O Leo o Le Au Paia o Aso e Gata Ai
O Manoa o le Taulaga
Candice A. Grover, Idaho, ISA
Ata na tusia e Allen Garns
I se tasi Kerisimasi i tausaga ua mavae, sa tele lava mea i lo‘u mafaufau e fiafia ai i le vaitau. Na maua lou toalua, o Andy, i se tale lea, i le mulimuli ai i suesuega faafomai, na vave ona faateteleina i le faaleagaina o māmā, taotoga, o le toelipeaina o lona faai, ma le aveeseina o ni vaega mo le suesueina—“mo le saogalemu.” O lona taotoga sa faia i le vaiaso ae matou te lei masii atu i se fale fou.
I ni nai vaiaso ao lumanai le Kerisimasi, sa ou asiasi atu i lou tuaoi o Janae. Sa fesili mai pe ua ou saunia mo le Kerisimasi. Sa mafai lava ona ou tali atu i ai sa ou saunia e pei ona tatau ai. Sa ou taua ai sa masani ona matou faia ni kuki o le Kerisimasi faatasi ma lou tinamatua ao lumanai le kerisimasi, ma sa ou manao e fai ni talieleele mo teineiti ae masalo o le a le mafaia.
I se vaiaso mulimuli ane, sa ou nofo ae i le nofoa ua tumu i talaane o la matou laau Kerisimasi. Sa momoe teineiti, ma na galue Andy i lona ofisa ae ou faalogoina le logo o le faitotoa. Sa ou tatalaina le faitotoa ma vaaia ai Janae i lo‘u faasitepu, o uuina ni afifi se tolu a o toulu ifo le kiona i ona tua atu.
“Sau i totonu,” sa ou fai atu ai, ma le mautinoa sa ia mafai ona lagona lou tei.
“Faafetai, ae e tatau ona ou toe foi,” o lana tala lea. “O nei mea e mo au teineiti.”
Sa tuu mai e Janae ia te au afifi.
“O ni talieleele,” o lana tala lea. “E le o mea sili ia, ae sa mafai ona ou faaumaina i le po nei.”
I se taimi o le lotomaulalo o le ofo tele, sa ou manava atu se faafetai. Sa ma feopoai, ma sa ou vaai atu ia te ia ua toe foi atu i lona ala i le fale.
A o ou toe nofo i lou nofoa, sa ou tatalaina ma le faaeteete le lipine satini paepae o le pusa e tasi. I le tatalaina, sa ou maua ai se talieleele faatoa sui i le fale e gaosi mai ie o le Kerisimasi. Sa ou faasolo se afega i le va o lo’u limamatua ma le limatusi a o ou mafaufau e uiga ia Janae. Sa i ai sana fanau laiti e toafa, e aofia ai le masaga faatoa atoa o la tausaga. Sa ia aoaoina atu le piano, ma sa ia te ia se tofiga pisi ma le taua i le matou uarota.
Sa ou taumafai e mafaufau po o le a se taimi o le a ia maua e fai ai talieleele, ma sa ou iloaina i le taimi lava lena sa leai sona taimi. Sa ia faaavanoa le taimi.
Na tafe ifo loimata a o ou lagonaina le alofa o le Tama Faalelagi na tuuina mai e ala mai ia Janae—se fuataga o le mafanafana ma le lagolelei a o siomia ai au “i lima o [Lona] alofa” (MF&F 6:20).
Ua tele tausaga talu ai ona matou mauaina talieleele. Ua leva ona le ofi i lau fanau teine, ae ou te teuina i lau umukuka, ma tautau i o latou manoa mai se matau ua faafouina i lalo o mea fou. O taimi uma lava ou te vaai ai i meaalofa a Janae, e faamanatu mai ai ia te au le mafanafana ma le alofa sa ou lagonaina i lena po. Latou te faamanatu mai ia te au le mea ou te manao ia avea ai—se soo o Iesu Keriso e agavaa mo faaaliga ma naunau e auauna atu.