Matauina o Mamanu o le Faatautala/Sauaina

E i ai faailoga masani e matau lelei i le auala e masani ona amata ma faaauau ai le faatautala/sauaina. O le malamalama ai i nei mamanu, e mafai ai ona tatou iloa le mea e tatau ona fai e puipuia ai le faatautala/sauaina mai le tupu po o le taofia ai pe afai ua amata.

Tulaga Masani o le Faatautala/Sauaina

O i latou e afaina ai e masani ona faatautala/sauaina e se tasi latou te iloa.

O le tagata faatautala pe faasaua atonu o se tasi o le aiga pe tau i ai, e pei o se matua, matua o matua, uso o le tina po o le tuafafine o le tama, tuagane o le tina po o le uso o le tama, tausoga, po o se uso po o se tuagane/tuafafine, o se uo o le aiga, po o se tuaoi. O le tagata faatautala/faasaua e soo se tausaga lava le matua. O le tagata faatautala/faasaua e seasea o se tagata ese.

E iu lava ina faatuatuaina e le tagata ua afaina ma lona aiga le tagata faatautala/faasaua a o lei tupu le faalavelave.

E taua lenei mea o le “faatosinaga.” E masani ona tupu le faatosinaga i tamaiti ma le autalavou. E tupu le faatosinaga pe a faauo pe taumafai se tagata e fausia se fesootaiga faalelagona ma atiae se faatuatuaga ma se isi tagata ma le faamoemoe e faatautala/sauaina faalefeusuai ma lena tagata. O amioga faatosina e mafai ona aofia ai le talosagaina o ni taimi e na o ia ai ma lena tagata, talanoa i mataupu faalefeusuaiga, po o le faaali atu o ponokalafi pe amata se fesootaiga faaletino ma le tamaitiiti. E taumafai tagata faatautala/faasaua e faateleina fesootaiga taitoatasi. O le faatosinaga e mafai foi ona tupu i luga o le initoneti e auala atu i le telefoni feaveai a le tamaitiiti.

E masani ona amata e tagata faatautala/faasaua i le soli po o le sopo tuaoi.

O tuaoi o tapulaa ia o le tagata mo amioga po o le gagana ua manatu i latou ua tatau pe fai ma mea e puipuia ai i latou. O le faatautala/faasaua o le solia lea o tuaoi o se tagata. O nisi o taimi e mafua ona tupu le faatautala/faasaua ona e leai ni tuaoi mo amioga talafeagai i le va o tagata e toalua. Atonu e amata e le tagata faatautala/faasaua ona sopoia tuaoi i ni nai auala laiti ina ia maua ai e se tasi le lagona lelei, le maaleale, po o le masani ai i uiga ma le gagana le talafeagai. E mafai foi e le tagata faatautala ona matua le amanaiaina lava tuaoi.

E masani ona saili e tagata faatautala/faasaua e e faigofie ona latou faaaogaina.

E masani ona saili e tagata faatautala/faasaua e e faigofie ona latou puleaina (e pei o tagata matutua, e e i ai manaoga faapitoa, po o tamaiti i lalo ifo o le 18 tausaga le matutua). Latou te saili i tagata o e leai se malosi po o se malamalama e tuuina atu ai se maliega. Latou te saili foi i e atonu e le talitonuina e seisi. E taumafai foi tagata faatautala/faasaua e saili i latou e manatu e le tali mai pe le mafai ona latou tau atu i isi tagata le faatautalaga po o le sauaga.

E masani ona taumafai tagata faatautala e vavaeese e ua afaina mai isi tagata.

E masani ona taumafai tagata faatautala e vavaeese i latou o faatosina po faatautala mai le talitonuina pe talanoa i isi tagata. Latou te taumafai e vavaeese mai le ua afaina ina ia le iloa e ia ona saili atu i isi mo se lagolago ma se fesoasoani. Atonu foi latou te taufaamatau i le aiga o le ua afaina pe faia ni tuuaiga, faamaasiasi, po o le faamalosi e faaauau ai pea le faatautala.

O le malamalama i nei uiga masani e mafai ona fesoasoani e iloa pe puipui ai tulaga e ono oo atu ai i se faatautala. E mafai ona e faia se galuega e taofia ai le faatautala/sauaina a o le i tupu.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

“What is domestic violence?” O le Laina o Sauaga i Aiga i le Atunuu
“Grooming Behavior,” Monica Applewhite, faatonusili o le Confianza, LLC.
“Grooming,”Abuseandrelationships,org
“Grooming: What It Is, Signs and How to Protect Children,” Sosaiete Faaleatunuu mo le Puipuiga o le Faasaua i Tamaiti
“Creating a Family Safety Plan,” parentsprotect.co.uk
“Learn More,” Faalapotopotoga Tuufaatasi e Tetee atu i Sauaga i le Aiga