E mafai ona ou faatuatuaina a’u po o la’u lava faamasinoga?

Ioe, e mafai ona e aoao e faatuatuaina oe lava. O se tulaga masani lava i ē ua afaina i sauaga faatautala le aveesea o le faatuatuaina o a latou lava faamasinoga ma le lē talitonu pe a faia ni filifiliga. E mafai ona e maua le talitonu e te manaomia e te faatuatuaina ai oe lava. Sa saunoa Elder Dieter F. Uchtdorf, “O loo i ai se vaifofo i le matuā leai o ni lagona o le faamoemoe ma le lotovaivai e te ono lagonaina. O lenei faamoemoe o loo maua i le mana liua o le talalelei a Iesu Keriso ma i le mana togiola o le Faaola e faamalolo ai i tatou mai i o tatou ma’i o le agaga” (“Talitonu, Alofa, Fai,” Ensign po o le Liahona, Nov. 2018, 47).

O le mafuaaga e ono faigata ai ona faatuatuaina lau faiga filifiliga

O tagata solitulafono e masani ona faia pe tautatala i mea e lē moni pe e lē talafeagai e faamanu’alia ai ē ua afaina ma faia ai e i latou mea e mananao ai latou. E ta’ua lenei mea o le faitogafiti po o le teuteuga. A o taumafai le tagata solitulafono e maua lou faatuatuaga, atonu lava sa e talitonu pe faatuatuaina o ia. Atonu e te toe tepa i tua ma talitonu semanu e mafai lava ona e taofia le sauaga ma puipuia oe lava, lea e mafai ona faateteleina ai lagona o le lē talitonu ia te oe lava. Atonu o le mea lea sa tata’iina oe ia masalosalo i au oe lava faamasinoga ma lou gafatia e fai ai au filifiliga.

Atonu e te lē faatuatuaina lou gafatia e faia filifiliga e faatatau i galuega faigofie o aso uma. O lenei lē faatuatuaina e mafai ona faalautele atu i filifiliga tetele atu e pei o filifiliga e faatatau i sootaga po o galuega. O lenei mea e mafai ona faavaivai ai, ma atonu e te lagona ai le leai o se faamoemoe e uiga i sou gafatia e toe faatuatuaina oe lava ia.

Toe Fausiaina o le Talitonu Ia Te Oe Lava Ia

E mafai ona amata ona e fausia le faatuatuaina ia te oe lava e ala i le faia o la’a laiti ma faigofie. I totonu o tusitusiga paia tatou te faitau: “O mea laiti ma faatauvaa e faataunuu ai mea tetele” (Alema 37:6).

E mafai ona amata ona e toe maua lou gafatia e faatuatuaina ai oe lava e ala i le faia o filifiliga faigofie. Mo se faataitaiga, vaai i le filifiliina o se mea e oka i se faleaiga. E mafai ona e faia lena filifiliga ma faatuatuaina o se filifiliga talafeagai. Tu i lau filifiliga ma faamanatu ia te oe lava e leai se tali sa’o pe sese, e tusa lava pe lē taunuu e pei ona e faamoemoe i ai.

Faailoa au taumafaiga i le faia o filifiliga ma le mafai ona tali atu. A o e atinaeina le gafatia e faia filifiliga laiti, o le a mafai foi ona e faia filifiliga ‘anoa atu. Maitau Ou Lagona. A o e faia o lea, o le a sili atu lou to’a.

Atonu e te manao e mafaufau i au filifiliga ma taunuuga e ono maua. O le maua o le lagolago a se uo faatuatuaina e mafai ona fesoasoani ia te oe i lenei faagasologa. E mafai ona fesoasoani o ia ia te oe e fuafua po o le fea filifiliga e matuā lē afaina lava ma lē fea e sili atu le taua. E mafai foi e se uo ona aumaia le faamaoniga e lelei le faia o se filifiliga e te manao e faia ma e mafai ona e faatuatuaina oe lava ia.

A o e fausia le faatuatuaga ia te oe lava, e mafai ona e aoaoina mea ia:

• E mafai ona e faatuatuaina ou lagona.

• E mafai ona e maua au oe lava faaaliga ma musumusuga.

• E mafai ona sao ma moni au faamatalaga.

• E taua ou manatu ma talitonuga.

• E lē sili atu le taua o manatu ma lagona o isi nai lo oe.

O le mauaina o le talitonu ia te oe lava e mafai ona alu ai se taimi. O se mea masani. Na aoao mai Elder Jeffrey R. Holland, “Ia atoatoa ona lelei o la outou amio—i le iuga” (“Ia Atoatoa Ona Lelei o La Outou Amio—I Le Iuga,” Ensign po o le Liahona, Nov. 2017, 40–42). O le alofa o le Faaola o lona uiga e tusa lava pe a tatou faia mea sese, e mafai ona tatou aoao mai ai ma faaauau le galuega o le fausiaina o le talitonu ma le faatuatuaina.

E faaopoopo i ai, ua faamanuiaina i tatou i le fesoasoani a le Agaga Paia, lea e fesoasoani ia i tatou e iloa le eseesega i le va o le sa’o ma le sese. “I le avea ma tagata o le Ekalesia, atonu tatou te maua le mafutaga faifaipea a le Agaga Paia. … E aumaia e le Agaga Paia faaaliga faaletagata lava ia e fesoasoani ia i tatou e faia filifiliga autu o le olaga” (Robert D. Hales, “O Le Agaga Paia,” Ensign po o le Liahona, Me 2016, 105). E finagalo Tamā Faalelagi ma le Faaola e faaaoga le meaalofa o le Agaga Paia i o tatou olaga. O le fausiaina ma le faamalosia o le faatuatuaga ia Tamā Faalelagi ma Iesu Keriso e mafai ona faateleina ai lo tatou talitonu e saili le uunaiga a le Agaga Paia.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

• “Atiina Ae o Faamasinoga Lelei ae Le o le Faamasinoina o Isi,” Gregory A. Schwitzer, Ensign po o le Liahona, Me 2010

• “Vaai Atu ia te Ia i Manatu Uma,” Joy D. Jones (Faigalotu a le Iunivesite o Polika Iaga, 21 Auk. , 2018)