le faamautinoaga ua i ai se fuafuaga a le Atua mo le alualu i luma e faavavau o tagata taitoatasi. Ia uunaia tagata ina ia fafaga o latou faatuatua patino e ala i le tatalo ma le suesue i tusitusiga paia i aso uma.

Auauna atu. Galue i le alofa, faalogo ia malamalama, ma saili le taitaiga mai le Agaga o le a tuuina atu ai se malamalamaaga loloto atili i le auala sili ona lelei e auauna atu ai ma le alofa i manaoga o le tagata.

Sii Mai ia Vitio o Aoaoga

O loo maua Punaoa mo autu nei: