Talanoaga i Tamaiti e uiga i le Faatautala/Sauaina

O le puipuiga o fanau mai le faatautala/sauaina o se faamuamua mo matua ma taitai. Taofiga ma Puipuiga e amata i le aiga. O le taofiga e aofia ai le fesoasoani i fanau ma le autalavou ina ia malamalama i le uiga o le faatautala/sauaina ma mea latou te fai ina ia puipuia mai ai. E ao foi ona aoaoina tamaiti ina ia aua le faatautala/faasaua i isi.

Sauniuniga e Talanoa i Tamaiti.

O le faia o fesootaiga tatala ma tamaiti o le ki e fesoasoani ai ia i latou ina ia malamalama i le uiga o le faatautala/sauaina ma auala e puipuia ai i latou lava. O nei talanoaga e mafai ona fesoasoani e atiina ae ai le talitonuga ma fausia ai se lagona o le saogalemu ma lau fanau. E mafai e lenei mea ona fesoasoani ia i latou e lagona ai le saogalemu e talanoa ia te outou pe a latou lagona le fiafia i le auala e talanoa atu ai ma faaalia uiga o tagata ia i latou. E manaomia ona iloa e tamaiti e mafai ona talanoa atu ia te outou i soo se mea, e aofia ai ma mea o loo taua i lalo:

• Malamalama i o latou tino, vaega o o latou tino, ma o latou tulaga faalefeusuaiga

• Tulaga e latou te lagona ai le le fiafia

• Pe afai sa latou aafia po o loo aafia ai i le faatautala/sauaina

Na aoao mai e Sister Joy D. Jones, Peresitene Aoao o le Peraimeri: “O se vaega o le puipuiga o le fausiaina lea o mafutaga malosi, faatuatuaina, tutumau. O nei ituaiga o mafutaga e fesoasoani e faavavalalata ai a tatou fanau. A o tatou fausia sootaga malolosi o le faatuatuaina ma puipuia a tatou fanau ma a latou fanau-po o soo se tamaitiiti-tatou te tuuina atu ia i latou se nofoaga saogalemu e liliu atu i ai” (“It Starts with Us” [lauga na tuuina atu i le Konafesi o le Faalapotopotoga Tuufaatasi a Iuta e Tetee atu i Ponokalafi 2018, 10, Mati, 2018], mormonnewsroom.org).

I le avea ai o se matua po o se tagata matua faatuatuaina, e ao ona avea oe ma faataitaiga o mea e te aoaoina atu i le fanau e uiga i le taofia o le faatautala/sauaina. Mo se faataitaiga, e le tatau ona e faamalosia tamaiti e faaali atu o latou lagona (e pei o le fusi po o le kisi i se tasi) pe a latou le mananao i ai, e tusa lava pe e te le manao e faatiga i o latou lagona.

Aoaoina o Fanau e uiga i le Taofiga

Aoao fanau i mataupu faavae nei. Fesoasoani ina ia latou malamalama e ui ina e aoao i latou e uiga i auala e taofia ai le faatautala/sauaina, e mafai ona tupu lava le faatautala/sauaina. Afai e tupu, e le o sou faatamala, po o le faatamala foi o le tamaitiiti (tagai (“What if I think the abuse is my fault?”). Fetuunai au talanoaga e fuafua i tausaga, matua, ma le malamalama o lau tama.

O mea nei e mafai ona e fai atu ai pe a e talanoa i lau fanau e uiga i le taofia o le faatautala/sauaina:

1. E le afaina le fai atu e leai, e tusa lava po o se tagata matua.

E pulea e oe lava lou tino. O lona uiga e mafai ona e filifili pe afai e tago mai se tagata ia te oe, fusi oe, pe kisi ia te oe.

Afai ua tagofia po ua le talafeagai uiga e fai ia te oe po ua fesiligia e fai se mea e te lagona ai le ma, faanoanoa, po o le matamuli e fai, e le afaina lou fai atu e leai ma aluese loa, pe a mafai.

O nisi o taimi atonu e te lagona le fia fusi atu i se isi po o se kisi ma o nisi o taimi atonu e te le manao ai -- ma e le afaina lena. E mafai ona faataitai ona e fai atu “Leai,” “Aua le pai mai ia te au,” ma “Tuu mai au.”

2. E i ai vaega o lou tino o itusa e le tatau i se isi tagata ona pai ai ia te oe.

O itusa e aofia ai vaega e ufiufi e le ofutaele. E le tatau mo seisi tagata ona tagofia ou itusa i totonu po o fafo o ou ofu. E le tatau ona latou pueina ni ou ata e aunoa ma ou ofu. Ma lea foi, afai e manao se tagata e te tago atu ia i latou po o se isi tagata i ni vaega o o latou tino o itusa, e le tatau lava.

3. E le tatau mo se tasi ona faamalosi, taufaamatau, po o le faatosina o oe e auai i fesootaiga faaletino po o soo se amioga faalefeusuai.

Afai e manao se tagata e te faia se mea e te iloa e le sao, e mafai ona e fai atu leai.

O nisi faataitaiga o auala latou te faamalosi, taufaamatau, po o le faatosina ai o oe e aofia ai mea nei:

• Latou te faaaoga o latou tulaga, tofiga, matua, lapoa, po o se mea latou te iloa e faamalosia ai oe e fai mea o loo latou mananao i ai.

• Latou te faapea mai e le mananao e fai ma a outou uo seia vagana ua e faia le mea latou te fai mai ai.

• Latou te avea se mea o oe e anaina ma e le toe aumaia sei vagana ua e faia le mea latou te fai mai ai.

• Latou te taufaamatau e faasalalau pepelo e uiga ia te oe seia vagana ua e auai.

• Latou te ofoina mai ia te oe meaalofa, faatosinaga, po o isi taui mo le auai.

• Latou te taufaamatau e faatiga oe po o se isi i lou aiga pe afai e te le faia le mea latou te fai mai ai.

4. Aua nei nanaina le faatautala/sauaina.

E i ai eseesega o le faalilolilo ma le faateia. O le faateia o se mea e pei o se meaalofa o se aso fanau po o le Kerisimasi e iu lava ina fefaasoaai. O le faalilolilo e pei o se mea e tau atu ia te oe e se tasi e aua nei tauina i se isi. Afai e fesiligia oe e tausi faalilolilo se mea e uiga i se tasi ua tago po ua faatiga ia te oe, e ao ona e talanoa vave loa i se tagata matua faatuatuaina.

5. Talanoa i tagata matutua faatuatuaina e uiga i se nofoaga e taunuu saogalemu i ai pe a tupu se mea.

E i ai nisi o mea e mafai ona e taumafai e fai ina ia taunuu ai i se nofoaga saogalemu pe a ua e aafia i se tulaga faatautala/sauaina. E tusa lava pe le mafai ona e aluese, talanoa i se tagata matua faatuatuaina i le mea na tupu po o loo tupu i se taimi vave lava.

6. E tusa po o lou taumafai i le mea sili ina ia e saogalemu, e mafai lava e tagata ona faamanualia oe.

Afai e tago pe faamanualia oe e se tasi, e le o sou sese. Tau i se tagata matua faatuatuaina pe afai na tupu se mea leaga. E tusa lava po o le a le mea e tupu, e alofagia pea lava oe.

7. E mafai lava ona e talanoa mai pea ia te au po o se isi tagata matua faatuatuaina.

E mafai ona e talanoa mai ia te au pe afai na tagofiaina oe pe a faapea na manao se tagata e te faia se mea e te lagona ai le le saogalemu. E ui ina faapea sa tau atu ia oe e leai se tasi o le a talitonu ia te oe, o le a ou talitonu ia te oe.

Afai e le mafai ona e tau mai ia te au, faamolemole tau atu i se isi tagata matua e te faatuatuaina. O se tagata matua faatuatuaina e mafai ona fesoasoani e puipuia oe ma tuuina atu ia te oe le lagolago e te manaomia. Fai se lisi o tagata o e faalogo ia te oe ma e te lagona le saogalemu ai. O se tagata matua faatuatuaina e mafai o se matua, matua o matua, isi o lou aiga, faiaoga, taitai o le Ekalesia, fomai, po o se faufautua i le aoga.

Aoaoina o Fanau e Faaaloalo i Isi

E pei ona taua le aoao o fanau i auala e taofia ai le faatautala/sauaina po o le tali atu pe a o taumafai se tasi e faatautala/sauaina i latou, e taua foi mo le fanau ona malamalama e ao ona latou faaaloalo i isi. E tatau ona tatou faaali atu i tagata uma le agalelei ma le faaaloalo. I le mulimuli ai i taiala mo uiga ma amioga e pei ona faamatala i le Mo le Malosi o le Autalavou o se mea lelei e amata ai. Aoao foi fanau i mataupu faavae nei:

1. E le tatau ona faamanualia se isi tagata— faaletino, gagana tautala, po o le faalelagona— e tusa po o le a lava. Aua nei fai atu upu e toso ai tagata i lalo pe faatiga ai i isi tagata. Aua nei faia pe faasoa atu ata, vitio, po o feau e afaina ma faatiga ai i isi tagata.

2. E le tatau ona e tago i itusa o se isi tagata, e tusa lava pe e te manaomia pe manaomia e isi. Aua nei talaia ou ofu i luma o se tasi. Ma aua nei e tilotilo i itusa o se isi tagata.

3. Afai e fai mai se tagata e leai pe manao ia te oe e taofi le mea o fai pe o tautala mai ai, faalogo ia i latou. Afai e le manao le isi tagata e tagofia, ene, pe kisi po o le auai i nisi amioga, aua nei faia lava.

4. Aua nei faatamatama i isi pe faamalosi isi tagata e fai mea e te manao ina ia latou fai. Faaaloalo i la latou filifiliga saoloto.

Punaoa a le Ekalesia ma le Nuu

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

• “Talking to Your Kids About Sexual Assault,” Toso teine po o tama faamalosi, Faatautala & Mataifale Upegafesootai Faaleatunuu (RAINN)

• “Talking with Your Children About Abuse,” Taofia le Faatautala i Fanau Amerika (archbalt.org), “Tips for talking with your children about child abuse” (ovc.ojp.gov), “How We Can Address Abuse” (churchofjesuschrist.org)

• “RESPECT! Conversation Starters: Respectful Relationships,” Lumanai e Aunoa ma le Sauaina

• “Child Sexual Abuse Prevention,” Auala o Faamatalaga o le Soifua Manuia o le Tamaitiiti

• “Preventing Child Sexual Abuse,” (preventchildabuse.org)

• “How can we prevent child sexual abuse?” Puipuiga a Matua!

• “Teaching Good Touch Bad Touch,” Ofisa Fesoasoani Tutotonu o Aiga

• “Tip Sheet: Don’t Wait: Everyday Actions to keep Kids Safe,” Tofa loa Nei!

• “How to Set Healthy Boundaries in Any Relationship,” Mormon Channel

• “You Can Get Teens to Talk,” Ensign, Oke, 1993

• Lesson Helps for Teaching Children: Abuse, LDS.org

• “Find a Trusted Adult to Talk To,” Wiki How

Tusiga e Faatatau I Ai

• Ae faapefea pe afai ou te mafaufau o le faatautala/sauaina o a’u le pogai?