Fesoasoani mo Ē Ua Afaina

O le sauaina/faatautala o le tuulafoaiina po o le lē faia lelei lea o isi i se auala e mafua ai le faamanu’alia faaletino, faalelagona, po o le faalefeusuaiga. E feteenai ma aoaoga a le Faaola. E ta’usalaina e le Alii amioga sauā faatautala o soo se ituaiga.

“O le tulaga o le Ekalesia e le mafai ona taliaina le faatautalaina/sauaina i soo se ituaiga” (Tusitaulima 1: Peresitene o Siteki ma Epikopo [2010], 17.3.2). O sauaga faatautala e solia tulafono a le Atua ma faapea foi ona avea o se solitulafono o tulafono a tagata. E finagalo le Alii ia tatou mataala i le puipuia mai le sauaina/faatautala ma puipui ma fesoasoani ia i latou ua afaina i sauaga faatautala. E leai se tasi e faamoemoeina e onosaia amioga sauā faatautala.

Afai o loo sauaina/faatautala oe pe sa faatautalaina/sauaina i le taimi ua tuanai, e le tatau ona e feagai ma lenei mea na o oe. Atonu o le a e lagona le lē mautonu, leai se malosi, tuua toatasi, maasiasi, pe e pei ua aveesea lou tāua. “Ia manatua e tāua tele le aogā o [lou agaga] i le silafaga a le Atua” (Mataupu Faavae ma Feagaiga 18:10), ma ua “tutusa le pele [o oe] i lana silafaga e pei o [soo se] isi” (Iakopo 2:21). E mafai e uo, aiga, taitai o le Ekalesia, ma isi ona faafesootaia oe i punaoa o le a fesoasoani ia te oe e lagona le saogalemu ina ia mafai ai ona faamaloloina oe ma manatua lou tāua. Ua alofagia oe, ma e mafai ona e maua le faamoemoe ma le faamaloloina e ala i le Faaola o Iesu Keriso ona o Lana taulaga togiola.

O nei anotusi sa foafoaina e fesoasoani ia i latou o ē sa afaina i sauaga faatautala ma ia fesoasoani i taitai ma isi e auauna atu i tagata taitotatasi ma o latou aiga ua aafia i sauaga faatautala. E tele lava ituaiga o upu eseese ua faaaogaina e faamatala ai tagata o ē ua aafia i sauaga faatautala. Mo lenei saite, o le upu lē ua afaina ua faaaogaina e faamatala ai soo se tagata ua aafia po o loo aafia i sauaga faatautala.

O lenei faamatalaga e maua ai le taitaiga ma punaoa e:

Fesoasoani i ē ua afaina i sauaga faatautala e maua le faamoemoe, fesoasoani, ma le faamaloloina.
Fesoasoani i tagata o aiga, uo, ma isi e iloa atu le sauaina/faatautala ma iloa le mea e faia e maua ai le fesoasoani mo ē ua faatautalaina/sauaina.
Fesoasoani i matua e talanoa ia latou fanau e uiga i le faatautalaina/sauaina.

O punaoa ma faamatalaga faafautuaga mo sui o aufono a uarota e uiga i le autu o le faatautalaina/sauaina e mafai ona maua i le CounselingResources.org.

E tatau ona mafaufau taitai i auala e faamautinoa ai o loo iloa e tagata o le Ekalesia ia nei punaoa. Ua faamalosiauina tagata o le Ekalesia ma taitai ia aoao ia iloa ma faaaoga punaoa faalelotoifale ua faatuatuaina mo fesoasoaniga i faalavelave faapea foi ma le lagolago faaumiumi.