Maitauina o Ituaiga o Faatautala/Sauaga ma Amioga Faatautala/Sauaina

O le faatautala/sauaina o le taulimaina lea o isi po o oe lava i se auala e mafua ai le tiga po o le afaina. E afaina ai le mafaufau, le agaga, ma e masani ai foi o le tino. E feteenai ma aoaoga a le Faaola ma tulafono o le nuu. O i latou ua afaina i le faatautala e soo se matua, soo se itupa, ma soo se siosiomaga. Atonu o i latou ia ua le lava le malosi e puipui ai i latou lava, e pei o tamaiti, o i latou e i ai manaoga faapitoa, po o e matutua. E tausalaina e le Alii amioga faatautala/sauaina i soo se tulaga—faaletino, faalefeusuai, gagana tautala, po o le faalelagona. O le mea e faanoanoa ai, e mafai ona tupu le faatautala/sauaina i soo se tasi. O le malamalama i le uiga o le faatautala/sauaina e mafai ai ona fesoasoani e talanoa ai, matauina ai, tali atu i ai, ma le faamaloloina mai ai.

Ituaiga o Faatautala/Sauaga

O le faatautala/sauaina e mafai ona tupu i soo se mafutaga, pe o se tagata o le aiga, uo, tane po o le ava, po o se soa o loo faamasani i ai.

Faalefeusuaiga—O le faatautala/sauaina faalefeusuaiga o soo se fesootaiga e aofia ai amioga fepaiai po o le le fepaiai e faaaoga ai se tagata e faamalieina ai manaoga faalefeusuaiga o se isi tagata e aunoa ma se malilie faatasi i ai. O le faatautala/sauaina faalefeusuaiga i tamaiti o le faia lea o soo se gaoioiga faalefeusuaiga i le va o se tamaitiiti (o soo se vaitausaga) ma se tagata matua. O le faatautala/sauaina faalefeusuaiga i tamaiti e mafai foi ona aofia ai amioga faalefeusuaiga i le va o le tamaitiiti ma se talavou, aemaise lava pe a faapea e matua le talavou po ua i ai i se tulaga o le malosi, faatuatuaina, po o le puleaina. E aofia ai foi ma le matamataina, fausiaina, ma le faasalalauina atu o ata ponokalafi o se tamaitiiti faapea foi ma le matamataina o ponokalafi faatasi ma se tamaitiiti.

Faaletino—O le faatautala/sauaina faaletino e faatatau lea i le faamanualia faamoemoeina o se tagata, e pei o le ta, kiki, po, u, po o se isi lava gaoioiga e mafua ai le tiga o le tino, manu’a, po o faailoga vaaia po o le unooa.

Tuulafoai—O le tuulafoai o le le gafatia lea ona faafetauia manaoga autu o se tagata, e pei o le le lava o le tausiga i mea tau meataumafa, fale, po o le vaaiga patino; tausiga talafeagai o le soifua maloloina o le tino ma le mafaufau; lava le aoaoina; po o le toafimalie faalelagona. E aofia ai le tuuatoatasi o se tagata e manaomia le tausiga faifaipea mo se taimi umi e aunoa ma le lava o le tausiga ma le lagolagoina.

Faalelagona ma Gagana Tautala—O le faatautala/sauaina i lagona ma le gagana o le taulimaina lea o se tagata i se auala e lamatia ai lona atiina ae faalelagona ma lona tauaogaina. O faataitaiga e aofia ai le faia pea lava pea o le sailiili masei, faatauvaaina, teena, ma le taofiaina o le alofa, lagolago, po o le taialaina. E aofia ai foi le molimauina e se tamaitiiti o sauaga faaleaiga.

Tulaga Tautupe—O le faatautala i tulaga tautupe e faatatau lea i se tagata ua ia taofia, gaoi, pe pulea le avanoa i tupe po o meatotino a se isi e aunoa ma se faatagaga. O se tasi lea o foliga o le taufaasee faaletulafono.

O Isi Amioga Faatautala/Sauaina

O amioga faatautala/sauaina nei e tetee atu i aoaoga o le talalelei. E ui ina e le faauigaina nei tulaga uma o se faatautala/sauaina, ae o nei amioga uma e afaina ai.

Faatosinaga—E tupu le faatosinaga pe a faauo pe taumafai se tagata e fausia se fesootaiga faalelagona ma atiae se faatuatuaga ma se isi tagata ma le faamoemoe e faatautala faalefeusuai ma lena tagata. O le tagata e faamoemoe e afaina ai e matele lava o se tamaitiiti. O amioga faatosina e mafai ona aofia ai le tuuina atu o ni meaalofa po o le fai o se mea lelei, talosagaina o ni taimi e na o ia ai ma lena tagata, talanoa i mataupu faalefeusuaiga, po o le faaali atu o ponokalafi pe amata se fesootaiga faaletino ma le tamaitiiti. O le faatosinaga e mafai foi ona tupu i luga o le initoneti e auala atu i le telefoni feaveai a le tamaitiiti.

Aoaiga Saua—E mafai ona fesoasoani ma faamalosia tamaiti e ala i le aoaiga talafeagai ma alofa. Ae ui i lea, o faitioga po o le ulagia e mafai ai ona tafiesea lo latou talitonuga ma lagona o le faatauaina o i latou lava ma le soifua manuia. O le aoaiga lelei o le a fesoasoani e aoao ai e le tamaitiiti le sa’o mai le sese. O aoaiga saua lea e mafua ai le faamanualia o le tino o le faatautala/sauaina ma e tatau ona lipotia i au pulega o le tulafono.

Uiga Faamalosi—O uiga faamalosi e fausia ai se siosiomaga feteenai lea e ono tutupu ai faalavelave mai le faaitiitia o le auai i ni gaoioiga masani i mafaufauga o le pule i le ola. E mafai ona aofia ai faamatalaga po o taga taufaaleaga, gagana faauigalua, le faaaloalo i le va patino o tagata, ma le tilotilo po o le talanoa i itutino sa o tagata. E mafai foi ona aofia ai le faaaogaina o faamatalaga i le initoneti e faalata pe faamatau ai isi tagata.

Faatamatama po o le faasaua—”O le faatamatama po o le faasaua o se amioga fiamalosi lea e faamoemoe ma faifaipea e se tasi e faamanualia ma lē nofo toafimalie ai se isi tagata. O le faatamatama po o le faasaua e mafai ona aafia ai le fepaiai faaletino, po o nisi gaoioiga maaleale” (“Faatamatama po o le Faasaua, American Psychological Association, apa.org). O le faatamatama po o le faasaua faaeletonika e mafai ona aofia ai le faaaogaina o faamatalaga i le initoneti e faamatau ai se tasi, e pei o le auina atu po o le faapipiiina o ni faasalalauga e uiga i se tasi e mataua, taufaafefe, po o le taufaamatau. E mafai foi ona aofia ai le faamoemoe e faaleaga le sootaga ma se tasi po o le tulaga faalauaitele.

Faamaasiasi—O le faamaasiasi e mafai ona tupu pe a faamalosi atu e se tasi se gaoioiga le talafeagai po o le faamaasiasi i se isi tagata e avea o se vaega o le oo aloaia mai i totonu o le vaega.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

• Ituaiga o Faatautala/Sauaga,” LoveIsRespect.org

• StopBullying.gov

• Media resource about bullyingMormon Channel

• Punaoa e uiga i le faasaua, Faasaua (churchofjesuschrist.org)

Tusiga e Faatatau I Ai

• O a ni faailoga o loo savali se tagata i le pouliuli faaleagaga?

• O le a se mea e tatau ona ou faia pe afai ou te iloa pe masalomia o loo sauaina se tagata?

• O le a se mea e tatau ona ou faia pe afai na sauaina la’u tama?