Sauaina
E A Pe Afai O loo Ou Tauivi ma le Faatuatuaina [O Isi]?

“E A Pe Afai O loo Ou Tauivi ma le Faatuatuaina [O Isi]?” Fesoasoani mo Ē Ua Afaina (2018).

“E A Pe Afai O loo Ou Tauivi ma le Faatuatuaina [O Isi]?” Fesoasoani mo Ē Ua Afaina

E a pe afai o loo ou tauivi ma le faatuatuaina o isi?

Afai sa afaina oe i sauaga faatautala, atonu o le a e lagona faapea o le a lē mafai lava ona e toe faatuatuaina atoa se isi. Atonu o le a e fesiligia pe e toe mafai lava ona e faalagolago i se isi tagata, ia te oe lava, pe oo lava i le Atua e tausia ia saogalemu oe. O lagona o le faalataina mai sauaga e mafai ona faapitoa le faigata ona foia pe afai o le tagata solitulafono o se isi e latalata ia te oe, ma o nisi taimi e faigata atu pe afai o se isi sa e faalagolago i ai e puipuia oe.

O le ogaoga o nisi soligatulafono e mafai ona faamalamalama ai i le mafuaaga e ono umi ai se taimi o toe tau fausia le faatuatuaga ma toe tau fuatai lagona o le saogalemu i le uma ai o le sauaga. O le isi mea, o le natura leaga o lou sauaga e ono matuā taofia lava oe mai le mafai ona toe fausia le faatuatuaga ma se tagata solitulafono. Manatua o le faamagalo atu e le faapea e tatau ai ona e faatuatuaina o ia.

Fausia o le Faatuatuaga i Sootaga Fou ma Sootaga o loo I Ai.

O sootaga lelei, fou ma o loo i ai, e fausia i luga o le faatuatuaga. E mafai ona e filifili e faatuatuaina isi pe a latou naunau e faia mea e fausia pe toefausia ai le faatuatuaga ma oe. O le aoao e faatuatuaina isi e manaomia ai le taimi ma le faafailelega faifaipea.

O le fausia o le faatuatuaga e faapei o se teugatupe i se faletupe e faateleina pe faaitiita e fuafua i teugatupe po o talagātupe e faia. A o e fausia se teugatupe o le faatuatuaina o se tasi, manatua ia aoaoga faavae ia:

  1. O oe o le pule o lau teugatupe—e te filifili po o ai o le a mauaina lou faatuatuaga.

  2. Fausia le faatuatuaga i lou lava taimi—e lē tatau ona e lagona ua faamalosia oe e faatuatuaina se isi ae e te le i saunia.

  3. Fuafua po o a amioga o teugatupe (e pei o le faaaloalo ma le faamaoni) ma talagātupe (e pei o le lē faamaoni ma le faimealilo po o le ufiufi o mea sese).

  4. Faamanino atu i isi po o a amioga e faaopoopo pe toese mai i lou faatuatuaga.

  5. Ia e talitonu i le sa’o o lou oe lava maitauina o amoiga a isi.

  6. Fetuutuunai le vavalalata o au sootaga ma isi e fuafua i le tulaga o le faatuatuaga ua fausia.

Afai e te filifili e fausia le faatuatuaga ma se tasi, fuafua tuaoi e manaomia e tausisia ai lou saogalemu. O nisi tagata e ono filifili e lē faia la latou vaega e fausia ai le faatuatuaga ma e lē tatau ona e faatuatuaina. Sa fautuaina i tatou e le Alii ina ia “atamamai pei o gata a ia fifilemu e pei o lupe” (Mataio 10:16).

A o lē mafai ona faatuatuaina isi, e mafai lava ona e faatuatuaina i taimi uma o le Alii o le a alofa ia te oe ma fesaosoani ia te oe e te faamaloloina. Afai e te saili mo le fesoasoani a le Atua, o le a e iloa ai le “tele o lona alofa mutimutivale agamalu” (1 Nifae 8:8) o faamaoniga ia e mafai ona e faatuatuaina o Ia. “O Lona alofa mutimutivale o se faamalologa sili lea, e oo lava i se tagata le sala sa faamanualia” (Boyd K. Packer, “O le Mafuaaga mo lo Tatou Faamoemoe,” Ensign po o le Liahona, Nov. 2014, 7).

Afai o lo o e tauivi lava i lou gafaia e fausia le faatuatuaga, saili le fesoasoani mai i se tagata matua ma faatuatuaina, e pei o se matua, tagata o le aiga, uo, ta’ita’i o le Ekalesia, faiaoga, po o se faufautua. E mafai foi ona e sailia le fesoasoani mai se faufautua tomai faapitoa e toe fausia le faatuatuaga ia te oe lava ma isi.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.)

Tusiga e Faatatau I Ai

Lolomi