Sauaina
Pe O Ou Taua Pea?

“Pe O Ou Taua Pea?” Fesoasoani mo Ē Ua Afaina (2018).

“Pe O Ou Taua Pea?” Fesoasoani mo Ē Ua Afaina

Pe o ou taua pea?

Ioe, o oe e ese lou taua (tagai i le Mataupu ma Faavae Feagaiga 18:10). Ua ia te oe se taua e lē i’u ma faavavau o se atalii/afafine o le Atua, ma e lē mafai e le sauaga ona faaitiitia pe aveesea lou taua i Lana silafaga.

Afai sa afaina oe i sauaga faatautala, atonu o le a e lagona le lē agavaa mo le manatu ma le alofa mai i isi, e aofia ai ma Tamā Faalelagi. Atonu e te manatu foi o le sauaga ua mafua ai ona aveesea lou agavaa e maua faamanuiaga o le talalelei. Ae peitai, o lou taua e le fuafuaina i soo se mea e tupu ia te oe.

Sa faamalamalama mai e Sister Joy D. Jones, le Peresitene Aoao o le Peraimeri, “o le taua faaleagaga o lona uiga o le faatauaina o i tatou lava i le auala o loo faatauaina ai i tatou e le Tama Faalelagi, ae le o le auala e faataua ai e le lalolagi i tatou. Sa fuafuaina lava lo tatou taua ae tatou te lei o mai i lenei lalolagi” (“O Lre Taua Le Mafuatiaina,” Ensign po o le Liahona, Nov. 2017, 14).

O sauaga e mafai ona faatupuina le lē mautonu i lou loto ma lou mafaufau, ma tupu ai lou fesiligia o lou taua po o lou agavaa. Ae peitai, o le sauaga e lē faaitiitia pe aveesea ai lou taua aua e lē mafai lava ona suia lou taua.

Malamalamaaga i Ou Mafaufauga ma Lagona

Atonu e i ai ia te oe nisi o manatu ma lagona nei:

  • Ou te lē agavaa.

  • Sa ono mafai ona ou taofia lenei mea.

  • Ua ou nofosala.

  • E le o toe alofa mai le Atua ia te a’u.

  • O le a leai lava se isi e alofa ia te au.

  • Ua faaleagaina a’u ma lē mafai ona toe faaleleia.

  • E aogā le Togiola a le Faaola i isi, ae le o a’u.

  • E manaomia ona ou atoatoa.

O nei lagona e taatele, ae o ni pepelo ia e aumai e le fili. O le alofa o Tamā Faalelagi ma le Faaola mo oe e lē mafai lava ona faaitiitia. E te agavaa mo le alofa. Mafaufau i upu a le Aposetolo o Paulo:

“Aua ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali,

“Po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii” (Roma 8:38–39).

O le iloa o le punavai o upumoni uma, o lo tatou Tamā i le Lagi, e mafai ona fesoasoani ia te oe e aveesea ou mata’u ma mafaufauga leaga.

E fesoasoani tusitusiga paia ia i tatou e malamalama i auala e tatou te iloa ai musumusuga ma taitaiga mai lo tatou Tamā Faalelagi: “O le mea lea, o mea uma ua lelei e mai le Atua; ma o le mea ua leaga e mai le tiapolo; ona o le tiapolo o se fili i le Atua” (Moronae 7:12).

Atonu e te manaomia le fesoasoani mai isi e galue ai i ou mafaufauga ma lagona lē lelei. O le vave lava e te maua ai le fesoasoani, o le faigofie foi lena ona atinae le malosi e pulea ai nei talitonuga lē sa’o. E lē mafai lava ona faapea ua tuai tele ona maua le fesoasoani ma le lagolago e te manaomia e galue ai e aveesea nei talitonuga.

Malamalamaaga i Lou Agavaa

O lou agavaa e le fuafuaina i soo se mea e tupu ia te oe, ma e le manaomia ona e salamo mo se mea sa faia e se tasi ia te oe.

Mo i latou o e sa faatautalaina/sauaina faalefeusuaiga, atonu tou te lagona ua outou le mamā faaleola mamā pe ua outou solia le tulafono o le lēgavia. “O tagata ua aafia fua i feusuaiga faatautala e le tausalaina i le agasala. … Afai na e aafia fua i se faiga faatautala, ia e iloa e taumamaina oe ma e alofa le Atua ia te oe” (Mo le Malosi o le Autalavou [tamaitusi, 2011], 36). O lou mamā e le mafai ona aveesea mai ia te oe e ala i amioga a isi.

O Lou Taua E Lē Mafai Ona Faaitiitia

Mai upumoni sili ona taua e mafai ona tatou iloa ma malamalama i ai i lenei olaga e aofia ai o ai lo tatou Tamā Faalelagi; o ai Lona Ao, o Iesu Keriso; o ai i tatou i le avea ma fanau a le Atua; ma o le a la tatou sootaga i le Tamā ma le Alo (tagai i le Ioane 15:1–5; Roma 8:16–17; Mataupu Faavae ma Feagaiga 50:41).

Sa folafola mai Elder D. Todd Christofferson, “O le alofa o le Atua e le mafuatia ma o le a tumau pea e faavavau” (“Tumau i Lo’u Alofa,” Ensign po o le Liahona, Nov. 2016, 48). E finagalo le Atua ia tatou lagona “ o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, [ma le] le gaoiā” (Kalatia 5:22–23). A o e malamalama e alofa Tamā Faalelagi ia te oe, o le a amata ona e malamalama ma talitonu i lou taua tele.

E leai se mea e mafai ona tupu i lenei olaga, e aofia ai ma amioga a isi, e i ai se malosiaga e faaitiitia lou taua.

Ua saunoa mai Peresitene Thomas S. Monson: “E alofa lou Tama Faalelagi ia te outou—outou taitoatasi. E le suia lava lena alofa. … Ua i ai lava iina. Ua i ai iina mo outou pe a outou faanoanoa pe fiafia, lotovaivai po o le tumu i le faamoemoe. Ua i ai le alofa o le Atua iina mo outou e tusa lava pe ua outou lagona pe leai e tatau le alofa mo outou. O loo i ai lava iina i taimi uma” (“Ua Le Tuua Lava Na o I Tatou,” Ensign po o le Liahona, Nov. 2013, 123–24).

Punaoa o le Ekalesia

Tusiga e Faatatau I Ai

Lolomi