Sauaina
Puipuia o Tagata ma Lipoti Atu ia Faatautalaga/Sauaga

“Puipuia o Tagata ma Lipoti Atu ia Faatautalaga/Sauaga,” Auala e Fesoasoani Atu Ai (2018).

“Puipuia o Tagata ma Lipoti Atu ia Faatautalaga/Sauaga,” Auala e Fesoasoani Atu Ai.

Puipuia o Tagata ma Lipoti Atu ia Faatautalaga/Sauaga

O le faatautala/sauaina o le tuulafoaiina po o le agaleagaina lea o isi (e aofia ai se tamaitiiti po o se toalua, tagata matutua, po o tagata e i ai manaoga faapitoa, po o se isi lava) i se auala e mafua ai se manu’a faaletino, faalelagona, pe faalefeusuaiga. O le tiutetauave muamua a le Ekalesia i tulaga o sauaga faatautala, o le fesoasoani atu ia i latou o e na faatautalaina/sauaina, ma puipuia i latou o e e ono mafai ona toe faatautalaina/sauaina foi i le lumanai. E tatau i taitai ma tagata o le Ekalesia ona popole, agaalofa, ma nofouta pe a galulue faatasi ma tagata na afaina ma o latou aiga.

I se tusi na tusia i le aso 26 o Mati, 2018, na uunaia ai e le Au Peresitene Sili ia taitai o le Ekalesia e aapa atu i le alofa e fesoasoani ia i latou o loo mafatia mai le faatautala/sauaina:

“O loo faaauau pea ona avea lenei faafitauli faavaomalo ma se popolega tele ia i tatou i le asō. O loo faatasi atu o matou loto ma tatalo ia i latou uma o e ua aafia i lenei faafitauli ogaoga.

“Ina ia fesoasoani e faamautinoa le saogalemu ma le puipuiga o tamaiti, autalavou, ma tagata matutua, matou te talosaga atu i taitai perisitua ma ausilali uma ina ia faamasani i aiaiga faavae ma taiala a le Ekalesia o i ai nei i le puipuia ma le tali atu i le faatautala/sauaina” (tusi a le Au Peresitene Sili, 26 Mat., 2018).

E tatau i taitai ma tagata o le Ekalesia ona faataunuuina matafaioi faaletulafono uma e lipoti atu ai sauaga i taitai o le malo. E le tatau i se taitai faaleEkalesia ona teena se lipoti o se sauaga/faatautala pe fautuaina se tagata ina ia lē lipotia se gaoioiga faalesolitulafono. E tatau i epikopo, peresitene o paranesi, ma peresitene o siteki ona valaau atu i le telefoni fesoasoani a taitai o le Ekalesia i le taimi vave mo le fesoasoani i taimi taitasi latou te iloa ai se sauaga e fesoasoani atu ai i tagata na aafia ma ausia mea e manaomia e lipotia. Alu i le counselingresources.lds.org mo le laina fesoasoani ma mo nisi faamatalaga.

E tatau foi i taitai ma tagata o le Ekalesia ona fesoasoani i tagata ua afaina, tagata solitulafono, ma o latou aiga e fesootai atu i faufautua faapolofesa po o nisi punaoa o nuu ma alalafaga, pe a talafeagai ai. Pe a galulue faatasi ma tagata na faia le solitulafono, e tatau ona fesoasoani atu taitai perisitua ia i latou ina ia salamo, talia taunuuga atoatoa o a latou amioga, ma taofi a latou amioga saua (tagai i le Isaia 1:18; Mosaea 26:29–32; Mataupu Faavae ma Feagaiga 64:7).

Mo taitai o le Ekalesia, faamolemole ia iloilo le vitio lenei i totonu o le aufono a le uarota po o le siteki:

12:10

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

Mo nisi faamatalaga e uiga i le auala e fesoasoani atu ai i e na aafia i le faatautala/sauaina, faamolemole saili ni faamatalaga mai punaoa nei: