Sauaga (Fesoasoani mo le Tagata ua Afaina)

Laina Fesoasoani

E tatau i epikopo, peresitene o paranesi, ma peresitene o siteki ona valaau atu e aunoa ma se faatali le telefoni fesoasoani a taitai o le Ekalesia i taimi taitasi latou te iloa ai se sauaga. O lenei punaoa e tuuina atu ai le lagolago e fesoasoani ai i tagata ua aafia i sauaga ma le ausia ai o tulaga manaomia o le lipotiina atu. Alu i Numera o Laina Fesoasoani mo le numera o le laina fesoasoani ma mo nisi faamatalaga.

E le tatau i se taitai faaleEkalesia ona teena se lipoti o sauaga pe fautuaina se tagata ina ia lē lipotia se gaoioiga faalesolitulafono.

I.S. ma Kanata

Afai e iloaina e isi tagata o le au paia ni sauaga, e tatau loa ona latou vave faafesootaia ia pulega faaletulafono. E tatau foi ona latou fefautuaai ma le latou epikopo po o peresitene o le siteki, o e o le a valaau i le laina fesoasoani o le sauaina mo se taitaiga i le fesoasoani atu i tagata ua afaina faapea foi ma le ausiaina o mea e manaomia mo le lipoti atu.

O Atunuu i Fafo atu o le I.S. a Kanata

Aoao pe faapefea ma po o afea e tatau ai ona e lipoti atu sauaga. E ao i peresitene o siteki ma epikopo ona valaau vave atu i le laina fesoasoani mo se taitaiga pe afai o loo i ai sea laina fesoasoani i lo latou atunuu. I atunuu e leai se laina fesoasoani faapea, e tatau i se epikopo ua silafia se sauaga ona faafesootai lona peresitene o le siteki. O le a ia sailia se taitaiga mai le ofisa o le fautua faaletulafono i le eria (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2020), 38.6.2.1, ChurchofJesusChrist.org). O isi aupaia e tatau ona mulimulita‘i i soo se matafaioi faaletulafono o le lipoti atu ma fefautuaai faatasi ma o latou epikopo.

E Le Mafai Ona Taliaina Sauaga

O le sauaina o le agaleaga lea po o le tuulafoaiina o isi (e pei o se tamaitiiti po o se toalua, tagata matutua, po o tagata e i ai manaoga faapitoa) i se auala e mafua ai ona afaina faaletino, faalelagona, pe faalefeusuaiga. O le tulaga o le Ekalesia e le mafai ona taliaina sauaga i soo se ituaiga, ma o i latou e faia sauaga, e tali atu i latou lava i luma o le Atua. Pe tausalaina faaletulafono se tasi pe leai ona o sauaga, o i latou o e faia sauaga e tuuina atu mo aoaiga faaleEkalesia ma e ono aveeseina ai lo latou tulaga o tagata auai o le Ekalesia (tagai i le Mataio 18:6; Mareko 9:42; Luka 17:2).

O ulua‘i tiutetauave o le Ekalesia i tulaga o sauaga, o le 1) fesoasoani atu, i se auala agalelei ma le gaualofa ia i latou o e na sauaina, ma 2) puipuia i latou o e e ono aafia gofie i le toe sauaina foi i le lumanai. E ui o nisi o sauaga e ono afua ai ni afaina faaletino, ae o ituaiga uma o sauaga e aafia ai le mafaufau ma le agaga. O sauaga e masani ona lepeti ai le faatuatua ma e mafai ona afua ai le le mautonu, masalosalo, le talitonuina, tausalaina, ma le fefe o le tagata ua sauaina. Tagai i “Matauina o Mamanu o Sauaga” ma “O a faailoga o le sauaina o se tagata?”

Fesoasoani i le tagata ua sauaina ia malamalama e le tauseseina o ia mai amioga a le tagata na faia sauaga ma e le o faamoemoeina e na te onosaia o ni amioga faatautala.

Ia mataala ona o tagata na faia sauaga e faitogafiti, faufauleaga, ma taufaasese ina ia ese la latou tala o mea na tutupu mai le faamatalaga a le tagata ua sauaina. I tulaga uma, ia mafaufau muamua lava i le saogalemu ma le puipuiga o le tagata ua sauaina.

O taitai o le ekalesia e le o faamoemoe pe uunaia e faia ni suesuega o le gasegase pe tuuina atu togafitiga ia i latou o tauivi ma faafitauli o le soifua maloloina faalemafaufau e faatatau i sauaga. Afai e manaomia, ia uunaia le tagata e saili atu mo se fesoasoani faapolofesa. O le Tautua mo Aiga (i nofoaga e i ai) ua avanoa e tuuina atu fautuaga ma ofo atu isi faamatalaga i taitai e uiga i punaoa i o latou alalafaga.

Ao e faitau i faamatalaga nei, saili i musumusuga i le fetuunaia o nei fautuaga i le tulaga o le tagata na sauaina, lea e ono suia pe afai o le tagata na sauaina o se toalua, tamaitiiti, matua tausi, po o se tagata e le atoatoa le malosi.

Saili ina ia Malamalama

3:28

O le fesoasoani i le tagata ua sauaina ia ona mautinoa ua lagonaina o ia ma malamalama e uiga i lona sauaina atonu e tutusa lava lona taua ma le taua o soo se fautuaga e mafai ona e tuuina atu. A o e talanoa ai ma latou ua afaina, saili ia faaali atu le alofa ma malamalama faapei ona faia e le Faaola. O le talanoaina o sauaga e manaomia le lototoa o lē ua afaina, ma e na te ono manaomia le faamautinoaga ma le faamafanafanaga.

Ia e to’a pea ma naunau e faaavanoa le taimi e faalogo atu ai i le tagata ua sauaina i ni ona gaumata‘u, masalosaloga, ma atugaluga. Mafaufau ma le agaga tatalo e fai atu fesili e pei o nei ise ala agalelei ma le faautauta ia fesoasoani ai ia e malamalama atili i le tulaga o le tagata ua sauaina ma iloatino ai ona manaoga. Ia mautinoa e faataga le tagata ua sauaina e faamatala le tulaga i ana lava upu nai lo o le tu’ifesiliina o ia.

O le a le mea o loo tupu?
O faapefea ou lagona e tusa ai ma lou saogalemu?
O faapefea le saogalemu o isi o loo siomia oe?
O ai se isi tagata ua e talanoa i ai e uiga i lenei mea (e pei o se aiga, matua, taitai o le Ekalesia, po o taitai faalemalo)?
O a ni mea o loo e manaomia i le taimi lava lenei?
E i ai se isi mea e uiga i lenei sauaga e tatau ona ou iloaina?

O tagata e afaina i sauaga e ono saili fesoasoani mai taitai o le Ekalesia mo le faamalologa faaleagaga. Atonu e sili atu ona lagonaina le mafanafana e tamaitai ma le autalavou e fono ma le epikopo po o isi taitai pe afai e i ai faatasi ma se uo, matua, po o se taitai faatuatuaina o le Ekalesia. Ia mautinoa ia iloa e le tagata na sauaina e mafai ona i ai se tagata lagolago faatasi ma ia i le taimi lea.

Fesoasoani i le Tagata

A o e fesoasoani pe lagolago atu i le tagata na sauaina, mafaufau i fautuaga nei: Manatua ia alofa ma loto fesoasoani i au fautuaga.

Fesoasoani i le tagata ia malamalama i le auala e maua ai le faamalologa e ala i le Faaola ma Lana Togiola (tagai i le Alema 7:11–12; 2 Nifae 9:21; MF&F 88:6).

Faamalo atu ia te ia mo le faaalia o le lototele e faasoa ane e uiga i le sauaga.

Ia toe faamautinoa atu i le tagata ua sauaina, e le manaomia ona salamo o ia ona o le avea ai ma se tagata ua afaina i sauaga.

Faamalosiau i le tagata e saili se faamanuiaga faaleperisitua.

Ia magafagafa i le faagasologa o le faamalologa o le tagata sauaina lava ia, lea e ono alu ai se taimi umi lava. Aua le taumafai e faatopetope pe puletutū le faagasologa.

Faataga le tagata ua sauaina e galue i ona lava lagona ma luitau e faatatau i le sauaga, ao lei fautuaina o ia e uiga i le faamagalo atu o le tagata na faia sauaga.

Fesoasoani i le tagata ia ona lagona le saogalemu.

Tagai i tusiga “E faapefea ona ou tumau ai i le saogalemu?” mo nisi faamatalaga.

Faamalosiau i le tagata na sauaina e aapa atu i isi na te faatuatuaina mo se fesoasoani ma le lagolago, e aofia ai tagata faufautua polofesa pe a manomia.

Lagolago le Aiga

O sauaga e aafia ai tagata o le aiga faapea foi ma le tagata lava ia. Filima‘oti le aafiaga i le toalua po o le aiga o le tagata na aafia ma talanoa e uiga i na faafitauli. Faapei ona e faaali le alofa ma popole mo le tagata na sauaina, faamautinoa e faaalia le alofa ma popole mo tagata o le aiga o e atonu o loo mafatia po o tiga.

Mafaufau e faaaoga punaoa i le lotoifale po o le fesoasoani faapolofesa mo tagata o le aiga o e ono manaomia faufautuaga po o le lagolagoina.

Fesoasoani i tagata o le aiga ia malamalama i le ala e mafai ai e le Faaola ona fesoasoani e faamalolo ia i latou lava (tagai i le Alema 7:11 ma le Mataio 11:28-30).

Tuuina atu le lagolago faifaipea i le aiga o le tagata na sauaina.

Faaaoga Punaoa a le Uarota ma le Siteki

Afai e tuuina atu ia te oe e le tagata na sauaina le faatagaga e talanoaina ai le mataupu ma isi, galulue i lalo o le taitaiga a le epikopo e faailoa mai ai taitai o le uarota po o nisi tagata faatuatuaina o e e mafai ona tuuina atu le lagolago faifaipea, taitaiga, ma le fesoasoani. (Tagai i le “Puipuiga ma le Tali Atu i Sauaga Faatautala” folasaga o faatonuga mo ni isi faamatalaga.)

Ia talanoaina ma le epikopo le auala e lagolago atu ai i le tagata po o le aiga ma le auala e tali atu ai i le mataupu i ni auala aoga.

Fesoasoani i le tagata na sauaina e saili ma fesootai ni punaoa o avanoa po o fesoasoani faapolofesa. Tagai i le “Pe tatau ona ou maua le fesoasoani faapolofesa?”

O punaoa e ono aofia ai malutaga, ‘au faufautua, auaunaga faafomai, auaunaga faaletulafono, ma nisi lagolago.
E fuafua i le ogaoga o le mea na tupu ma isi aiaiga, atonu e manaomia ona filifili le tagata pe faaaofia ai pulega faalelotoifale po o le puipuiga faaletulafono.

Ia magafagafa ma le agaga tatalo e uiga i manaoga o le tagata na sauaina ma faapea foi ma e e ono tofia o ni tuafafine ma uso o auaunaga. Mafaufau e faaaofia le tagata na sauaina i le faaiuga fai pe a talafeagai. O nisi tagata na sauaina atonu e sili atu ona mafanafana e faatasi ai ma se ulugalii o auaunaga nai lo ni uso o auaunaga se toalua.

Mafaufau e galulue ma le epikopo e faaalu le taimi i le aufono a le uarota po o se isi fonotaga ina ia aoaoina taitai i le aloese mai faapea foi ma le tali atu i sauaga.

“Puipuia ma le Tali Atu i Sauaga” pepa tusia punaoa