Toe Foi Vave i le Fale Mai La‘u Misiona
E alala le tusitala i Iuta ISA.
Sa ou le iloaina ina ua ou ulu atu i le nofoaga autu mo le aoaoina o faifeautalai faapea o la‘u misiona o le a matuai ese lava mai mea na ou faamoemoeina.
Ata na saunia e Massonstock/iStock/Thinkstock
O le mauaina o lo‘u valaauga o le misiona o se tasi o taimi sili ona loloto ma le mamalu o lo’u olaga. Sa ou mafaufau e uiga i se misiona i le tele o taimi talu ona ou mauaina se molimau o le talalelei i le 18 tausaga. Ou te manatua ina ua ou maua lo‘u valaauga e auauna atu i le Misiona a Taiuani Taichung, sa ou iloa ai ua sa’o, ma sa ou matuai fiafia lava e auauna atu.
Sa ou faitau au tusitusiga paia i aso taitasi, auai i au vasega faasauniuni a faifeautalai ma le malumalu, ma e oo lava i le taumafai e aoao le faa-Saina Meniterini e au lava ia. I le avea ai ma se tamaitiiti e toatasi i lo‘u aiga, sa ou iloa o la’u misiona o le a aumaia le mamalu e le gata ia te au lava, ae faapea foi i o‘u matua ma lo’u Tama Faalelagi. O le aso na ou ulufale atu ai i le nofoaga autu mo le aoaoina o faifeautalai (NAF), sa ou lagonaina e pei e leai se mea e mafai ona sese i le 18 masina e sosoo ai. Sa ou fiafia lava e uiga i mea uma mai le vaai i papatisoga i le faataitaia o le kukaina o meaai Taiuani sa ou faalogo soo i ai. Sa ou le iloaina ina ua ou ulu atu i le NAF o la‘u misiona o le a matuai ese lava mai le mea na ou faamoemoeina.
Mauaina i le Ma‘i
E tusa ma le fa masina i totonu o la‘u misiona, sa amata ona ou lagonaina le tiga—e le gata i le taimi o gaoioiga faaletino e pei o le tietie i la’u uila po o faamalositino o le taeao ae faapena foi pe a ou moe po o le faia o suesuega faaletagata lava ia. Sa vave lava ona amata ona ou paee. E oo lava i le inuina o vaiinu na ou ma‘i ai. O suesuega a fomai na le mafai ona faailoa ai le mea na faaletonu. Sa leai ni siama ninii po o ni vairasi. O lau peresitene o le misiona, o la‘u soa faifeautalai, ma au foi sa le mautonu i lo’u ola maloloina ua faaletonu.
I le masina na sosoo ai, sa tumau pea lou faatuatua lea na faateia ai foi au lava ia. E ui lava sa ou lagonaina lo‘u lotovaivai, sa ou talitonu, afai ou te galue malosi pea, tietie uila ia saoasaoa atu, e oo lava i le tautala atu i lau Faasaina panupanu i tagata uma sa ou vaaia, o le a faamaloloina faavavega au e le Atua. Sa ou talitonu i tala ia Keriso na faamaloloina ma‘i ma faatutu e ua maliliu, ma na ou talitonu ma le loto atoa o le a Ia faia lea lava mea mo au—o se faifeautalai vaivai ae naunautai. Ona oo lea i se tasi aso Sa ao ma tietie uila ma la‘u soa i le falelotu o le Ekalesia e feiloai ma se tagata sailiili, na le mafai ona tatalia le tiga ma le tetete o lo’u tino atoa. Ina ua ma taunuu i le falelotu, sa ou fesili atu i alii faifeautalai e tuuina mai ia te au se faamanuiaga, lea sa fesoasoani. A o mavae atu aso, na faateleina faamanuiaga faaleperisitua ma sa faapena foi tatalo mo le faamalologa.
O le aso sili ona pogisa o la‘u misiona ina ua ou ala ae i se tasi taeao i le vevela matautia o Taiuani ma iloa ai ua le mafai ona toe minoi lo’u tino e mafai ai ona aluese mai le moega. I lena taimi, sa ou iloa ai o le a le mafai ona toe avea au ma se faifeautalai. Na oo mai lo‘u peresitene o le misiona e asiasi mai ia te au, ma na ma fefautuaai faatasi. Na ma talanoa i avanoa uma, ma ina ua mavae le tele o tatalo ma loimata e tele, na faamautu e le Agaga ua tatau ona ou toe foi atu i le fale ma taulai atu i le faamaloloina.
Toe Foi Vave i le Fale
Nai lo le foi mai i le fale i paluni ma faailoga o le “Afio Mai i le Aiga”, sa tuleiese atu au mai le vaalele i ou matua fefefe, o e sa faavave lava ona aveina atu au i le potu o faalavelave faafuasei a le falemai. Sa amata ni masina o suesuega, ae na le mafai e fomai ona mauaina le mea na faaletonu ia te au. E le gata i lea, o tagata alolofa na siomia au na fai mai ni mea e pei o, “O afea e te toe foi ai?” “Pe o le a e nofo i le fale?” “Atonu sa tatau ona e faaipoipo.” “Atonu na e sese i lou alu.”
Sa ou lagona le maasiasi ma le le mautonu. Pe sa ou agavaa mo le alofa o le Atua? Aisea na tupu ai lenei mea ae na ou auauna atu ma le filiga? Pe sa le o au ea o se faifeautalai lelei? Pe na faafofoga mai le Atua ia te au? Pe o le a taliaina e au uo la‘u auaunaga faafaifeautalai “pona”?
I le isi ono masina, sa ou tauivi ma la‘u molimau, lea sa ou lagonaina ai le tausalaina. Sa ou mafaufau pe na ou toilalo mai le alofa tunoa, ma pe alofa moni lava le Tama Faalelagi ia te au. E ui lava ina amata ona ou lagonaina si feoloolo teisi atu, ou te lei lagonaina le lagona na i ai a o lei amataina la‘u misiona. Sa ou aloese mai le agai i luma i lo‘u olaga.
Ona oo lea i se tasi afiafi sa ma talanoa ma la‘u uo lelei. Sa ia oo foi i le tiga ma le faanoanoa o le toe foi vave mai lana misiona ona o le ma‘i ma sa galue agai atu i le toe foi atu i le galuega faamisiona. Ou te manatua o lena po o le taimi muamua i le ono masina sa ou lagonaina le filemu moni. Sa musumusu mai le leo o le Agaga ia te au, “E tatau ona e toe foi atu.” Sa ou matuai faafetai lava ina ua iu lava ina iloa le itu e agai i ai. Sa ou alu e vaai lou epikopo i le aso na sosoo ai. Ona ou tusia lea o se tusi faatauanau i le Matagaluega a Faifeautalai e fesili atu pe mafai ona ou toe foi atu i le galuega faamisiona. Sa taliaina la‘u talosaga, ma e tasi le masina mulimuli ane, sa ou toe tuiina lau pine o lo’u igoa.
E ono masina mulimuli ane, e ui i lea, sa amata ona ou toe lagonaina faafitauli lava ia o le soifua maloloina. Na ou manatua lou taoto ai i se moega i le falemai, ua oso faama‘i malosi mai itula o suesuega ma tui. Sa ou le talitonu ua tupu lenei mea. O le taimi lea sa ou iloa ai o la‘u misiona ua maea. Faatasi ai ma loimata o le le fiafia ma le le faamalieina na tafe ifo i o‘u foliga, sa ou faalogo i lo’u peresitene atamai o le misiona ua faapea mai: “Sister Romanello, e faalua ni taimi na e alofa ai i le Alii, aua sa e toe foi mai.” Sa ou lagonaina se faamafanafanaga tele mai ana upu. O le taimi lea a o ou ulufale atu i le vaalele i le fale, sa ou folafola atu i lo‘u Tama Faalelagi o le a ou tumau i le faatuatua e tusa lava pe ou te lei mauaina ni tali.
Mauaina o le Faamalologa i le Togiola a Keriso
O lenei ua silia teisi ma le lua tausaga talu ona ou toe foi mai i le fale. O loo i ai pea ni faafitauli tumau, ma o lo‘u tumau ma le malosi e le’i toe tutusa lava talu mai le taimi ae ou te lei auauna atu i la‘u misiona. E lei mauaina lava e fomai po o le a le faaletonu ia te au. E lei faigofie ia te au le avea ma se faifeautalai ua maea le misiona e lei maua le avanoa e auauna atu ai i le taimi atoa o la‘u misiona. E ui i lea, ou te alofa pea ia i latou uma taitoatasi o au tagata liliu mai matagofie. Na alu se taimi faatoa ou lagona le faamaoniaina ma iloa o la‘u auaunaga faafaifeautalai faapuupuu e i ai sona taua e pei lava o le taua i misiona e 18 po o le 24-masina i isi faifeautalai.
Ua tuuina mai ia te au e le Alii le tele o avanoa e talanoa atu ai i isi na feagai ma le tiga o le toe foi mai i le fale faafuasei. Ou te iloa ua taitaiina atu au e le Tama Faalelagi ia i latou e faasoa atu la‘u molimau ma fesoasoani ia i latou ia iloa o le toe foi vave mai i le fale ona o faafitauli o le soifua maloloina e le o se faaletonu ia nana faalilolilo ae o se aafiaga e talanoaina.
O le taimi muamua sa ou toe foi mai ai i le fale, sa ou oo i le lagona o le le amanaiaina o lo‘u faatuatua, ae o le taimi lona lua na ou toe foi mai ai, sa ou oo i le lagona e maua pe a tumau faamaoni. Sa ou tumau i mea autu: suesue i tusitusiga paia, auai i le inisitituti, auai i le lotu, ma le faataunuuina o o‘u valaauga. Sa ou tatalo i le tele o taimi ia iloa pe aisea na tutupu ai nei mea uma faapea. Sa ou taofia le tuuaia o au lava ia, ma sa ou taofia le tuuaia o le Tama Faalelagi. A o ou vaai atu i lo‘u olaga talu le toe foi mai le fale ma a’u asiasiga i ou tuagane ma uso Saina e nonofo i lou lava aai, ou te faatumauina le tulaga mausali faapea e i ai se faamoemoega e faavavau o mea uma.
Ou te fiafia i upu i le Mosaea 5:15: “O lea, ou te manao ai ia outou tutumau ma lē masiʼiʼese, ma tumu e lē aunoa i galuega lelei, ina ia mafai ona faamauina outou e Keriso, le Alii le Atua Mamana Aoao, e fai mona, ina ia mafai ona aumai outou i le lagi, ina ia mafai ona outou maua le olataga tumau-faavavau ma le ola e faavavau, e ala i le poto, ma le mana, ma le faamasinotonu, ma le alofa mutimutivale o ia o lē na foafoaina mea uma, i le lagi ma le lalolagi, o lē o le Atua o mea uma.”
Ou te talitonu afai ou te faaauau pea ona ola i lo‘u olaga i le faapaiaina i le Alii, o le a faavavau pea ona faamanuiaina au. I lena auala, ou te iloa sa faamaloloina au e ala i le Togiola a Iesu Keriso, aua e ui lava o lo‘u tino o le a le mafai ona 100 pasene le faamaloloina faaletino, o lo’u loto sa lei sili atu lava ona atoatoa po o le saunia e auauna atu i le galuega a le Matai.