O le a se mea e tatau ona ou faia pe afai na faatautalaina/sauaina la’u tama?

Atonu e mafai ona e oo i le tele o lagona i le iloaina na faatautalaina/sauaina lau tama, e aofia ai le te’i, le talitonu, ita, ma le faanoanoa. O se tulaga masani le lagona feteenai e uiga po o ai manaoga e taulai atu i ai, aemaise lava pe afai na faatautalaina/sauaina lau tama e se isi tagata o le aiga. O le iloa pe faapefea ona taulimaina manaoga o tagata uma e mafai ona lagonaina ai le lofituina. O lau mea muamua lava e tatau ona e faia o le tausia lelei o manaoga o le tamaitiiti na faatautalaina/sauaina. O lau faamuamua lona lua o le faamautuina o se fesoasoani mo oe lava ia ma lou aiga. Afai o le tagata na faia le mea sese o se tasi o isi o lau fanau, e manaomia foi e ia se fesoasoani.

Manatua e filifili faatasi ma le Tama Faalelagi i le tatalo ma saili le fesoasoani a le Faaola, e ala i Lana Togiola. Ua valaauliaina i tatou e le Alii ia o mai ia te Ia e tusa lava po o a o tatou tulaga:

“Ia outou o mai ia te au, outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.

“Aua e avegofie la’u amo, o la’u avega foi e mama ia” (Mataio 11:28–30).

O Manaoga a Lau Tama

O tamaiti o loo faatautala/sauaina e ono foliga mai o loo lelei [i latou]—ma o le toatele e ono fai mai o loo lelei i latou. Atonu latou te faaali mai ni amioga e pei o le faatautala/sauaina e le o aafia ai i latou. Atonu e mananao tamaiti e aua le faasoa maia o latou aafiaga i le sauaina mo ni mafuaaga eseese. E aofia ai le maasiasi, aloese mai le tiga po o le faanoanoa, fefe nei tei ua aafia i latou, fefe i le tagata na faia le soitulafono, fefe nei aafia atu ai nisi tagata, le lava le malamalama i le mea na tupu pe o loo tupu, ma lē gafatia i le faaleoina mai o le mea na oo i ai. E taua le mafaufau pe afai o le tagata na faia le solitulafono o se tasi latou te iloa ma alolofa i ai, atonu e mananao tamaiti e puipui le tagata na faia le solitulafono mai i taunuuga. Po o le a lava le mea e manao i ai lau tama, e taua le faia o mea nei i le taimi lava e te iloa ai le faatautala/sauaina:

1. Fai ni laasaga e puipui ai le tamaitiiti mai nisi faatautalaga/sauaga.

2. Lipoti le faatautala/sauaina i pulega faaletulafono. Ia saunia e faasoa atu ni faamatalaga e uiga i le tagata solitulafono, lau tama, ma soo se faamatalaga ua silafia e uiga i le faatautala/sauaga. O se mea masani le le maua uma o ni tali i fesili uma na fesiligia ai oe i le taimi o le lipoti. Feutagai ma le pulega faaletulafono ma tau atu ia i latou mea uma e te iloa. O le a fesoasoani lenei mea e puipuia ai le tamaitiiti.

3. Afai o loo faatautalaina/sauaina se tamaitiiti e se isi tagata o le aiga (e pei o se tei po o se matua), o le aveesea o le tagata solitulafono mai le aiga atonu o se filifiliga sili lea.

O le a manaomia e lau tama o loo faatautalaina/sauaina le lagolago, malamalama, ma le toe faamautinoa atu o loo malupuipuia i latou. Talatalanoa ma lau tama e uiga i le mea o le a fesoasoani ia i latou e lagona ai le saogalemu ma, i le mea e gata mai ai, saunia mo i latou na mea. O taitai o le Ekalesia, pulega faaletulafono, ma faufautua faapolofesa e mafai ona fesoasoani ia te oe e atiae ni fuafaatatau saogalemu talafeagai.

Faamautinoa atu i le tamaitiiti o le solitulafono e le o so latou sese; o le faatautalaina/sauaina e le o se agasala, ma e le manaomia ai ona latou salamo. Fesoasoani atu ia latou ia iloa o loo i ai so latou fesoasoani ma le lagolago. Afai e mafai, tuu atu lau tamaitiiti e suesueina e se faufautua faapolofesa o lē e i ai se poto masani i le galulue faatasi ma tamaiti ua faatautala/sauaina. E mafai e le faufautua ona iloilo le aafiaga o le faatautala/sauaga ua aafia ai lau tama ma tuuina atu se fautuaga mo le auala e fesoasoani ai ia i latou ina ia faamaloloina.

Mauaina o le Fesoasoani mo Oe ma Lou Aiga

Manatua, e le tuuaia oe pe afai o lau tama na faatautalaina/sauaina e se isi tagata; na pau le tagata o loo tuuaia o le tagata na faia le solitulafono. O matua ma isi tagata o le aiga o tamaiti o e na faatautalaina/sauaina e ono faamanuiaina mai faufautuaga faapolofesa. E mafai foi ona e maua le lagolagosua faaleagaga ma faalelagona mai taitai o le Ekalesia. Ia mautinoa e te faaaluina se taimi e toe faaleleia ai faaleagaga, faalelagona, faaleagafesootai, faaletino, ma faaleatamai.

Ia e agalelei ia te oe lava ia ma i isi tagata o lou aiga. O le iloaina na faatautalaina/sauaina lau tama e mafai ona faalavelave i mafutaga faaleaiga. Ia faaauau pea ni gaoioiga e atiae ai sootaga ma tagata o lou aiga. O se mea masani mo matua le lagona faapea o le a le toe foi lava mea i le tulaga masani. O le a alu ai se taimi, ae ia aua lava nei faavaivai. E mafai e le Faaola o Iesu Keriso, e ala atu i Lana Togiola, ona fesoasoani ia te oe ina ia faamaloloina.

Afai o se isi tagata o lou aiga o le tagata na faia le solitulafono, atonu e manaomia ona e mafaufau e aveese mai o ia mai le fale. E ui o lenei mea e ono lagona ai le pei ua vaeluaina le aiga, o le tuueseina o se laasaga taua lea e mafai ona taitai atu ai i le faamaloloina o tagata uma o loo aafia. I nisi o tulaga, o le toe faatasia o le aiga e iu ona ono mafai e ala atu i le fesoasoani mai o le pulega faaletulafono ma faufautua faapolofesa. I nisi tulaga, e le fautuaina le toe tuufaatasia o le aiga.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

• “Why a Child May Sexually Harm Another Child,” Stop It Now!

• “Help for Parents of Children Who Have Been Sexually Abused by Family Members,” Toso teine po o tama faamalosi, Faatautala/Sauaga & Mataifale Upegafesootai Faaleatunuu (RAINN)

• “What to Do If Your Child Discloses Sexual Abuse: A Guide for Parents and Caregivers,” National Child Traumatic Stress Network (NCTSN)

• “Coping with the Shock of Intrafamilial Sexual Abuse: Information for Parents and Caregivers,” National Child Traumatic Stress Network (NCTSN)

Tusiga e Faatatau I Ai

• Talanoaga i Tamaiti e uiga i le Faatautala/Sauaina

• O a ni faailoga o loo savali se tagata i le pouliuli faaleagaga?

• O le a se mea e tatau ona ou faia pe afai ou te iloa pe masalomia o loo sauaina se tagata?