E mafai ona faamaloloina a’u mai lenei mea?

O le faamalologa e mafai. E mafai ona faamaloloina oe mai soo se ituaiga o sauaga faatasi ma le fesoasoani a le Faaola e ala i Lana Togiola.

Pe a faamanu’alia oe, o le manatu faapea o le tiga e te tauaveina e mafai ona suitulaga i le filemu atonu e toetoe lava a lē mafai ona talitonuina. O ou manu’a atonu o le a lē iloaina ma lē amanaiaina mo tausaga e tele. Atonu o le a le iloa e isi e uiga i ou tiga auā e te nanāina le tiga e ala i lou ataata ma lou ola ai e pei e leai se mea o faaletonu.

A o faafalepuipuiina le Perofeta o Iosefa Samita i le Falepuipui i Liperate, sa ia tusi ai se tusi i le Ekalesia, e aofia ai le “tiute o le Au Paia e faatatau i e faasaua mai ia te i latou” (tagai i le Mataupu Faavae ma Feagaiga 123, ulutala o le vaega). I le tusi, na te lei ta’ua i le Au Paia o e sa mafatia i sauaga ma manua faaletino e tausia o latou tiga ia i latou lava ma faafoliga e pei e leai se mea na tupu. Nai lo lena, sa ia faatonuina i latou e ao mai tala o o latou mafatiaga ma tuuina atu i pulega.

E faapena foi, e le manaomia ona e lafi ma faafoliga faapei e leai se mea na tupu. Atonu e te lagona le leai o sou aogā, vaivai, lē mautonu, tuua nao oe, pe vavaeesea. O le a lava le mea e te manatu i ai pe lagonaina, ia e iloa e faavavau lou taua ma e alofaina oe (tagai i le Mataupu Faavae ma Feagaiga 18:10).

O Le Faagasologa o le Faamalologa

O le faamalologa o le a fesoasoani e faaitiitia lou tiga. O se faagasologa e alu le taimi o fai, ae e mafai lava faatasi ai ma le fesoasoani a le Faaola o Iesu Keriso ona o Lana taulaga togiola mo i tatou.

O le faagasologa o le faamalologa e aofia ai laasaga nei:

O le faailoaina ma le faavauvau i le toesea
Faasoa atu lau avega i isi
O le iloa o le aafiaga o sauaga i lou olaga ma le sailia o faufautuaga mai tomai faapitoa pe a manaomia
Malamalama o lou aafiaga i sauaga e le faamatalaina oe
O le faatuatua i le malosi o le Atua e faamalolo ai

Fesili ia te oe lava fesili ia a o e galue ai i lenei faagasologa:

Ua faapefea ona aafia lo’u olaga i le sauaga?
O fea o ou i ai i le faagasologa o le faamalologa?
O le a se mea e mafai ona fesoasoani ia te a’u e agai i luma?

Mafaufau e faatusatusa le faagasologa o le faamalologa faalelagona i le tausia ma le taulimaina o se manu’a faaletino. Pe a faapea na gau lou vae, ao e laitiiti. Nai lo le alu i le fomai e togafiti ai, e te tauetuetu solo seia oo ina alu ese le tiga loloto, ae o loo i ai pea sina tiga i laa taitasi e te faia. I tausaga mulimuli ane ua e manao ia alu ese le tiga, ona e alu lea i se fomai. E tatau ona toe seti ai e le fomai le ponaivi, faamama ese soo se afuaga lea ua faatupulaia, faasimā, ma auina atu oe e fai ni togafitiga faamalositino e faamalosia ai lou vae.

A o saili le faamalologa mai sauaga, e tatau ona muamua lava e iloa e moni lava le tiga ma e i ai se mea e mafai ona fai i ai. E aofia ai ii le faailoaina o le mea na tupu ma le faatagaina o lagona o le tiga, fefe, ma le faanoanoa ia faamaonia. E masani lava e aoga le galulue faatasi ma se faufautua tomai faapitoa i lenei faagasologa o le faamalologa. (Siaki i lou epikopo ina ia iloa ai po o a punaoa o loo maua a le Tautua mo Aiga i la outou eria.)

A o e galue i le faamalologa, e ono tumau pea lou manatuaina o le sauaga; ae peitai, o le malosi o lagona ma taunuuga leaga o nei aafiaga i lou olaga o le a faaitiitia ma atonu e iu lava ina toetoe lava a leai atu.

Pe na e mauaina se fesoasoani faapolofesa pe leai, o le a fesoasoani le tatalo, suesue i le soifuaga o le Faaola ma Lana Togiola, maua le lagolago mai isi, ma saili le fesoasoani faaleagaga mai se taitai o le Ekalesia (tagai i le “O fea e mafai ona ou liliu i ai mo se lagolago?”). E mafai ona fesoasoani taitai o le Ekalesia ia faamāmā lau avega, ma mafai e i latou ona maua musumusuga e fesoasoani ia te oe e malamalama i lou taua paia ma le sootaga ma lou Tamā i le Lagi ma le Faaola.

Sa folafola atu Elder Richard G. Scott o le Korama a Aposetolo e Toasefululua: “Ou te matuā tautino atu pe a e mafatia i ni amioga sauā, tau faasese, po o le mataifale o se tasi e le tusa ai ma lou loto, e le pa’ū ia te oe le leaga ma e le tatau ona ia te oe se lagona tausalaina. Atonu o le a tuu oe ua e mailaila i le saunoa o lena tagata, peitai o na mailaila o le a le tumau. …

“Ia e malamalama, o lena faamalologa e mafai ona umi se taimi e alu ai. O le faamaloloina e o’o mai i laasaga taitasi. A e faavavevaveina pe a faaali atu le lotofaafetai i le Alii mo tulaga taitasi o le faaleleia” (“Faamaloloina o Mailaila Matuiā o le Saunoa,” Liahona, Iulai 1992, 32).

Ofoina Atu O Le Faamagaloga

A o e galue ai i laasaga o le faamalologa, e mafai e oe, faatasi ai ma le fesoasoani a le Faaola, ona atinae le gafatia e faamagalo ai i latou ua faamanu’alia oe.

O se vaega o le faamalologa o le alu lea i se nofoaga e mafai ai ona e faamatuu ese atu lagona faapea o le tagata solitulafono e tatau ona tali atu mo ana mea sa fai. Pe molia ia tali atu se tagata e pulega faalemalo pe leai, o tagata solitulafono uma lava o le a tulai i se aso i luma o le Atua (Mataupu Faavae ma Feagaiga 137:9).

E tusa lava po o afea pe faapefea ona molia le tagata solitulafono, e mafai ona e mautinoa a i ai se tasi e faaaoga ai le pule po o le puleaga po o le faamalosi i luga o agaga o le fanauga a tagata, i soo se tikeri o le amioletonu, faauta, e aveese e le lagi i latou lava; e faanoanoa le Agaga o le Alii” (Mataupu Faavae ma Feagaiga 121:37; faaopoopo faatusilima). Tagai i le “Faamata e mafai ona faamagalo atu?” mo nisi fesoasoaniga.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

“Healing from Sexual Abuse,” Chieko N. Okazaki, BYU devotional, Oke. 23, 2002 (PDF) (video)
“Ia Saoloto Mai Avega Mamafa,” Richard G. Scott, Ensign po o le Liahona, Nov. 2002
“O se Alalaupapa i le Faamoemoe ma le Faamalologa,” Nanon Talley, Liahona, Ape. 2017
“Faamaloloina o Mailaila Matuiā o le Saunoa,” Richard G. Scott, Liahona, Iulai 1992
“O Le Togiola e Aofia ai Tiga Uma,,” Kent F. Richards, Ensign po o le Liahona, Me 2011, 15–17
“O le Fomai Sili,” Carole M. Stephens, Ensign po o le Liahona, Nov. 2016
Overcoming Trauma, Elizabeth Smart, The Daily Goalcast