O le a se mea e tatau ona ou faia pe afai ou te iloa pe masalomia o loo sauaina se tagata?

Afai e te iloa pe masalomia se tasi o loo sauaina, lipoti atu le sauaga i le puleaga faaletulafono. Ona fesoasoani lea i le tagata ina ia fesootai atu ma isi punaoa mo le saogalemu ma le faamalologa, e aofia ai se fesoasoani faafomai, taitai o le Ekalesia, ma faufautua faapolofesa.

O taiala mo le talanoa atu i se tagata na afaina i le sauaina

Ia loto popole, agaalofa, ma nofouta pe a talanoa i tagata ua afaina i le sauaina. Atonu latou te le o sauni e talanoa e uiga i le sauaina i le taimi lava lena. O taiala nei e sili ona aoga pe a talatalanoa ma se talavou po o se tagata matua o le na i ai se gafatia e faamatala ai o latou aafiaga. O tamaiti laiti ifo, po o i latou ua faaitiitia o latou gafatia faaletino pe faalemafaufau, atonu e manaomia se lagolago faaopoopo pe a talanoa e uiga i o latou aafiaga.

1. Faaalu le taimi e faalogologo atu ai.

   Atonu e alu ai se taimi mo se tagata ua afaina i le sauaina ona amata faamatalaina la latou tala. E taua le onosai ma faalogo. Toe faamautinoa atu lou alofa ma lou talitonuga i le tagata. Afai e mafai, o i se nofoaga saogalemu ma toafimalie lea e mafai ona e talanoa atu ai. Ia toafimalie ma faaalu se taimi e faalogo ai.

   Aua le atuatuvale pe soona tali atu i mea e tau mai e le tagata ia te oe. E mafai e lenei mea ona taofia le tagata mai le talanoa atu ia te oe.

2. Ia faaaia le faamaoni i le faamatalaga e faailoa mai.

   E seasea lava ona i ai se lipoti o le sauaina e sese. A o e faalogo, aua nei e aveesea pe taumafai e faaitiitia mea ua tau mai e le tagata ia te oe. Talu ai atonu o fefe le tagata e tau mai ia te oe le mea na tupu, ia loto malamalama ma lagolago atu ia i latou a o latou talanoa mai. Faaali le agaalofa. Faamautinoa atu ia i latou o le lototele na mafai ai ona latou tau mai ia te oe e uiga i le sauaga ma e te talitonu i mea sa latou tauina mai ia te oe.

   I le sauaina o tamaiti, atonu na faafefe e le tagata na faia le solitulafono le tamaitiiti i le faiatu ia i te ia o le a lamatia i latou faaletino pe oo ni mea leaga ia i latou pe afai latou te tauina i soo se tasi e uiga i le sauaga. Faamautinoa atu ia i latou lou alofa ma le naunau ia faasaogalemuina ma malupuipuia i latou.

3. Aua nei tuuaia le tagata pe faapea atu o le sauaga i se isi itu o i latou le mafuaaga.

   Manatua le tala ia Iosefa o lē na faatau atu i Aikupito. Na faia sana miti o le a avea o ia ma taitai a ona uso. Ina ua ia tau atu i ona uso e uiga i le miti, sa latou feitai ia te ia ma mulimuli ane lafoina o ia i le lua ma faatau atu o se pologa (tagai i le Kenese 37). E ui lava na tau atu e Iosefa i [ona] uso e uiga i le miti, sa le o sana mea sese lo latou taulimaina ai o ia e pei ona latou faia. E leai se mea sese na faia e Iosefa ma e le tuuaia o ia.

   Atonu e lagona e se tagata na afaina i le sauaina le tausalaina ma le tali atu ma faapea ai o i latou e tuuaia. Atonu latou te faapea sa tatau ona latou popoto atu pe malolosi atu e taofia pe puipuia le sauaina. A sauaina tamaiti, e tele lava ina faatosinaina pe faasese i latou. Faamautinoa atu i tagata na afaina o le sauaga e le o so latou sasi ma latou te lei faia se mea sese.

4. Saili le Fesoasoani.

   Saili vave le fesoasoani mai le pulega faaletulafono, auaunaga e puipuia tamaiti, auaunaga e puipuia tagata matutua, o se tagata e tu mo le tagata ua afaina, po o ni fomai faapolofesa. O nei auaunaga e mafai ona fesoasoani e puipuia le tagata na afaina ma taofia isi sauaga. Tagai i le itulau “O i Ai i se Faalavelave” mo nisi faamatalaga.

   E tatau i taitai ma tagata o le Ekalesia ona faataunuuina matafaioi faaletulafono uma e lipoti atu ai sauaga i taitai o le malo. O epikopo ma peresitene o siteki e tatau ona o i le counselingresources.org mo nisi faamatalaga.

5. Fesoasoani i le tagata ua aafia ia fesootai atu i punaoa.

   Atonu e manaomia e le na afaina le fesoasoani mai punaoa i fafo atu faapea ma nisi fesoasoani faapitoa, e aofia ai pulega faaletulafono, auaunaga faafomai, auaunaga faaletulafono, faufautua faapitoa, ma taitai o le Ekalesia. Atonu e te ofo atu tou te o faatasi ma i latou e asiasi i nei punaoa ma fausia ai se fuafuaga e fesoasoani ia i latou ina ia tumau saogalemu.

   E mafai foi e le epikopo ona saunia punaoa ma le lagolago e taulima ai le sauaga ma amata ai le faagasologa o le faamalologa.

   Afai o le na afaina o se tagata laitiiti, uunaia i latou e talanoa i o latou matua po o se tagata e vaaia e uiga i le sauaga, pe afai latou te lei faia. Afai o le matua lea na solitulafono, uunaia i latou e talanoa i le matua lea e le o solitulafono po o se isi tagata matua faatuatuaina e mafai ona fesoasoani atu.

Punaoa a le Ekalesia ma Nuu po o Alalafaga

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.)

• “Tips for Talking with Survivors of Sexual Assault,” Faamalosi teine po o tama, Sauaga & Mataifale Upegafesootai Faaleatunuu (RAINN)

• “If You Suspect a Child Is Being Harmed,” Faamalosi teine po o tama, Sauaga & Mataifale Upegafesootai Faaleatunuu (RAINN)

• When Someone You Know Is Being Abused: Safety and Well-Being Tipsheet SeriesNational Center on Domestic Violence, Trauma &Mental Health

• “How to Help a Friend Who Is Being Abused,” womenshealth.gov

• “Is Someone You Know Being Abused?” IRIS Domestic Violence Center

• “Domestic Violence and Abuse: Recognizing the signs of an abusive relationship and getting help,” HelpGuide.org

Tusiga e Faatatau I Ai

• O le a se mea e tatau ona ou faia pe afai na sauaina la’u tama?

• O a ni faailoga o iloa ai o loo sauaina se tagata?

• E mafai faapefea ona ou lagolagoina se tagata na sauaina?