Punaoa Faufautua

E mafai faapefea ona ou lagolagosua i isi a o latou atiina a’e fuafuaga?

I le avea ai ma se taitai o le Ekalesia, ua ia te oe se avanoa tulagaese e tuuina atu le lagolagosua i tagata o loo tauivi ma le faaaogaina o ponokalafi, ma i o latou taitoalua, ma isi o loo aofia ai. O lau lagolago e mafai ona fesoasoani e aveesea le maasiasi lea e tele ina o faatasi ma le faaaogaina o ponokalafi (tagai i le Wendy Ulrich, “E le o se Agasala le Augavaivai,” Ensign, Ape. 2015, 30-35).

E toatele tagata ua maua le manuia e ala i le atiina a’e ma mulimulitai i se fuafuaga patino ina ia faatoilaloina ponokalafi. O latou uma, o le tagata o lē o matamata i ponokalafi ma lona toalua po o se tagata o le aiga e ono manaomia se fuafuaga patino a le tagata lava ia ina ia maua ai le faamalologa. O le tiutetauave patino o le tagata lava ia le saili i faaaliga patino, ina ia maua tali, ma atiinaa ’e ma mulimuli i lana fuafuaga. I le avea ai ma se taitai, e mafai ona e uunaia ma lagolagoina tagata a o latou atiina a’e a latou fuafuaga, ae o le tiutetauave o le faia o fuafuaga ma le iloiloina o lo latou aoga, e a le tagata lava lea.

E ala atu i talanoaga musuia ma tagata ma o latou taitoalua po o aiga, e mafai ona e uunaia i latou e atiina a’e fuafuaga ina ia faatoilaloina ai lenei luitau faigata. Ao atiina a’e e tagata a latou fuafuaga ina ia suia, e mafai ona e fesoasoani atu ia i latou i auala nei:

• Taulai ia Keriso.

• Faaaofia ai isi.

• Faaaoga punaoa talafeagai.

Taulai ia Keriso

E ui e tele auala e fesoasoani ai i tagata ia agai i luma, a o lau matafaioi o se taitai o le fesoasoani lea i isi ina ia o mai ia Keriso, maua faamalologa faaleagaga, ma saili le leleiga ma le Atua faapea foi ma i latou o e ua latou faatiga i ai e ala i a latou amio.

A o e uunaia tagata e atiina a’e a latou fuafuaga, ia taumafai e fesoasoani ia i latou e ffaatupulaia lo latou faatuatua i le Tama Faalelagi ma Iesu Keriso. Fesoasoani i isi ia iloa faamanuiaga ia e maua mai le usiusitai i le Tama Faalelagi. Uunai latou e faaaoga faamanuiaga o le Togiola a Iesu Keriso ma ia tausia a latou feagaiga. Valaaulia i latou e saili atu i le taitaiga a le Agaga a o latou faataunuuina ma toe faaleleia a latou fuafuaga.

Taumafai e fesoasoani i tagata ina ia liliu atu i le Faaola. O ia o le puna topito o le malosi ma ua i ai le poto sili. Na te silafia ma alofa i tagata taitoatasi uma. A o liliu atu tagata i le Alii, o le a taitaia i latou i le ala e tali atu ai i lenei faafitauli, ma o le a Ia auauna atu ia i latou. Saili i musumusuga i le ala e lagolagoina ai tagata ma taitoalua ma le ala e fesoasoani ai ia i latou e tapue le latou sootaga faatasi ma le Faaola.

Faaaofia Isi

O ponokalafi e tupuolaola i le faalilolilo ma e tele ina aumaia ai le maasiasi. O le uunaia o tagata e fesootai atu i isi e mafai ona fesoasoani ia i latou e faamalosiauina ai. E taua mo i latou uma, o tagata ma o latou taitoalua ona fausia se faatulagaga lagolago o tagata o e faamalosiau ia i latou ma lo latou sologa manuia.

O le tele e mafai ai ma le natura o le lagolago o loo manaomia e faalagolago lea i saofaga tulagaese faatatau i le tagata. O se tagata sa matamata i ponokalafi mo nao ni nai taimi atonu e laitiiti atu se taimi e manaomia, ma laitiiti foi se fesoasoani mai fafo, e aveesea ai le faafitauli. Atonu o le mea lava lea e tasi e moni mo lona toalua. Ae peitai, o se tagata ua umi se taimi o matamata i ponokalafi e aunoa ma le iloaina e lona toalua pe o se ua faasolo atu i ponokalafi e sili ona mataga ma matuia —atonu o le a manaomia se taimi tele ma le fesoasoani sili atu. O lona toalua e ono manaomia foi se taimi tele ma le fesoasoani sili atu.

Aiga

O le alofa, lagolago ma le taitaiga e mafai ona sau mai tagata o le aiga. Uunai tagata e asuvai mai le malosi o o latou taitoalua, matua, po o aiga lautele i le foia ai o le faafitauli o le ponokalafi. Ae peitai, e tatau i tagata ona mafaufau i le tiga atonu o loo lagonaina e tagata o le aiga. Uunai tagata ia saili atu i le lagolagosua mai tagata o le aiga o e ua saunia e lagolagoina i latou. O le faaaogaina o ponokalafi e masani lava ona faateteleina i le faalilolilo; o le mea lea, o le faailoa atu ma le faaeteete o se vaega fesoasoani aoga o le toe faaleleia. I le tulaga o ulugalii ua faaipoipo, faamau po o ua faia ni tautinoga , o le faailoa atu o se mea ua tatau ai.

Faaaoga Punaoa Talafeagai

E tele ina anoanoai faapogai e taitai atu ai se tagata e faaaoga ponokalafi. O fofo faaleagaga, e ui lava e taua, atonu e le na’o le pau lea o le fesoasoani e manaomia e tagata. Atonu e latou te manaomia foi le talanoaina o isi vaega o o latou olaga, e pei o tulaga faaletino natura, faalemafaufau, ma aafiaga faaleagafesootai. Ia uunaia talafeagai tagata ia mafaufau i le ituaiga o fesoasoani e latou te ono manaomia e taulimaina ai nisi nei o aafiaga o o latou olaga. E ono aofia ai i lea le saili o le fesoasoani mai punaoa e pei o uepisaite ua talitonuina ma tagata popoto faapitoa faafomai ma le soifua maloloina faalemafaufau.

Tagata e Tomai Faapitoa

E ono manaomia tagata tomai faapitoa faafomai ma le soifua maloloina faalemafaufau, aemaise lava pe afai na itiiti lava se manuia na maua e tagata tainane sa tele se galuega i a latou taumafaiga ia faamutaina ponokalafi mai o latou olaga. E ono manaomia foi e taitoalua lenei ituaiga o fesoasoani a o latou feagai ai ma le faalataina o lo latou faatuatuaga. O ai lava e latou te filifilia e aofia i a latou fuafuaga e faatoilaloina ponokalafi e tatau ona mafana lelei ma tulaga faatonuina o le talalelei.

Tekinolosi

E tele meafaigaluega eseese i luga o upega tafailagi e mafai ona fesoasoani i tagata e tetee atu i faaosoosoga e matamata i ponokalafi. O nisi o ia mea e tuuina atu ai fesoasoaniga taufaamatalaga, e pei o le “Taulimaina Ponokalafi” vaega o le ChurchofJesusChrist.org, o le Taiala Lagolago: Fesoasoaniga mo Taitoalua ma Aiga o i Latou o loo i le Faaleleia, o alaata faasalalau a le Ekalesia, fightthenewdrug.org, ma isi. O nisi o punaoa faaeletonika e tuuina atu ai faasalavei e pei o faamama lea e vaavaaia pe polokaina le ulufale atu [i uepisaite faasaina], ma isi punaoa, e pei o fortify.com, e tuuina atu ai se faasalavei faatulagaina.

Elemene o se Fuafuaga Aoga

A o fatuina e tagata ia fuafuaga, uunai i latou e manatunatu ia:

• Tusia i lalo a latou fuafuaga, tau manino mai ai gaoioiga ma sini, ona faasoa lea ma iloilo ma toefetuunai fuafuaga pe a manaomia.

• Faailoa pe faapefea ona tumau i le tuuto, tusa lava pe afai e latou te feagai ma tulaga soloitua.

• O le fatuina o se fuafuaga e tali atu, lea e mafai ai ona latou lipotia ai lo latou alualu i luma i se tagata o le aiga, uo, po o taitai o le Ekalesia e faatuatuaina. O lipoti e tali atu ai e le tau faia ma le epikopo.

• Valaaulia se toalua, matua, se isi tagata o le aiga, po o se isi tagata e iloilo ma tulitatao atu fuafuaga. E mafai ona fesoasoani le lipoti soo atu i se isi tagata i le tulaga o le gasologa lelei o loo galueaiina ai le fuafuaga. (Tagai i le “O le a le mea ou te manaomia ona taulai atu i ai ina ia faatoilaloina ai lau mausa o le ponokalafi?”)