Sauaina
E Mafai Faapefea e Taitai o le Ekalesia ona Lagolago i Tagata Na Afaina i Sauaga Faatautala?

“E Mafai Faapefea e Taitai o le Ekalesia ona Lagolago i Tagata na Afaina i Sauaga Faatautala?” Auala e Fesoasoani Atu Ai (2018)

“E Mafai Faapefea e Taitai o le Ekalesia ona Lagolago i Tagata na Afaina i Sauaga Faatautala?” Auala e Fesoasoani Atu Ai

E mafai faapefea e taitai o le Ekalesia ona lagolagoina tagata na aafia i sauaga faatautala?

3:28

E tatau i epikopo, peresitene o paranesi, ma peresitene o siteki ona valaau atu i le telefoni fesoasoani a taitai o le Ekalesia i le taimi vave mo le fesoasoani i taimi taitasi latou te iloa ai se sauaga e fesoasoani atu ai i tagata na aafia ma ausia mea e manaomia e lipotia. O le fesoasoani ua tuuina atu e mafai ona taiala ai taumafaiga a le aufono a le uarota i le lagolagoina o tagata na aafia fua i sauaga faatautala.

Ona o le mafatiaga o le sauaina, e ono aafia ai tagata ua afaina faaletino, faaleagaga, faalemafaufau, ma faalelagona. I le avea ai ma se taitai, atonu e i ai ni au fesili e uiga i le auala e fesoasoani atu ai.

O le faateleina o lou iloa ma le malamalama i aafiaga o le sauaina o le a fesoasoani ia te oe e lagolago, auauna atu, ma tuuina atu ma le mataalia le taitaiga ma le lagolago faaleagaga.

Malamalama i Tagata na Sauaina

Atonu e ese manatu, lagona, ma amioga a tagata na aafia i sauaga faatautala nai lo le auala na latou faia a o lei sauaina i latou. I lou manao e lagolago i e ua afaina, saili faamatalaga e tali atu ai ma le maaleale. (Tagai i le “E mafai faapefea ona ou lagolagoina se tasi na sauaina?” mo nisi faamatalaga i le auala e tuuina atu ai le lagolago).

Ia nofouta i mea nei a o e galue faatasi ma nei tagata lotu:

Fausia le faatuatuaina

O sauaga faatautala e aveesea ai le faatuatuaina, e oo lava ia i latou o e o le a sili ona faatuatuaina, e aofia ai tagata o aiga, uo, taitai o le Ekalesia, ma le Atua. E tusa lava pe o mai tagata ua afaina ia te oe mo se lagolago, atonu e le faapea e i ai so outou sootaga o le faatuatuaina. Atonu o loo sailia e tagata ua afaina ia tagata latou te faamoemoe e faatuatuaina.

O se mea masani mo e ua afaina i le sauaina le faasoa atu na o vaega o o latou aafiaga (tagai i le “Ae faapefea pe afai o loo ou tauivi ma le faatuatuaina o isi?”). Atonu e manaomia lou faaaluina o se taimi faaopoopo i le fausiaina o se sootaga o le faatuatuaina ma le tali atu i le saogalemu po o isi atugaluga.

O mea e mafai ona e faia

  • Saili e tali atu ma le alofa.

  • Talitonu i o latou aafiaga.

  • Ia e faasoa atu ma ia e faamaoni.

  • Siaki soo le tagata i le taimi o lua talanoaga e uiga i mea e mafai ona e faia e fesoasoani ai ia i latou e lagona le saogalemu (mo se faataitaiga, fesili atu pe latou te mananao i se tasi e soaina i latou, faataga le tagata na sao mai e filimaoti po o afea ma po o fea e te feiloai i ai ma fuafua pe latou te fiafia i autu o loo talanoaina)

  • Faamalamalama manino atu ou mafaufauga ma amioga ma uunaia tagata na aafia e fai ni fesili pe afai latou te le malamalama.

  • Ia faaeteete i au upu. O le fai atu o mea e pei o le “tuu loa” po o le “ua oo i le taimi e agai ai i luma,” atonu latou te lagona ai e pei e te le popole pe e te manatu o loo latou soonafai (tagai i le “Aafiaga Masani o Lagona, Mafaufauga, ma Amioga a i Latou Ua Sao Mai i Sauaga Faalefeusua’iga”).

  • Ia tumau i au fegalegaleaiga.

  • Mulimuli i mea e te fai atu ai o le a e faia.

Toe faamautu atu le taua ma le agavaa

O le sauaina e tele lava ina faataumaoia ai le faatuatua o se tagata ua afaina. O le toatele o tagata ua afaina e lagona le tuulafoaiina e le Atua ma taumanatunatu pe aisea na Ia le puipuia ai i latou pe taofia le sauaina. E masani ona latou tuuaia sese i latou lava mo le sauaina. O le toatele o tagata ua afaina e fesiligia lo latou taua. O nisi atonu e taulai atu i le soona flolotu e tauia ai o latou lagona o le le agavaa faaletagata lava ia. O isi atonu e leai se faamoemoe ma tauivi ma lo latou faatuatua pe ono o ese mai gaoioiga faaleagaga.

E mafai faapefea ona e fesoasoani:

  • Ia iloa talitonuga patino o tagata ua afaina e uiga i lo latou taua ma le agavaa.

  • Aoao atu ma le magafagafa ia mataupu faavae o le talalelei o le taua ma agavaa.

  • Faamamafa atu le alofa o lo tatou Tama Faalelagi ma le Faaola mo i latou.

  • Faamautinoa atu i tagata na aafia faapea o le sauaina e le o so latou sese (tagai i le “Ae faapefea pe afai ou te manatu o le sauaina o lo’u sese?” ma le “Pe o o’u taua pea?”).

Faamanino puapuaga

Atonu e talitonu sese tagata na afaina i le sauaina o se tofotofoga na tuuina atu ia i latou e le Tama Faalelagi ina ia mafai ai ona latou aoaoina se mea. Atonu na ta’u atu ia i latou o le aafia ai i le sauaina sa tatau ai mo lo latou tuputupu ae po o se vaega o le fuafuaga mo lo latou olaga. O se aoaoga faavae sese lenei; o le Alii e le o le tusitala po o le puna o mea leaga i olaga o Ana fanau (tagai i le Iakopo 1:13, 17; 2 Nifae 26:24; Ominae 1:25; Alema 5:40; Moronae 7:12). O lenei manatu sese e ono afua ai ona latou saili mo mea lelei i o latou tulaga ma taumafai e le amanaia o latou tiga. E ono mafua ai foi ona latou mafaufau faapea e finagalo le Atua ia latou puapuagatia.

O mea e mafai ona e faia

  • Aloese mai le ta’uina atu i tagata na aafia faapea na tuuina atu e le Atua ia i latou lenei tofotofoga ina ia mafai ai ona latou aoaoina se mea pe o se mea na latou malilie i ai i le muai olaga.

  • Fesoasoani ia latou malamalama o le sauaina o se taunuuga tuusao lea o le filifiliga le lelei a se isi tagata i le faaaogaina o lana faitalia.

  • Aoao atu i tagata na aafia e alofa le Atua i a i latou ma o le a lagolagoina i latou i o latou tofotofoga, ma o latou faalavelave, ma o latou puapuaga, ma o le a siitia ae i latou i le aso gataaga” (Alema 36:3).

Faamalosia le faasologa o taimi o le tagata na sao mai mo le faamalologa ma le faamagaloga

E masani ona lagona e tagata ua afaina le faamalosia e faamagalo le tagata solitulafono a o lei saunia i latou. Afai e ta’u atu ia i latou ia vave faamagalo atu, atonu latou te talitonu o le manaoga o le tagata solitulafono mo le faamagaloga e sili atu nai lo lo latou manaomia o le faamalologa. A faamaloloina tagata ua afaina, o le a oo mai le gafatia e faamagalo atu ai.

O mea e mafai ona e faia:

  • Fesoasoani i tagata ua afaina e taulai atu i lo latou lava faamalologa.

  • Fesoasoani i le tagata na sao mai ia onosai i lona lava manao e faamagalo atu. Aloese mai le setiina o se faasologa o taimi mo le faamalologa ma le faamagaloga. Faalogo i e ua afaina ia malamalama pe a latou saunia mo se fesoasoani i le galulue e faamagalo atu. O laasaga o le faamalologa o le a mafai ai ona maua le faamagaloga (tagai i le “E mafai ona ou faamaloloina mai lenei mea?” ma le “Pe mafai ona faamagalo atu?”).

  • Fesoasoani i le tagata na sao mai e faalagolago i le tulafono tupito a le Alii o le faamasinotonu i le olaga o le tagata solitulafono.

Fesoasoani ia i latou ia faamagalo i latou lava

E ono fai e tagata ua afaina ni filifiliga le lelei o se auala e taulimaina ai le mafatiaga po o le tiga mai le sauaina. Mo se faataitaiga, atonu latou te taumafai e faagalo le tiga ma le mafatiaga e ala i le faaaogaina o ava malosi po o fualaau faasaina. Atonu e faigata ia i latou ona faamagalo i latou lava mo nei filifiliga.

O mea e mafai ona e faia:

  • Faamanatu atu ia i latou e alofagia i latou.

  • Faataga i latou e talanoaina mea latou te talitonu latou te manaomia ai le faamagaloga pe manaomia ona salamo ai.

  • E aunoa ma le taliaina o ana amioga, ia talanoaina ma le agaalofa ma le tagata na sao mai ana amioga ma auala na faaaoga ai na faatinoga e taulima ai le mafatiaga o le sauaina.

  • Faamautinoa atu ia i latou le alofa mutimutivale ma le alofa o le Faaola.

  • Faamautinoa atu ia i latou ou lagona lelei e le masuia e uiga ia i latou.

  • Fesoasoani ia i latou i lo latou ala i le faamagalo atu o le tagata lava ia.

  • Fautuaina i latou ia malamalama e mafai e lo latou epikopo ona fesoasoani ia i latou ia iloa le mea e fai ma mea e le manaomia ona salamo ai.

Ia nofouta i le avanoa patino

E toatele tagata na aafia i sauaga faatautala e nofouta i le avanoa o loo siomia ai i latou. E masani ona le toafimalie i fesootaiga faaletino. Pe a fesiligia i latou pe ua lelei le opoina o i latou, e masani ona latou fai mai ioe, pe a latou mananao moni lava e fai atu leai.

O mea e mafai ona e faia:

  • Fesoasoani i e ua afaina e ala i le faaaloalo i lo latou avanoa patino.

  • Faataga le tagata ua afaina e talanoaina le pa’i faaletino latou te maua ai le toafimalie (pe leai se pa’i, se faatalofa, po o se opo). Tuu atu ia i latou e amatalia lenei talanoaga pe atonu latou te lagonaina se uunaiga le talafeagai e tali mai

  • Ia nofouta e masani ona tuu ese e tagata ua afaina lo latou lava mafanafana faaletino e faafiafia ai isi.

Faamaonia le tagata na aafia i le lotolotoi o faamanatu mafatiaga

O le mafatiaga o le sauaina e mafua ai ona osofaia le tulaga maaleale o tagata ua afaina e le faaosofia, o ni faamanatu ia o le mea na tupu. O faaosofia e ono tupu i soo se mea i soo se taimi. O le tagata na sao mai e mafai ona faaosofia e se mea latou te vaai i ai, sogisogi, faalogo, ma isi mea faapena. Pe a “faaosofia” i latou ua afaina, e masani ona latou lagonaina auga e talitutusa ma mea na latou oo i ai i le taimi na sauaina ai i latou. E mafai ona aofia ai le soona nofouta i o latou siosiomaga, faateleina o le popole, faateleina o le saoasaoa o le fatu, afugia, gatete, atuatuvale, po o le manaomia ona o ese mai isi.

O mea e mafai ona e faia:

  • Pe a faasoa atu e tagata ua afaina nei lagona ia te oe:

    • Tuuina atu le faamaoniga o nei tali e moni ma e taatele.

    • Faataga le tagata aafia e talanoaina o latou manaoga i nei tulaga.

    • Faamaonia manaoga o le tagata aafia.

  • Afai e faaosofia se tagata na afaina pe a faatasi ma oe

    • Faamautinoa atu i le tagata ua afaina o loo saogalemu o ia.

    • Faataga le tagata na sao mai e aluese pe afai na te lagonaina le manaomia ona alu ese.

    • Faataga le avanoa sili atu o le tagata na sao mai ai; atonu latou te manaomia oe e tuua i latou ma faataga i latou e taulimaina a latou faaosofia.

Fesoasoani atu i Tagata Ua Afaina ia Lagona le Saogalemu

E masani ona faigata i tagata ua afaina ona lagona le saogalemu faaletino ma faalelagona. O le fatuina o se siosiomaga saogalemu mo e ua afaina e mafai ona fesoasoani ia i latou e fausia le faatuatuaina ma saili le faamalologa.

Pe a feiloai ma e ua afaina, mafaufau i mea nei:

  • Fesili atu pe latou te mananao i se isi tagata (o la latou filifiliga) ina ia auai.

  • Fesili atu pe latou te mananao e tatala le faitotoa.

  • Valaaulia i latou e nonofo i soo se mea e sili ona mafanafana mo i latou.

Afai o loo i ai le tagata ua afaina i le faapotopotoga lava e tasi ma le tagata na faia le solitulafono, ia manatua o le saogalemu o le tagata ua sauaina e sili ona taua. Mafaufau po o le a se mea e mafai ona e faia e fesoasoani ai i le tagata ua afaina ia lagona le auai saogalemu i sauniga po o gaoioiga a le Ekalesia.

Mauaina o Fesoasoaniga Mo Le Tagata Ua Afaina

Atonu e manaomia e tagata ua afaina le tele o punavai o le lagolagosua a o latou galulue e ala i le faagasologa o le faamalologa. E mafai e epikopo ma isi taitai o le Ekalesia ona feutagai ma le Tautua mo Aiga, i nofoaga o loo maua ai, e uiga i le auala sili e lagolago ai tagata ua aafia ma maua ai punaoa o loo maua.

Pe a fesoasoani i e ua afaina ia maua le lagolagosua, mafaufau i mea nei:

  • Ofo atu e fesoasoani i e ua afaina i le mauaina o se fesoasoani faapolofesa.

  • Aloese mai le tuuina o se faasologa o taimi i le umi e tatau ona fai ai fautuaga. Ia nofouta o le tele o le taimi i le fefautuaai e eseese, e fuafua i tulaga o le tagata.

(Na’o Epikopo)

  • Afai e tuuina atu le faatagaga, ia feutagai e le aunoa ma le fofo a le tagata na aafia.

  • Mafaufau e totogi le tau o fautuaga faapolofesa, e tusa lava po o le a le gafatia o le tagata na aafia e totogi (e mafai ona totogi e ala i punaoa o le taulaga anapogi).

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

Tusiga e Faatatau I Ai