Faifeautalai ua Toe Vave Foi Mai i le Fale

4:29

O faifeautalai ua toe foi mai pe maea vave mai a latou misiona nai lo le mea sa faamoemoe iai e ono i ai ni aafiaga ma ni luitau tulaga ese. A o latou sauniuni mo a latou misiona ma tuuvaa atu e auauna atu, atonu sa faatumulia i latou i ni faamoemoega maoae ma se manao e auauna atu i le Alii. Pe a latou toe foi vave mai i le fale ona o soo se mafuaaga, (mo se faataitaiga, o faafitauli i le soifua maloloina faaletino pe faalemafaufau, po o solitulafono), atonu latou te lagona le le fiafia, maasiasi, po o le lotovaivai. Atonu latou te fesiligia le musumusuga lea na taitaia ai i latou e auauna atu i se misiona. Atonu e popole nei faifeautalai ua toe taliu mai i auala o le a manatu ai isi tagata ia i latou po o se silafaga foi o le Alii ia i latou. Atonu latou te lagonaina le pei ua latou toilalo pe ua le agavaa ma atonu e le lelei ai ona latou faamasinoina i latou lava. Atonu foi e i ai ni o latou lagona o le aveesea [o se mea taua] ma e ono uia ai ni laasaga eseese o le faavauvau.

O faifeautalai o e toe foi vave mai i le fale, e manaomia ia taumafaiga faifaatasi a aiga, uo, taitai, ma tagata o le uarota e fesoasoani ai ia i latou i lenei taimi faigata. Ia aapa atu i le alofa e faamafanafana, faamalosiau, ma agalelei i ia faifeautalai taitoatasi ua toe taliu mai faapea foi ma lona aiga. Faamalosiau i le faifeautalai, lona aiga, ma tagata o le uarota e tau o ia o se “faifeautalai ua toe taliu mai” ae le o se “vave toe foi mai” po o le “faifeautalai ua vave faamalolo”. O lenei filifiliga o faaupuga e mafai ona fesoasoani e tuuitiitia ai le faalumaina lea e o mai faatasi ma vave faamalologa.

Saili ina ia Malamalama

A o e talanoa ai ma tagata, faamautinoa e faaali atu le alofa ma le malamalama faapei ona faia e le Faaola. Ona e eseese ia tulaga uma, ma e eseese foi tulaga o tagata taitoatasi, ia mafaufau ma le agaga tatalo e fai atu fesili faapenei e fesoasoani e te malamalama lelei ai i atugaluga o le faifeautalai ma iloatino ai ona manaoga.

O le a sou lagona e uiga i lau misiona?
O a faamanuiaga na e maua mai i lau auaunaga?
O a ni ou atugaluga po o popolega sili ona tetele o i ai i le taimi nei?
O le a sou lagona e uiga i lou faamalologa?
O faapefea le tali atu a lou aiga i lou faamalologa?
O a ni au fuafuaga mo le talanoaina o luitau na ala ai ona aumai oe i le fale?
O a ni alagā lagolago o loo e maua?
E mafai faapefea e lesona ua e aoaoina i lau misiona ona faamalosia oe i lenei taimi o suiga?
O faapefea mai lou va ma le Alii i le taimi nei?

Fesoasoani i le Tagata

A o e fesoasoani atu i le faifeautalai ua taliu mai i lona tulaga, mafaufau e faaaoga nisi o fautuaga nei:

Afai e fesoasoani, ia feiloai soo ma le faifeautalai ua taliu mai e fesoasoani ia te ia ia maua le faamoemoe ma le faamalologa (healing).

Fesoasoani i le faifeautalai ia malamalama i le mana o le Faaola ina ia fesoasoani ia te ia i soo se luitau o loo feagai ai (tagai i le Alema 7:11–12; MF&F 88:6; Mosaea 24:13–15).
Fesoasoani i le faifeautalai ia iloa lona faasinomaga ma lona taua o se atalii/afafine o le Atua ma iloa ona malosiaga patino, taleni, tomai, ma meaalofa faaleagaga (tagai i le MF&F 18:10–11; Galuega 17:28–29).
Uunaia le faifeautalai e saili mo se faamanuiaga faaleperisitua.
Afai na toe foi mai i le fale le faifeautalai ona o se tulaga i le soifua maloloina faaletino pe faalemafaufau, fesoasoani ia ona vave maua togafitiga talafeagai.

Fesoasoani i le faifeautalai ia malamalama e faataua ma talia e le Alii le auaunaga sa ia tuuina atu o se faifeautalai, e aofia ai le sa ia taliaina le valaau e auauna atu (tagai i le MF&F 124:49).

Faailoa atu le agaga faafetai mo le auaunaga na tuuina atu e le tagata i le avea ai ma se faifeautalai.
Afai na faamalolo le faifeautalai ua toe taliu mai ona o se tulaga i le soifua maloloina faaletino pe faalemafaufau, e mafai e le epikopo ona ta’u atu ia te ia e lipoti atu i le aufono a fautua maualuga a le siteki.
Saili ala e fesoasoani ai ia te ia ina ia lagona le talisapaia i le toe foi mai i le uarota pe faasoa atu aafiaga e uiga i le misiona. Afai e tatau ai, fai i le faifeautalai pe manao na te faia se tatalo, faasoa atu lana molimau, pe lauga i se sauniga lotu.
Fesoasoani i le faifeautalai ia malamalama o le a ia maua ni avanoa se tele e auauna atu ai i le galuega a le Alii, e tusa lava pe na te le toe faia se pine o le igoa o le faifeautalai.

Ia faamamafa atu, o le mea e ave i ai le faamuamua a le faifeautalai ua toe taliu mai o le faamalologa (healing), ma o faaiuga e uiga i le toe foi atu i le galuega faafaifeautalai e tatau ona [faia] mulimuli ane.

Aua le faamalosia faatauanau le faifeautalai e toe foi atu i le galuega faamisiona. O lenei faaiuga e mafai ona oo mai i le mavae ai o le toe faaleleia atoa mai luitau ia na aumai ai o ia i le fale.
Mo i latou e mananao e toe foi atu i le auaunaga faafaifeautalai po o le saili o isi avanoa e auauna atu ai, tagai i le tusiga “Toe Foi Atu i le Galuega.”

Uunaia le faifeautalai ia fesootai pea ma lona peresitene o le misiona ma le faletua a o iai o ia i lenei taimi o fesuiaiga.

Afai e le toe foi atu le faifeautalai i le auaunaga faamisiona, saili e tuuina atu le lagolagosua ma le amana‘ia. A o amata ona faatutu e le faifeautalai ua toe taliu mai ni sini mo lona lumanai, ia fautua atu i mea e pei o le:

Aoaoga
Galuega
Mafutaga (tafaoga faamasani)
Avanoa e auauna atu ai
Auai i le Inisitiuti
Auai i le malumalu ma le agavaa

Mo le epikopo: Afai e siitia ese pe sui le uarota a le faifeautalai ae lei leva ona toe taliu mai, ia fesootai ma le epikopo fou ma ia mautinoa ua nofouta o ia i le tulaga o le faifeautalai ua toe taliu mai.

Afai na toe foi mai i le fale le faifeautalai ona o faafitauli tau i le agavaa, fesoasoani ia te ia i le faagasologa o le salamo (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai [2020], mataupu 32).
Afai na faamalolo le faifeautalai ua toe taliu mai ona o se tulaga i le soifua maloloina faaletino pe faalemafaufau, ia ta’u atu ia te ia e lipoti atu i le aufono a fautuamaualuga a le siteki.

Lagolago i le Aiga

O le aafiaga a le faifeautalai ua taliu mai, o le toe foi vave mai i le fale, e aafia ai olaga o tagata o lona aiga. Faamautu le aafiaga i luga o tagata o le aiga, ma saili e talanoaina na faafitauli.

Ia fautua atu ma fesoasoani i tagata o le aiga i o latou lava tauiviga, atugaluga, po o fesili ia e mafua i le toe foi vave mai o le faifeautalai.

Fesoasoani i tagata o le aiga ia malamalama i le auala e mafai ai e le Faaola ona faamalolo, aumai le toafilemu , ma faamafanafana i latou ma le faifeautalai ua toe taliu mai.

Uunaia le aiga e fefautuaai faatasi e uiga i manaoga o le faifeautalai ua toe taliu mai ma punaoa o loo avanoa e fesoasoani ai ia te ia.

Fesoasoani i tagata o le aiga ia taulai atu o latou atugaluga i le faifeautalai ma lona faamalologa (healing) nai lo o le, pe o faapeī le vaai a isi tagata i le tulaga.
Fesoasoani i matua o le faifeautalai ia malamalama, o le toe foi vave mai o le la atalii po o le afafine, e le faapea ua i ai se mea sese na la faia o ni matua.
Fesoasoani i matua ia malamalama e le tatau ona laua tauia pe tuuaia i laua lava po o isi i le toe foi vave mai o le faifeautalai.

Taofi tagata o le aiga mai le uunaia faamalosi o le faifeautalai ia toe foi i le galuega faafaifeautalai ae e lei sauni o ia pe e le o manao foi le faifeautalai e toe foi atu.

Faaaoga Punaoa a le Uarota ma le Siteki

Mafaufau e galulue faatasi ma taitai o uarota, po o isi tagata faatuatuaina e tuuina atu le lagolago, taitaiga, ma le fesoasoani faifaipea. Talosaga le faatagaga a le tagata ao lei talanoa i isi e uiga i le mataupu.

Atonu e mafai e taitai ona mafaufau e talanoaina le tulaga o le faifeautalai ua taliu mai i totonu o le aufono a le uarota e faailoa ai ni punaoa ma avanoa e fesoasoani ai ia te ia.

Saili ni auala mo taitai o le Ekalesia e faatino ai le auauna atu ma le lagolagoina o le faifeautalai ua taliu mai ma lona aiga i lenei taimi faigata.

Uunaia le faifeautalai ia faailoa se tagata e faatuatuaina e avea ma se faufautua mo ia, ma uunaia i la’ua ina ia la fono e le aunoa.

E mafai ona avea le faufautua o se uso po o se tuafafine o auaunaga a le faifeautalai.
Mafaufau e filifili se isi faifeautalai ua taliu mai e i ai se aafiaga talitutusa faapea, o le ua ia maua le faamoemoe ma le malosi e ala i le Faaola o Iesu Keriso ma Lana talalelei.

Ia faaaofia le faifeautalai i valaauga ma avanoa e auauna atu ai, ma lauga i tulaga talafeagai pe a ua saunia o ia e fai lena mea.

Pe a talafeagai ai, mafaufau i fesoasoaniga faaopoopo mai le punaoa a le Ekalesia ma punaoa i le lotoifale ia e ogatasi ma mataupu faavae o le talalelei.

I nisi o vaega, e tuuina atu ai e Auaunaga mo Aiga o le AAG ni auaunaga o faatalatalanoaga mo taitai o le Ekalesia ma vasega faufautua mo faifeautalai o e ua toe foi vave mai i le aiga.
Afai e le o i ai se Auaunaga mo Aiga o le AAG, mafaufau i punaoa faaopoopo i le lotoifale.