Talanoa ma Tagata o le Au Paia e uiga i le Itupa

O nisi taimi e i ai fesili a tagata e faatatau i o latou lagona e uiga i le itupa. Atonu e i ai ni tagata o o latou aiga po o uo o loo feagai ma na fesili. Pe atonu foi latou te tau mafaufau e uiga i savali na latou faalogo ai i le lalolagi e faatatau i le itupa.

Afai e o mai tagata ia te oe e saili se fautuaga e uiga i mataupu e faatatau i itupa, saili ma le agaga tatalo le taitaiga a le Agaga. Fesoasoani ia i latou i a latou fesili mai le vaaiga o upumoni e faavavau o le fuafuaga a le Tama Faalelagi mo Ana fanau. O le faalogologo ma le alofa ma le agalelei, fesoasoani ia i latou ia faalagolago i le Faaola mo le malamalama ma le malosiaga faaleagaga.

A o e saili ia malamalama ma fesoasoani i nei tagata, ia nofouta i le tulaga manaomia e lagolago ai le aiga ma faaaoga ia punaoa o loo maua. Tagai i le “Transgender: Supporting Others” i le Life Help in the Gospel Library.

Manatua: O le itupa e le tutusa ma le uiga tumau faalefeusuai. O nisi tagata ua manatu ifo ua faafoliga i latou lava i le isi itupa, latou te le tosina i le itupa e tasi. E faapena foi, o i latou e i ai uiga o le tosina atu i le itupa e tasi, latou te le fesiligia lo latou itupa. Mo se fesoasoani i talatalanoaga e uiga i uiga tumau faalefeusuai, tagai i le “Tosinaga i le Itupa e Tasi” i le Punaoa Faufautua.

Upumoni e Faavavau

O i tatou o atalii ma afafine faapelepele a ni matua faalelagi—o lo tatou faasinomaga sili lea ona taua.

Sa tatou ola faatasi ma le Atua ae tatou te le’i fananau mai. I le avea ai ma Ana fanau, ua ia i tatou le gafatia e avea ai e faapei o Ia.

O lo tatou faasinomaga o se atalii/afafine o le Atua o lo tatou faamuamua aupito maualuga.

Tagai foi ia Russell M. Nelson, “Filifiliga mo le Faavavau” (faigalotu i le lalolagi atoa mo le autalavou matutua, 15 Me, 2022), Gospel Library; aemaise le vaega ua faaulutalaina “Muamua, ia iloa le upumoni e uiga i lou faasinomaga.”

O o tatou tino tane ma fafine na faia i le faatusa o le Atua.

O eseesega o afafine o le Tama Faalelagi ma Ona atalii e taua i Lana fuafuaga e faavavau. O na eseesega e mafai ai ona tatou foafoaina le ola, faapea foi ma aiga fiafia, e faavavau. Ona o lenei mafuaaga, ua Ia poloaiina ai ia tatou taulimaina o tatou tino ma le mana o le foafoaga o ni meaalofa paia e ala i le usitai i le tulafono o le ola mama.

Tagai foi Kenese 1:27; 1 Korinito 11:11.

E tofu i tatou ma se tino ma se agaga, ma ua mamanuina o tatou tino e faapei o o tatou agaga.

“O le tulaga tane po o le fafine [o le tagata] o se vaega taua lea o le mua’i olaga, olaga faitino, ma le faasinomaga e faavavau ma le faamoemoega” (“O Le Aiga: O Se Folafolaga i le Lalolagi”).

O le uiga o le upu itupa i le folafolaga i le aiga o le “itupa moni na fanau mai ai.”

O nisi tagata e lagonaina faapea o lo latou faasinomaga faaleitupa (o o latou lagona i totonu) ma o lo latou itupa moni e le fetaui. O na lagona e le o se agasala, e ui e mafai ona faafatu’ulu ia i latou e oo i ai.

Na aoao mai Peresitene Dallin H. Oaks e faapea, o le fenumia’i e uiga i le faasinomaga faaleitupa “e mafai ona eseese ituaiga e alia’e mai ai i taimi eseese i le olaga o se tagata.” O i latou e i ai ni fesili e tatau “ona umi se vaai i ai ma saili ia faalagolago ma galulue i luga o mataupu faavae o le faavavau” (“Tu mo le Upumoni” [faigalotu mo talavou matutua i le lalolagi atoa, Me 21, 2023], newsroom.ChurchofJesusChrist.org). E le tatau ona latou faatagaina Satani e faaaoga le fenumia’i e uiga i le itupa e aveesea ai i latou mai le Faaola pe tuumaualaloina ai lo latou faatuatua i le fuafuaga a le Tama Faalelagi mo lo latou fiafia e faavavau.

E mafai ona maua le toafilemu o le mafaufau, malosiaga faaleagaga, ma se vaaiga e faavavau ia Iesu Keriso, Lana talalelei, ma Lana Ekalesia, tusa lava pe i ai ni fesili e le mafai ona taliina atoatoa i lenei olaga.

“Afai o oe, o se tasi o lou aiga, po o se uo o loo tauivi ma nei faafitauli o le fenumia’i i le faasinomaga, ou te uuna’ia oe e faaaoga tulafono uma ia e lua o le talalelei ma le alofa ma le alofa mutimutivale o lo tatou Faaola ma le Togiola, lea o le a fesoasoani ma taiala oe pe afai e te savali ma le onosai i Ona ala. Ua aoao mai … e Iesu Keriso i tatou le ala e manaomia ona tatou mulimuli ai ia iloa ia faamanuiaga aupito silisili a lo tatou Tama Faalelagi. … E alofa o Ia ia i tatou ma o le a taialaina i tatou a o tatou saili e mulimuli i le mea Na Te taitai tatou i ai”(Dallin H. Oaks, “Tu mo le Upumoni”).

Tagai foi i le Eteru 3:16; Mataupu Faavae ma Feagaiga 77:2; 88:15.

E alofa le Atua i Ana fanau uma, ma e agavaa tagata uma mo le alofa ma le faaaloalo.

O tagata e i ai fesili e uiga i o latou lagona e faatatau i le itupa, e tele ina taumanatunatu e uiga i o latou sootaga ma le Alii po o lo latou nofoaga i Lana Ekalesia. E ui ina tatou “le iloa le uiga o mea uma,” e mafai ona tatou faatuatuaina le Atua ma “iloa e alofa o ia i ana fanau” (1 Nifae 11:17).

E talileleia tagata uma i le ekalesia. E ui i o tatou lagona e uiga i le itupa, tatou te manaomia uma ni uo lelei o ni faataitaiga o le alofa faaKeriso. Ua uma ona aoaoina i tatou i mea nei e uiga i le alolofa i fanau uma a le Atua:

“Soo se tasi e le taulimaina tagata o e feagai ma lu’itau o le faasinomaga tau itupa ma le alofa ma le faaaloalo, e le o ogatusa ma aoaoga o le poloaiga sili muamua ma le lua. O lea, e faatatau i le mataupu o le tulafono a le Atua, e manaomia ona tatou manatua ua faafia ona faaali mai e le Atua na Ia foafoaina le tane ma le fafine. Ma e faatatau i le mataupu i lo tatou tiute e alolofa i o tatou tuaoi, e ao ona tatou manatua ua poloaiina i tatou e le Atua e alolofa atu e oo lava ia i latou e le tausia poloaiga uma. …

“… Ia manatua po o a lava o tatou lava tulaga i eseesega o foafoaga a lo tatou Tama o i le Lagi, e alofa lava o Ia ia i tatou uma, ma o loo i ai se nofoaga o Lana fuafuaga atoatoa o le fiafia mo tagata uma. Tatou te faaalia lo tatou alolofa mo Ia e ala i le tausia o Ana poloaiga, e aofia ai ma le alolofa mo Ana fanau” (Dallin H. Oaks, “Tu mo le Upumoni”).