Sauaina
E Mafai Ona Ou Fausia Sootaga Saogalemu ma Lelei?

“E Mafai Ona Ou Fausia Sootaga Saogalemu ma Lelei?” Fesoasoani mo Ē Ua Afaina (2018).

“E Mafai Ona Ou Fausia Sootaga Saogalemu ma Lelei?” Fesoasoani mo Ē Ua Afaina

E mafai ona ou fausia sootaga saogalemu ma lelei?

E mafai ona e fausia sootaga lelei ma saogalemu, e ui lava atonu e te lē lagona e ono mafai ona o sauaga ua e mafatia ai. Faatasi ai ma le taimi ma le taumafaiga, e mafai ona e mauaina le faaatoatoaina ma le olioli i au sootaga ma isi.

Fausiaina o Sootaga Lelei

O le fausiaina o sootaga e pei lava o le totoina ma le faaolaina o fatu laau. Sa aoao mai e Peresitene Spencer W. Kimball faapea o se sootaga “e pei o se fugalaau, ma, e pei o le tino, e manaomia le fafagaina pea lava pea” (“Marriage and Divorce” [Brigham Young University devotional, Set. 7, 1976], 6, speeches.byu.edu). O le tuulafoaiina ma le le faia lelei o se sootaga e mafua ai ona mamae ma ono oo ai ina pe, e pei lava o le auala e pe ai se laau i le lē lava ona faafaileleina ma tausia. O itu uma e lua i se sootaga e manaomia ona tuuina atu le taumafaiga faifaipea e fausia ai se fesootaiga saogalemu ma ‘anoa. O sootaga uma lava e manaomia le taumafaiga e fausia, tausia, pe toe faaleleia ai lena fesootaiga.

O sootaga lelei e aofia ai uiga e pei o ia:

  • Fefaaaloaloa’i mo le saolotoga ma le tutoatasi o le isi

  • Faamaoni

  • Faatuatuaina

  • Fetuunai ina ia fetaui ma manaoga o le isi

  • Fesootaiga saoloto o manatu ma lagona

  • Faamamaluina o eseesega ma malosiaga

  • Lagolago tutusa

  • Tiutetauave ma le tali atu

  • Tuaoi manino, ma mautū

  • Faaaloalo mo tuaoi o le isi

Atonu o le mea aupito taua e mafai ona e faia e mafai ai ona fausia sootaga ma isi o le faamalosia lea o au feagaiga ma oe lava faapea ma le Atua. Amata e ala i le aoaoina o le vaai ia te oe lava e pei ona silasila mai le Atua ia te oe—o loo i ai se gafatia maoae e faavavau.

Sa aoao mai Peresitene Dieter F. Uchtdorf: “faaalu sina taimi faaopoopo itiiti e te faamasani lelei ai ia te oe lava. … Aoao e vaai ia te oe lava e pei ona silasila le Tama Faalelagi ia te oe—o Lona afafine po o le atalii faapelepele ua i ai ni gafatia faalelagi” (“E Uiga i Mea e Sili Ona Taua,” Ensign po o le Liahona, Nov. 2010, 22).

I le āluga o taimi ma le fesoasoani mai isi, e mafai ona amata ona ese lau vaai ia te oe lava ma taulimaina oe lava ma le onosai, agalelei, faaaloalo, ma le faamagalo atu. E mafai ona e aoao e suia ou talitonuga ma lagona lē lelei. Afai o e tauivi i au taumafaiga, atonu e te manao e faaaoga fautuaga a faufautua e i ai tomai faapitoa. Atonu foi e tatau ona e faavaeina pe toefaavaeina se faiga lagolagosua.

A o e faamalosia lau sootaga ma oe lava ia ma le Atua, o le a e aoao ai i auala e mafai ai ona faaaoga mataupu faavae lava ia i le faavaeina o ni sootaga lelei ma isi. O le faia o ni taumafaiga e foafoa ai ni sootaga faaatoatoaina, faafaileleina, ma tutusa o le a aumaia ia te oe le olioli.

Punaoa a Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

Tusiga e Faatatau I Ai