Faamata e Mafai ona Faamagalo Atu?

O le faamagalo atu e faato’ā mafai lava e ala i le mana o le Faaola o Iesu Keriso. Afai sa afaina oe i sauaga faatautala, atonu o le a e lagona faapea o le faamagalo atu o se galuega e matuā foliga faigata ona fai. O manatu ma lagona lē lelei e oo mai i le tiga o le faatautalaina/sauaina e mafai ona matuā malosi mai. Atonu o le a e lagona o le a lē mafai lava ona e saoloto mai ia i latou. Atonu o le a e lagona foi ua faamalosia oe e tau lava ina “faamagalo ma faagalo” e uiga i le sauaga faatautala ma lagona le ta’usalaina ona o loo faigata ia oe ona faamagalo atu.

E tele laasaga o le manu’aga faaletino, faalelagona, faalemafaufau, ma le faaleagaga o taunuuga mai sauaga faatautala, ma e leai se isi e mafai ona fuaina le tulaga o lou tiga vagana ai lava oe. O manua uma lava e alu le taimi o faamalolo, ma o manua loloto atu e manaomia se taimi e sili atu, e pei lava o se lima ua gau e umi atu se taimi e faamalolo ai nai lo se lavea i se pepa. O le loloto lava o le manu’a—pe faaletino, faalelagona, faalemafaufau, pe faaleagaga—o le umi foi lena e ono manaomia e faamalolo ai.

O le Faamagalo Atu e Ono Umi seTaimi

A o e galue ai i laasaga o le faamalologa, e mafai, faatasi ma le fesoasoani a le Alii, ona amata ona e faamagalo atu i latou sa faamanu’alia oe. Atonu o le a lē mafai ona e faamagalo atu vave. O lenei mafai ona faamagalo atu e sau mai le mana o lo tatou Faaola o Iesu Keriso, o lē, e ala i le Togiola, sa tauave ai i Ona lava luga ma lagona le tiga uma lava o loo e lagonaina i le taimi nei (Alema 7:11–12). E mafai ona faasaolotoina oe mai le uunaiga a lenei tiga i luga ia te oe. E alofa le Alii ia te oe tusa lava poo le a le loloto o le tiga pe o le a foi le umi e faamalolo ai.

E pei ona saunoa mai Peresitene James E. Faust: “‘O le faamagalo atu e le vave i taimi uma. … “O le toatele o i tatou e manaomia se taimi e taulima ai le feagai ma le tiga ma le maliu. E tele mafuaaga e mafai ona tatou maua e tolopo ai le faamagalo atu. O se tasi o nei mafuaaga o le faatalitali mo le tagata na sese ia salamo muamua ae tatou te lei faamagalo atu i ai. Ae o lena faatuatuai e afua ai ona tatou le maua le filemu ma le fiafia e mafai ona avea mo tatou” (“O Le Mana Faamalolo o le Faamagaloga,” Ensign po o le Liahona, Me 2007, 68).

O le Mea e Aumaia e Le Faamagaloga

O le faamagalo atu e fesoasoani ia i tatou e toe ola ma le filemu ma le olioli.

Sa sii mai e Peresitene Faust upu a Dr. Sidney Simon: “O le faamagalo atu o le faasaolotoina lea ma faaaoga tatau le malosi lea e alu i le teulotoina o le ita, faaputuputuina o le faatautee, ma le teufatu pea o manua e lei pepe. O le toe mauaina lea o lo tatou malosi sa masani ai ma toe tapue mai gafatia e leai se tuaoi ia malamalama ai ma talia isi tagata ma i tatou lava” (i le “O Le Mana Faamalolo o le Faamagaloga,” 68).

O le faamagalo atu e le faapea o le faagaloina sa tupu le sesē pe o le faafoliga foi faapea e le i tupu lava. E le faapea o le a e faatagaina le sauaga faatautala e faaauau pea. E le faapea e mafai ona faamaloloina sootaga uma lava. Ma e le faapea o le tagata agasala o le a le faamasinoina i ana mea sa fai. O lona uiga e mafai ona fesoasoani le Faaola ia te oe e faamatuuese atu.

Sa aoao mai e Elder Jeffrey R. Holland o le Korama a Aposetolo e Toasefululua foliga o le faamagaloga o agasala loloto. Sa ia faapea mai, “E taua mo soo se tasi o outou o loo ola i le tiga moni e matau mea sa le’i fetalai ai [le Faaola]. Sa le’i fetalai mai o Ia, ‘E le faatagaina outou e lagonaina le tiga moni po o faanoanoaga moni mai aafiaga matuitui na e oo i ai ona o le isi tagata.’ Pe na Ia fetalai foi, ‘Ina ia mafai ona faamagalo atu atoatoa, e ao ona e toe faia se sootaga faatiga pe toefoi atu i se tulaga faasaua ma faataumaoi.’ Ae e ui i ni faatiga sili ona matuitui e ono oo mai ia i tatou, e mafai lava ona tatou tutulai ae i o tatou tiga pe afai tatou te savavali i luga o le ala i le faamalologa moni. O lena ala o le ala o le faamagaloga sa savalia e Iesu o Nasareta, lea o loo valaau mai ia i tatou taitoatasi, ‘Sau, Mulimuli Mai Ia Te A’u’” (“O Le Galuega o le Faaleleiga,” Ensign po o le Liahona, Nov. 2018).

Faamagaloina o Oe Lava

Atonu e te mafaufau e tatau ona e faamagaloina oe lava ona o le sauaga faatautala. Faamolemole ia manatua e le tuuaia oe mo amioga a isi (tagai “Ae faapefea pe afai ou te mafaufau o le faatautalaina/sauaina o a’u le pogai?”).

Atonu o loo e tauivi foi e faamagalo oe lava mo filifiliga leaga atonu sa e faia e taulimaina ai le tiga o le faatautalaina/sauaina. E taua le aoao i auala e agaalofa ai ia te oe lava. Ua fetalai mai le Alii faapea Na te “faatatau o ona alofa mutimutivale e tusa ma tulaga o le fanauga a tagata” (Mataupu Faavae ma Feagaiga 46:15). Na te silafia mea e te manaomia ma le auala Na te mafai ona fesoasoani ai ia te oe.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

“Faith to Forgive Grievous Harms: Accepting the Atonement as Restitution,” James R. Rasband (Brigham Young University devotional, Oke. 23, 2012)
“O Le Togiola ma le Malaga i le Olaga Faitino,” David A. Bednar, Ensign po o le Liahona, Ape. 2012
“O Le Galuega o le Faaleleiga,” Jeffrey R. Holland, Ensign po o le Liahona, Nov. 2018
“Forgiveness,” Steve Gilliland, Ensign, Auk. 2004
“Forgiving Others: Misconceptions and Tips,” Elizabeth Lloyd Lund, Ensign, Apr. 2018
“Friends Again at Last: Justice and Mercy in the Warming Glow of Charity,” Lance B. Wickman, Ensign, Iuni 2000
“Perfection Pending,” Russell M. Nelson, Ensign, Nov. 1995
“Forgiveness – Letting go of grudges and bitterness,” Mayo Clinic